喺廣東長大嘅細路仔，我諗個個都識唱幾句廣東童謠，例如最經典嘅《落雨大》，此外重有《月光光》、《氹氹轉》、《點蟲蟲》、《洗白白》、《有隻雀仔跌落水》、《鷄公仔》等，另外有啲比較唔係咁出名嘅有《鼻涕蟲》、《又喊又笑》等。另外有啲童謠喺唔同地區又有唔同版本，就算同一個地區都有幾個版本。以下介紹一啲較有參考價値嘅畀大家重溫。

《落雨大》——選自《俗話廣州》/曾應楓 著　廣州出版社，2000.8
　　落雨大，水浸街，阿哥擔柴上街賣，阿嫂教我做花鞋；花鞋做埋花腳帶，珍珠蝴蝶兩邊排，排排都有十二粒，粒粒圓滑無疵瘕。

《月光光》——由方言研究學者Gary提供
　　月光光，照地堂，年卅晚，摘檳榔，檳榔香，摘子姜，子姜辣，買芙薘，芙薘苦，買豬肚，豬肚肥，買牛皮，牛皮薄，買菱角，菱角尖，買馬鞭，馬鞭長，起屋梁，屋梁高，買張刀，刀切菜，買籮蓋，籮蓋圓，買隻船，船沉底，浸死兩個番鬼仔，一個浮頭，一個沉底！

《氹氹轉》——選自《精選經典童謠》(錄音帶)
　　氹氹轉，菊花圓，炒米餅，糯呀糯米糰；五月初五係龍舟節啊！亞媽佢叫我去睇龍船，我唔去睇我要睇鷄仔，鷄仔大我扐去賣，賣得幾多錢？賣咗幾多隻呀？我有隻風車仔，佢轉得好好睇，睇佢氹氹轉呀，菊花圓，睇佢氹氹轉呀，氹氹轉又轉。

《點蟲蟲》——選自《UnGoo抵死粵語網》
　　點蟲蟲，蟲蟲飛，飛到荔枝基。荔枝熟，摘滿屋，屋滿紅，伴住個細文公。

《又喊又笑》——本人托兒所時代所有同學都識唱。
　　又喊又笑，烏蠅打醮，蠄蟧攋尿，老鼠行橋。