創意靈感嚟自改編許冠傑嘅歌詞。
    大部分人認同香港七十年代後期至九十年代初期嘅歌比現時嘅歌經典，無論旋律、歌詞都寫得非常優秀。目前嘅年輕一代之所以對呢啲經典嘅舊歌唔感興趣，與其話係聽厭咗舊歌嘅旋律，不如話係嫌舊歌嘅歌詞“老土”，描寫嘅事物已經過時。隨著社會迅速發展，今日已經極少出現“制水”、“停水”，不過諸如“污染”、“資源短缺”等社會問題卻日益嚴重；現時嘅情侶相識、拍拖亦極少會去公園“拽搖共對輕舟漂”，取而代之嘅，係上網、手機短信……
    要重振流行曲，最好當然係寫最好嘅曲，最好嘅詞，搵最好嘅歌手演繹。三個條件當中，相對最容易實現嘅係寫詞。喺改編許冠傑歌詞嘅過程中，我發覺到借用一啲經典金曲人人耳熟能詳嘅旋律，賦上有現實意義嘅新詞，會有事半功倍嘅效果，聽者更易琅琅上口。因此，製作一個《難忘你的音韻》的音韻系列，係一個值得考慮嘅嘗試。系列不妨從許冠傑開始（《難忘你的音韻——許冠傑》），然後係徐小鳳、鄧麗君、羅文、關正傑……既係對過往巨星嘅一種懷念、致敬，又不失為重振粵語流行曲嘅一種嘗試。

二零零六年五月十一號

本文版權由Highyun所有，轉載請註明出處，否則保留追究法律責任權利。