廣西梧州，乃兩廣通衢，交通要塞，自古與粵文化融爲一體，清末民初更有大批廣東人到此搵食。當其時甚至稱其爲「小香港」，因其地形特點、城市建築格局及人文環境確與民國時期嘅香港有幾分相似之處。

　　當地方言梧州話保存咗唔少古漢語特徵，口音與廣州話有七八成相似，而當地一啲特有詞彙卻係廣州話冇嘅。余自細接觸廣東四鄉及廣西桂東南一帶民眾較多，尤其係梧州人，故此將平時蒐集返嚟嘅幾個有代表性嘅梧州話特色詞語列舉如下，以饗諸位看倌：

　　纜鬚——即係廣州話嘅「做媒」。何以爲「纜鬚」？此詞原據余推測應寫爲「攬騷」，自以爲係「招攬顧客埋嚟騷一騷」之意，經當地人解釋方知錯誤。原來，當地有稱釣魚絲爲「纜」；而「鬚」則乃釣魚鈎上嘅小刺，俗話稱作釣鈎鬚。故此詞引申到「做媒」嘅情形中，甚爲形象，不言自明。

　　伏雞矇——即係廣州話嘅「伏匿匿」，捉迷藏之解。睇字面容易理解，不作解釋。

　　老濕——相當於廣州話嘅「哇鬼」、「僆仔」之類，對細路仔一種帶戲謔色彩嘅稱呼。此講法爲當地新興講法，大概係十幾廿年間嘅事情。

　　冇知——即係廣州話嘅「唔知」，「冇」當地音若「某」。此講法流行於粵西及桂東南嘅粵語區。何以「冇」、「唔」相通呢？皆因廣州話嘅「唔」實乃「冇」（本字應爲「無」，「冇」爲自造字）嘅變音，聲母同韻母脫離開來嘅情況。按此，「冇知」其實更爲地道表達出原意。當地更有「冇有」表達「冇」嘅意思，搞到部分廣東人一頭霧水，唔知佢哋講有抑或冇。

　　足卒——即係蟋蟀，「卒」當地音若「質」。何以爲「足卒」？余尚未考究清楚，據初步推測可能爲「促織」嘅變音，《聊齋志異》亦有《促織》之篇目。

　　阿碌人（佬）——相當於廣州話嘅「嗰條友」，帶些少輕蔑色彩嘅稱呼。「阿」即「嗰」，用作指示代詞，此講法據余所知流行於順德、佛山、桂東南一帶。講開又講，指示代詞中，喺順德、佛山話中更有「lou²」嘅講法，未知與粵西湛江口音之「lo¹」係咪同源；廣州話祇有「阿邊個」嘅講法，其他指示代詞一律採用「嗰」嚟表達。

　　嵌返埋——相當於廣州話嘅「佮返埋」。物品損壞或分離以作維護之動作當地話曰「嵌」。不過廣州話亦有「氹返埋」嘅講法，發音近似。

　　聊——即係玩。暫時未知此字嘅正字寫法，現妄據音近姑且推斷其寫爲「聊」，其發音若「leu⁵」。將玩講成聊不爲梧州話獨有，佛山地區老一輩人亦有類似講法。

　　粒兒——即係廣州話嘅「啲咁多」，解作好少，「兒」發音若「衣」。

　　塞隻——即係廣州話嘅「幾隻」，個別嘅意思，用於表達一個群體事物其中一小部分。尚未考究「塞」嘅正字寫法，暫以同音字代替。

　　失屐/塞屐——梧州附近鄉間「去玩」嘅講法，頗有文言色彩。「屐」字不容置疑，前一字按音推測，未知本字如何。

　　爬撓、撓飯——「爬撓」喺梧州話中係指撐艇仔用嘅船槳，而裝飯嘅飯殼形狀類似船槳，故此又引申到「撓飯」一詞中。

　　鬼兒——即係細路仔，當地普遍講法，與上述「老濕」嘅講法唔同，帶親昵語氣。

　　舐——梧州話音若「失（或塞）」，「我冇舐你」即係類似廣州話「我唔睬你」嘅意思。呢度借助咗「舐犢情深」嘅「舐」字，未知正字係咪噉。梧州話帶「失/塞」音嘅詞語較多，而且每個意思都唔同，比較有趣。

　　甌——梧州附近農村如今重有用呢個古字作爲「大碗、缽」嘅意思，可見當地農村閉塞，受外界語言影響甚少。