[抵死]嘅非典型用法

    粵語裏面經常聽到[抵死]呢個詞，意思係“該死, 槽糕, 討厭, 缺德”，係一句鬧人嘅話。呢個係[抵死]嘅典型用法，不過，有時[抵死]可以用嚟做褒義詞，意思係“古怪、趣致”，呢個ungoo抵死網站裏面嘅[抵死]當然 係取佢嘅非典型用法，即係[有趣]噉解啦。

    另外，關於個[抵]字，古詩有“烽火連三月,家書抵萬金”，喺粵語，[抵]字依然保留“值得”呢個意思。我哋買嘢嗰陣經常話啲嘢“好抵買”，“抵到爛”，意思即 係話啲嘢好便宜，好值得買。

    [抵]字嘅另一個意思係“捱, 忍受”嘅意思。例如：“佢好抵得諗”，意思即係話佢為人能忍耐，不怕吃虧。

    所以話，[抵]字喺粵語裏面有好多用法，花多啲時間去研究都係抵嘅。
 

變音姓

    有唔少字如果作為姓氏，讀音就會改變。下面舉幾個例子：

  [單]，做姓嘅時候讀sin6[善]，中國有個打籃球嘅運動員就叫做“單濤”。

  [解]，做姓嘅時候讀haai6[械]，水滸一零八好漢裏面就有兩兄弟叫解珍、解寶。

  [樸]，做姓嘅時候讀piu4[嫖]，好多韓國人都用呢個姓。最搞笑嘅就係有個叫“樸昌鎬”嘅。

  [仇]，做姓嘅時候讀kau4[求]，武俠小說裏面就有個叫仇少癡嘅。
  [區]，做姓嘅時候讀au1[歐]。
  [華]，做姓嘅時候讀waa6[話]，《中華英雄》裏面嘅“華英雄”個[華]字讀音係同[中華]個[華]字讀音唔同嘅，我諗好多人都冇留意到。
    呢類變音姓重有唔少，希望大家揾到其他例子記住話我知。
 

呢啲字你點讀（二）

    大家學會上一期嗰幾個詞點讀未啊？今期再教你哋幾個難讀又或者易讀錯嘅字詞：
囹圄 ling5[零] jyu5[羽]，[身陷囹圄]即係“坐緊監”噉解
鍥而不舍 kit8[揭]，千祈唔好讀成[契而不舍]
忐忑不安 taan2[坦] tik7[剔]，“忐忑”好形象，即係心上心落好唔安樂噉解
挑釁 jan6[刃]，唔少人以為讀[挑伴]
孑孓kit8[揭] kyut8[缺]，蚊嘅幼蟲
不啻 ci3[次]，即係“不止，不只”嘅意思
緘默 gaam1[監]，“你有權保持緘默，不過你所講嘅嘢將會成為呈堂證供”
箴言 zam1[針]，即係規勸嘅說話
褻瀆 sit8[泄] duk9[讀]，千祈唔好讀成[泄濁]

    上面有啲詞雖然唔係十分常用，但係用到嘅時候好多人往往會發錯音出洋相。如果識得用粵語讀呢啲生僻字，人哋肯定會覺得你非常有文化。

文讀與白讀

    試嚇讀呢兩個詞：“精乖伶俐”、“精通”；再試試呢兩個：“成功”、“成日”， 係唔係讀音有啲分別呢？呢個就係粵語裏面嘅文讀同白讀現象。文白異讀嘅現象多數出現喺韻母為[ing]嘅字。一般嚟講，文讀時韻母為[ing]，白讀（又稱俗讀）時韻母為[eng]。例如：

    訂[ding6]——>[deng6]

    醒[sing2]——>[seng2]

    青[cing1]——>[ceng1]

    驚[ging1]——>[geng1]

    命[ming6]——>[meng6]

    聽[ting1]——>[teng1]

    等等。

    有幾點一定要清楚，白讀並唔等於錯讀，亦唔算一般嘅一字多音現象。而且文讀同白讀係唔可以相互代替嘅，有啲時候一定要用文讀，有啲時候一定要用白讀。如果聽[ting1]日讀成[teng1]日 係唔係好奇離呢？如果聽[teng1]見講成[ting1]見係唔係好唔自然呢？

    當然，文白異讀嘅重有其他韻母嘅字，不過由於比較特殊，所以打算以後分開逐個介紹。

簡得冇道理

    國家推行簡體字已經幾十年，現在國民已視簡體為標準漢字，而視傳統漢字（Traditional Chinese）為“繁體”，此“繁”字也許略帶貶義。漢字之簡化是好是壞可能要等後人才能評論，不過簡化確實有唔合理之處，將好多表義根本唔同嘅詞合而為一，下面僅舉幾例：
[捨]不得 & 宿[舍]       ->舍
[鍾]意 & 鬧[鐘]         ->鐘
一[齣]戲 & [出]來       ->出
[嚇]（語氣詞） & 驚[嚇] ->嚇
公[裏] & [裡]面 & [裏]面->裏
一[只] & 一[隻] & [祇]有->只
[後]面 & 皇[後]         ->後
強[姦] & [奸]狡         ->奸
老[闆] & 木[板]         ->板
標[準] & [准]許         ->准
[製]造 & [制]度         ->制
電[線] & [綫]索         ->線
[滙]豐 & [彙]集 & [匯]演->匯

[甦]醒 & [蘇]聯         ->蘇
戰[鬥] & [鬥]膽         ->鬥

    當然，簡體亦有偶有比繁體好嘅字，例如蘋果嘅[蘋]字，無論音、形都不如簡體嘅[蘋]字。

    多啲瞭解簡體同形而繁體異形嘅字對精通粵語非常有幫助，例如[試嚇]個[嚇]，如果知道繁體裏面[嚇]、[嚇]兩字本來根本唔同，就唔會錯寫成[試下]。