陽入（陽去）變陰上，意義有別？
   
    粵語九聲中，第二聲係陰上，第六聲為陽去，第九聲為陽入。在粵語六調方案中，陽去與陽入可以歸入同一調。部分粵語字讀起來可以變調，陽入或陽去聲變成陰上聲，並且意思往往會有變化。
    例如[月]字可讀yt2，又可讀yt9，意義有別：半個月yt9是十五天的意思,半個月yt2是半個月亮,以聲調別義。
    另一例子：地下之[下]可讀haa6，亦可讀haa2。但地haa9指地面之下，即[地底]。而地haa2指相對於高空而言的地面。
    亦有變調而意思不變者，例如一嚿嚿，通常讀成一[九]嚿；一棟棟，通常讀成一[懂]棟，此類變調純粹為讀起來順口。
    當然並非所以字都有變調屬性，故此只是某種現象，而不是規則，不能亂用。
 

粵語殘片用語回味（二）
   
    近排睇完《非常外父》，又總結咗一批以前經常用，而家已經好少出現嘅粵語用語，聽返起上嚟非常有趣。
洒家-->做某樣嘢好叻  喺《水滸傳》裏面，魯智琛經常稱自己“洒家”，不過粵語裏面“洒家”嘅意思唔係“我”，而係“叻”。
省鏡-->靚  可以對比嚇“靚爆鏡”，不過程度上弱少少。
啦-->同  呢度唔係作語氣詞用，係作介詞用。其實原字應該為“拉”，不過讀音變成“啦”。
因乜解救-->點解
    綜合上面四個詞，可以造個例句：
    嗰位小姐著到咁省鏡，你跳舞又咁洒家，因乜解救你唔啦佢跳只舞呀？
    下面重有三個舊時常用嘅名詞：
映畫戲-->電影
新聞紙-->報紙
荷蘭水-->汽水
     唔知呢啲咁有韻味嘅粵語詞會唔會重新流行呢？
 

[計]與[偈]
   
    “聊天”，喺粵語裏面唔少人寫成“傾計”，其實呢種寫法系錯嘅。正確寫法應該為“傾偈”。

    [偈]字原意為“佛經中的唱詞”，“傾偈”本意為“傾談佛經”，後來引申為“聊天”

    既然如此，“冇偈”同埋“諗偈”呢兩個粵語詞嘅寫法又系唔系正確呢？當然唔正確啦，呢個時候就應該用[計]喇。

    眾所周知，[計]其中一個意思系“計謀，辦法”，“冇計”表示冇辦法，“諗計”表示想辦法，與[計]嘅意思非常吻合。雖然[計]字本身讀gai3[繼]，不過喺上面兩個詞中，變調讀成gai2[偈]。

    各位千祈唔好用錯呢兩個字喎！

“麥當勞”亦懶音
   
   

“麥當勞”亦懶音
   
    現時懶音嘅情況已經非常嚴重，連英文都被“懶化”埋。

    “麥當勞”三字，相信無人不曉，而且人人都認為此翻譯非常傳神。就連一開始以普通話音底翻譯成“麥克唐納”嘅內地，亦自愧不如，將招牌換成“麥當勞”。然而呢個被公認為傳神嘅譯名，實際上犯咗一個嚴重嘅懶音錯誤。

    此快餐連鎖店嘅英文名係Mcdonald's，將其中“nald”音節譯成“勞”實屬l、n聲母不分嘅典型懶音現象。 捨一個現成嘅“奴”字唔用，而取一個近音“勞”，莫非譯者唔希望各位成為麥記公司嘅“奴隸”？

    既然“麥當勞”三字已深入民心，要改亦冇可能，祇能將錯就錯，將此三字“發揚光大”罷了，畢竟呢三個字都比“麥克唐納”好上千萬倍。同時亦希望譯名專家以後翻譯英文名稱時唔好再犯同樣錯誤，誤人子弟。

迷信的粵語
   
    廣東人通常比較迷信，就連粵語，都可以體現出迷信嘅成分。其中最有代表性嘅就係對“輸”同“凶”兩個字嘅變讀。
    正由於人對“輸”嘅畏懼，連累埋與“輸”同音嘅“書”字，因此，“通書”變成“通勝”，《秋天的童話》裡面，發哥扮演嘅“船頭尺”甚至將“讀書”講成“讀贏”。睇嚟眞係執“書”行頭，重慘過敗家！
    關於呢個“輸”嘅忌諱，我有一次有趣嘅經歷，當時喺廣州某間飯店點菜時點一個“勝瓜炒牛肉”，本地嘅店員竟然唔知道“勝瓜”爲何物。突然醒悟，原來“勝瓜”乃佛山叫法，皆因佛山話“絲”字發音同“輸”，“輸瓜輸瓜”，輸完又瓜，當然唔“老利”，所以佛山人就改口叫“勝瓜”。眞係唔到你唔服！
    我睇電視，經常見到“吉屋出租”，開始唔明“吉屋”同一般屋有咩分別，後來得到老者指點，先知道“空”、“凶”兩字粵語同音，邊個願意租一間“凶屋”啊？所以惟有將“凶”變“吉”，方有租客。
    關於此類避諱詞重有唔少，大家可以從生活中慢慢體會，若然唔懂得呢啲規矩，就會畀身邊嘅老人家“大吉利市”過你架喇。

“多謝”與“唔該”
   
    粵語裏面表示致謝嘅詞主要有兩個：“多謝”同埋“唔該”。好多人以為呢兩個詞意思完全一樣，其實並非如此，兩個詞有微妙嘅區別，唔可以亂用。睇吓以下例子：

    唔該幫我開電視吖！

    “我幫你開咗電視喇。”“唔該晒！”

    “份禮物送畀你架！”“多謝晒！”

    “新年大吉大利！”“多謝！多謝！”

    上面四個例子，都唔可以用另一個詞代替，否則就會顯得好唔通順。噉究竟呢兩個詞點樣區別呢？好多人知道點用但係又講唔清。其實概括嚟講，“唔該”一般用於感謝人哋幫自己做咗事情，事前講，如上面例句一，相當於普通話“麻煩你……”嘅意思；事後講，相當於普通話“謝謝”。而“多謝”，一般用於感謝人哋畀咗某啲嘢自己，如上面例句三，而例句四相當於感謝人哋畀咗一啲“吉利嘅說話”自己，所以經過引申同樣通用。

    呢度所講嘅祇係大體規律，呢種區別並唔係絕對嘅。比如有時候感激人哋為你做過事情，可能要講“多謝”。比如：

    “我好多謝各位咁支持我個網頁！”因為呢句可以轉變為“多謝大家嘅支持！”，喺呢度，“支持”作為名詞已經引申為物。