（警校考试）
周星星（做咗一阵手势畀啲下属睇，啲下属拗晒头）：Understand?
周星星：你做咩呀？你哋喺依度做乜嘢呀？
下属：唔知呀！
周星星：唔知？！我头先讲得好清楚架嘞。全部散开！散开吖！
（下属四散）
（周星星巧计救下人质）
敌人（畀周星星踢出窗，差啲就跌落楼）：哗！救命呀！救命呀！
（周星星行去解开人质）
人质（发晒姣噉款，拉拉扯扯）：你好叻呀，点解你咁好嘢嘅？
周星星（厌倦）：冇咁埋呀喂！
（人质发姣）
周星星：吆！（走去救敌人）
敌人：喂！喂！
周星星：死咗架啦吓！
敌人：系啦，死咗喇，死咗喇！
（考官行入嚟）
人质：Sir!
敌人：Sir!
周星星（行礼）：报告，任务经已顺利完成。
考官：周星星，你班手下呢？
（下属一字排开）
考官（睇牌子）：All dead! 我哋要嘅系指挥官，系Team Work，唔系独行独断，唔系rambo。
周星星：报告，人质已经顺利获救。
考官：拯救行动只系呢次考试嘅其中一个项目，最重要架系你部下嘅安全同埋你嘅领导能力，但系我一啲都睇唔到。
（Sir戥印）
周星星（用手遮住纸）：哎！Sir，畀次机会啦！
考官：你做咩呀？
（周星星用另外一只手遮住纸）
考官：你做咩呀？（戥印，着晒周星星块面度）
周星星：唔好呀！Sir，我请求你再考虑多阵，好吗？
（电话响）
考官（扐起电话）：喂，边位？系！Yes, Sir!（收线）老顶想见你。
周星星（行礼）：Yes, Sir!

（英国国旗喺风中飘扬）
周星星（行礼）：Morning Sir，周星星报到。
王晶：真系抵死，重咁青靓白净呀，转个圈畀阿Sir睇吓。唔使怕丑架，嚟吖！嚟吖！
（周星星转圈，王晶吹口哨，周星星退避三舍）
王晶：情不自禁，真系唔好意思呀。想唔想扎呀？
周星星：我唔想做鸭，Sir！
王晶：我问你想唔想扎呀？
周星星：我系唔会做鸭嘅，Sir！
王晶：都九唔搭八，我问你想唔想升级呀？
周星星：想！但系我系唔会出卖自己嘅贞操架，Sir！
王晶：边个要你嘅贞操啫，我要你嘅青春嗱。
周星星：青春对于我嚟讲同贞操一样咁重要架，Sir！
王晶：得啦！得啦！我知道啦！你听我讲埋先嗱。件事系噉嘅，前嗰排有班学生嚟警署参观。参观完之后，就发觉唔见咗支枪。
周星星：失枪嘅事件经常都有发生架，Sir！
王晶：但系，嗰支系我嘅枪。
周星星：我真系戥你心碎。
王晶：你知又好啦，嗰支枪跟咗我三十几年，一枪都未开过，只系有时攞嚟拗痕架啫。唉！讲起上嚟都有啲痕。嚟，同我拗吓佢。（拧转身）
周星星：背脊吓哗？
王晶：系！佢系一支善良嘅枪。
周星星：枪都有善良？
王晶：我支枪本性系善良架嘛。最怕就系落喺啲坏学生嘅手上，嗰阵时就会滥杀无辜，涂炭生灵嘞。呣！
周星星：放心啦，Sir！我实行抄起成间学校，直至帮你揾返支失枪为止。
王晶：唉！抄得起重使揾你咩？我就嚟退休架嘞嘛，而家至唔见咗支枪，畀人知道呀，我重使见人嘅？唉！所以而家我想揾你呢，混入嗰间学校度。
周星星：Sir，教书我冇乜信心。
王晶：冇人叫你扮教师，扮学生啫。
周星星：扮学生？！我当年就系因为最憎读书所以先加入警队架咋。我唔可以扮学生呀！Sir，你噉做，就即系等于带我上去一个充满毒蛇猛兽嘅火山口上便，唔理我架哭叫，唔理我架哀号，狠狠地，毫无怜悯地，将我用脚一伸，伸落去火红嘅岩浆里头。你噉做又于心何忍呢？
王晶：噉咪好啰，等你活得丰富，死得精彩。你唔使讲架喇，吟诗吟唔甩架喇。（扐出call机）嗱，呢度有个call机表，你带住佢，见到666，即系我call你。
（周星星神情沮丧）
王晶：重有，讲一次“Good Morning, Sir!”畀我听吓。
周星星（把声颤抖）：Good Morning, Sir!
王晶：呣！噉就啱嘞。记住，唔好畀人知呀，唔系一镬熟架。

（学校门口）
（周星星带住介绍信好无奈噉走入学校）
（中史老师企喺门口，周星星将介绍信交畀佢，跟住佢入去）
（体育老师训紧啲迟到嘅学生）
老师：睇吓你哋重敢唔敢迟到？！
（王小龟抬起头，畀老师揿返低）
老师：望咩呀？
（周星星心生恐惧）
（周星星无意间见到好长嘅校规，中史老师提醒周星星快啲行）
中史老师：唔使睇喇，迟啲就识得念架嘞。行呀！
（众同学见到周星星依牙松杠）
同学甲：哎！呢个咪新嚟嗰个啰。
同学乙：又大只，正大嚿衰，边班嚟架？
同学丙：会唔会我哋嗰班呀？
同学甲：唔会啩？
同学乙：我谂唔系喇。
（训导主任林作栋出场，瞄一瞄介绍信）
林作栋：周星星，我系呢间学校嘅训导主任，林作栋。
（嗡嗡声）
周星星：有蚊！
林作栋：你系英伦中学转过嚟架？嗰度专出垃圾，不知所谓！我唔理你屋企同校董会有咩关系。我哋爱丁堡系最好嘅学校，出最好嘅学生。我唔能够容忍有害群之马。你如果唔识谂，我就踢你出校，清楚未？
周星星（习惯性行礼）：Yes, Sir!
林作栋：好有趣咩？带佢去班房。
中史老师：跟我返班房呀。
（周星星坐喺班房心猿意马，无心听课）
生物老师（上堂）：嗱，大约系1987年，有一项南极上空进行嘅观察，就证实咗南极上空出现咗一个臭氧洞。强烈嘅紫外光对于生物系有害嘅。轻嘅呢，就会令到生物嘅遗传基因发生咗突变。重则就会杀死被照射嘅细胞。指物亦都因此而枯萎。（声音离周星星越嚟越远）
（周星星发梦，梦见自己坐紧监）
周星星（唱狱歌）：我冇自由，失自由，伤心痛心眼泪流，你话行错步，叉错步，此餐心伤透。
（粉擦击中周星星）
周星星（欲拔枪）：边个袭警？
生物老师：咩呀？袭咩呀袭？你吖，攞返个粉擦出嚟。
某同学：噉都冇事，好嘢，好嘢！
（周星星走上台）
生物老师：我话之你新嚟吖，上我堂纵横四海吖嗱。（拍周星星头壳，周星星回望生物老师）做咩？Miss有自尊架嘛！上堂！好啦，我哋而家讲到大气层，大气层系可以分为好多层。
（同台黄小龟畀周星星睇纸仔，上便写住：忍一时风平浪静，退一步海阔天空。）
生物老师（继续上堂）：最接近地面嗰层，我哋就称佢为对流层。喺地面对上一万五千至到五万公尺高空，我哋又称佢为停留层。
（课室内粉擦横飞）

（中史堂）
中史老师：明代最讲刑法，一律要严刑对待。尤其是欺君犯上，纠党结社，潜伪窥私。
（黄小龟举手）
中史老师：黄小龟！
黄小龟（起身）：郑Sir，到底乜嘢叫潜伪窥私呀？
中史老师（解释）：潜伪即系而家架卧底，俗语所谓嘅二五仔。呢廷人，系要行宫刑嘅。
周星星：宫刑？！
中史老师（笑笑口）：切啫啫呀，小朋友！
周星星：切几多呀？
中史老师：噉睇你有几多啰。
（周星星用尺比划）
（黄小龟用手剪尺，周星星吓咗一跳）
周星星：哎吖！哎吖！

（化学堂）
（啲同学坐晒后便，得周星星一个坐喺前便）
化学老师：哎吖！又带错书添，真冇记性。（开咗石油气又唔记得关）真冇记性！（听到啲嘢）咩声？
（周星星示意系石油气冇关，化学老师即刻关咗石油气）
（周星星谂住撇）
化学老师（手指周星星）：呢位同学，头先好在得你咋，出嚟帮帮我手呀！嚟嚟嚟！快啲！快啲！
（众人皆笑，黄小龟笑得最大声）
黄小龟：哈哈哈！（指周星星）抵死呀！
（点知乐极生悲）
化学老师（手指黄小龟）：嗰位同学，笑得好开心，你出埋嚟呀。
（讲台上）
化学老师：你叫咩名呀？
周星星：周星星！
（转身问黄小龟）
化学老师：你呢？
黄小龟：黄小龟！
（转身问周星星）
化学老师：你叫咩名呀？
周星星：周星星！
化学老师：你呢？
黄小龟：黄小龟！
化学老师（又问周星星）：呢位同学，叫咩名呀？
周星星：周星星！
化学老师（同黄小龟讲）：而家我哋开始啦，周星星同学。（周星星、黄小龟吓咗一跳）而家我哋呢个实验呢就比较复杂。我哋一定要记住每一个步骤。如果冇记性，就好危险架啦吓。
周星星：Sorry，你话呢个实验最紧要系……
化学老师：记性！
周星星：如果冇就会……
化学老师：好危险呀！
（周星星畀炸到鬼五马六，食波饼添。）
（周星星想爬出去）
中史老师（吹银鸡）：Stop!
（达叔想拉周星星落嚟）
达叔：喂，落返嚟，落返嚟，落返嚟。你落返嚟先啦！
（周星星畀达叔拉落地）
（周星星踩住达叔个身）
达叔：唔该你落返去吖。
周星星：你做咩啫？你边个啫？关你咩事啫？
达叔：唔该你借一借落返去啦。
周星星：你拉我落嚟做咩嘢啫？
达叔：你而家企喺我肚腩处。
（周星星转身欲走）
达叔：喂，唔好走呀。自己人，有密码架。
周星星：密码？！
达叔（走埋一便）：鸡、龟、骨、滚、羹。
周星星：又话密码？！
达叔：鸡、龟、骨、滚、羹。
周星星：咩嚟架？
达叔：密码啰。
周星星：死嘞，死嘞，冇个正常嘅呢度，唔好阻住我呀。（擒铁网）
达叔：唔好爬出去，你唔可以喺呢度爬出去架。你唔能够喺呢度踩出去架嘛。
周星星：OK，OK，OK，我喺正门出去。
达叔：哦！正门都唔得，正门都唔得，……
中史老师（阻住周星星）：做咩呀？
达叔：冇，呢位同学突然间shot咗。
周星星：系啊，我shot咗，我想返屋企呀。（推开中史老师）
林作栋：做咩呀？
周星星：Sorry, Sir! （推开林作栋）
生物老师：哎！
周星星：冇阻住我，唔该！（推开生物老师）
（Miss Ho企喺面前）
周星星：借借，唔该！（推开Miss Ho，突然间又返转头）唔该借借，我想走！
Miss Ho（露出关心嘅表情）：你冇嘢吖嘛？
周星星：我好唔舒服呀，我想返屋企。唔该借开少少，畀条路行吓，唔该！
Miss Ho：你唔舒服呀？
周星星：系！
Miss Ho：跟我嚟呀！

Miss Ho：睇吓有冇发烧。（睇探热针）你冇烧呀。
周星星：有呀。
Miss Ho：冇呀！嗱，你自己睇吓。
周星星：支探热针就冇，但系我有吖嘛。好凄凉我，真系。
Miss Ho：嗱，你畀我睇睇只眼嗱。向下望，向上呀！向左呀！喂，你眼珠唔识喐嘅。
周星星：发烧呀，喐唔到。
Miss Ho：你诈病呢。我系Miss Ho呀，我唔系教你个班架。但我负责你个班辅导工作。你而家返课室先嗱。有咩问题，随时嚟揾我呀。乖喇。

（周星星返课室，黄小龟畀人掐紧）
小妖：系咪一个唔觉意丢咗你个笔盒，你就嬲先？
黄小龟：唔系吖！唔好呀，唔好呀。
小妖：我而家好惊呀。
黄小龟：噉今次要畀几多钱呀？
小妖：我点知呀？睇吓你识唔识做啰。
（黄小龟畀小妖300文）
黄小龟：得三百。
小妖：我唔惊嘞。
Johnny（恐吓黄小龟）：如果畀我知道你身度重有钱呢，我就唔丢你个笔盒，净系丢你。
黄小龟：知嘞。

（周星星返番自己个位）
黄小龟：好啰，好啰，救星到啰。
周星星：你冇唔会，我唔系帮你，亦都唔会帮你。更加唔系你救星，千祈要搞清楚至好。
黄小龟：你得嘅，你咁样衰，以后佢哋只系挂住掐你，唔会掐我，多谢晒吖！

（放学）
（一班女喺出便等候）
女：出嚟嘞！出嚟啰。
番薯：乜你咁早嚟到呀？

（达叔将周星星拉入一二角）
达叔：周Sir，周Sir，我记得密码啦，密码系“东冻董东冻”，系咪？
周星星：真系。
达叔：系吖！
周星星：早讲吖嘛。
达叔：头先我唔记得密码吖嘛。周Sir，我系CID 5798，我系派嚟接应你嘅。
周星星：手震返屋企唞阵先啦。傻仔嚟。
达叔：唔系，唔系手震，系柏金森病，我扮嘅啫。噉样唔使做咁多嘢吖嘛。周Sir呀，上头叫你去我屋企住住先。
周星星（指达叔含住）：担住碌杉咩意思呀？
达叔：戒烟。
（周星星见到Miss Ho男朋友嚟学校接Miss Ho）
达叔：喂，喂，Miss Ho呀，你谂你都唔好谂呀。佢男朋友系反黑组大帮嚟呀，知吗？
周星星：讲咩呀？
达叔：咩呀？
周星星：我系（目及）紧坐喺栏杆上便扯住口烟嗰条僆仔呀。
（镜头移去Johnny仔嗰边）
达叔：哦！Johnny仔吓哗？
周星星：咩料？
达叔：毕架山四虎嘅老大，佢大佬好猛架，叫大飞。老顶失枪呢单嘢，佢嫌疑最大吖。
周星星：（目及）住！（目及）住呀！
达叔：哦！

（一条僆行入大飞间房）
僆（笑笑口）：大佬！
大飞（抌嘢）：你个冚家铲，度埋晒啲屎桥。而家畀人追数呀，起钉呀。走粉咪走粉啰，搞乜鬼走军火啫？
僆：噉你话架嘛，伊拉克打仗，军火有得谂架嘛！
大飞：噉你劝我吖嘛。而家揸住啲ＡＫ４７，都唔知做乜。手枪都话可以打劫啫。
僆：啊，Jonny仔佢嚟咗呀。
大飞：唔早啲同我讲？
僆：条友好窜啫。
大飞：窜？！有钱就窜嗱，你有钱都可以窜架。（行出间房）
大飞（同Jonny）：哎，嚟咗呀，入嚟呀！（同玩紧金鱼嘅小妖讲）喂，风水嘢嚟架，冇搞！
小妖：哎吖！有怪莫怪！
（房内，Jonny交条锁匙畀大飞）
大飞：喂，而家好窜。
Johnny：放心啦，我爹哋去咗游埠，架车上到深圳嗱，佢都未返嚟啦。
大飞：睇吓点。
Johnny：系吖！顺便找埋上次我大佬嗰两部车条数畀我呀。
大飞：人哋过到数我先畀到你架嘛。唔系咁等钱使啫，吓哗？
小妖（打紧机）：咩唔等钱使呀？喺学校收埋收埋都唔够我去两晚卡拉屋企吖。
Johnny：系吖，早两日我执到件好嘢，你睇啱唔啱使？（喺个包度攞出一支枪）
小妖（埋嚟）：系吖，我哋好辛苦喺警署度攞出嚟架。
大飞（大惊失色）：警枪呀？

（达叔喺神主牌前面点香）
达叔：各位大佬呀，每人有三支，千祈唔好争食呀。
（周星星埋嚟）
周星星：你老窦啲神位呀？
达叔：我就想呀，有咁多老窦我重使做咩？呢，呢啲冚棒冷我以前啲拍档嚟架。
（周星星食面，达叔抢过去自己食）
达叔：啊，有面食，有面食。
周星星（抢返）：要食自己煮呀。
达叔：唔系哗？食自己？
周星星：都重得。
达叔：食自己犯法架。
周星星：你话有几多个拍档话？
达叔：九个！
周星星：有十个神主牌嘅？
达叔：噉梗系要预度一个半个噉，噉物梗系要预多一个半个，睇吓边个唔好彩黐埋我处啰。噉呀，有用又好，冇用又好，以备不时之需啰。你唔介意吖嘛？
周星星：咩介意唔介意？你讲咩呀？
达叔：唔明呀？唔明都好啲，唔明都好啲。唉，英年早逝真系似……（周星星起身）哎，嗱，你食面，我出街食饭。哎，记得做功课呀，听朝重要返学架。
周星星：顶你个肺！
达叔：唔好顶！唔好顶！

（菜馆）
二五仔：冇嘢啰，继续讲嘢啰。
达叔：你成世都咁污糟架。
二五仔：惯咗吖嘛。
达叔：冇，呢排喺间学校处做校工，本来好好做嘅，点知跟着个周Sir钟意自己食自己，好麻烦嘅，冇人性到死。喂，你又做紧啲咩料呀？
二五仔：唉，我就唔使计喇，你边有你咁好景呀？跟紧大飞条线啰。
达叔：呣？
二五仔：军火呀！
达叔：咁巧？！喂，我哋都系（目及）紧大飞。不过，嚟揾支警枪啫。
二五仔：警枪？系咩？唔系，佢哋嗰便系机关枪嚟架。
达叔：香港地有咁猛架料？
二五仔：系呀！嚟咗架啦，光天化日呀！（咬耳仔）
达叔：厉害！厉害！喂，噉重唔拉佢哋返嚟？
二五仔：啲买家恐怖分子嚟架，上头想一镬熟就炒起晒佢哋。
达叔：咁心狠手辣。
二五仔：有乜差错就死得人多架嘞。无谓打草惊蛇嘞嘛。
达叔：喂，噉嘞，搭单吓，如果你知道支枪下落，知会声我。
二五仔：哦！梗系啦嘛。出嚟行讲义气架。以前成班二五鸡一齐出嚟，全部都钉晒嘞，死剩你同埋我啫，我唔关照你，你话关照边个？啱唔啱呀？
达叔（慢慢行出菜馆）：个个都死得，呢个千祈唔好死。（达叔同大飞擦身而过）
大飞：咁难听架。

（二五仔身份暴露）
二五仔：飞哥！飞哥！唔使咁劳气呀，有咩事同你摆平佢啰。
大飞：鸡仔标记唔记得呀？十年前畀你拉嗰个呢。佢话问候你，王Sir！
（二五仔牺牲）

（周星星喺个包扐出书本）
周星星（读书）：Policeman! Understand? Yes! Good! Understand? Fuck!

（周星星畀罚企走廊，身上挂一块牌子，写住：我無交功課，真抵死。畀Miss Ho见到。）

（落堂钟声响起，中史老师行出课室，周星星头顶凳，每只手托住本书，身上挂一块牌子）
中史老师：一只脚企，抬高啲。
同学（幸灾乐祸）：有嘢睇。真人表演。
（小妖行去周星星面前）
周星星（警告）：睇好啦！
小妖：你讲咩话？
周星星：我话你睇好啦！千祈唔好笑呀！啊！
小妖（揾手指厾周星星件衫）：哈！哈！
（周星星踢开小妖）
同学：冇嘢吖嘛？痛唔痛呀？
周星星：话你架嘞，唔听我讲。

（周星星畀人喺操场示众，身上挂一块牌子，写住：每週一星）
同学（围观）：每周歌后有啫，每周一星都有？唔系哗？抵佢死喇，啲噉嘅人。……
生物老师：呢个学生，冇脑架，冇用嘅。
化学老师：噉唔系成日都冇记性，真冇用。
（生物老师同化学老师行开）
同学（依牙松杠）：人已经够衰啦，睇佢死人样，好似生痄腮噉。呢次真系唔慌唔“星”嘞。我真系戥佢阿妈伤心呀。哼！真系抵佢死。……

（警署）
王晶：你两个喺度做咩呀？叫你查失枪，你又查字典？
达叔：喂，阿头呀，佢今日冇功课交，成日都返唔到入课室，碌杉噉喺操场罚企。
王晶：一定要入课室查嘅咩？唔入课室都可以查架之嘛。
周星星：如果我再冇功课交，学校门口都入唔到架。嗰阵真系查碌杉。呢条题你识唔识计呀？睇吓。帮帮手。
王晶（抌书）：呢啲三角关系我唔识架。
周星星：哗！阿头，你初初叫我接呢单case嘅时候态度唔系噉架。
达叔：唔系呀，佢不嬲都系噉。
王晶：我不嬲都系噉，你听到佢讲喇。当初好声好气，氹你入局架啫。
达叔：阿头，阿头，如果睇吓出便啲师兄，边个识做，入嚟帮帮手做好佢啦。
王晶：你都白痴架，噉咪即系扬晒出去。（厾周星星魂精）你吖，我话畀你呀，你快啲搞掂佢吖。如果唔系，我用铰剪脚嚟夹爆你个头。
周星星：咩，咩脚话？
王晶：凌空飞起嗰廷铰剪脚，一夹就夹爆你个头，铰剪脚呀！惊未？
周星星：好惊呀。

（周星星同达叔行出嗰门房）
周星星：铰剪脚，你话笑死唔笑死呀？
达叔：唔系吖，佢以前真系好劲架。
周星星：以前咋吓哗？
达叔：一个打廿个。
周星星：打廿架飞机有佢份。
（两个人扮嘢）
周星星：阿爸，你见点呀？阿爸！阿爸，你见点呀？阿爸！阿爸，你见点呀？阿爸！阿爸，你去死吖，阿爸！
达叔：乜你噉讲呀？

（周星星瞓过栊）
周星星：弊！迟到！
达叔：有冇搞错呀？六点咋。咁勤力，感染到我添，我都要读吓书嘞。（扐出一本PENTHOUSE）

（学校）
周星星：啊啊啊！番薯呀！番薯！
番薯：我唔系叫番薯噃。
周星星：但系你真系好似。你擒日啲Bio做好未呀？借嚟抄抄。
番薯：有都唔借你喇。shot架，你？
周星星（喺个袋度拿出五十文）：出五十文买你份Bio。
番薯：我制！
周星星（打镬番薯）：未交货你就想攞钱，你？

（啲同学争相卖功课畀周星星）
周星星：行开呀，逐个逐个嚟吖。多多都有呀。作文有冇呀？作文！……
（Miss Ho见到呢一个场面）
Miss Ho：喂，佢都几受同学欢迎架。
隔篱个女同学：系。

（周星星返课室，黄小龟喺度猛咁抄）
周星星：家吓先抄？噉冇用，冇前途。你睇，我做好晒。
黄小龟：巴闭喇，你。
周星星：失礼！我噉讲唔系想润你。我只系想话畀你听呀，我由今日开始，唔会再畀任何人掟我粉擦。（黄小龟掩耳）我由今日开始，唔会再畀人罚出去走廊罚企，或者企喺操场示众呀，重要揽住块死人牌 畀人当马骝睇，唔会。你慢慢抄呀。

（中史老师行入课室）
中史老师：突击测验，边个唔合格罚企操场一个礼拜。

（周星星紧张到流晒汗）
（周星星打电话求救）
黄小龟（羡慕嘅眼神）：大哥大？！
周星星：吹呀？

（达叔嘅call机响）
达叔：有冇搞错呀？

王晶（听电话）：咩话？中史测验？你同佢搞掂咪得啰。
达叔：唔系吖嘛？阿头！中史我唔掂架，屙屎我又叻。
王晶：你唔好收线吓。（摆低电话）男人婆，同我叫晒啲膊头有花嘅即刻上嚟。

（课室）
周星星：同我问佢，平定安史之乱，使唐室转危为安嘅名将系：A，郭子仪，B，for boy呀清唔清楚呀？系李光弼，C，李克用。李克用呀，李克勤。
达叔（扐起电话）：喂，A就郭子仪，B就李光弼。
王晶：边两个平定安史之乱？你答！
甲：郭子仪同朱温。
乙：唔系，好似系李光弼同埋朱温。
王晶：哎吖！究竟系边个屙屎……，郭子仪定朱温呀？答我呀！哎吖，你搞错呀？查书？
丙：唔系吖，得架嘞……等多阵啦。
丁：喂喂，仔呀，系啰，朱温呀，朱温系边个呀？
王晶（扐起电话）：答案系B吖，个答案系B吖，B吖！

周星星（见到窗外达叔抛起嘅香蕉）：蕉？！蕉for banana，B。（写低B）你再同我问佢。
王晶：啊？哦！牛李党争系咩！答我！答我呀！答我呀！又抄书呀？啊？牛李党争你哋都唔识？读咩书架？喫屎呀！
（出便行过两个警员）
警员甲：哗！搞紧咩大case呀？
警员乙：唔知呀！

（课室）
周星星（见到苹果）：apple，苹果，Apple for A，（偷笑）噉都得？下一题，你听清楚。系……
王晶：答案D呀，D呀，D for dog。
达叔（拗头）：D for，D for dog。（扮狗吠）
（一个miss行埋嚟）
达叔（向上抛蕉）：
Miss：达叔，你喺度做咩嘢呀？
达叔，冇，我喺处执垃圾之嘛。
Miss：女厕塞咗呀，你跟我嚟去通通啦好吗？
达叔：好呀，好呀。
Miss：系呀，你跟我嚟呀。

（中史老师行出课室，见到达叔留喺地下啲嘢）
王晶：喂，咩呀？测完啰。
手足：阿Sir，系咩案嗱？
王晶：三狼呀。
手足（疑惑）：系？！咪死咗架啰。
手足二：翻案嗱！

（周星星见到黄小龟将本中史书坐喺身下，效仿之）
周星星：点解我咁蠢，噉都谂唔到。（揾唔到答案）冇！
（爆煲）
中史老师：你两个骑马呀？
周星星：堕马。
中史老师：噉你两个即系出猫啦。
周星星：唔系两个，系我一个出猫。你拉我！
中史老师：你跟我出嚟。
周星星：等等！（攞返件西装）

（教师办公室）
中史老师：几离谱呀，中史测验，攞本国文出嚟出猫。
生物老师：你都算失败啦，你。
Miss Ho：噉佢都唔算出猫呀。
林作栋：我唔担心佢嘅罪名，我只系作出适当嘅处分啫。你哋大家有咩意见嗱？
中史老师：扣操行三分例排架啦。（周星星有嘢讲）咪嘈！
Miss Ho：唔好咁严啦，扣满十二分就要赶出校架嘞。
林作栋：Miss梁，你呢？
生物老师：劈死佢啰。
中史老师：你讲乜嘢呀？
生物老师：你唔系想噉咩？出猫咋嘛，系人生必经嘅阶段呀。试问边一个人未出过猫至得架？最紧要呢，系识用脑，你连出猫都唔识用，你企好！你重喐？都唔识用脑呀，噉就抵罚啦。（喺周星星面上划咗一条痕）计我话呢，最好呢重测。一次唔识，测够两次，两次唔识，测够三次，测到佢识为止。
中史老师：你而家罚佢定罚我呀？！我边有咁多时间呀？
生物老师：去少啲马场啦，你。
林作栋：系啰。
Miss Ho：我赞成，我提议见佢嘅家长，了解吓佢屋企嘅情况。
林作栋：好，我而家决定周星星出猫，罚留堂一个礼拜，扫操场两个礼拜，扣操行分五分，下个礼拜重测。重有呀，我要见你架家长。
周星星：家长？！我冇架，我冇老窦，冇老母，冇兄弟姊妹，冇亲戚，冇朋友。
Miss Ho：噉你嘅监护人呢？
周星星：监护人咪我啰。你要见见我得架嘞。

（中史老师递上周星星嘅档案）
中史老师：佢个快劳。
Miss Ho（凑近）：监护人填边个呀？
林作栋（惊诧）：达叔？！
周星星（惊诧）：达叔？！

（班学生喺门口嘈嘈闭）
同学：冇嘈啦，死喇，大镬嘞。

（达叔企喺周星星隔篱笑）
林作栋：达叔，周星星真系你个仔？
达叔（同周星星讲）：你高级过我，你讲嘞。
林作栋（手指周星星）：周星星，你讲！
（周星星同达叔一齐大笑）
林作栋：你唔好笑呀，你哋讲啦。
周星星（含糊其词）：系吖！系吖！
达叔：系，系，失礼，失礼！
生物老师：我一早就估到啦，你睇佢哋吖，成个饼印噉样呀。
周星星：唔系吖哗？饼印？

同学（惊诧）：啊？佢老窦？唔系呀？
林作栋：喂喂喂，唔系。嗱嗱，呢度呢。你又姓曹，佢又姓周，噉点解呀？
达叔：唔知呀？（问周星星）点解呀？

（周星星示意达叔讲嘢，达叔摇头）
周星星：This is an order!
达叔：出世嗰阵我改咗佢做曹星星嘅，后尾佢又唔知点解自己改做周星星，噉……噉答得唔得呀？
周星星：It's right.
达叔：哦！主任，冇乜嘢我哋返出去啦。
林作栋：哎！等等先，达叔，即系我哋请你返嚟呢就系想讲畀你听，你个仔出猫呀。
达叔：出猫？出猫唔啱嘅，出猫唔好呀嘛。出猫唔好，老师呵？出猫……，冇咩我哋返出去啰。
林作栋：喂喂喂，阿达叔，你明唔明啫？即系管教呢系学校同家长相辅相成架嘛。你话系咪呀？噉我哋可以管教到几时至得架。（达叔打喊露）你个仔吖，返学唔够三日咋就出猫喇。
周星星：求祈打两嘢走啦。
林作栋：你要认真管教先啱架嘛。
周星星：系噉意啦。
达叔：系噉意啦吓。得嘞，唔使讲嘞，主任，我知点做呀。（猛打周星星）衰仔呀，你学人出猫，读屎片呀？打死你！
Miss Ho：你唔好畀佢打。
达叔（攞只挨拼凳打落去）：打死你！死未？
周星星：死咗啦！
达叔：讲大话！
周星星：真架。
达叔：打多你一嘢。

（周星星畀打到一身孱，行出教师办公室）
（达叔走埋出嚟）
周星星：你个仆……
达叔：周Sir，你都唔好咁冇阴功呀。要我出行力噉抦你，你知你自己几咁硬正架啦。
周星星：噉物系。
达叔：我几呀岁，骨头又脆，抦完你之后周身骨痛，手指骨都爆埋。
周星星：系？噉唔好意思。
达叔：唔紧要，鬼叫我捞呢行咩？
周星星：去睇吓医生呀，我请！
达叔：多谢！多谢！

（Miss Ho行出嚟）
Miss Ho：达叔！（安慰达叔）你唔好咁劳气啦！（同周星星讲）周星星同学，你知唔知你阿爸几咁伟大？
达叔：唔紧要，唔紧要，为人父母嘅个个都系咁伟大架啦。
Miss Ho：佢噉样唔得架。不如噉呀，我帮佢补习啦。
达叔：我屋企冇钱呀。
周星星（推开达叔）：啊！唔好意思呀，Miss！
Miss Ho：达叔！
周星星：阿爸！
Miss Ho：我唔收佢钱架。
达叔：唔好，唔好。
Miss Ho：我负责帮你教返好佢啦。
达叔：唔好嘅。
周星星：唔系几好嘅，噉呀。
Miss Ho：就噉啦，由听日开始，你放心啦。
达叔：多谢！多谢！多谢！多谢啦！
（Miss Ho行返入教师办公室）
达叔：重使乜口震嗱？得米吖你。
周星星：作死呀你，正话想倒我米呀，够胆话唔好？喂，醒目啲呀，唔好穿煲呀。喂……
某同学：有人揾你呀！
周星星：边个？
某同学：上去天棚你又知嘞。
周星星：好呀，嚟呀。
某同学：上！

（天棚聚集咗好多人）
Johnny：阵间点都要畀啲颜色佢睇。
黄小龟（见到周星星）：啊！佢嚟嘞！

（）
Johnny（担住口烟仔）：边个帮佢就企佢嗰边嗱。
（班友冚棒冷走埋一便，黄小龟犹豫不决）
同学：坐呀。过嚟呀。
（周星星瞄咗小龟一眼）
黄小龟：呣！
黄小龟（同Johnny讲）：你要收保护费，我咪同佢畀埋啰。
Johnny：你个乌龟仔梗系未死过定嘞。等我捉你过嚟，攞你个口嚟做烟灰缸。捉佢过嚟。
（周星星两三下就收服咗Johnny）
周星星：重有咩事冇呀？
Johnny：冇，冇事。
周星星：你以后冇咩事就唔好叫我上嚟嘞嘛。
Johnny：知嘞。

周星星：冇前途，真系。
黄小龟（擦鞋）：星哥，你重厉害过李小龙呀！星哥，使唔使擦鞋呀？星哥！
番薯：星哥，你真把炮，够唔够钱使呀？我有！

（Miss Ho办公室）
Miss Ho：重有呀，件衫又唔揳好，今日我唔打你唔得架嘞。攞手出嚟！攞嚟呀！攞嚟！
周星星：我几呀岁人重打手板？
Miss Ho：攞嚟吖！
周星星：唔好啦，唔使啦，Miss！
Miss Ho：嗰只！
周星星：我畀度地方你打，你忍心打，你忍心出力打落嚟呀。

（达叔屋企，间屋乱七八糟）
周星星：垃圾岗一样。你话阵间畀Miss Ho上到嚟见到几失礼，你话！（摷到一样嘢）喂，啲咩嚟？多士炉呀？抌咗嚿面包佢。你房里便啲咸书呀，全部……，我叫你执嘢你食嘢？扮嘢呀，嚟，扮嘢，（扮柏金森病）噉呀！
达叔：执嘢啰。
周星星：柏金森病吖嗱？柏金森你老窦！一日到黑扮住。唔好以为几呀岁，我照噍，话你听呀。

（达叔执房）
达叔：仔冇理由房大过老窦嘅。

（Miss Ho同周星星补习）
周星星：Miss，呢度我唔系好明。
Miss Ho：呢度呀？In this section, we will be giving model letters with different kinds of social sitiuation follow by similar exercises.

（周星星同以前判若两人，接粉擦嘅功夫日渐犀利）
（众人拍掌）
黄小龟：好嘢！坐呀！星哥，头发乱咗呀，星哥！（梳头）

（体育馆，每个人都好似好闷）


（野餐）
某女：嚟，帮手点着佢呀。都透唔着嘅。

（衰仔教唆番薯食烟）
衰仔：正呀。（番薯猛咳）
周星星：喂，学人食烟？几时食得到大呀？抌咗佢。报警拉你班友吖嗱。有乜前途呀，你话？
（坐喺Miss Ho隔篱）
Miss Ho：乜你唔识烟嘅咩？
周星星：我唔食架，咁贵点买得起呀？你唔信嗱？闻吓我个口，睇吓有冇烟味吖嗱。
Miss Ho：你傻架咩？
周星星：嗱，你睇吓，冇烟屎牙架。
Miss Ho（见到智慧牙）：咦，喂喂喂，点解你咁快有智慧牙嘅？你今年几大呀？
周星星：我今年呢就……十八岁。
Miss Ho：十八？
周星星：就嚟十九。
Miss Ho：不过睇你个样，好早熟。
周星星：熟晒架嘞，食得添架啦。
Miss Ho：系嘞，成班同学都有女朋友仔架，噉你嗰个呢？
周星星：哦！我冇架，因为我唔好赞成啲学生呢喺求学嘅时期谈恋爱，我认为好嘥时间。
Miss Ho：蛊惑呀，你。
周星星：系吖！
Miss Ho：真系嘅？
周星星：系。我见过你男朋友嘞，成日喺门口等你嗰个吖嘛。
Miss Ho：你又知嗰个系我男朋友？
周星星：噉我睇得出嘅。我睇佢对你几好吓添。
Miss Ho：多事喇，你。不过，我谂佢都唔系好啱我。
周星星：噉有时感情嘅嘢又真系唔可以勉强嘅。
Miss Ho：佢系警察嚟架。我越嚟越憎警察。
周星星：我同意，我不嬲对警察都冇乜好感。

（黄小龟同女朋友坐埋一嚿石）
黄小龟：
女朋友：咩呀？
黄小龟：Anne呀，我有个请求呀。
女朋友：咩事啫？
黄小龟：畀个胸我睇吓。
女朋友：咩话？！
黄小龟：一边都够架嘞，一边喇。
女朋友：胸呀啦！
黄小龟：你又冇蚀底架，咪当诈唔知啰。
女朋友：你死细龟吖，正核突佬嚟架，讲埋晒啲噉嘅嘢。
黄小龟：嗱，唔好再追过嚟呀。
女朋友：你冇走呀，你。

周星星：你睇吓细龟佢真系，成只龟噉吓。尤其是个头，加个壳，fit晒。哈哈哈！
Miss Ho：不过，最近细龟嘅成绩差咗，我谂都要同佢补习吓。
周星星：但系你要同我补，边有时间嗱？
Miss Ho：你已经进步咗好多啦。
周星星：噉等我同佢补得嘞。我进步咗吖嘛，应该冇问题嘅。
Miss Ho：你得咩？
周星星：咪即系所以你要继续同我补，噉我先至可以同佢补吖嘛。你明吗？你明嘅。你明嘅。明啦吗？

（周星星去黄小龟屋企同黄小龟补习）
黄小龟（担住遮）：呢度系舍下嚟架，点呀？（入屋，收埋遮）阿嫲，斟茶！阿星哥，随便坐！（接住周星星件衫）哎吖！阿星哥，钟意玩咩游戏机呀？世嘉定PC呀，定系超级任天堂呀？
周星星：迟啲先。迟啲先。
黄小龟（闹阿嫲）：乜你咁烦嘉，斟茶啦！
阿嫲：请饮茶！（摆低茶）
周星星：唔该！唔该！
阿嫲：你哋系同学呀？
周星星：系吖！系吖！
阿嫲：一齐读书架？
周星星：系吖！系吖！
阿嫲：书友嚟呀？
周星星：系吖！系吖！
阿嫲：你哋系同学呀？
周星星：系吖！你点知架？哈哈哈！
黄小龟（闹阿嫲）：你讲咁多做乜啫？返入去啦！
阿嫲：随便坐呀！
黄小龟：冇厘醒目。
周星星：你工人嚟呀？
黄小龟：系阿嫲。
周星星；阿嫲！老窦老母呢？
黄小龟：冇几个喺度架。啊，星哥，有好嘢招呼你。（畀周星星一沓杂志）
周星星：哗！哗！哗！哗！个死仔咁多好嘢吓。哗！好似嚟同你补习架。
黄小龟：唓！傻啦！（中咗周星星一鎚）

（黄小龟喺度抄嘢，个头甫抬起就畀周星星打咗吓）
周星星：嫲嫲，试吓，唔好客气呀！唔使钱，玩吓啰，怕咩啫？（将饼干盖交畀阿嫲）行啦！
（阿嫲用饼干盖抨咗黄小龟个头顶一下）
周星星：系，好唔好玩呀？你试吓反手呀，好过瘾嘅。反手车落去，九十度角车落去。等等，等等，等个头起咗先嗱。预备，出击！（黄小龟又中咗吓）Very good! 做得好！试吓两只手呀，好力啲架。（扌坚）佢头顶，嗰度，冇错。
（阿嫲猛咁(扌坚)黄小龟头顶）
周星星：哗！重狼过我呀，睇唔出，真系。

Miss Ho：噉Open day呢？你哋负责游戏部分。噉玩游戏嘅主题系童话故事。就雪姑七友喇，你哋认为点？
同学（唱）：雪姑七友，七个小矮人，雪姑七友，七个同床瞓。七个人，有七碌……
Miss Ho：够啦，够啦，你哋似乎离谱啲。
周星星：Miss，其实呢，我哋而家钟意嘅嘢未必系呢啲嚟架。点解你唔问吓大家呢？
同学：系吖！系吖！
周星星：问十一啦，十一，你平时钟意玩咩多？
十一：打游戏机啰。
周星星：听到吗？我都钟意架。
同学：系吖！系吖！
周星星：其实我哋今次系咪应该揾啲新鲜刺激啲嘅嘢嚟大家搞吓噉呢？
某同学：啊！打气枪呀。
同学：正呀！好呀！
某同学：打气枪就太过暴力噉样喇。
周星星：噉无可否认就系暴力咗啲，但系都好过暴露，吓哗？

（达叔屋企，晚饭时间）
达叔：唔该晒！
Miss Ho：食饭嘞。
周星星：唔该！
达叔（用筷子打周星星）：死仔，帮吓手嘞嫲。
周星星：做咩呀，你？
达叔：你好啰，你，你噉都重得嘅？
达叔：饮汤啦，Miss！
Miss Ho：唔该！
达叔：食嚿排骨啦。
Miss Ho：唔该，达叔！
周星星：阿爸，你都饮！
达叔：唔紧要。
Miss Ho：你自己呢？

（Miss Ho畀周星星睇考卷）
Miss Ho：你今次嘅成绩好好。
周星星：都系多得Miss你同我补习啫。
Miss Ho：不过细龟重高分过你。
周星星：唔系吖哗？！
Miss Ho：你睇吓！
周星星：噉都系多得我同佢补习啫。呢排我日日督促住佢，你都知架。
Miss Ho：如果个个学生都好似你噉就好嘞呵？
周星星：乜说话，其实个个Miss好似你噉咪重好？
Miss Ho：吓！你又口花喇！（出包）
周星星：剪你！（出剪）
Miss Ho：我揼！
周星星：包住！噉都捉唔到佢嘅手，真系，真失败！个衰仔去咗边嗱？

黄小龟（打电话返屋企）：阿嫲，我唔返嚟食饭啦，系噉呀。（收线）大哥大，劲！
同学甲（交钱）：龟哥！龟哥！呢个月嘅。
黄小龟：今日月头嘞咩？
同学乙：系吖，睇住我。
黄小龟：唔使多谢我，多谢星哥得嘞。
黄小龟（收保护费）：喂，醒少少呀，星哥唔钟意啲冇厘醒目嘅人嗱。
同学丙：系吖！系吖！卅文！
黄小龟：嘥时间！
黄小龟（见到本好嘢）：哗！哗！哗！呢本书星哥钟意，当交埋下个月。哗！哗！哗！
同学丁：龟哥，孝敬你架。
黄小龟：醒目！
周星星：喂，有啲好嘢畀你睇！叫你呀，死仔。做乜鬼鬼鼠鼠？企喺度！（追）我够识弹咯。（跌低）
黄小龟：唔关我事呀，星哥，系你自己戆居要弹咋。
周星星：冚家祥，跣我呀，你！走！
（黄小龟跣低）
周星星（捉住黄小龟）：擘大个口！
黄小龟：放咗我啦，星哥！
周星星：喝住你唔好走，你系要走吓嘛？死铲！
黄小龟：唔想架。
周星星：咩名？
黄小龟：黄小龟！
周星星：住喺边？
黄小龟：九龙塘！
周星星：住晒呀？
黄小龟：理想酒店隔篱。
周星星：转过嚟！
黄小龟（转身）：双手摆头！
周星星：玩嘢啦，细佬！（抄到一部电话）
周星星：咩嚟架？
黄小龟：你嘅电话！
周星星：我够知咯。
黄小龟：知你又问？
周星星：窒阿Sir？（掴咗黄小龟一巴，抄到一沓港纸）
周星星：啲咩嚟架？
黄小龟：港币！
周星星：我够知咯。
黄小龟：知你又问？
周星星：噉我而家系咪问你唔起呀？吓！系咪问你唔起呀？
黄小龟：问得起！问得起！问得起！
周星星：问得起啦吗？即刻话我听呢啲系乜嘢嚟嘅。
黄小龟：港币！
周星星：我够知咯。
黄小龟：知你又问？
周星星：仆街呀，即刻话我听。如果唔系我凌空飞起一乸铰剪脚，夹爆你个头。
黄小龟：唔好夹呀，星哥，啲钱系你架。
周星星：关我咩事呀？
黄小龟：保护费嚟架。
周星星：咩保护费呀？
黄小龟：系我向啲同学收嘅，每人卅文，我哋而家有财有势，系天下第一大帮派。
周星星：天下第一大帮派？！
黄小龟：系吖，星字派，或者星字头都得。
众同学（鞠躬）：大佬！
周星星：你班友听住呀，我唔系你哋大佬，即刻攞返晒啲钱，全部走！
黄小龟：哎！大佬唔系叫你呀，叫我咋。叫阿公喇！（指周星星）
众同学（鞠躬）：阿公！
黄小龟：几听话！

（校门口）
Johnny：算啦，无谓搞到学校窜晒，盏我哋两个麻烦。
大飞：你系我照架嘛，你喺学校畀人搞，唔畀面你即系唔畀面我，系咪，小妖？
小妖：系吖！
大飞：喺我环头想开多瓣？话开就开，你估Seven-Eleven呀？！
Johnny：佢傻庚庚，乜都唔识啫。
大飞：等我睇吓佢有咩三头六臂。

（校内）
达叔：周Sir，大飞嚟咗！好似话专程嚟刮你。你小心啲。
周星星：定啲嚟呀，应该冇乜事架。
众同学：阿公，阿公，过嚟呢便啦。
番薯：阿公，死梗喇。
周星星：唔好再叫我阿公，你班友呀。
黄小龟：星哥，星哥，大飞嚟揾你呀。
周星星：边个话揾我呀？
黄小龟：佢话有大揾大，咪即系揾你啰。
周星星：噉即系揾你啫。呢期你先系大佬吖嘛，呢期。（行出去）
番薯：噉点呀？

（）
大飞条僆：喂，僆仔，咪行住！
大飞：大佬呀！
周星星：你好吗，哥哥？
大飞：你就系星字头呀？你都好窜。
周星星：你讲咩呀？
大飞：喺我地头行都唔知会我一声，你老几呀？
周星星：我排行第二嘅，对上重有个家姐。但系佢结咗婚好耐嘞，而家重同我姐夫搞紧移民添。
大飞条僆：窜我大佬？！
大飞：哎！皇气！
大飞（拍周星星膊头）：僆仔，你行运啦。睇路呀，下次冇咁好运架嘞。

（Miss Ho同男朋友一齐食饭）
Miss Ho：你做咩嘢呀？
Miss Ho男朋友：你而家重帮紧个周星星补习，吓嘛？
Miss Ho：系吖，佢啲成绩虽然唔系好好，但系已经比以前好好多架嘞。
Miss Ho男朋友：你知唔知你学校而家多咗个新黑社会帮会呀？
Miss Ho：又系黑社会，我讲过啦，我唔会将学生嘅资料讲畀你知嘅。
Miss Ho男朋友：冇人问你攞资料呀，我净系想话畀你听，你哋学校多咗个新帮会，叫星字头。嗰个大佬就系你而家帮佢补习嗰个周星星呀。
Miss Ho：哼，荒谬，我警告你呀，佢系我学生，唔系咩黑社会大佬。
Miss Ho男朋友：但系佢系害群之马。
Miss Ho：我已经讲过好多次架啦，我学校冇害群之马，啲学生唔好，我哋有责任教好佢嘅。
Miss Ho男朋友：好嘞，好嘞，算嘞，唔好嘈嘞。我费事为咗佢伤害我哋嘅感情呀，Okay？你可唔可以唔同佢补习？我系你男朋友，我惊你蚀底畀佢。
Miss Ho：我叫学生要信任，信任身边嘅人。但系你就教我唔好信我啲学生。

（Miss Ho走去周星星屋企帮周星星补习，Miss Ho揿钟，周星星开门）
周星星：Hi，不如我哋今晚入房补习呀，因为我阿爸喺出便打紧雀，噉物费事骚扰住佢吖嘛。
（Miss Ho口黑面黑）
周星星：冇咩事呀嘛？Miss！
Miss Ho：入房温习呀。
周星星：好呀。（Miss Ho行入房）
达叔（走埋周星星身边）：喂，开房呀？
周星星：嘘——！
达叔：嘘咩呀？
周星星：出去行吓！
达叔：去边度行呀？
周星星：你钟意行上广州呀
达叔：哎！嗱，你一个，我一个。
周星星：你搞错咗嘞。
达叔：冇搞错，呢只系超薄架。
周星星：系咩？
达叔：系！
周星星：我绝对唔系你谂嗰类人，我亦都唔会用……
达叔：揸住呀，人哋好女仔嚟架。唔好害死人添呀，十五分钟好啦。
周星星：你行就行啦，咁多嘢讲。黐线！（抌咗安全套）

（出便）
达叔：搞错呀？间屋系我，竟然要我出街？
路人甲：请问你系咪周星星架老窦呀？
达叔：啊，系吖！系吖！
路人甲（同达叔身后嘅人讲）：佢话系。
（突然间喺达叔身后窜出一个人用袋笠住达叔个头）
达叔：喂，喂，做咩呀？做咩呀？

（周星星喺度对住安全套进行紧激烈嘅思想斗争）
（周星星卒之决定拿起安全套，啱撞到Miss Ho，安全套畀Miss Ho抢过去）
周星星：糖嚟架。（攞返安全套）吹波糖嚟架。（将安全套吞入口中）补习啦。
Miss Ho：你当我白痴呀，你令我好失望。（离开）

达叔：救命呀。救命呀。
Miss Ho：达叔？！发生咩事呀？
周星星：点呀？
Miss Ho：达叔！
周星星：行埋一便。
（搞掂晒啲僆）
僆：唔好打，唔好打，畀次机会我呀！
周星星：边个叫你嚟？
僆：大飞呀，唔该你畀次机会我啦，畀次机会我呀。
周星星：畀次机会你乜至得架？
僆：我想走呀！
周星星：走去边呀？
僆：唔知呀！
周星星：返屋企瞓觉呀，僆仔，你老母挂住你呀。

（达叔埋嚟）
达叔：周Sir，真不愧为飞虎队第一号杀手呀。
周星星：呢基本嘢嚟啫，身为皇家香港警察，唔通好似你噉呀？
达叔：噉物系。
（Miss Ho知道晒真相，周星星同达叔重扮嘢）
周星星：阿爸，你冇事吖嘛？
达叔：冇事，冇事，我返去捽捽跌打酒就……
周星星：噉我嚟捽，我嚟捽。
达叔：乖！
Miss Ho：你两个唔使再扮嘢嘞，你唔系学生，你哋两个根本唔系父子。
达叔：唔系，我哋真系两父子嚟架。虽然我个样后生过佢，但系佢真系我亲生仔嚟架。
周星星：其实呢，呢啲嘢我唔可以讲出嚟嘅。但系我唔想呃你。我系警察。
达叔：周Sir，而家都米已成炊咯，讲晒出嚟都啱嘅。
周星星：吆！
周星星（同Miss Ho讲）：我系警察，今次我入嚟学校系为咗查单案。不过，其实我都系想帮班僆仔，我真系想帮佢哋。
Miss Ho：我唔理你咁多嘢，亦都唔想知。不过你以后冇玩我，周Sir！
（周星星拉住Miss Ho）
Miss Ho：做咩啫，你？
周星星：冇话畀人听，好吗？唔好啦！

（Miss Ho离开）
达叔：周Sir，佢会唔会爆出嚟架？
周星星：会架，你去杀佢灭口。
达叔：Yes, Sir!（面露凶光）
周星星（掹住达叔衣领）：我唔该你悭啲使啦，你把死臭口，系都杀你先啦，拍硬档悭啲好吗？
达叔：我好大使咩？

（警署）
王晶（拍台）：信唔信我一嘢铁砂掌打爆你个吖嗱？
周星星：信！
达叔：信，信，信，阿头，正话嗰掌都好有型呀。
周星星：系吖！系吖！
王晶（拍台）：入咗学校两个月一啲头绪都冇。话畀我知，你做过啲乜嘢嚟？
达叔：讲呀！
周星星：我架做法呢，就系首先同啲学生同埋教师沟通咗先。
达叔：系吖！系吖！沟紧架嘞。沟紧。
王晶：话之你沟又好，通又好啦，总之一个月之内要交返支枪出嚟。如果唔系，两个都要炖冬菇。
达叔：我无所谓呀，我天生贱格，不求上进。
王晶：我调你去守边界吖。
达叔：好呀，好呀，多谢，多谢！
（王晶好冲动）
周星星：阿头，你冇咁冲动嘞。你嘅铁砂掌咁厉害我哋经已好惊架嘞，吓哗？
达叔：系吖！好惊！好惊！
周星星：请收返埋只铁砂掌先嗱。我哋一定尽快帮你搞掂佢。

（学校）
Miss Ho：今次Open day啲学生搞得好好呀。
另一位Miss：系就好啰，上年都唔知搞得几闷呀！行啦！

（周星星企喺走廊，达叔喺厕所出嚟）
达叔：冇嘢呀？
周星星：喂，借call机我。
达叔：做咩呀？
周星星：借我，嚟！
达叔：个call机系我……
周星星：攞嚟吖！
达叔（扐出call机）：呢个call机呢……
周星星：我知，我知，用完畀返你。唔该！

（Miss Ho台面call机响，见到周星星畀佢嘅留言：如果唔系你，我Geography唔会攞到八十几，如果唔系你，班僆仔唔会对我死心塌地，你教我人生目标，应该为人，唔 系为钱，噉我就话畀你听，我嘅目标就系你，对唔住，因为我以前呃过你，对唔住，因为我将会追瘦你，周星星！）

（Miss Ho出办公室，周星星同达叔喺走廊等紧佢）
周星星：Hi!
Miss Ho：无聊，个call机我没收呀。（行开）
达叔：喂，个call机我架。
周星星：你企喺度做咩呀？
达叔：架call机我架，嘛。
周星星：你讲你企喺度做咩先？
达叔：嗰部call机我架。
周星星：我同佢讲嘢，你企喺度阻住我呀。
达叔：但嗰部call机系我……
周星星：你阻住我，你行开啲……

Johnny：有人劈你呀，我大佬揾人劈你呀。走啦！
（大飞揾人嚟劈周星星）
周星星：细龟，你快走！
小妖（睇热闹）：咁多人打一个。

（Miss Ho男朋友坐喺自己架车里面，谂住到时候冲出去拉人）
手足：喐手未呀？
Miss Ho男朋友：睇定先！
黄小龟：死啦！
学生甲：喂，星哥畀人劈呀。
番薯：帮手！

Miss Ho男朋友（通知啲手足）：喐手！
Johnny：有差佬呀，走呀，有差佬呀！
某学生：星哥，星哥，你冇嘢吖嘛？
周星星：冇嘢，冇嘢！
（Miss Ho男朋友埋嚟）
周星星：阿Sir，嗰边斩到七彩。（Miss Ho男朋友拉周星星）做咩呀？
Miss Ho男朋友：有嘢返差馆先讲。

（差馆）
Miss Ho：你点呀？冇事吖嘛？
番薯：我谂我冇事啩。
Miss Ho：返去唞吓。
Miss Ho：你两个冇事呀？
某同学：冇事！
Miss Ho：见唔见周星星呀？
某同学：唔见嗱，Miss。
Miss Ho：唔见嗱，你哋返去唞吓。
Miss Ho（问另外一个同学）：见唔见周星星呀？
另一同学：唔见呀，Miss！
（黄小龟喺里便行出嚟）
黄小龟：有咩事同我律师讲喇。
Miss Ho：细龟呀！
黄小龟：Miss，好痛呀！
Miss Ho：见唔见周星星呀？
黄小龟：冇见过，唔知道佢哋拉咗去边呀。

Miss Ho：阿雄呀，见唔见黄Sir？
阿雄：黄Sir呀，黄Sir佢……，啊！喂！

（周星星畀吊起）
周星星：而家唔系事必要我讲，但我所讲嘅嘢将会成为呈堂证供，我有权打畀我律师，甚至乎有权饮杯奶茶添。但系你哋冇权吊高我。
（手足除开周星星对鞋）
手足：哗！臭呀！
周星星：放手！喐我呀！想打我脚板，你当我新嚟架。好呀，嚟！要打打我头，睇吓我死定你死呀，嚟！
Miss Ho男朋友：啱呀！（放下周星星）睇吓我而家重打唔打到你呀？
阿雄：何小姐，你唔可以入去架。
Miss Ho：喂！（扶起周星星）点呀？你冇事吖嘛？你哋做咩啫？自己人打自己人都有嘅。其实……
周星星：点解你会嚟呢度架？
Miss Ho：黐线架，自己人都打，佢……
周星星：我有啲紧要嘢同你讲。
Miss Ho：你系都等我讲埋先嗱。其实佢系……
（周星星嘴Miss Ho）
（Miss Ho男朋友猛打周星星，呢个时候王晶入嚟）
王晶：停手！
（Miss Ho男朋友打多吓）
达叔：星呀，星呀，冇事吖嘛？
周星星：问吓佢只手有冇事。
达叔：啊！快啲返去捽啲跌打酒啦，因住啲手骨爆添呀。
Miss Ho男朋友：你走唔走呀？
达叔：冇有识死，系又打，唔系又打。走嘞，走。

（王晶办公室）
王晶：而家好啦，冇嘢嘞。扯喇。我叫你查失枪，你又搞到满天神佛。（指达叔）你又成世都唔使升架啦。或者你跟埋佢成世都唔想升啦。扯喇，冇嘢喇，处之泰然，当一无所有。

达叔：畀次机会喇。
王晶：机会？咩机会都畀晒你啦。话我唔畀机会你？系咪唔畀机会你？
周星星：唔系我讲架，阿Sir。
王晶：死喇，你唔揾返支枪，我同你同归于尽。
周星星：哎吖！真系铰剪脚呀！

（达叔屋企）
达叔：喂，唔使咁唔开心。
周星星：都唔知几过瘾。

达叔：喂，你几时生日架？
周星星：十二月廿二。想开p呀？
达叔：唔系，喂，我就正月初四嘅。嗱，你记住呀，我全名叫曹达华。
周星星：摆酒呀？
达叔：唔系，呢镬唔系你又梗系我架啦。梗系要留返个喺处写神主牌至得架。
周星星：唔该讲清楚啲好吗？
达叔：军火吖嘛。大飞批军火，摆喺边度我早就收到风嘞。
周星星：噉点解你唔早讲？
达叔：惊吖嘛，大佬！
周星星：冇叫我大佬，叫我阿Sir！Attention!
达叔：Yes, Sir!
周星星：知情不报咩后果你知唔知？
达叔：Yes, Sir!
周星星：明知点解重要犯？
达叔：怕死呀，Sir！
周星星：我都系。
达叔：嗱。
周星星：但系身为香港警察，死都要顶硬上。
达叔：Sorry, Sir!
周星星：你噉做系咪想成世做卧底？
达叔：系！
周星星：咩话？
达叔：冇，噉过瘾嘞嘛，我而家咪擸埋支炮陪你去死啰。
周星星：立正望住我！嘴你！（嘴达叔）冚家铲！

（停车场）
周星星：系呢个停车场啰。
达叔：系呢度喇。
周星星：边架车？
达叔：我点知呀？
周星星：噉点呀？
达叔：咪逐架车揾啰。
周星星：揾你个头。（警报声）
达叔：喂，做咩？
更佬（听到声）：喂，出去睇吓！出去。
甲：有冇嘢呀？
乙：架车冇嘢。
甲：噉点解会有声嘅？
乙：周围睇吓。

（周星星揾到装军火嗰架车）
达叔：哗！劲嘢！全部都系长枪嚟嘅？（揾到一支手枪）呢支短嘅。
周星星：系，系警枪嚟架，系呢支。（达叔揽住啲枪谂住走）你做咩呀？
达叔：擸晒佢返去呀嘛。
周星星：成车车走吖嘛，摆返低佢。（达叔摆低啲枪）
周星星（坐喺驾驶室）：搞掂未呀？
达叔：搞掂啦！（车开动，但系自己重未上车，死蠢嚟架）我未上车。我未上车呀，喂，喂，喂，我未上车呀！

（大飞同班鬼佬现身）
鬼佬：What seems to be the problem?
翻译：Everything under control, don't worry, OK?

（公路上）
周星星：阿头，够钟起身屙尿嘞。屙完涿尿有啲正嘢畀你睇。

（差馆，周星星架车停低）
王晶：你晨早流流call醒我，冇话畀我听系冇事吓。
周星星：梗系好嘢啦。
王晶：好嘢？
周星星（将失枪交畀王晶）：袋返佢呀。
王晶：啊！哈哈哈！估唔到可以破镜重圆吓，醒目！
周星星：唔好喊住呀，陆续有嚟。
王晶：重有？
周星星：醒吓啦，喂！
（拉开车门）
王晶：哗！哗！哗！喺边度揾返嚟架？哗！临退休整单噉嘅嘢畀我呀。郇啰！郇啰！唔退休呀，港督都有得做呀。

（大飞手提响）
翻译：拍硬档等多阵啦。
大飞：周星星你好嘢，起我批枪？想唔想听你老窦把声呀？
达叔：阿仔呀，我暂时未有事，但系呢……
大飞（攞返电话）：喂，听住，如果你想见返你老窦架，半个钟头之内嚟学校后山揾我。记住，千祈冇玩嘢呀！
翻译：喂，咁耐架，个鬼佬好唔耐烦呀。
僆：得喇，而家咪call紧佢啰，咁心急做咩啫？
大飞：叫个鬼佬咪咁多叽咭，半个钟头之后一定有枪畀佢睇。

（差馆）
王晶：你咁激动做咩啫？啲枪喺我度，有咩事呀畀飞虎队嚟喇，飞虎队会搞掂架嘞。
周星星：如果噉做达叔就更加危险。
王晶：喂，佢做差人架嘛，佢做卧底架嘛，预咗架啦，几呀岁人嘞。喂，嗱，嗱，我知你做咩架，你又想逞英雄呀嘛？嗱，你唔好呀，与其畀人打死，我不如一枪打死你呀。（支枪 畀周星星夺走）喂，喂，大佬，呢只善良之枪嚟架。喂，唔好呀！佢卅几年都未开过架。你唔好攞去呀。喂！你而家算点呀？你开车呀？你够胆开车，够胆开车畀我睇吓。你试吓够胆冇返嚟！哈，而家啲后生仔真 系够胆。

（周星星单刀赴会）
（学校后山）
大飞：啲枪呢？
翻译：Weapon are there.
周星星（打开车门）：放我老窦呀。
大飞：带个过去睇吓。
翻译：Follow me! Follow me!
达叔：喂，阿星呀，我无端端……
翻译：Go ahead!（鬼佬鱼贯而入）
鬼佬：What smell? It's gasoline.
（周星星点着火机抌入车，架车爆炸）
达叔：烧银纸呀，烧银纸呀！（走去攞钱箱）
（大飞开枪）
周星星（用王晶嘅手枪还击）：开唔到嘅？喂，唔系真系咁善良吓哗？走啦！

（周星星同达叔跑返学校）
达叔：返嚟学校做咩呀？咁多同学，想害死佢哋咩？
周星星：使你教咩？今日假期嚟架。
达叔：噉咪重惨，冇人帮手。

（啲学生喺学校搞紧活动）
生物老师：钉高啲，喂喂喂，玩乜嘢？企度！做咩呀？重玩气枪添，唔使帮手呀？揸住，帮手呀！你都系吖，你都要帮手呀。快啲去做。
某同学：喂，个迷宫星哥设计架。佢又话返嚟帮手，（睇表）而家咁晏嘞，重未见人嘅？
番薯：唔系嘞，我谂星哥九成畀差佬捉咗。
黄小龟：傻啦，点会呢？Miss Ho见过吖嘛。
某同学：真系架？
番薯：系咪真架？
黄小龟（问Miss Ho）：Miss Ho，Miss Ho，星哥冇事呀，呵？
Miss Ho：冇事！
黄小龟：系咪呀？做嘢啦，乱噉噏！
生物老师：喂，成嚿望夫石噉，冇咩事吖嘛？
Miss Ho：冇事呀！
（周星星同达叔冲入嚟）
达叔：咁多人嘅？
周星星：喂，放假你哋重返嚟做乜鬼呀？
达叔：快啲走呀，呢度好危险呀！
周星星：快啲走呀！
生物老师（惊诧）：哗！乜达叔走得咁快架？

（迷宫）
周星星：跟住我喇！
达叔：等埋我呀！
Johnny：大镬！
大飞（问Johnny）：见唔见周星星呀？
Johnny：唔知呀！
小妖：喺入便嗱。
Johnny：喂，阿大，揾佢咩事呀？
大飞：唔关你事！
僆：行开！
大飞：揾人（目及）住啲后生，马骝，嚟！（走入迷宫）嗰便！

（迷宫出便）
生物老师：喂喂喂，你想点呀你？
僆：唔关你事，冇出声！（撩Miss Ho）靓女，咩呀？惊呀？！（收埋枪）噉样唔惊喇。
（同学两三下收服咗个僆）
同学：搞掂！
Miss Ho：Miss梁，你去报警先喇，快啲去啦。
黄小龟：我哋去救星哥！
Miss Ho：唔好呀，佢哋有枪架。
黄小龟（举起气枪）：我够有枪咯。（冲入迷宫）
同学：我够有咯。
Miss Ho：喂，唔好呀！
同学：喂，冇阻住！
（Johnny擸起个僆身上嘅枪）
Miss Ho：喂，你做咩呀？
Johnny：死过！（冲入迷宫）

周星星：跟喺我后便行！
达叔：喂，喂，喂，等埋我！
（大飞赶到，开枪）
大飞：存孝，上！

（周星星同达叔走入迷宫中心）
周星星：喂，嗰个入口嚟架，天才！
达叔：我点知啫？度度门都一样。
周星星：所以你要跟住我呀嘛，死蠢！

（出口）
周星星：到嘞。即刻出去同阿头联络。
达叔：噉你呢？
周星星：里便重有成班僆仔，我唔返去又点得呀？
达叔：但系呢枪唔开得架。
周星星：我有办法啦。
达叔：唔好嘞，我留喺处帮你啦。
周星星：出去拖马啦，今年贵庚呀，帮我？（行返入迷宫）
达叔：喂，喂！

（大飞同班僆喺迷宫中心相遇）
大飞：点呀？见唔见？
僆：冇。
大飞：阿坚，你哋过嗰便，其他跟我嚟！
（大飞喺度门上便划咗两道痕）

僆A：喂，扭咗转左啦。
僆B：转啦，你转咗先啦！又左，转左！
黄小龟（匿埋喺暗角，用气枪指住僆B）：细佬，咪喐！叫咗你咪喐架啦。
（同学四窜）
同学：走呀，快啲呀！
（某同学中枪）
某同学：喂，阿宝中咗枪呀！快拉佢出去！
Johnny：走呀，快啲走呀！（开枪）死呀！
黄小龟：走啦，重唔走，想死咩？
某同学：走啦，嗰边，嗰边呀！

大飞（突然间现身）：走呀，走呀，死靓仔！
Johnny：嗰便呀，走啦！爽手啲啦！
大飞：一枪打死你吖嗱！

（迷宫中心）
（周星星声东击西）
周星星：走鬼吖！
（喺啲僆嘅手枪入便揾子弹，揾唔到）
周星星：又冇？死你都唔剩返粒畀我？啊！你咁绝你？吓！
（黄小龟同Johnny冲入嚟）
黄小龟：星哥！
Johnny：星哥！

（迷宫出便）
大飞：周星星，你听住！而家班靓仔喺我手上。我畀五分钟时间你，如果你重唔出嚟，我就杀晒佢哋。
黄小龟：死嘞，星哥，佢哋真系会开枪架。
Johnny（举起手枪）：我出去同佢搏过！
周星星：做咩呀？冇嘈！冇嘈！冇出声呀，冷静啲，冷静啲，听唔听到呀？听唔听到呀？你哋最叻系咩呀？
黄小龟：死嘞，死嘞，今次真系死嘞。
周星星：顶你个肺！你即刻收声！听我讲，你哋最叻系咩呀？
Johnny：沟女！
周星星：除咗沟女呢？
Johnny：冇嘞。
周星星：系玩吖嘛？你沟女都系为咗玩啫？唔通谂住结婚咩？OK，我哋而家就同佢玩一镬，我哋当系一个游戏，但系呢个游戏唔输得架，输咗会死人嘅。够刺激呢，未玩过呢？
Johnny：未呀。
周星星：但我可以话你听，我哋输嘅机会系零。只要我哋三个通力合作。我系司令，你两个听我指挥。喺呢个环境底下，我哋占尽天时地利人和，百分之一百会嬴。最紧要有信心。有冇信心？有冇？有冇信心？
Johnny、黄小龟：有！
周星星：Good! 出击！

周星星：里便有六个人，有冇架撑？攞嚟！
黄小龟：气枪！
周星星：唔要气枪！
Johnny：嗱。（畀把枪周星星）
周星星：都话唔要气枪。
Johnny：真枪嚟架，重有五粒子弹喺入便添架。
周星星：得五粒子弹？
大飞：周星星，你好快啲出嚟嘞。
周星星：都要搏一搏嘞。对表！（睇表）啱晒，照计划进行，清唔清楚呀？
Johnny、黄小龟：哦！
大飞：周星星，你好行出嚟嘞，行出嚟呀！好，你当我流架吓。（开枪）听到未呀？我逐个搞掂佢哋架。重有二十秒。
（Johnny同黄小龟各自埋位）
大飞：做咩？重唔出嚟？（用脚踩啲学生）出嚟呀，出嚟，我一枪一件，搞掂晒佢哋。重唔出嚟，出嚟呀，（拉起一个学生）你信唔信我打爆佢嘅头？信唔信？唔系吓哗？好！
（Johnny拉下电闸，霎时间一片漆黑）
（黄小龟将一嚿嘢抌落嚟，吸引注意）
（周星星用五粒子弹搞掂咗五个人）
周星星：走，走，快啲！

（大飞挟持住Miss Ho）
大飞：开枪呀，开枪，够胆你又开枪。
周星星：我惊你唔够胆咋。
大飞：唔紧要架，第一个就佢死先架。
周星星：随便，关我叉事！想遮住呀？点遮都中你。有版畀你睇呀，嚟呀！
大飞：你想抛我呀？！
周星星：我一枪打死你都重得呀。
大飞：嚟呀，开枪呀！
周星星：开咪开！
大飞：数三声大家一齐开！
周星星：数呀，
周星星、大飞：一、二、三……
周星星：OK，OK，对唔住，我错，唔好意思。
大飞：我都话你唔够我玩架喇。
周星星：何必咁认真呢？
大飞：放低枪！
大飞：褪后！褪后呀！（放开Miss Ho）啲钱喺边度？
周星星：唔喺我度！
大飞：啲钱喺边度？啲钱呀？
达叔：啲钱喺呢度！即刻放低支枪。（倒汽油喺啲钱上便）
大飞：你够胆，如果唔系我一把火烧晒啲钱佢。
周星星：大家一镬熟呀！
达叔：喂，有冇火呀？
周星星：你冇火？
达叔：冇呀，你呢？
周星星：冇呀！
达叔：飞哥，方唔方便借个火用用呀？
大飞：火呀！
（一条僆慌失失噉行入嚟）
僆：大佬，小心呀，快啲走啦！

（王晶以一身好酷嘅造型露面）
周星星、达叔：哗！好有型呀！
王晶：够胆同我驳火？！即刻出嚟！重想喐我？出嚟！出嚟呀！
大飞：冇开枪呀！
王晶：放低枪！
周星星（见到危险）：阿头！
（王晶畀大飞打倒）
（千钧一发嘅时刻，周星星攞出手枪掟大飞）
周星星：中！
（周星星用铰剪脚夹住大飞个头）
周星星：僆仔，我唔系咩星字头大佬，我系皇家香港警察，绰号夺命铰剪脚！记住嘞。（锁住大飞）
（王晶睇枪）
周星星：阿头！
王晶：噉样掟我支枪？容乜易整花架？
周星星：我冇办法唔掟，你支枪开唔到架。
王晶：我一早话畀你听，呢支系善良之枪嚟架嘞嘛。你想用佢嚟杀人？哼，你真系吖！都算你几醒目，掟得几准。冇枉费皇家香港警察对你一番栽培。
周星星：呢啲唔系皇家警察教架，系我喺学校学返嚟架。

（出便有警笛声）
王晶：哎！啲伙计嚟嘞。嗱，我走先啦，当我冇嚟过。你搞掂晒佢啦，周总督察！
（周星星拦住王晶去路）
王晶：做咩？做咩呀？
周星星：总督察？！
王晶：我话你系又系喇。
周星星：喂，唔系总警司咩？

（周星星喺班学生嘅簇拥之下行出Edinburgh College）
（周星星同Johnny、黄小龟扼手）
黄小龟：星哥！得闲咪返嚟饮茶啰。
其他同学：得闲咪返嚟啰。
周星星（将自己嘅大哥大送畀黄小龟）：呢个电话送畀你，call我！call机响，我会即刻返嚟。
Johnny：保重呀！
周星星：保重！

（Miss Ho摆一个靓甫士企喺门口）
众同学：星哥！你发达啦！
周星星：系吖！系吖！
众同学：重唔上？！
周星星：呀！（畀推出去）

（全剧终）