[ 轉載自 Ungoo抵死粵語網《佛山話速成班》，作者 Highyun ]

         睇電視電影，通常講幾句鄉下話，例如臺山話、潮州話，又或者係佛山話（順德話），都可以起到諧趣效果。作為廣府人，我做咗呢個Ungoo粵語網站研究廣府話，作為佛山人，我都好應該喺度探討吓佛山話。由於佛山話又可以細分為老城區話、石灣話、南海話、順德話等等，每種話都有各自特點，所以喺度主要參考老城區話，從聲母、韻母、聲調以及習語四方面與廣州話嘅分別總結佛山話嘅大致發音特點。

聲母 t —> h
         佛山話聲母嘅最大特點就係冇聲母t，廣州話以t為聲母嘅字，喺佛山話一律以h代替。例如：“天天見面”講成“牽牽見面”、“通殺”講成“兇殺”。更有頑固人士，將呢個規律應用到普通話上，因此“普通話”變成“普哄話”，“太陽”變成“害陽”。

         佛山話嘅發音同廣州話相比，除咗呢個顯著分別，另外重有個別字嘅聲母有變化，不過好難總結成規律。例如[佢]keoi5字，佛山話大多將其讀成heoi5；[瞓]fan3字讀成han3。

韻母
     1、i[*衣] —> y[*於]
         而家唔少人為咗開玩笑，都將“咩事”將成“咩樹”，其實呢個讀音就係來源於佛山話。喺佛山話裏面，韻母i[*衣]通常都讀成y[*於]，例如[寶芝林]變成[寶豬林]，[廁所]變成[處所]，[絲]變成[輸]，所以佛山人叫“絲瓜”做“勝瓜”，因為“輸輸”聲唔好“輕（聽）”。更有甚者將此規律應用到普通話甚至英語上面，我以前個化學“老書”用普通話同我哋講解“原子”、“分子”嘅時候，就講成“原組”、“分組”；電腦城個電腦仔更加搞笑，上次幫我部電腦重裝系統，話要格式化個“輸盤”，其實係話格式化個C盤。
     2、aau[*教] —> eu（類似英文tell單詞韻母部分發音）
         某一部分字有呢種情況出現，例如[搞]讀成geu2，“瞓覺”讀成han3 geu3，但係呢個規律唔可以亂用於所有包含aau韻音嘅字上面，因為有好多字係唔允許噉發音嘅。

聲調 第四聲－>第一聲高降調
         佛山話嘅聲調規律祇得一個，亦唔會有其它特別情況，所以講起上嚟比較簡單。佛山話冇第四聲（陽平聲），凡係廣州話第四聲嘅字一律轉調為第一聲嘅高降調。粵語第一聲可以分為高平調同高降調，舉個例，“村莊”個[村]讀高平調，“思想”個[思]讀高降調，關於高降調嘅更詳細說明可以參考《當今粵語懶音現象大觀》嘅聲調部分。
         雖然佛山話聲調祇有一個規律，但係聲調嘅變化係最難掌握嘅，好多貪過癮想學佛山話嘅人往往就係掌握唔到聲調嘅控制，該變調嘅亂變，唔該變調嘅都變埋。

         石灣話比老城區話口音更濃，比廣州話變化更加大 。例如[眼]講成en5，[煙]講成en1，三個代詞[我]、[你]、[佢]讀成oi5、li5、ky5。為咗加深大家對佛山話嘅印象，下面送首用佛山話（石灣話）唱出嚟嘅歌仔畀大家：
         石灣[wen1]石灣[wen1]好多煙[en1]
         煙[en1]親我[oi5]隻眼[en5]
         醫來[loi1]醫去都醫唔[m1]返[fen1]
         我[oi5]以後都唔[m1]去石灣[wen1]
         上面首咁抵死嘅歌仔用石灣話唱出嚟，原來係押韻嘅！

習慣用語
         此外，佛山話重有一部分習慣用於唔同于正宗廣州話，例如：
         嗰—>佬：嗰個—>佬個，嗰便—>佬便，嗰日—>佬日
         喺度—>喺蓋：阿哥喺唔喺度呀？—>阿哥喺唔喺蓋呀？
         返屋企—>去歸：返屋企食飯—>去歸食飯
         未—>命：佛山話“未曾”講得快，就變成[命]音，因此，“食飯未”就變成“食飯命”
         叫—>eu：叫你你又唔應—>eu你又唔應
         咗—>heu：做咗功課未？做咗。—>做heu功課命？做heu。
         頭先、正話—>就間、舊間：頭先重喺度。—>就間重喺蓋（喺處）。
         完—>罷：食完飯。—>食罷飯。
         滿—>leon5：裝滿碗飯佢。—>裝leon5碗飯heoi5。
         冇—>名meng2有：我冇去睇電影。—>我meng2有去喺電影。
         （關於呢個讀音我個死黨同我講過一個笑話：佢上次去三水負責啲包工頭報名考試，一個工頭交申請表嘅時候，我朋友叫佢檢查多次，但佢不斷講“名有錯”。我朋友睇咗佢個名好耐都搵唔到有錯，諗咗好耐先醒起原來個工頭係講緊“冇錯”。）
         細蚊仔—>嫩蚊仔

         由於本人接觸面有限，僅能總結以上幾個，希望各位佛山嘅老鄉提供更多例子。

Copyright © Highyun 版權歸Highyun所有，任何轉載需經Highyun本人同意，侵犯版權者等於得罪全佛山嘅人