（夕阳下，一男子同三人搏斗）
黑熊：排山倒海！（将另外一个人踢上天）
（三人畀打到呻吟不止）
学员甲：坚呀！
学员乙：猛料呀！
学员丙：厉害吖！
学员丁：恐怖呀！
（队友想去扶起摊喺地下嗰三个人）
黑熊（摆手）：唔准扶！（踢三个）自己起身！成班都蠢材！一啲进步都冇！练习到此为止，解散！（鞠躬）
学员戊：主将呀，你头先嗰招……
黑熊：滚！（走去阿丽身边）我讲过几多次，唔准喺道场食香口胶！
阿丽（吐出香口胶，黐喺身上）：你真系好犀利呀，
黑熊：系？
阿丽：系吖！头先呢，你使出嗰招绝招排山倒海嗰阵嗱，哗！真系好有男子气概吖！加上你啲头发呢，系噉扬嚟扬去，好有型呀。
黑熊（摆头，好cool噉款）：噉你今晚得唔得闲？嚟我屋企睇电视呀，我张床好大，好舒服架。
阿丽：呵呵！黐线架。

（浴室）
肥妹：喂喂喂！头先主将黑熊咪走埋嚟沟你嘅，佢都几型呀，乜你唔骚佢嘅？
阿丽：黑熊？（学黑熊把声）嚟我屋企睇电视呀，我张床好大架。（扮作呕）
其他人：好似呀！扮得好似呀！
肥妹：讲畀我听呀，咩条件先符合你嘅要求呀？
侧边个女仔：系吖！
阿丽：佢一定要系一个心地善良，斯文大方，真正勇敢嘅——英雄。（摆甫士）
肥妹（扐出一张报纸）：有冇英雄就唔敢包嘞，想要俊男美女呢，玩line啦。嗱，（读报纸）灵气迫人，天生丽质，36 24 36，寂寞的我愿与你共享禁果。4567呢个咪就系我个冧巴啰。不过你记住呀，千祈唔好打电话畀116呀，佢出咗名“摷完就走”架嘞。但上次，佢一见到我即刻走咗。摷都唔摷。
阿丽：噉咪好啰，唔使摷到乱晒。（笑）
（肥妹狂笑）
阿丽：快啲去换衫啦，重讲！傻妹！
肥妹（转身）：阿丽呀，话时话，喺而家噉嘅年代，重边度有英雄架？


　　 ----阿丽望向壁柜门上的施瓦辛格海报，灯光变换，镜头缓缓向施瓦辛格头像拉近，淡出换镜。月黑风高，一小巷内，垃圾工人甲在垃圾车后捡垃圾。突然电闪雷鸣，阿甲发现前方跪着一起跑姿势裸体男子，不禁惊落嘴上香烟，转身而逃----

（何金银慢慢站起来，表情严肃地环顾四方，忽然一束光照在他脸上，何金银马上低头抱胸）

警察甲：就系你报警吓哗？
何金银：（点头）系吖，Sir。
警察甲：（打量）畀人抢晒嘢呀？
何金银：攞晒啲嘢。
警察甲：咩名？
何金银：何金银。
警察甲：身份证？
何金银：阿Sir，你睇我而家全身重边度揳得落张身分证？
警察甲：噉你认唔认得嗰个老笠你个样个人嗱？
何金银：唔明。（蓦然）
警察甲：我系问你呀，认唔认得老笠你个样个人个人样呀。
（何金银茫然，听极唔明）
警察乙：等我嚟呀，师兄。阿Sir系问你认唔认得老笠你个人个样呀！
何金银：认得佢算数嘞，其实我系自愿。
警察甲：自愿？何谓自愿嗱大佬？
何金银：件事系噉嘅，正话我经过呢度，有个衣衫褴褛架男人走埋嚟问我攞廿文买嘢。噉我见佢几可怜就畀佢喇。点知佢又话，重有个老婆同个仔冇嘢食冇衫着，好冻。自走埋嚟除我啲衫，攞埋我银包，重问我介唔介意。噉我话：介意梗有啲嘅，但你咁惨，咪由佢啰。条底裤我自己话要除架添，我见横掂都系啰，帮人帮到底吖。但系我惊畀人拉，话我当街露械，所以我报定警，大家沟通咗先噉啰。就系噉。
警察甲（沉默片刻）：明白！（扐起对讲机）PC26324，喺街口发现一件露体狂，怀疑有轻度弱智兼阻差办公，即刻派架车嚟呀，唔该。
何金银：你有冇听错呀？需唔需要我再重复多次你听？
警察甲：行喇，弱智露体狂。
警察乙：收嗲啦！
何金银：阿Sir，我讲真架，正话真系好可怜架！
警察甲：呢个世界有你啲噉嘅人真系可怜喇！
（何金银被带走）

（街头某角落，乞儿一家人）
某女人：阿仔，起身嗱，有嘢食呀。
某男人：老婆呀，一阵你两个试吓啲衫睇吓啱唔啱着，头先个人真系好心。
某女人：乜呢个世界重有啲噉嘅人嘅咩？

（何金银送完外卖返到去荣记冰室）
何金银：我返嚟喇。
返嚟咪返嚟啰，好叻咩？
伙计：咁辛苦，润润佢先呢？
何金银：唔该你呀！（饮）辣嘅？！
伙计：唔够辣呀？加多两滴呀。（发癫）
（老板走埋嚟）
何金银：老板嗱，下次菠萝嗰啲咁远嘅地方呢，你唔好要我送嘞。一系嗰条长命斜呢，我差啲yap唔上。
老板：笨！天将降大任于斯人也，必先劳其筋骨，饿其体肤，苦其心志。呢转走去屯门！
何金银：唔系呢，我真系顶唔顺。
阿牛：阿银，老板真系惜你呀，我羡慕到你咩噉。
何金银：你玩我啫，阿牛。
阿牛：吆！噉都畀你睇穿嘅？

某客仔：老板！点解我碗汤里便有只乌蝇架？
何金银（埋去）：睇过。咦，小强！
客仔：重嚟呢招？！（推开何金银）汤我就饮咗几啖嘞，只乌蝇重生勾勾喺度叠背蛙捷个人四式表演，似乎喺度嘲笑紧我噉。
老板：你唔使讲，我哋做餐厅至讲卫生，（擸起乌蝇）呢啲噉嘅害虫，唔好话你，我都至憎嘅。（抌落地）踩死佢！哎吔！想走？我唔信踩你唔死。帮拖。
某客仔：使唔使呀？
伙计：飞落人碗汤吖嗱？飞落人碗汤吖嗱？！
老板：拦住嗰便。唔好畀佢走！拗跛佢对脚！
何金银：我哋做生意至讲卫生架，我点都帮你出返啖气架。
某客仔：喂，我想换过碗汤啫，使乜搞到咁大呀？你bat7畀我啦！
何金银：哦！噉咋吓哗？！喂，大家停停先。
老板：只乌蝇喺度呀。（暴打何金银）
某客仔：喂，当我唔啱呀。（摆低钱，走咗）
老板（停手）：冇事！冇事！冇事！
伙计：大家返埋位饮茶。

老板（教导伙计）：嗱，我哋如果唔系去到咁尽呢，汤就唔会悭返一碟，银纸又唔会照收。所以凡事要尽力而为，啱唔啱先？
众伙计：啱嘅。
老板：大家做得好好呀。
何金银：Yeah!
老板（含住烟仔）：你就过晒火位嘞，打只乌蝇使唔使爆樽嗱？
何金银：我都系尽力而为啫。
老板：个啤酒樽值五毫子架，蠢材！
何金银：啤酒樽喺边嗱？
伙计：呢，喺嗰度。（手指何金银箩柚）

（阿丽同黑熊切磋武功）
阿丽：主将，我呢招点呀？
黑熊：非常好！阿丽，你系我生命中唯一挞倒我嘅女仔。阿丽，今日我生日，嚟我birthday party呀。
阿丽：而家上紧堂，好多人望住架。咪噉喇。
黑熊：你唔应承我就唔放手。
阿丽：黐线架你！放手呀！

（条友搭何金银嘅车）
条友：喂，唔该晒。

（体育馆内）
黑熊：哎！今晚唔得闲算嘞，听日礼拜日得闲嘞啩？嗱，我有两张张学友演唱会飞，一齐去啦。
阿丽：听日呀？我姨妈到，唔出得街。
黑熊：咁啱嘅？我又系。（笑）真系跷呀！

A（拍何金银头）：送外卖呀，阿银？
B（拍何金银头）：早晨！
C（拍何金银头）：早晨！
D（拍何金银头）：早晨！
E（拍何金银头）：早晨！
F（拍何金银头）：早晨！
G：喂，醒件蛋治嚟食得唔得呀？
何金银：畀钱咪有得食啰。
G：啊！你咁醒嘅你！
H：阿银，见你冇女朋友，醒件畀你嘞。
女：好衰架你呀！揾啲噉嘅嘢玩！
H：益你啫。

（体育馆内 黑熊重喺度缠住阿丽）
黑熊：生日party唔去又算嘞，birthday kiss都要整返个嘞啩？（欲吻，阿丽拧转面走开）
黑熊（拉返阿丽）：阿丽，其实我明益你架。你知唔知几多女仔黐埋嚟我都唔骚佢。点解你唔好好把握呢个机会啫？
阿丽：系吖，我都唔知点解。惜边个都得，不过，系唔想惜你。
黑熊：惜边个都得？！
某甲：打死都唔信嗱。
黑熊：嗱，阿丽，你唔好呃你自己吖。你其实系爱我架。我话畀你听呀，你惜边个都唔得。
（何金银冲入嚟，阿丽走出去）
何金银：唔好意思，嚟迟咗少少。
黑熊：只可以惜我！
（阿丽嘴咗何金银一啖）
黑熊（手指阿丽）：嗱，唔好喺我面前玩啲噉嘅嘢呀。即刻返过嚟！
何金银（手捂面）：吓！揾啲噉嘅嘢玩，发生感情点算嗱？
（阿丽发嬲，惜都何金银一啖添）
（阿丽扮鬼脸畀黑熊睇）

阿丽（同何金银讲）：想唔想去睇张学友演唱会呀？一齐呀。
何金银：好忙架，呢啲。
阿丽：忙咩呀你？行喇。
（拖住何金银只手走出体育馆）
黑熊：喂，你两个企喺度呀！企喺度呀！
某甲：唔好咁激，噉会搞出人命架。
黑熊：你够胆行后门？！
某乙：黑熊主将，陈主任有事揾你呀。

（何金银拖住阿丽喺街度走）
何金银：其实学友呢我本身都好喜欢嘅，所以你咁有诚意呢，我陪你亦无妨。但系最好拣星期三啦，因为我成个月先得嗰日有假。
路人甲（惊奇）：咦？！点解外卖仔会同环球之花一齐嘅？

（阿丽同何金银碌木噉样企定，拖住手）
何金银：如果你一定要今日去嘅话，你介唔介意我戴帽？再唔系畀少少时间我电电个发先，因为我本身嘅发型可能同你唔系好衬。可以吗？
阿丽（松开手）：啊，唔好意思呀，我头先冇问过你就惜咗你一啖，其实同你开玩笑架咋。
何金银：开玩笑？
阿丽：系吖。
何金银：哦！噉我放心嘞。唔紧要嘅，傻啦。呢一类似嘅情况都经常性发生喺我身上。
阿丽：拜拜！
何金银：你走先嗱。我等我嘅脚冇咁震，个心冇咁乱嘅时候，我都会走架嘞。
阿丽：真系唔好意思呀，我有咩可以帮到你架？
何金银：冇，傻啦，冇乜嘢架，完全唔系问题。坐坐冇事嘅。
阿丽：点称呼呀，哥哥？
何金银：小姓何，送外卖嘅。哎吖，今日冇带卡片添。
阿丽：何生吓？我叫阿丽吖。
何金银：阿丽，你好。拜拜！
阿丽：噉系噉先，拜拜！
何金银：阿丽呀，你正话话睇张学友演唱会嗰啲都系讲笑架咋？
阿丽：我都好想去架，不过我知好难买飞架。
何金银：未必嘅，只要有恒心，铁杵都能够磨成针架。（笑）
阿丽（笑）：拜拜！
何金银：拜！

（售票处走廊内，何金银睡眼惺忪，头发蓬松，从一小帐篷中探出头来刷牙，身后跟着很长的人龙。售票处门外，学友歌迷正在助威）

学友歌迷：学友学友！永远支持你！学友学友！永远支持你！学友学友！永远支持你！学友学友！永远支持你！
某黎明fans：（大嗌）我爱黎明！我爱黎明！我爱黎明！
众张学友fans：死老坑，死呀你。……
（学友歌迷蜂拥而至狂殴老头。镜头转至走廊内，某男走到何金银身边蹲下）
某男（扐出一千文）：阿生，我畀一千文你买呢个头位。
何金银：（摇头）对唔住，呢个位对我好紧要。
某男：我应承我女朋友一定要买到演唱会飞嘅。（攞出二千文）一口价，二千！
何金银：唔系钱嘅问题，而系买飞应该凭自己架努力。好似我本身都牺牲咗呢个月唯一嘅一日假期嚟排通宵队，（某男叹气起身走）试问你点可以咁取巧？（何金银拉返某男）如果你畀你女朋友知道你用啲咁“乸渣”架手段，我思疑佢会睇你唔起。
（一穿吊带裙的女子走到何金银身边蹲下，一边吊带滑落）
某女：喂，哥哥仔，我应承我男朋友一定要买到飞架，畀你个头位我呀。
何金银：对唔住，我唔可以架。
某女：最多我畀你揸一下个波呀。
何金银：（耷低头睇某女个波）一下咋？
某女：唔系你想几多下？
何金银：起码都三四下啦。
某女：有冇搞错呀？
何金银：如果我系你，为咗个男朋友，莫讲话三下，就算系三十下都会毫不犹疑噉应承。
某女：唔系咁过分呀？黐线！
何金银：你都唔肯为爱情牺牲嘅，你呢世都买唔到飞架。
（一老婆婆走到何金银身旁，阿银马上站起来）
老婆婆：阿生呀，我个孙仔叫我买飞睇学友呀！人龙又咁长，你可唔可以让个位畀我买飞呀？我好惜个孙仔架。
何金银：阿婆，虽然你又冇钱又冇波，但系你既然间咁惜个孙嘅，我就让个位畀你。
老婆婆：先生，你真系好心呀。
何金银：唔好客气。
老婆婆：你一定有好报架。
（售票处开门，人群汹涌而入，何金银随阿婆扑到窗口前）
保安（用警棍打人）：排队呀！企好！
何金银：畀两张三百二架，唔该！
售票员：对唔住，啲飞畀阿婆买晒嘞。
何金银：喂，两张咋。喂喂喂！
售票员：我哋呢度系配售到廿张咋，卖晒嘞！（猛挥警棍）冇呀！冇呀！松手！松手！冚棒冷松手！走呀！
（何金银喺人群之中钻出）
何金银：阿婆！阿婆！阿婆！
（场面极其混乱，人群在骚动，何金银弯腰追寻老婆婆，镜头随阿银移动，两个保安拿盾牌持警棍向人群乱打，一保安手持AK47向天扫射，何金银终于找到老婆婆）
老婆婆：乜嘢呀？
何金银：阿婆，你做吓好心，你让返两张飞畀我得吗？
老婆婆：啲飞畀晒我孙仔啦。
何金银：边个你个孙呀？喺边度呀？
老婆婆：就系下便个黄牛成啰。
（何金银向门外望去，一男子手持门票大喊：“有飞卖，每张加五百！连位加一千！要买趁手喇。先到先得！”顿时人群一起向门外涌去，何金银失足滚落楼梯）
某甲：喂！僆仔！冇打尖啊！！
何金银：（滚至黄牛脚下，头破血流）两张呀，唔该！（递上钱）
黄牛：冇问题！（接过钱正欲给票阿银）
警察：（突然出现用手铐锁住黄牛）僆仔！
黄牛：阿Sir！
警察：喺度炒黄牛？！
黄牛：畀次机会，阿Sir！
警察：跟我返去！行呀！（把黄牛带走）
黄牛：唔好意思呀，各位！
（何金银晕低）

（售票处外一遍狼籍，何金银坐在楼梯上抱头苦恼）
学友：乜一个人坐喺度重唔走？
何金银：（低头）我只系想买两张飞咋，噉都买唔到。个天对我真系唔公平。
学友：傻架，你梗系买唔到，喺晒我度。
何金银：（抬头，惊诧）学友？！
学友：送畀你！
何金银：学友，我爱你！！
学友：你唔好噉，我已经有咗女朋友。
何金银（写信）：阿丽，张学友嘅出现令我相信呢个世界系有奇迹。同时令我有勇气大胆嚟约你。现附上张学友演唱会飞，希望与你一起欣赏。明天下午三时喺大门口小巴站等。阿银。

（阿丽同几个同学一齐走出体育馆）
何金银：阿丽！
阿丽：何生！你好！
何金银：咁啱嘅。
阿丽：系吖！
何金银（攞出一件蛋治）：啊！请你食件蛋治呀！
阿丽：对唔住呀，我唔食蛋架。
肥妹：好喇！好喇！行喇！行喇！哎！走喇！
阿丽：拜拜！
（何金银第一次食柠檬）
何金银（递上蛋治）：阿丽吖，你唔食，一系攞返去畀你阿妈食呀。
肥妹（抢过蛋治）：哎！怕你呀！等我食喇。（将蛋治吞落肚）
何金银（双手抱头）：救命呀！个八婆食咗我件蛋治呀！

（肥妹觉得唔舒服）
肥妹：我喉咙好唔舒服呀，硬系有啲嘢噉呀。
伙伴甲：做乜嘢呀？你冇事吖嘛？
阿丽（拍肥妹背脊）：我帮你挞挞背脊吖。
肥妹（呕出张纸）：咩嚟架？

（何金银好失落噉荡嚟荡去）
肥妹（嚟到何金银面前）：喂，寻晚你张演唱会飞都累得我惨咯。我畀人打到呕电嗱。外卖仔，阿丽喺小巴等紧你吖。
何金银：真嘅？
肥妹：梗系喇。好请饮茶添呀。
何金银：请埋宵夜点话？Yeah!（劲开心）

（何金银见到马路对面嘅阿丽）
何金银（跌咗落地，爬返起身嘅时候唔小心掂到嚿屎）：我得架，我完全冇问题嘅。
阿丽：何生，你好！
何金银（伸出手想同何金银握手，何金银唔肯伸出手）：你好，阿丽！送畀你嘅。
阿丽（睇到礼物）：哗！多谢你呀！（伸出手想同何金银握手，何金银依然冇伸只手出嚟）
阿丽：揸吓手先嗱。
何金银（伸出只脚）：好呀，嚟呀。
阿丽：你好怪呀，我从来都未识过人好似你噉嘅。
何金银：过奖喇。
阿丽：点都好喇。（又想扼手）我要多谢你嘅演唱会飞。
何金银：阿丽，你噉又何苦呢？
阿丽：嚟吖，唔使怕丑。
何金银：咪啦，唔好迫我啦。
黑熊（突然出现）：你哋又好啦。
何金银：喂，唔该晒你呀真系。
黑熊（同何金银揸手）：唔该咩呀？
何金银：总之唔该呀。
黑熊：鬼鬼鼠鼠，你身有屎呀？
何金银：哎！中呀！
黑熊：外卖仔，寻日一识就打茄轮，今日都怕开房喇。
阿丽：你讲咩呀？呢个我朋友嚟架。（用手指厾黑熊）我唔该你尊重啲呀！
黑熊：我系要玩你，咩？唔信嗱？打我呀，打嘞嘛，唔够胆呀？嚟呀！嚟呀！嚟呀！嚟呀！
（黑熊自己拿屎上面）
何金银：重打咩呀？你已经受到应得嘅惩罚。
黑熊：咩嚟架？
何金银：相信系屎嚟架。但唔好问我边个屙，我唔知。
黑熊（兴过火屎）：仆街仔！你好玩唔玩屎？
（黑熊一拳误将阿丽打出九霄城外）
黑熊：你个人渣，你揾啲意闪开？你噉都做得出嘅？你重系人嚟架？你个懦夫。

（阿丽喺度照镜）
阿丽母亲：阿丽吖，快啲落嚟睇电视呀。
阿丽：唔落呀。
阿丽母亲：阿吴刚师父又试除衫表演心口碎大石呀。
阿丽：都话唔落咯。
阿丽母亲：你冇事吖嘛？
阿丽（闩埋度门）：冇事呀，冇嘢呀。
阿丽母亲：哎吖！你睇吓，除衫喇，除衫喇。……
阿丽：我唔睇吖，唔睇吖。
阿丽母亲：好精彩吖，佢而家搽紧油呀。
阿丽：你唔好烦我啦！
（何金银爬上电灯杉喺阿丽面前出现）
何金银：Hi，阿丽。
阿丽：你做咩呀你？你点会喺度架？
何金银：我专程嚟向你道歉嘅。
阿丽：傻啦，你做乜要向我道歉啫？都唔关你事。
何金银：噉你冇嘢吖嘛？
阿丽：冇嘢。
何金银：真系冇嘢？
阿丽：真系冇嘢。
何金银：你呃我嘅。正话系噉意自己窝槌个鼻都痛到飙晒眼水，家下都重赤住。
阿丽：对唔住，你听我讲，我真系冇事，唔使你担心。
何金银：都唔系架，阿丽。我点都坚持你去医院验验好呀，因为鼻嘅嘢好长手尾架。少少嘅嘢可以导致鼻腔内出血，甚至鼻窦炎，一个唔好彩你话整个鼻咽癌，就真系，真系死咗唔知咩事真系。
阿丽：你讲完未啫？而家真系好夜嘞，我要瞓嘞。你舍得走未呀？重有，畀返你。（丢出何金银之前送畀佢嘅礼物，何金银接唔到，礼物跌落地）
何金银：阿丽，你唔好噉对我呀。你畀多次机会我呀。因为我对于我哋呢份感情呢都睇得好重吓架。
阿丽：何生，我谂你误会咗，我系唔钟意啲懦弱嘅人。（拉埋帘）

（何金银好失落）

（第二朝 体育馆内，黑熊喺度吹水）
黑熊：我一拉弓，都未打到佢。佢吓到跪喺度嗌阿妈嘞，喊到成只死狗噉呀。重有，你知唔知我打到边个呀？
旁人：边个呀？
黑熊：我舂咗落阿丽嗰度呀。我一拳打到佢飞起码九尺咁高，转体都超过七百二喇，真过瘾喇！
何金银（气势汹汹走嚟）：你打伤咗人重喺度唱？你点能够做出啲噉嘅事架呢？即系譬如你寻日揩到成面屎噉，唔通我又四围话畀人听？
甲：你寻日揩到成面屎呀？哈哈哈！
黑熊：你做咩呀？
何金银：我建议你快啲嗱嗱声同阿丽道个歉好。（做出打何金银嘅姿势，何金银缩低）
黑熊：呢，个懦夫寻日咪噉样缩低啰。
旁人：正懦夫嚟架。
（阿丽嚟到）
黑熊（擸起何金银）：咦，阿丽，你冇嘢吖嘛？唔好喐呀。我寻晚成晚打电话畀你呀，知唔知啫？你都唔听人电话嘅？知唔知人好担心你架。我成晚都冇瞓过呀。
阿丽（睇唔过眼）：停手，黑熊！你唔好噉啦。
黑熊：咩啫？快啲去送外买啦。唔好四围走呀。（掴咗何金银一巴）听唔听到呀？（踢咗何金银一脚）废柴！

（何金银狂奔，不幸食波饼，个波正中面门）
波友：死咗未呀，傻仔？
波友：懦夫仔，畀人打呀。
（何金银个脑一片混乱，谂起阿丽讲过嘅说话：我系唔钟意啲懦弱嘅人。）
（执起帽戴返）
波友：喂，做咩啫？傻傻哋架佢。
波友：啊，唔好理佢。练波。
……
（万分沮丧之时，何金银见到一块“懦夫克星”嘅牌子，即刻走去拍门）
（达叔开门）
达叔：喂，大佬呀，九点钟至开档呀，家下八点九，差几个字呀，做咩嘢呀？
何金银（细细声）：我系懦夫。
达叔：睇得出，寻晚就好嚟嘞，傻佬。廿文嗱。
何金银：廿文呀？
达叔：系吖。（扐出一樽印度神油）嗱，用之前薄薄地搽一浸，千祈唔好贪心呀。上次有条麻甩佬呢急功近利，浸住浸咗成晚，结果……
何金银：搞错咗呀，老世。唔该换返钱畀我呀，唔该。
达叔：大佬，你手掂过有指纹，噉我点换返钱畀你呀？
何金银：噉我换两罐啤酒饮吓得冇？
达叔：噉就得，补八文。啊！嗱，两文费事找嘞，畀包花生你呀，揸住呀。唔好望呀，再望收多你两文嗱。走呀！睇你嘅衰样呀，凿晒喺额头处啦。失恋样呀！
（何金银掩面而泣）
达叔：失恋嗱？系人都试过啦，几咁唔闲啫。第一次？
（何金银点头）
达叔：噉就伤啲，而家唔适宜饮啤酒架嘞。我觉得你呢最好就换套老例嘅衫冲喜吓，欣赏啱mood嘅音乐，同时呢食个靓早餐，噉个人嘅心情都开朗好多架喇。帮你呀。信我！嚟！嚟呀！

（达叔开启录音机）
达叔（介绍）：呢个系抵抗失恋冲喜套餐，靓衫靓歌靓早餐，全套加埋都系收你每六秒六毫，抵到烂嗱。觉得点呀？
何金银（装饰奇怪）：我感觉好似领你嘢。
达叔：系？嗱，你觉得领我嘢之余系咪开始忘记失恋嘅痛苦吖嗱？
何金银：好似系。
达叔：嗱，你试吓再领大镬啲，够胆你大声跟住佢唱出嚟，我担保你嘅痛苦烟消云散，唱呀。揸住咪。
何金银（揸住碌香肠喺度唱）：放弃她！
达叔：Yeah! Come on baby!
何金银（继续唱）：放弃她！
达叔：Yeah baby!你试吓望嗰便，唔好望住我。（偷笑）
（突然间一个波飞到埋身，何金银及时闪开，达叔中招）
波友：喂，老友，唔该执返个波过嚟呀。喂，落雨呀，快去避避呀。
（个波扁晒）
何金银：阿伯，你冇嘢吖嘛？阿伯。
达叔：傻啦，冇嘢，喫过夜粥，顶得住。
何金银：夜粥？
达叔：冇错，即系功夫，想唔想学？八折。

（士多后面）
（墙上便写住：中國古拳法）
达叔：呢度系体育中心里便历史最悠久嘅中国古拳法部，我就系中国古拳法嘅掌门人。
何金银：点称呼你呀，阿伯？
达叔：你可以叫我做魔鬼筋肉人，总之就唔好叫我做阿伯。好吗？
（何金银见到达叔只脚系嘅）
何金银：噉呀，魔鬼筋肉人，你间武馆又会开喺士多宝后便嘅？
达叔：开士多只不过系我兴趣，教拳至系我正职。同时我个人比较低调，至憎人就沽名钓誉架嘞。
（扐出一张自己同李小龙嘅合照）
达叔：嗱，我同李小龙根本呢就系两师兄弟，唔通我四围噉话畀人听咩？（又扐出张杂志大页）成龙弟呀，噉系都要同我饮茶，我就甚少应酬佢哋嘅，搞到佢喊咁滞，你有眼睇架喇。唔通我话畀你知咩？又唔系咩嘢咁架势？点呀？你想学咩呀？
何金银：噉有咩嘢学呢？
达叔（演示 插沙）：铁砂掌，源于泗水铁掌帮，威力无穷，任何人畀击中，五脏碎裂，而导致送院途中不治。哎吖！（渌亲）两日练成，收费六百。
达叔（演示铁布衫）：铁布衫，源于福建省以北七十公里，汕尾以南三十海里之南少林。练成之后全身坚硬如铁，刀枪不入水火不侵。五日练成，收费八百。
达叔（演示血滴子）：血滴子！源于明末清初，乃系大内暗杀组嘅独门暗器。取人首级于千里，易如反掌。由于杀伤力太强，所以揾个摇摇代住先。七日练成，收费一千。
达叔（演示电光毒龙钻，何金银倒）：电光毒龙钻！源于龙虎门嘅王小虎，原本只系幻想，但经我改良，已经成为一种闭杀嘅腿法。收费千五。
达叔（演示十字电光）：十字电光！源于咸蛋超人，曾经杀死无数侵略地球嘅怪兽，同埋暴君恐龙。七十年代疯魔几许青少年。但系我可以话畀你听，系假架。世上根本冇呢种武功，只不过拍戏用架啫，所以我唔讲你唔知。但你放心，童叟无欺，实事求是系我教拳嘅宗旨。
何金银：我呢……
达叔：事先声明，我收徒弟最紧要睇佢有冇潜质。所以就算你肯学呀，我都未必教。
何金银：噉我走先嗱。
达叔（挽留）：正话我哋重倾得好哋哋，你听得好高兴架。
何金银：唔系，价钱太贵。
达叔：价钱嘅嘢可以商量架咋嘛。赚得你好微架咋，老世。话唔定你有潜质我一毫子都唔收你哩。
何金银：系？
达叔：系。
何金银：不过，都系，都系唔好嘞，因为你脚又唔系咁方便嘅时候呢，即系我就唔想你咁辛苦嘞，对唔住，打搅晒。（行出去）
（达叔用功掹拍台，另外一只手做小动作，搞到只台好似畀佢打烂嘅噉样）
（何金银睇到呆晒，埋去睇碎片）
达叔：铁砂掌嘅至高境界就系以内力取胜。杀敌于无影无形。
何金银：真系咁犀利？
达叔：我个人真系好低调架，你唔好立乱话畀人听我有绝世武功。就当我系一个普通嘅跛佬。
何金银：唔知可唔可以打赢柔道呢？
达叔：柔道？哈哈哈！你唔系讲笑吓哗？梗系打谢柔道啦。中国功夫有数千年嘅悠久历史。古语有云：有功夫，无懦夫。
何金银：可唔可以教我呢？
达叔：都话咗未必教咯。不过尽管讲嚟听吓你想学啲乜嘢。
何金银：我想全部都学晒。
达叔：啊？！全部学晒，好贵架。而且重好辛苦添。
何金银：我唔怕，因为我要成为一个最强嘅人。
达叔：Very good! 就凭你呢对充满斗志嘅眼神，我肯定你系有潜质嘅。废话少讲，即刻畀钱，即刻拜师。
何金银：好！
（何金银交学费）
何金银：学费呀，师父。
（达叔想伸手攞）
何金银（缩手）：咪住。因为呢啲系我血汗钱，所以我……
达叔：放心啦，我明嘅。我好快就会将你训练成才架喇。
何金银：啊！咪住！
达叔：又做咩呀？
何金银：你又话有潜质唔收学费嘅？
达叔：问得好！你等等。（攞出一个捐款箱，写住：人人有功練）其实呢啲钱就唔系我袋嘅，系捐畀中国万千苦难嘅同胞，使到人人唔单止有书读，重人人有功练。
何金银：原来咁有意义架。
达叔：系咯，放落去啦。（何金银将钱放落捐款箱）
达叔：搞掂晒！你已经成为中国古拳法嘅弟子，恭喜你！

（何金银苦练功夫）

（体育馆 阿丽同何金银碰头）
何金银：阿丽，返学呀？
阿丽：系吖！
何金银：话啲嘢你听。（咬耳仔）我而家秘密练紧功夫。
阿丽：系咩？
何金银：系吖。可以大胆讲句，已经变得非常厉害。所以，以后有咩麻烦，你随时call我。夜亦都唔紧要，因为我好夜瞓。
肥妹（突然现身）：真系咁厉害？试试。（一拳打晕何金银）

（荣记冰室）
伙计：阿银入嚟嘞。（阿银喺店堂练功）
老世（老世一嘢掟埋去）：死仔！

（阿银插米）
老世：阿银，我叫你洗米啫，唔使咬牙切齿插足半个钟头呀。我啲米用粗口闹过你定系同你有杀父之仇呀？就算系吖，一刀咪插死佢啰，唔使阻住地球转嗱。
阿银：我练吓功啫，老板。
老世：哦，练功啫吓哗？噉揾我嚟练嗱。插我！插我呀，笨！
阿银：讲清楚有冇病先。
老世：你个死仔吖！

（肥仔攞嘢畀个客）
肥仔：嗱！
客：喂，咩嚟架？
肥仔：豉椒牛河，你叫架嘛。
客：我叫豉椒牛河兜乱嗱。
肥仔：换过畀你呀。
阿银（埋嚟）：唔使，唔使，等我处理。（兜乱晒啲豉椒牛河）
客：喂，你有冇搞错呀？用手嚟兜？
老世：唉！唉！唉！唔好劳气！
客：唔系新架嘛，污糟架嘛。
老世（赔罪）：正一衰仔嚟架，忙中有错架啫。
伙计（递上新嘅牛河）：牛河兜乱，即到。
客：唔好用手嚟兜至得架。
老世：慢慢食呀。

（后台）
老世：你系咪搞破坏呀？喺啲客面前系噉兜系噉兜。你有冇道德架？逢亲呢啲嘢呀，梗系背住面做架嘛。点可以畀客见架？
阿银：近排练紧功夫，所以一时惯咗手势噉解嘅啫。
老世：你重好讲添，好嘢唔见你做，学人拜师呀，练武功呀，发姣发趸。人哋见你噉嘅傻样呀，点会教你嘢呀？呃你钱揾你笨就有份。
阿银：你唔揾我笨经已好高兴架，老板。
老世：你讲咩话？我揾你笨？枉费我最初见你无父无母，无兄无弟，至会接你返嚟有食有住，你而家讲埋啲噉嘅嘢？（肥仔扐出相机影相）唔好影。如果你认为做得辛苦架，你唔好做，你扯，走呀！我养小狗重好。（阿银走出冰室）
伙计：我哋平时同你玩吓啫，咪噉啦。
伙计：做咩呀？做咩呀？你去边嗱？
老世：唔使理佢，做嘢。
肥仔：冇事架嘞。冇事架嘞。

（中国古拳法部）
达叔：阿银，每个人都有自己嘅身份同埋尊严。你身为中国古拳法嘅弟子，好应该有一套自己嘅制服。（扐出件衫）扐去喇。
阿银（跪低）：师父，你真系我嘅苦海明灯。
达叔：傻啦，呢啲系你应得架嘛。你第日着呢套制服行走江湖，武林中人都要畀面你三分。
阿银：哦！
达叔：重有。（喺一堆书里面摷出一本《九阴真经》畀阿银）呢本系我哋镇派之宝《九阴真经》，而家攞埋去。
阿银：《九阴真经》？乜练呢种武功要蒙面嘅咩？
达叔：啊！系咩？哦！蒙住面好打啲嘅。嚟嚟嚟，起身，坐坐坐。
阿银：师父，你对我真系恩重如山……
达叔：哎！唔使讲埋啲噉嘅嘢。嗱，今日我就畀咗两件镇派之宝你喇。噉国内啲苦难同胞呢都应该得到帮助架喇。正所谓大家中国人，血浓于水，就……
（见到阿银得廿文）
达叔：咦！做咩得两条架？上次你扎个马都捐五根嘢啦。
阿银：我系得咁多架嘞。
达叔：嗱，首先你明白，呢钱呢就唔系话我袋嘅，捐多少就凭良心架啫。就算你唔捐呢，我一样咁高兴。不过如果你重有啲咩珠宝首饰，外汇股票呀，又或者……
阿银：师父你听我讲，我对国内同胞经已仁至义尽，我已经捐到干晒塘。
达叔：噉你个个月有粮出架嘛。
阿银：我呢份工我都做得唔系咁happy，我谂住以后都可能唔捞添。我而家可以讲话一无所有。不过难得师父你对我咁好，我就谂住以后跟师父你勤练武功，服侍你老人家。
达叔：吓？！
阿银：哎！师父，讲得好哋哋，做乜无情情打个冷震嗱？
达叔（扮cool）：冇事。既然你讲到噉，冇办法嘞，跟我嚟。

（两个人嚟到）
达叔：嗱，我而家喳喳林教你去练《九阴真经》里便最厉害嗰招嘞。
阿银（扐出书）：呢度呀。
达叔：上册冇架，响下册。学唔学得成睇你自己喇。
阿银：我得架，师父，你信我啦。
达叔：喺处碌落去呀。
阿银：哗！讲真定讲笑呀？咁长条楼梯碌落去？呢招咩绝招嚟呀？师父，你讲笑定讲真呀？
达叔：呢招叫做无敌风火轮，你同个敌人一齐碌落去咪碌鬼死啰。
阿银：我死咋啩？
达叔：唔会。乜你咁蠢架？你起势噉揽实个敌人，等佢身体保护住你。你用地球嘅地心吸力，宇宙间嘅万有引力，再加上你同敌人嘅体重乘以二嘅turbo。若然你噉都碌佢唔死，你返嚟问我喇。
阿银：我硬系唔系好明……
达叔：嗱，阿银，呢一招就唔系咁易明嘅。危险性亦都相当高，所以如果你唔学呢，亦都系正路，但系证明呢，你就唔系练武嘅材料。以后就唔再需要嚟揾师父喇。
阿银：师父，你唔好噉讲喇，我会尽力而为嘅。
达叔：如果你练得成咁神奇嘅话，恭喜晒喇，你已经系天下无敌。以后更加唔需要嚟揾师父喇。系噉喇。系噉喇。（行开）吆！
阿银（走埋嚟）：师父！师父！
达叔：又做乜嘢呀？
阿银：即系同我分手噉嘅意思……
达叔：哎！点话点好喇。
阿银：师父！
达叔（好忟）：你唔好烦嗱，你想点样呀？
阿银（将只手表送畀达叔）：呢只swatch我送畀你呀，师父。好嘢嚟架，我平时都袋住唔舍得戴。
达叔：硬胶嘢嚟啫，值几多钱嗱？
阿银：钱就唔系太值，不过就上年我生日呢自己亲自买嘅。
达叔：啊！得嘞！得嘞！多谢喇！多谢喇！
阿银：唔好噉讲。好有纪念价值架，我唔会辜负你架。
达叔：叻嘞！叻嘞！去死呀！

（达叔良心发现，返去揾阿银，唔小心自己跌落）
达叔：啊？！唔系真系碌咗落去吓哗？死蠢，蠢成噉。啊！（唔小心碌咗落去）金呀。
阿银（食甜筒）：师父，我睇到。
达叔：你做咩呀？
阿银：就系无敌风火轮嘅练习方法吓哗？你专登示范畀我睇架吓哗？哗！我正话见你喺上便谂都唔谂就“累”落去。嗰种勇气真系。你知唔知我正话企喺上面几耐，始终都系拗底吖，咁高。
达叔：你见到晒嘞，吓哗？
阿银：见到晒嘞，好饱呀。哗！呢招咁厉害嘅时候，我睇我都系唔谂住嘞师父。我都系练返其他低层次少少嘅嘢先嗱。
达叔：喂，大佬你谂好唔谂好，正话我示范咗一次，你系噉意畀封老毛我得架。
阿银：好呀，冇问题吖。
达叔：冇问题你都要畀架，我而家见晒红架。攞个彩都要呀。
阿银：好呀，嚟呀。
达叔：喂，嚟你要嚟得架。仆街仔！

（黑熊扮斯文嚟沟阿丽）
阿丽：早晨！
黑熊：早晨！（递上花）送畀你嘅。我以前咁粗鲁，系我唔啱。
阿丽：算啦。
黑熊（揸住阿丽只手）：不如噉啦，你嚟我屋企坐，我有好多嘢想同你讲。我屋企好阔落，张床重好大，好舒服架。
阿丽：发神经！唔好掂我呀！（行开）
黑熊：你畀次机会我呀。
甲（执起烂咗嘅眼镜）：主将，你副眼镜烂咗呀。
黑熊：我副amani烂咗？你整烂我副amani？！啊！我副amani呀！
甲：主将，唔好再啊嘞。
乙：条女走咗好远嗱。
黑熊：捉住佢。
甲：咪走呀！
阿丽：喂，放手呀！
甲：我捉到佢喇。
黑熊：你知唔知我储咗几多钱先至买到呢副amani？我靠晒佢揾食架，你赔返畀我呀！
阿丽：我数三声你好放手嘞吓。一……（狠狠地踢咗黑熊一嘢）
（始终寡不敌众，阿丽畀两个人捉实）
黑熊：我本来系个受过高等教育嘅斯文人，系你迫我架。我今日要同你就地正法。
阿银（戴住茄啡猫面具）：停手！放开个女仔佢。
甲：咩嚟架？
乙：卡飞猫？我钟意呀。

黑熊（打咗乙一巴）：捉实佢！（手指阿银）你系边个？
阿银：我话，放开个女仔佢！
黑熊（除西装）：仆街！当我流架？你只死病猫，同我争鱼食？
甲、乙（扐出薯片观战）：Yeah! 主将出手呀！
阿丽：攞嚟呀！打佢！
黑熊：我一捶就打死你呀！
（激斗）
甲、乙（欢呼）：Yeah! 冇得打嘞。
黑熊（以为自己赢咗）：不堪一击！攞把刀嚟劏开面具佢。
（阿银企起身）
阿丽：Yeah!
（激斗）
黑熊（以为自己赢咗）：睇到吗？挑战我嘅结果就系死路一条。
（阿银企返起身）
肥妹（过嚟凑热闹）：阿丽，嗰便边个打紧交呀？
阿丽：有个着黑衫嘅蒙面人走嚟挑战黑熊呀。
肥妹：啊？
阿丽：佢真系好勇呀！
（激斗）
黑熊（以为自己赢咗）：我系无敌嘅。
（阿银又企起身）
（激斗）
黑熊（以为自己赢咗）：我都话咗架喇。冇人够我打嘅。
（阿银又企起身）
（激斗）
观众：打佢！打佢！……
（激斗）
黑熊：排山倒海！
阿银：无敌风火轮！
（两个人一齐碌落个楼梯）
（阿银打咗一个V手势，然之后走咗去）
甲：喂，快啲跟我过嚟！擸齐架撑落去帮拖。主将喺下便嗱。
（一班人落到去楼下）
甲：主将，你有冇事呀？主将，你点呀？周围刮嗰条友出嚟。主将，你点呀？揾唔揾到呀？冇嘢睇呀！走呀！走开呀！……


阿银（照镜）：师父讲得冇错，原来蒙住面真系咁好打嘅。我终于都打赢咗。我打赢咗呀！（仰天高呼）
差人（拉阿银）：返差馆先打喇，依家告你公众地方行为不检，重怀疑你系三合会会员。伙计，带埋个双花红棍面具返去做证物。

（环球体育中心大地震）
肥妹：哗！大件事喇！着黑衫嘅蒙面卡飞猫人救咗阿丽吖！
路人甲：啊？大件事喇！蒙面卡飞猫人救咗环球之花阿丽吖！
路人乙：啊？大件事喇！最佳格斗员黑熊三年嚟第一次打输咗呀！
路人丙：啊？蒙面卡飞猫人用一招无敌风火轮打赢咗柔道部主将黑熊呀！
肥妹：买定离手，究竟边个系蒙面卡飞猫人呢？阿丽！（镜头转向阿丽）
阿丽：我都话唔知边个系蒙面人咯。
众人：吓？
阿丽：OK?
肥妹：喂，阿丽，你唔系吖嘛？如果你唔识佢，佢又点会救你呀？吓嘛？
某女：系啦，唔系噉吓嘛？快啲讲啦！讲嚟听吓。
阿丽：啊！——，我唔知应该点同你哋讲好呀。喺我呢一生人里便，从来都冇人好似噉，为我挺身而出嘅。（肥妹呆晒）我唔知佢系边个，我只系知道佢救咗我而冇要求过任何嘢。每一次跌低佢都爬返起身。佢系一个真正勇敢嘅人，我而家只系希望可以再见返佢。当面同佢讲一声多谢。
肥妹：啊？你真系唔识佢呀？噉咪即系冇得赌？

（阿丽见到卡飞猫人）
阿丽：我终于都可以再见到你嘞。你知唔知我等咗你好耐呀？（点头）咪住先，等我估吓你个样呀，你一定系眉粗粗，对眼好有神，好有男子气概嘅。我好紧张呀。
老世（揭开面具）：完全估啱晒。嗱嗱林打个茄轮先。
A（揭开面具）：停手！其实系我救咗你架，你谂住点报答我呢？
B（揭开面具）：其实系我至真嗱，九龙塘理想酒店106号房等你呀。攞去呀，快啲攞呀！
肥仔（揭开面具）：我个人好老实，我系假扮嘅，我嚟抽水架啫。吖！——（冲埋去）

（阿丽畀大把卡飞猫追住，撞到阿银）
阿银（惊诧）：唔系啩？！
众人（喺后面追）：女吖，咪走呀，……
阿银：搞错呀？！死嘞！（戴返面具）
阿银：阿丽，你唔使惊，我嚟救你架。
阿丽：贱格！（打咗阿银一拳）

（一班人追到阿银身边）
老世：哗！你都喺度呀？你都算蛊惑呀，匿埋喺度想截糊？
甲：喂，你懂唔懂规矩架？
肥仔：抽水排后便啦。
阿银：我系真架。
某君（将阿银掹向后便）：排后便嗱。

阿丽（叫的士）：的士！（坐上的士）
某君：想走？追到天脚底都追呀！

（好多迫埋同一架车，阿银同达叔都喺里面）
某君：咁迫，后便唔好顶啊……
阿银（见到达叔）：啊？！师父，连你都嚟？
达叔：系吖，嚟凑吓热闹吖嘛。
阿银：估唔到你都系噉嘅人。
达叔：挑！呢度个个都系架喇。
阿银：我唔系吖，系我救个女仔架。
达叔：巴闭嘞，唔系得我点你，你有咁叻呀？
阿银：乜点呀？我真系练成咗无敌风火轮嗱。
达叔：唔好大声添呀。扶碌架啫，唔系成世都咁好彩吖。碌多次连命你都冇呀。
阿银：咩呀？
达叔：呃你架啰，做咩呀？
老世：我讲听日嘅头条新闻畀大家听。
众人：咩呀？
老世：架车撞山。
（架车真系撞山）

（达叔屋企）
阿银：点解你要呃我？
达叔：大佬呀，“人人有功练”呢下嘢你都信嘅？噉唔呃你呃边个呀？你教我喇，唔该。
阿银：点解你而家至话我听？
达叔：你而家至问我吖嘛，我咪而家话畀你听啰。噉你以前冇问过我吖嘛，唔通我主动话畀你听：喂，老友，我呃你架，你唔好信嗱。噉呀？须知呃人呢唔系十分光彩架嘛。所以综合整件事呢，并唔系我嘅错，系你自己戆居。
阿银：钱嗱？畀返啲钱我！
达叔：傻仔！畀返啲钱你就唔叫做呃嘞。
阿银：死跛佬，你生仔冇屎窟喇你！
达叔：喂，家阵玩人身攻击嘞，吓哗？
阿银：系又点呀？跛佬，老千，咸湿佬！
达叔（回敬）：缩头乌龟，软脚蟹，懦夫。
阿银：我唔系懦夫，我打赢咗黑熊。
达叔：我唔教你功夫，你打得赢黑熊？
阿银：你呃我有份，我靠我自己。
达叔：我唔畀信心你吖，你够胆同黑熊只抽？你够胆沟阿丽？
阿银：唔好讲阿丽吖嗱。
达叔：咩呀？好叻呀？你够胆喺阿丽面前嗱，你够胆喺阿丽面前剥咗个面具畀佢睇睇你，佢唔嗌救命我切喇。靠自己？食屎呀你！（抌咗烟头）
阿银：鬼唔望你下世都跛，兼且做鸡。
达叔：你性无能呀！
阿银：你做只跛鸡！
达叔：性无能！
阿银：跛鸡！大家嚟睇睇吖，呢度有跛鸡呀！
达叔（手执大声公）：各位街坊快嚟睇呀，有人性无能呀！超！
阿银：超！
达叔：够胆再闹吖嗱！
阿银：系要闹你！
达叔：你唔好手指指呀！
阿银：指死你个跛佬！FUCK U!
达叔：FUCK U TWO!
阿银：FUCK U THREE!
达叔：FUCK U FOUR FIVE SIX! FU…FU…FUCK U TEN! （o累口水）
（阿银o累口水）
达叔（闩门）：走呀，契弟！
阿银：你出嚟呀！打你一槌吖嗱，信唔信？（走开）
达叔（开门）：生花柳呀！
（阿银飞起一脚踢度门）

（环球体育中心）
阿银（见到阿丽同啲朋友行紧过嚟）：阿丽，阿丽，我一定要老实话畀你听，其实嗰日救你嘅蒙面人系我。
阿丽（除低副黑超）：系你？
（阿银点头）
阿丽：你有咩证据呀？
阿银（哑口无言）：吓？
阿丽：估唔到连你都想博我懵。你想揸我边度呀？过嚟呀！过嚟揸呀！
阿银：真系假呀？你唔系氹我呀？
阿丽：我最憎就系你呢种人渣！
阿银：阿丽吖，我唔系你谂嗰种人嗱。我请求你听我解释呀！
（阿银中枪，阿丽手中无端端多咗支枪）
阿银：哗！唔好呀！哎吖！
（阿银睁开双眼，原来系发梦）
（阿银惊到成面都系汗）
（阿丽喺后便出现）
阿丽：喂，阿银！
（阿银走）
阿丽（追上去）：喂，阿银！做咩啫？我有嘢问你吖。
阿银：唔关我事，大佬。
阿丽：讲咩吖？做咩见到我要走啫？
阿银：因为近排又比较忙啲，所以……
阿丽：唉！你知唔知边个系蒙面卡飞猫？
阿银：唔知呀，大佬！
阿丽：真系唔知？
阿银：点解噉问？
阿丽：其实我一早就应该估到，佢系一个我识得嘅人。
阿银：估得好呀。
阿丽：知唔知点解佢要蒙面呢？
阿银：点解？
阿丽：因为佢唔想畀人哋知道佢系边个，佢唔想人哋报答佢。
阿银：冇错，佢系一个施恩不忘报嘅奇男子，佢伟大嘅品格已经升华到同耶稣一样。
阿丽（拖住阿银只手）：我咩都知道晒。但系我真系唔知应该点样多谢呢个人。
阿银：讲多无谓，嘴佢喇。
阿丽：嘴佢？
阿银：唔使怕丑，喺而家二十世纪九十年代，我哋好应该将不必要嘅道德观念抛开。你相信我，冇第二条路你行架嘞，唯有系嘴佢啫。好嗱嗱声添呀。救命之恩呢啲唔迟架。嚟呀。嘴哩！Come on, baby!
（阿丽嘴咗林国斌，阿银大跌眼镜）
阿丽（嘴完）：阿银，等我嚟介绍呀。佢就系我哋精英中心里便嘅空手道部主将，专登喺日本返嚟教空手道架。（林国斌对阿银笑咗一笑）
阿丽（揽住林国斌）：我哋系旧同学嚟架，我哋而家见返面真系好开心呀。嗰日就系佢蒙住面救咗我架嘞。
林国斌（谰cool）：都话唔好同人讲咯。你嘅朋友好似喺嗰边揾紧你。
阿丽：系咩？
林国斌：嗯。
阿丽：噉好呀，你哋倾吓先嗱。（行开）

林国斌（行前几步阿银）：你系咪精英中心嘅人？
阿银：唔系。
林国斌：我唔希望阿丽同啲垃圾行埋一齐，所以以后你最好行远啲。
阿银：垃圾系咪话我？
林国斌：系。

阿丽（走埋嚟）：喂，倾完未吖？Viven话等埋我哋一齐走吖嘛。
林国斌（拍阿银膊头）：有机会再见。（行）
阿银：阿丽，其实你有冇问清楚……
阿丽（揸住阿银对手）：阿银，真系好多谢你头先嘅意见。

（垃圾堆）
阿银：唉！搞成噉真系太唔应该，我明明叫佢嘴我，佢点可能会嘴咗佢？就等于亲手将自己嘅至爱奉献咗畀嗰个四眼仔。呢个打击都可算得系几大嘅。不过凭我一身顽练嘅意志力，应该顶得住。
（路人嚟倒垃圾）
阿银：唔阻你吖嘛，哥哥？
路人：唔阻，呢度摆垃圾嘅，你应该摆喺度架嘛。
阿银：你讲咩都伤我唔到，因为我而家已经黐Ｑ咗线。（达叔喺身边行过）One Two…芝芝喳，呯呯把……，又嚟，芝芝喳，呯呯把……，芝芝喳，呯呯把……
阿银（见到达叔，好折堕噉款）：企喺度！呵呵……，唔好走！
达叔：大佬呀，你家下想点呀？钱我就一定冇得还架喇。而家连份工都冇得捞。命有一条，要你攞埋去。
阿银：咪嘈呀，有正经嘢斟呀！嗱，你知道我先系卡飞猫蒙面人嗱。系我救阿丽架嘛。而家佢呢就误会咗系另外一个咩大师兄噉样嘅嘢。噉所以我就想请你同我澄清吓呢件事啫，我惊佢畀人呃架。
达叔：好，我第日撞到佢话佢听。
阿银：呢啲唔好撞到先嗱，要专登行过去架。
达叔：哦！我一阵专登行过去讲呀。
阿银：我家下同你一齐去。
达叔（阻住阿银）：喂喂喂！嗱，阿银，以你而家嘅身分地位，走去专登话畀佢听你系黑衣蒙面人咪即系大材小用？不如话畀佢听你系美国总统喇，好吗？
阿银：总统……，迟一步先讲呀，都系讲咗呢单先吖，而家同你。
达叔：喂！你唔好黐线嘞好唔好？你而家系乜嘢呀？你讲咩都冇人信架啦。走喇！
阿银：噉我点呀？我真系生无可恋爱嗱。
达叔：噉你咪死咗佢啰。
阿银：都好。但我临死之前都要打镬个大师兄，因为佢话我系垃圾。
达叔：你系垃圾呀。系，（拉阿银去到啲垃圾前便）你睇吓你同啲垃圾，哗！哦！咿！啲色水衬到，千祈唔好话自己唔系吖。
阿银：为咗证明我唔系，我要打镬佢。
达叔：好，噉你打镬佢呀，顺便打槌入我数。
阿银：再教我功夫。
达叔：哗！我都话嚟呃你架啦。你噉都重要嚟？你咁贱格架你！
阿银：呃我都打得赢，你再呃多镬呀。
达叔：唉！我都话咗你听系扶碌架嘛。唉！你信又好，唔信又好，唔该你以后唔好再嚟揾我，即刻扯呀！
阿银：呃我唔呃呀你而家？
达叔：唔呃架，吹咩？
阿银：划花你块面话你听呀？
达叔：你够胆？
（阿银喺达叔面上划咗几下）
达叔：超！（执起一碌棍）仆街仔！我话畀你听，我系一个知书识理嘅人，以后唔会再呃人，听清楚未？（用棍扑阿银）消失！消失！消失！消失！
（阿银揸住把刀，凶神恶煞噉）

（阿银同达叔头扎白色布条，杀气腾腾噉前去下挑战书）
阿银：大师兄！空手道大师兄喺唔喺度？即刻叫佢出嚟！
接待小姐：咦，外卖仔，好耐冇见你送奶茶嘞。
阿银：系吖，呢排见有两声咳，噉所以咪休息吓啰。
接待小姐（见到达叔）：士多佬，你走咗架？返转头做咩呀？
达叔（调情）：唔舍得你吖嘛，玛丽。
接待小姐：系唔系架？
达叔：受唔受沟先？
接待小姐：请我睇戏先讲呀。
达叔：好呀，就睇《扑湿玛丽》哩。
接待小姐：益我阿妈喇。
达叔：都好啫，你阿爸唔介意嘅咩？
（阿银笑）
接待小姐：无赖！
达叔：乜“无奶”呀？（指自己对乳头）呢啲咪奶啰。
（两人大笑）
阿银：你唔好沟女住啦。今日我好大杀气架嘛，你噉搞法你话我几尴尬得架。大师兄喺边度呀？
接待小姐：同陈主任开紧会。
阿银：同我交呢封信畀佢呀。（拉住达叔行出去）走！

（经过办公室）
达叔（偷睇）：喂喂！

（办公室内）
主任：我哋精英中心嘅格斗技击系东南亚系首屈一指架。有噉嘅成绩呢，全靠我哋四个部门嘅主将。（跆拳道主将起身）
主任（介绍）：呢一位呢就系跆拳道嘅主将。佢双脚呀灵活过双手，喺不可思议嘅角度可以踢中对方架。
（剑道部主将转身）
主任（介绍）：呢位系剑道部嘅主将，（剑道部主将同林国斌扼手）佢出剑呀，快如闪电，威力开山劈石。
主任（介绍）：呢位系西洋拳嘅主将，（西洋拳主将同林国斌扼手）佢嘅右勾拳击出嘅时候有878磅。
主任（介绍）：柔道部嘅主将，（林国斌同黑熊握手）黑熊，连续三届连任我哋中心嘅杰出格斗员。
林国斌：哦！你就系打输畀个蒙面人嘅黑熊呀？好高兴认识你呀。

林国斌（坐低）：其实董事局喺日本请我返嚟，系重组中心架。我认为呢，空手道呢系地球上最强嘅武术。所以呢，我就觉得中心里便呢，就只系应该有空手道嘅存在。
黑熊（好大反应）：你噉咩意思呀？
剑道部：净系得你空手道，噉我哋点呀？
林国斌：哎！问得好！如果各位有兴趣嘅，可以加入我哋空手道部。但要先经过选拔。因为我哋净系钟意训练精英，绝对唔会接受垃圾。（望住黑熊）
黑熊：做乜望住我呀？即系当我垃圾？
林国斌：哎！哎！唔系！唔系！唔好误会，我唔系针对你，我系话在座咁多位，都系垃圾。
黑熊（拍台）：我仆你个街！
（四人围攻林国斌，畀林国斌一一打残，阿银同达叔睇到呆晒，唔敢再去挑战，谂住收返张挑战书。）
达叔：点呀？谂紧咩呀？
阿银：嗰封挑战书烧佢罢嘞。

（办公室）
主任：我都话过呢班呢全部都系垃圾嚟嘅，应该趁早扫走咗佢架喇。吓哗？

（阿银好紧张噉样去揾嗰封挑战书，卒之畀佢揾到）
阿银：哎，封信呢？（揾到挑战书）哎吖，好彩重喺度。（烧挑战书）嗱嗱声呀。
主任（抢过挑战书，见到达叔）：啊！你个死跛佬呀，我明明赶咗你出中心架喇。你重够胆返嚟嘅？喂，你要唔要面架喇？啊！我明嘞，你梗系想返嚟拗烂脚，揾着数系咪喇？嚟嚟嚟，过几草嘢畀你喇。嗱嗱声，过住喇。过住喇。（攞出几十文畀咗达叔）
达叔（收埋啲钱）：我话你知，唔该你唔好成日当我乞儿得唔得？我而家已经唔系精英中心嘅人，以后我唔再需要睇你面色做人。我今日嚟系以中国古拳法嘅掌门身分挑战你空手道嘅大师兄。
阿银：哗！你鬼上身呀你？
林国斌：一九七四年，第一次喺东南亚打自由搏击，就攞冠军。一九八零年，打赢咗日本嘅重炮手雷龙，跟住连续三年横扫日本嘅空手道高手，夺得全日本自由搏击冠军。中国古拳法唯一传人鬼仔达，被喻为空手道嘅克星，绰号“魔鬼筋肉人”。
阿银（见到达叔转咗个造型，吓咗一跳）：你做咩呀又？
达叔：冇错，呢个就系魔鬼筋肉人当年比赛嘅造型。
林国斌：不过，可惜呀，喺一九八八年嗰场中日大赛，畀我师父打跛咗只脚之后，就消声匿迹。
达叔：退出江湖，自暴自弃，偷呃拐骗。
主任：所……所以话你个跛佬呢，做咩啫？几呀岁嘞嘛，学人挑战？挑战。（喐手搣封挑战书）挑战。挑战。
达叔：所以挑战嘅唔系我，系……（唔见人嘅？）
（揾到阿银）
达叔：系佢——中国古拳法第二代大弟子何金银。（擸起阿银）
林国斌：就凭呢件垃圾？
达叔：冇错。够胆畀一个月时间我，我会将佢训练成为最强嘅人。
林国斌：只有空手道先至系地球上最强嘅武术。
达叔（拍胸）：鬼仔达一日未死，空手道永远排我后便。够唔够胆打？
主任：黐线架，真系，真系。
林国斌（抢过挑战书）：我接受你嘅挑战。不过我有个条件，如果我打赢你嘅话，我要中国古拳法从此喺地球上消失。
达叔：好，不过如果你输咗我要中国古拳法堂堂正正入主环球体育中心。
林国斌：一言为定。
达叔：重有。主任，你攞我嗰两打印度神油唔该你清埋条数畀我。
（主任同林国斌仆倒）

（野外）
阿银：师父，原来你旧底咁有计嘅。
达叔：我话咗你听我不留低调架喇。
阿银：但系唔好立乱帮我应承决斗得架，你即系“ngung2”我去死？
达叔：讲起真系要多谢你吖，唔系你攞把菜刀“航”住我，我真系呢世都谂唔到原来做呢件有百利而无一害，万一你打赢咗呢，我哋中国古拳法就可以重振声威。就算你畀人打死呀，你而家嗱嗱林买一份保险，受益人写我嘅名。
阿银：噉都系你有计啫，我点呀？
达叔：噉你话要证明自己唔系垃圾吖嘛。
阿银：傻喇，我本身系垃圾，点会话唔认？
达叔：师父有办法。
阿银：咩办法？
达叔：边有咁快谂到架？
阿银：噉呀，噉我扯先嗱，以后有机会再合作过。
达叔：好喇，一于噉决定喇。（阿银扯咗）呜——，条女冇咗喽。
阿银（返转头）：打就打嘞，死就死嘞，打死佢呀。
达叔：揸揸吓。

（电视台）
（收视率曲线图）
总监：你哋睇吓，今年嗱，《欢乐今晚》嘅收视屡创新低。你哋好快啲谂吓计，讲吓嘢喇！
细龟：总监呀，我今朝见到单噉嘅嘢，自杀式挑战，会打死人噉话。
总监：唔系啩？打死人咁郇？够噱头。

（电视台记招）
总监：我哋《欢乐今晚》好荣幸能够主办呢个“欢天喜地擂台夜”。两位参赛者分别就系我右手便嘅中国古拳法第二代大弟子外卖仔先生。
阿银（低语）：我叫何金银。
总监：哦！原来外卖仔重有个绰号叫咩银嘅。（转身）
总监：喺我左手便嘅参赛者就系连续三年得空手道冠军断水流大师兄。喺比赛之前，双方参赛者已经签署咗呢个生死状。

（台下）
肥妹：哗！点解佢哋要打嘅？
（画外音 总监：亦都系《欢乐今晚》今年一个重点出击嘅大制作！）
阿丽：我都唔知呀，我真系要问吓佢哋。
总监：啊！系喇！外卖仔先生！外间嘅人嗱，形容你今次系一个自杀式嘅挑战。究竟点解吖，你会做出咁悲壮嘅决定呢吓？
台下记者：总监唔该望望呢便嗱，总监唔该呢便嗱。唔该！呢便！呢便！唔该晒！……
阿银：其实我只系想……（总监掹咗个咪条线）
总监（幸灾乐祸）：假架！傻仔！哈哈哈！
细龟：大师兄，你今次系咪第一次喺电视上面比赛呢？
林国斌：冇错，我今次之所以畀你哋电视台转播呢个比赛，系因为我想推广本派嘅空手道。而任何对于武术上有益嘅活动，我都会极力噉去支持。
（众人拍手）
细龟：嗱，外间呢有啲有趣嘅传闻呢，话你曾经以蒙面人嘅身分呢上演过一幕英雄救美架。
林国斌：其实我蒙面嘅目的就系唔想畀人睇到，既然大家有兴趣知道嘅话，我就讲畀大家听。我自细喺日本长大，我嘅偶像就系蒙面超人，由嗰阵时开始，我就经常戴住唔同嘅面具。方便他日可以锄强扶弱，警恶惩奸。（戴唔同面具）但我点都谂唔到，当日我所救嘅人竟然就系我一生中最爱嘅女神。（起身）
肥妹（羡慕）：佢讲你吖。
（林国斌走去阿丽身边，响起好动人嘅音乐）
林国斌：其实，阿丽，我真系，好高兴能够见返你。
阿丽：我亦都谂唔到我心目中嘅英雄，会喺嗰阵时出现，及时救返我。
林国斌：谂返起当时嘅情形，真系好危险呵？
阿丽：如果唔系你出现，我都唔知点算。
林国斌：虽然冇见咁耐，我重记得，你钟意嘅颜色系红色。
阿丽：你钟意嘅颜色系黑色。
林国斌：你最钟意食嘅系砵仔糕。
（阿银嬲到将只玻璃杯捏碎埋）
阿丽：你最钟意食嘅系Wasabi。
肥妹（晕低）：好浪漫嗱！

（阿丽同林国斌一齐合唱《情花开》）
阿丽：情花开，开灿烂。情义誓永无限。
林国斌：夜莺歌，声美曼。吐露热爱弥漫。
阿丽、林国斌（合）：情花娇，鸟语醉，春色充满世间。同相亲，永不分离。我两爱不变幻。
（阿银面上流晒血）
林国斌：我今日真系开心到不得了。
阿丽：我又何尝唔系？
林国斌：阿丽，我想藉住呢个机会向你求婚，希望你答应。（打开结婚戒指盒）

（达叔睇到阿银嘅表情）
达叔：咦？好嬲呀？呜——，条女冇咗喽。
阿银（拍台，忍无可忍）：放开个女仔佢！
林国斌：你做咩呀？发羊吊呀？
阿银：你讲大话，你并唔系一个诚实嘅人，你只系一个虚伪嘅四眼仔！阿丽，阿丽，你唔好信佢，其实嗰日救你个系我呀。
林国斌：阿丽，行开先。
肥妹：噉嘅？
林国斌：你啲噉嘅垃圾，我畀机会同我一齐企喺擂台，你唔多谢我不得止，重中伤我！到时喺擂台，我一定唔会留手！
阿银：我都唔会留手架。我一定要打到你流鼻血。
林国斌：打死你呀！
总监（满心欢喜）：哗！讲得好呀！今次发达喇！听日就用呢句对白做头条喇。讲多次呀！
林国斌（大声嗌）：打死你！
总监：好呀！
达叔（谰cool）：讲多无谓，外卖仔并唔系自杀，我魔鬼筋肉人更非浪得虚名。一个月之后，你哋将会见识到我哋中国古拳法嘅厉害。地狱式死亡特训听日正式展开。阿银，我哋走！
（达叔同阿银撞埋一齐）
达叔：超！你一日企喺我后便你系咪基架？
阿银：你话走吖嘛。
达叔：走嗰便嘞嘛，仆街！（记者影相）唔好影！借过！唔该！唔该！唔该！
林国斌（同阿银讲）：打完三个回合，如果你死唔去，都当我输呀。
阿银：用条命同你赌，打完之后我一定企得返喺度。（行开）
记者：喂喂喂，影张相先嗱！喂！唔好走得咁快呀！
（阿丽想追阿银，畀林国斌拉返）
林国斌：阿丽，唔好理个癫佬，佢乱噏架啫。嚟，戴返只戒指先。
阿丽：我谂我唔可以戴。
林国斌：点解呀？你唔系唔信我呀嘛？
阿丽：我惜你吖，不过……
林国斌：咪噉喇。嚟呀，无论如何，今晚上上我屋企，我哋慢慢倾。好唔好？
阿丽：你畀啲时间我。
肥妹：啊？
阿丽：Vivien，我哋走。
肥妹：哦！好呀！

（总监搭住林国斌膊头）
总监：你真系打死人嘞嘛？系得至好讲。
林国斌：梗系唔得。

（阿丽发梦，梦见蒙面卡飞猫人系何金银而唔系大师兄）

（气氛阴森恐怖）
细龟：各位观众，我哋收到线报，魔鬼筋肉人嘅地狱式死亡特训就喺呢一秒钟开始正式进行。所以我哋第一时间嚟到训练现场做直击嘅报道。我哋发觉呢度阴森恐怖，令人不寒而栗。我带大家周围zong1 zong1。
（见到阿银同达叔喺度打边炉，细龟大跌眼镜）
达叔：哗！啲墨鱼丸都好弹牙架。
阿银：系？
达叔：试试呀。
（弹鱼丸，鱼丸弹得好高）
阿银：哗！弹得咁犀利嘅！
细龟（凑近）：哗！两位，你哋嘅地狱式特训……
达叔：进行紧嗱。
阿银（问细龟）：食咗嘢未？
细龟：未吖！
阿银：坐。
达叔：坐！坐！坐！
阿银：整碟鹅肠好。
达叔（问细龟）：食唔食鹅肠？
细龟：好呀。
阿银：加两碟鹅肠添。
达叔（见到摄影机）：喂，影紧我哋架？
细龟：系吖！
达叔（摊开手板）：畀封老毛好。
阿银：我条猪膶呢？
达叔：去咗底啩？
阿银：我浪喺个面嚟渌架块猪膶。系咪你呀？
达叔：冇，真系冇。
阿银：你冇？
达叔：发誓冇。
阿银：嗱，你唔好搞搞震呀，话你听。（喺达叔袋里便摷出一嚿猪膶）
阿银：啲咩嚟架？
达叔：点解猪膶会走嚟我度？
阿银（掟块猪膶，掟中咗细龟嘅眼镜）：容忍有个限度啊！

（环球体育中心办公室）
主任：睇到嘞！睇到嘞！
林国斌（睇报）：佢哋训练成点呀？
主任：打边炉啰。
林国斌（疑惑不解）：打边炉？！
主任：系吖，重见到两碟鹅肠，好多件鱼蛋添呀。重放咗只鸡蛋，连埋壳落埋去，话可以吸走啲热气，食咗冇咁燥。喂，不如今晚呢我哋打边炉，试吓蒸只鸡蛋连壳……
林国斌（打低主任）：收声呀！搞咩呢？


细龟：而家距离比赛重有两个星期，究竟何金银嘅地狱式特训进展成点嘅样呢？我哋即刻去睇吖嗱。
（游泳池）
阿银：Come on baby, let's go for fun. Yeah!
某人：女呀！唔好走呀！……

（电视机前）
主任：哗！唔系讲笑，真系喺度玩咋。一系呢就黐咗线，一系有阴谋。
林国斌：我唔理佢搞咩花样，我一定要打残佢。

（阿银喺度唱K）
阿银：情难自禁，我却其实属于极度容易受伤的女人，不要不要不要骤来骤去，请珍惜……

（直播现场）
一医生：今晚我都系嚟坐吓，坐吓做吓样噉嘅啫，吓嘛？
电视台工作人员：唔系吖，听讲今晚真系冧友架。你自己执生喇。
一医生：唔系哗？
总监（向自己工作人员交代啲嘢）：唔系咩呀？总之一阵嗰个外卖仔中咗招受咗伤之后，我要由十字车去医院嘅过程，尽量畀多啲特写佢。啲血千祈唔好抹呀，最好影到啲血叭叭声噉流。
细龟：如果佢死咗呢？
总监：死咗咪你加人工，大家开香槟啰。Yeah!

（林国斌接受记者采访）
记者：呢场比赛双方实力好悬殊，你会唔会留手呢？
林国斌：我哋上到擂台系悉力以赴，对方咩环境，我哋系唔理架。
记者：你有冇谂过会错手打死人嘅呢？
总监：无可奉告！
记者：听讲电视台今次系以打死人嚟作噱头，增加收视率架。
总监：呢谣言嚟架啫，冇啲噉嘅事。
记者：对方冇准备，会唔会系故弄玄虚，其实已经练成咗必杀绝招呢？（林国斌表情紧张）万一你打输咗，你有啲咩打算嗱？你身形咁好，有冇考虑过拍吓三级片噉呢？
林国斌（手揸记者衣襟）：我系唔会拍三级片嘅，系都只会拍功夫片嘅啫。

（林国斌走入内室，主任闩门）
主任：好嘞，好嘞，好嘞，对唔住！对唔住！对唔住呀！所以话呢，全世界嘅人嗱，根本就系黐线架。问埋晒咁stupid嘅问题都有架。点会输先得架。输赢有样睇。（指林国斌）
林国斌（头发乱晒）：究竟何金银喺度搞咩呀？
主任：喂喂喂，你冇事吖嘛？
林国斌：阿丽呢？重未嚟嘅？
主任：喂喂喂，你唔系惊吖嘛？你千祈唔好而家先至惊，我全副身家买你赢架。唔系嘞，我都系补返几千文……
林国斌：边个话我惊？（打晕主任）

（休息室）
工作人员（入嚟通知大家）：几位呀，重有两分钟入厂，准备吓啦。
老世：阿银，虽然我哋几个都买咗一百文大师兄赢。但系我哋内心系支持你架。（扐出一件衫）呢件战袍系我哋几个擒晚漏夜做畀你架。
阿银：多谢，喺临出去之前，我想见见阿丽最后一面。
肥仔：我出去睇过，佢冇嚟到。
达叔：准备好未呀？
阿银：嗯！

（擂台）
公证：第一回合，开始！
（阿银畀大师兄大卸八块，好彩唔系真嘅，系阿丽嘅臆想）
阿丽（坐紧升降机）：我好惊呀，Vivien。
肥妹：唔使惊，唔使惊，重有一分钟时间，啱啱好呀。
阿丽：我唔想佢哋打呀。
肥妹：你唔系嚟同大师兄打气嘅咩？
阿丽：唔得，我一定要叫阿银唔好打。
（升降机突然停低，死火）
肥妹：点解会噉架？
阿丽：有冇搞错？而家至韫lip7？喂，有冇人嗱？啊！

（各就各位）
总监（喺后台）：所有camera stand by。
（on air）
梁荣忠（宣布擂台赛开始）：欢乐今晚之欢天喜地擂台夜现在开始！（大师兄出场）首先出场嘅就系日本断水流空手道大师兄，外号“人间凶器”，空手道讲求一击必杀。而空手道名家都能够练到佢哋全身都系杀人武器，佢哋摧残人嘅身体就好似破冰、断木、碎石、爆樽一样嘅，大师兄就系空手道家里便嘅表表者。
细龟：如果外卖仔畀大师兄打中。哗！唔系好似个西瓜噉。
梁荣忠：冇错。不过讲系冇用嘅，大家攞定个相机出嚟拭目以待喇。
细龟：跟住出场嘅系代表中国古拳法嘅外卖仔。（阿银同达叔以一身咸蛋超人嘅扮相出场）佢师父魔鬼筋肉人当年号称空手道克星，大有来头。但系根据资料显示，外卖仔除咗冲奶茶了得之外，系冇乜点练过功夫嘅。所以今次嚟挑战系被认为有心自杀。究竟系受咗咩打击而噉做呢？都重系一个迷。但系睇佢今日嘅造型，杀气腾腾。居然胸有成竹噉样，更加令我心里呢个迷，迷上加迷。

中年妇女（同阿银扼手）：你好嘢，我支持你呀。
阿银：多谢你，阿婶！
中年妇女：你畀心机吖，我买重你第一回合（o累）低架。
工作人员（拖中年妇女落去擂台）：喂，落返去吖！
中年妇女：记得（o累）低吖，第一回合呀！
阿银：尽我能力呀，阿婶。

（擂台之上）
梁荣忠：欢迎两位英勇嘅斗士，一息间两位就会进行三个回合嘅血战嗱。
细龟：我哋恐防一阵间呢各位影唔到相，所以趁外卖仔先生重健在嘅时候呢，影返张相留念呢。
记者：两位，摆个甫士影张相嗱，唔该。
（阿银运用心理战术吓大师兄）
细龟：各位记者嘅投票结果已经喺我上便嗱，最抵死造型奖嘅得主就系外卖仔先生。
众人：Yeah! 恭喜晒！恭喜晒！
：好嘞！好嘞！好嘞！我哋而家请断水流空手道大师兄帮我哋颁呢个奖。（大师兄颁奖畀阿银）大师兄呀，畀啲笑容人哋影相呀。笑吓。（大师兄笑得好勉强）啱嘞！啱嘞！
众人：好嘢！好嘢！好有型！好有型呀！
阿银：多谢晒！
梁荣忠：认真抵死呀！真系实至名归呀！哗，噉都畀你谂到呀，影咗相先嗱。

（第一回合即将开始）
细龟：睇嚟双方已经准备就绪，一场惨烈嘅屠杀在所难免架嘞。
（比赛正式开始）
梁荣忠：比赛正式开始！（解说）一嚟大师兄就好似一只猛虎出笼噉样嘅，拳来拳往，脚来脚往呀！
（细龟提醒梁荣忠睇台上便，梁荣忠睇到台上便啲情况大为意外）
梁荣忠：啊？！
（阿银企喺擂台上便唔喐）
林国斌（心谂）：拧转面，想点呀？（见到台下便嘅达叔神情诡异）一定有诡计！
达叔：阿银，拳脚方面，你点练都唔系大师兄嘅对手。所以我今次教你嘅系中国古拳法里便嘅最高境界：心理战术。喺呢个月里便，我哋日日吃喝玩乐。玩得越高兴，大师兄佢就越怀疑。成个月噉铺排，再加上你而家用个背脊dat7住佢，我担保第一个回合大师兄绝对唔敢埋你身。
林国斌：分明想引我埋去，不过我冇理由惊佢架，点都要顶硬上呀。（迈出一步）
达叔：大镬，唔通抛佢唔到？

（后台）
总监（忟）：重唔打佢？呢镬玩死我喇。下便讲吓嘢喇。
梁荣忠：佢两个都唔喐，讲条毛咩？！
总监：所有camera对住细龟哋，两个同我讲到最精彩为止。唔系我畀人炒鱿鱼呢就买凶杀死你两个！
梁荣忠：真系唔晓讲呀！
（细龟谂到办法，攞出一本《倚天屠龙记》畀梁荣忠）
细龟：照读呀。
梁荣忠：《倚天屠龙记》？
总监（拍台）：唔识讲都要讲呀，讲呀仆街！
细龟：冇办法喇，顶住先嗱。
梁荣忠：呢镬真攞明呀！
细龟：读喇。
梁荣忠：金毛狮王，唔系，大师兄突然打出一招崆峒派镇山绝学，七伤拳，所谓一面七伤，七者皆伤，呢镬真攞命呀。我至叻讲到噉架咋，老世。
总监：啱喇，就系噉喇，继续讲落去喇。
梁荣忠：张无忌，啊，唔系，外卖仔不慌不忙，双掌浑圆成盾，使出乾坤大挪移，将七伤拳威力……
阿丽（听收音机）：唔系吖嘛？出咗乾坤大挪移？
梁荣忠：外卖仔连消带打，大喝一声，霎时之间，擂台鬼影重重，成个场都系外卖仔嘅身影。大师兄根本冇办法分得出边个先至系外卖仔嘅真身。只见大师兄眉头一皱，计上心头，左脚（足泵）地，大叫一声“老师公大显威力”，原来佢标起童上嚟。（《倚天屠龙记》掉咗落地下，死火）
细龟：唔使惊！重有。（畀咗本《金瓶梅》梁荣忠）
梁荣忠：大师兄姣喘一声倒在外卖仔嘅怀里，喺呢个时候，大师兄眼如微丝，湿润嘅双唇，微微张开，口中喷出有如兰花一样嘅香气，（觉得唔对路，睇书名）《金瓶梅》？
细龟：My God，读呀！
梁荣忠：对住如丝尤物，佛都会动心啦。外卖仔一手报腰，另一只手也不闲住咯，偷偷地从大师兄衣襟挖入，喺佢丰满嘅双峰附近，周围任意游览。（大师兄举拳欲打阿银，阿银吓到流晒大汗）而大师兄嘅欲火再也控制不住了。嗰两粒菂亦由软嘅棉花糖变为硬嘅橡皮糖嘞。
林国斌（忍无可忍）：你个冚家拎，收声！
（达叔大松一口气）
林国斌：忍你好耐嘞，你讲咩呀？边两粒菂呀？边两粒菂呀？
梁荣忠：大佬呀，我都唔想架。你又唔喐，我又要讲，噉我好难做架。
林国斌（妈妈声）：你老母你点做旁述架？信唔信我告你老母呀？
梁荣忠（拍台）：闹咩老母呀喺呢度呀？
林国斌：仆你个臭街吖！
阿银（间交）：唔好嘈啦，当畀面我。
林国斌：噉系吖嘛，佢老母喺度乱噏。
梁荣忠（好激动）：重闹？唔系吖嘛？大家揾食咋嘛，你揾食我揾食啫。你唔系噉样吓哗？
阿银：一人少句啦。
林国斌：咩呀？同你friend返啊？
（铃声响起）
梁荣忠：第一个回合，完！新年流流闹老母！


阿银、达叔、荣记冰室班人：Yeah!
达叔：吓哗？冇事呀。
阿银：好惊呀，吓死我！
达叔：大步[足南]过呀，傻仔嚟架，唔使惊呀。

（另一边）
一人：大师兄……
林国斌：我知嘞。用个背脊dat7住我想抛我？想拖延时间？一阵我就兜背脊打爆你！

（裁判台）
甲：呢条外卖仔真系唔怕死吖吓。

（第二回合开始）
（达叔抛起嚿石仔畀林国斌接住）
林国斌：喺度整古做怪呀？（达叔大玩心理战术）
林国斌（同公证讲）：喂，下便犯规，揦住个樽掟吓掟吓喺度搞搞震。哗！重揦住把刀添呀。
公证：下便揦住把刀关你鬼事咩？
林国斌：佢飞上嚟插我噉点呀？
公证：插刀至算嗱，到时自然有法律制裁佢嘅。打啦你哋，好闷嗱。
达叔：阿银，如果第一个回合过到骨，佢一定心浮气燥，第二个回合我哋再将心理战术升华，一于吓低佢！
林国斌：搞乜我都一样打死你架。
（林国斌中咗阿银一拳）
梁荣忠（解说）：冇眼花吓哗？大师兄经已中咗拳。
林国斌：公证你睇到喇！
公证：冇嘢呀。
林国斌：嗱，死跛佬，你唔好搞搞震嗱，如果唔系我落台连你都打埋架，你唔好话我……
（林国斌中多拳）
（林国斌转身冲向阿银，阿银抬头，讲咗声：哗！林国斌好奇，抬头望，又中一拳，流鼻血添）

梁荣忠：哎！大师兄又中多拳。
细龟：哗！点解大师兄唔还手呢？
梁荣忠：哗！又畀人中一脚呀！
（达叔发癫噉样掟嘢）
达叔：重有冇嘢？快攞嚟畀我掟。
老世（中招）：不如唔好再掟喇。
阿银（头顶榴莲）：师父，我好似舐咗嘢呀。
达叔：唔使惊，榴莲嚟啫，冇毒架。
（林国斌发难）
阿银：仆街喇！
（突然间某人飞身嚟到阿银面前）
某人：广告时间，即刻清场。

（广告）
位元堂，养阴丸。好似太阳咁温暖。……

（升降机里便）
（收音机冇电嘞）
肥妹：哗！点解会冇声架？
阿丽：梗系冇电嘞。
肥妹：唔系哗？
阿丽：喂，唔好嘈住！
出便个人：喂，系咪有人韫lift呀？
阿丽：有呀！点做嘢架？等咗成半个钟头先至嚟。
出便个人：咁窜？韫多半粒钟呀！
阿丽：喂，唔好呀，快啲救我哋出去吖！

（广告）太阳出嚟了，太阳出嚟了。

（第三回合）
甲：重有一个回合咋，你重唔快啲打谢佢？
林国斌：我要打佢，一秒钟救打死佢嘞。呢个废柴，你睇个衰样，整蛊做怪，原来真系一啲嘢都冇练过。
甲：唔系噉讲，我每日天蒙光见到外卖仔喺一架高速行驶嘅货车里便，faak8嚟faak8去，仿如个黐线佬一样。会唔会练咗某种独门武功而我哋唔知呢？
林国斌：练你老母呀！行开！我唔会畀佢吓倒嘞。（向前冲）
（阿银缠住林国斌双手双脚，林国斌喐唔到）
林国斌：喂，公证，噉算唔算犯规呀？
公证：梗系犯规喇。你擘到只脚噉大，呢个节目好多细路仔睇架嘛。
梁荣忠：大师兄钳住外卖仔。
细龟：照我睇呀，外卖仔克制住大师兄至真。

达叔：（回忆阿银练功嘅情景）阿银，既然你冇能力打低大师兄，就唯有令到佢都冇办法打低你。就唯有令到佢都冇办法打低你。而家我传授你中国古拳法里便嘅皇牌防守绝技，沿于金庸武侠小说《鹿鼎记》里便嘅金蛇缠丝手。只有用货车训练大法先至可以速成。呢种功夫，要诀只有一个字，就系锁！

达叔：锁住佢！锁住佢！锁住佢！

（激斗）
林国斌：你个垃圾，放手呀！
阿银：我唔系垃圾！
林国斌：仆你个街呀！

（阿银揸住林国斌对脚唔放，林国斌猛咁打阿银背脊）
林国斌：放手呀！放手呀！放手呀！……
阿银：顶唔顺嗱！
林国斌：顶唔顺嗱！
阿银：咪走呀！
林国斌：哗！你重嚟？！
（阿银发力打林国斌）
阿银：你至系垃圾！
达叔：Yeah，打得好！
阿银：Yeah!（放松警惕）
达叔：小心呀！
林国斌：Yeah吖嗱！（一脚踢开阿银，阿银弹返缠住林国斌双手）
林国斌：你个死仆街，我唔信（扌永）你唔甩！放手未？你放手未？

细龟：顶住呀，外卖仔！
梁荣忠：打死都唔好放手呀！
达叔：唔好放呀！
荣记冰室班人：千祈唔好放呀！

林国斌（极之痛苦嘅表情）：啊！你唔好噉喇！你放开我喇！（跪低）
（记者埋嚟拍嘢）
记者：唔该望望镜头呀，大师兄。
林国斌：望你老母呀！
阿银：我明白你嘅心情，但我都系唔会放架嘞。
林国斌（四围撞）：救命呀！
（阿银终于都顶唔住，松开咗双手）
阿银：我唔得嘞。
林国斌：十二成功力，裂头脚！
（铃声响，第三个回合完，阿银畀拖开，林国斌踏空）
公证：三个回合，打完！
林国斌：啊？！
阿银：啊！我冇死到呀！
达叔、荣记冰室班人（高举双手）：好嘢！

细龟：外卖仔打完三个回合居然重可以企喺度，真系神奇。
梁荣忠：直情可以拍一部幻海奇情呀！

记者（影相）：大师兄好嘢！
阿银：我好开心呀！

观众（向台上掟嘢）：有冇搞错呀？
公证：经过三个回合嘅比赛，评判一致裁定，胜利者系属于，断水流大师兄！
（众人举起阿银，体育馆沸腾）
众人：好嘢！
观众：我成副身家买佢死架，噉都打佢唔低，大师兄食屎喇！大师兄去死喇！
众人（住阿银周围走）：好嘢！

总监：重以为真系会打死人添。超！原来冇料到嘅。
（林国斌一拳打低总监）

阿银（好开心）：我决定唱过首歌嚟多谢大家对我嘅支持，英雄好汉，……

肥妹（赶嚟）：喺嗰度呀！系吖！快啲过去喇！
阿丽：阿银！
阿银：请大家跟住我一齐唱。（见到阿丽）阿丽！
阿丽：阿银！
（众人一见到阿丽就趸低阿银，走去阿丽嗰度）
达叔：阿丽！畀我惜一啖！
肥仔：我受走伤呀！
伙计：我甩咗牙铰呀！
阿银：阿丽，我冇死到呀！
阿丽：系吖！噉我就放心嘞。
阿银：你知唔知其实我……（林国斌喺后便踢咗阿银一脚，阿银飞咗去好远嘅地方）
林国斌（手指指）：你个废柴呀，用埋啲旁门左道想阴我？我打比赛咁耐呀，所有对手冇一个企得返起身架。你都唔例外呀！你使旨意走呀！我今日一定要打死你为止！（拉返阿丽）走去边嗱？我赢咗你唔恭喜吓我？我叫咗你咪同垃圾一齐架嘛。
（阿丽扇咗林国斌一巴）
林国斌：你打我？！
公证：赢咗咪算啰。重想攞人命？即系当我奔雷手文泰来流嘅啫？
（公证爆衫，畀林国斌打咗一拳就（o累）低咗，流嘢嚟架）
林国斌：何金银，你唔好走呀！
画外音：强中自有强中手，一山还有一山高，何金银今次战术运用成功，你应该口服心服至啱。依家你赢咗重要赶尽杀绝？哼！太过分嘞！
林国斌：边个条气唔顺上嚟打过！
画外音：鹰爪门蒲头！（鹰爪门嘅人蒲头）
林国斌：好，你哋个个一齐上嚟喇！等你哋见识吓人间凶器嘅厉害！
众人：喐佢！

阿银：岂有此理！
达叔：重岂有此理？嗱嗱声搭的士返屋企过年啦！
阿银：的士够唔够坐呀？
肥仔：五个啱啱好呀！
（阿丽埋嚟）
阿丽：阿银，你点呀？
阿银：哎吖！而家第一个添。老板，你自己搭湾仔呀！
达叔：行喇！行喇！
老世：喂喂喂！

（一片混乱）
电视台手足：总监，你冇吖嘛？
老坑：僆仔，得饶人处且饶……
林国斌：收声！
（六国大封相）
电视台女职员：总监，不如腰斩呀。
总监：癫咗呀？我等咗成晚都系等呢个大场面出现嘅啫。你听住呀，所有照原定安排，准备压轴大抽奖。
（阿银重未走）
达叔：阿银，你唔好谂埋啲无谓嘢呀，你点都唔够佢打架喇。
阿银：我重有一招，同我揾条楼梯嚟呀！
其他人：啊？！

达叔：阿银，我同你讲过几多次呀，无敌风火轮系假架，唔得架。
阿银：我话得就得。
达叔：就算得呀，翘起首去边度揾条楼梯吖？
肥仔：揾到条楼梯嘞。
阿银：喺边嗱？
（肥仔扐出一条玩具楼梯，阿银大跌眼镜）
肥仔：长唔长得滞呢？
女主持：各位观众，今晚嘅压轴大高潮，幸运轮大抽奖！

肥仔：哗！原来重有幸运轮大抽奖。如果抽中我就好咯。
阿银：幸运轮？就玩一镬大抽奖。

林国斌：何金银，快啲出嚟！
阿银：何金银喺度，上嚟抽我呀！睇吓边个系垃圾！
记者（摄影）：唔该望望镜头呀！
阿银：上嚟呀，八公！等你呀！上嚟呀！
（林国斌冲向阿银，阿银施展无敌风火轮）
阿银：无敌风火轮！（夹住林国斌一齐滚入幸运轮之中）
（幸运轮高速转动）
（起火添）
阿丽：阿银！
众人：走呀！走呀！
（幸运轮烂晒）
（林国斌爬起身）
林国斌（大笑）：你以为噉就可以碌死我咩？冇咁易！空手道系最强嘅！你始终系垃圾咋。垃圾！垃圾！你系垃圾呀！
阿银：悭返啖气（足累）低啦，见你呀辛苦嘞！
林国斌：噉都畀你睇穿，好嘢。
（倒下）
众人：好嘢！……
（众人扑向阿银）
达叔：阿银，好嘢。
总监：真系好精彩呀！你整烂我哋嘅幸运轮，呢镬赔都赔到你仆街呀！哈哈哈！
梁荣忠（采访）：外卖仔先生呀，你嘅无敌风火轮真厉害吖！点样练返嚟架？
阿银：呢招系我师父教我架。
达叔：唔系，呢招唔系我教佢架，你自己创架。阿银，你不愧系一个勇敢嘅战士。我冇睇错你，我以你为荣。
阿银：师父，都系全靠你啫。
达叔：千祈唔好噉讲，（面向镜头）我做人好低调，我叫魔鬼筋肉人，当日阿银跟我学功夫嗰阵呢，成个番薯噉。若然唔系得我过佢两招，佢有……（咪畀细龟抢走）
细龟：吆！系咯，外卖仔先生，刚才你简直做咗一件为民除害嘅事呀。
阿银：冇错，除暴安良系我哋做市民嘅责任。而行善积德亦系我本身嘅兴趣。所以拖阿婆过马路嗰啲平均每个星期都做一次嘅。星期日同公众假期有三四次添架。
老世（抢过咪，面对镜头）：点解阿银咁好打嘅？我话你知，因为佢食咗我哋荣记嘅菠萝包，我哋嘅……，行开！我哋菠萝包里便真系有菠萝嘅。我哋嘅西多士真系有屎嘅。讲你梗系唔信架。阿牛，屙涿屎畀大家开吓眼界。
肥仔：哦！（踎低）
总监：喂，喺我场度搞搞震？未死过你呀？
老世：噍佢！
细龟：其实你而家最希望最嘅系咩呢？
阿银：其实我而家最希望嘅就系阿丽能够陪我睇听日嗰场黎明嘅演唱会。（举起手中两张演唱会飞）因为呢两张飞呢我都系扑得好辛苦先扑返嚟架。阿丽！阿丽，你喺边嗱？阿丽！
阿银（见到阿丽）：阿丽！（拥抱）阿丽！我想……
阿丽：得喇！唔好讲咁多废话！嗱嗱林打个茄轮先嗱。
（相吻）

（剧终）