[倔擂錘]定系[倔擂槌]？
  前最近經常同網友爭論一個詞嘅正確寫法，究竟應該系[倔擂錘]呢定系[倔擂槌]？下面睇嚇呢兩個字嘅解釋：

*[槌]1、棒槌 2、通“捶”，敲打
*[錘]1、秤砣 2、通“錘、鎚”，一種敲打的手工具
  如果要理解成好似鐵錘咁倔（鈍），可能要用[錘]字，但系如果連埋前面個[擂]字一齊，個[錘]字就比較難解釋得通。[槌]字作名詞時可以解釋為“棒、棒槌”，如果加埋個[擂]字，就可以理解成“擂漿棍”[倔擂槌]嘅意思就系好似擂漿棍咁鈍，咁直，同我哋所理解嘅[倔擂槌]嘅意思完全相符。

  [倔擂槌]呢個詞除咗可以形容物件冇菱冇角，重可以引申為形容人嘅性格戇直。例如：佢講嘢真系[倔擂槌]，唔識轉彎。

  不過記住啊，[倔擂槌]唔系好嘢嚟架。
 

“飲啖茶，喫個包”

跟佢做個Friend，Walkman兩份聽，去咖啡彎撐艇，再轉車出粉嶺，兩個喫曬一打西餅……
相信睇過《最佳拍檔》嘅朋友對阿Sam呢首
《跟佢做個friend》都好熟悉，佢哋都會知道個[喫]字點解。咁未聽過呢首歌嘅朋友，你哋又知唔知個[喫]字點讀點解呢？
[喫]字讀jaak8，佢嘅意思其實就系[吃，食]，呢個字喺六七十年代系好流行嘅，時至今日，雖然好多老一輩嘅人重講緊[喫飯]，但佢已經慢慢俾[食]字代替。不過系某啲場合，用個[喫]字能增加幽默效果，所以依然有人用呢個字。
唔知大家記唔記得周星馳喺《蓋世豪俠》裏面嗰句好經典嘅口頭禪：“不如大家坐低飲啖茶，喫個包，慢慢傾”呢？
 

同[糖]字有關嘅兩個俗語

  “一啖砂糖一啖屎”呢句俗語唔知有幾多人聽過呢？知唔知呢句俗語系咩意思呢？砂糖系甜嘅，屎系臭嘅，食一啖砂糖又食一啖屎，感受會系點呢？食甜嘢嗰陣感覺好好，但系食屎嗰陣感覺好難受。而呢個詞通常有個省略嘅主語，即系指主語（施動者）喂完人食一啖砂糖馬上喂人食一啖屎。意思即系佢剛剛重對你好好，好溫柔，但系突然變臉，變到對你好差好惡。例如：
  佢對我成日都系一啖砂糖一啖屎嘅。

意思即系佢對我嘅態度反復無常，好難觸摸。

  另一個有俗語“一時糖黐豆，一時水溝油”。糖黐豆系一種食物，將黃豆抄香然後再粘上白糖，黃豆同白糖黐得好實，形容人關係密切；水溝油系一種現象，水同油系互相不能融解，所以倒埋一齊會完全分開，形容人嘅關係好差。雖然呢個俗語都有近似嘅意思，但系呢個俗語主要系講兩個人之間嘅關係，而唔系指某一個人對其他人點樣，所以應該分別開呢兩個詞。例如：

  佢哋兩兄弟一時糖黐豆，一時水溝油。

意思即系話呢兩兄弟有時關係好好，但系有時又鬧矛盾鬧到好僵。

[喊]與[嗌]

    乖啦，唔好喊啦，畀粒糖仔你食...

    成日聽到啲大人噉樣氹細路仔，其實呢句話嘅意思並唔系叫個細路唔好嘈住曬（叫喊），而系叫個細路唔好哭。喺粵語裏面，[喊]字好少解作[大叫，叫喊]嘅意思，一般都解作[哭]。聽過《十兄弟》呢個故事嘅人都知道十兄弟中最細嗰個叫“大喊十”。叫佢“大喊十”唔系因為佢叫得好大聲，而系因為佢淨系識得大哭。

    噉喺粵語裏面用乜野嚟表達[大叫]呢個意思呢？其實粵語嘅字彙真系好豐富，[嗌]字就可以表達呢個意思。[嗌交]就系大聲同人吵架。下面再舉兩個有趣嘅例子講明個[嗌]字嘅用法：

    “我連隨嗌阿媽救命！嗚……”呢首系許冠傑喺《最佳拍檔》電影裏面嘅一首插曲《跟佢做個friend》嘅一句歌詞，佢GF亂咁摣車，就算佢叫佢阿媽嚟都救唔到佢啦。

    “救命啊！”
    “你嗌啦——嗌破喉嚨都冇人理你架喇……”

    唔知大家對呢段對白熟唔熟呢？好似好多搞笑片個色狼想強姦個女仔之前都有呢段對白。

    可見，[嗌]字喺粵語裏面系好常用嘅。

小心發錯音

    由於受普通話或者形聲字規則嘅影響，有啲字嘅粵語發音時時會畀人搞錯，下面就分成呢兩類錯誤嚟糾正幾個發音：

受普通話影響

    [彼]同[鄙]，呢兩個字嘅普通話拼音分別系pi同bi，但系粵語裏面，佢哋嘅聲母剛剛相反，[彼]字發 bei2[比]，而[鄙]字讀 pei2 [皮2]。

    另外一個例子系[隨]同[垂]，普通話拼音分別系sui同chui，但系粵語亦系剛剛相反，[隨]讀ceoy4 [除]，而[垂]讀 seoy4 [誰]。     

受形聲字影響

    [娩]讀min5 [免]，唔好唔好因為個[挽]字而讀成[分挽]。

    [滓]讀zi2 [紙]，唔好因為個[宰]字而讀成[渣崽]。

    [憧]讀cung1 [沖]，唔好因為個[童]字而讀成[同景]。

    [竊]字正音系sit8 [薛]，千祈唔好因為普通話讀qie，而以為[竊]讀cit8[切]。

粵語殘片用語回味

    唔知大家有冇發覺，五、六十年代嗰陣，廣府人講嘅粵語同宜家嘅相比有啲唔同，其中嘅唔同之處主要表現喺用詞方面，從粵語殘片就可以得到證明。下面就舉幾個例子睇睇：

扯-->走

以前叫人走，一般都講“你扯啦”，而比較少講“你走啦”。

系定啦-->梗系啦

睇返模仿粵語殘片環境嘅《難兄難弟》，就經常聽到阿寶珠講“系定啦”呢句話，今時今日我哋都改曬用“梗系啦”表示呢個意思啦。

嗰處(發[恕]音)-->嗰度

雖然宜家都偶有聽任講“邊處”、“嗰處”，但系用得更流行更現代嘅系“邊度”、“嗰度”。

話過我知-->話畀我聽

個[過]字唔可以完全等同[畀]字，好難解釋。不過我諗見到“交封信過我睇睇”呢類句子大家都知道咩意思啦，粵語有時系可意會不需言傳嘅。

喫-->食

關於[喫]字，前面已經有文章詳細解釋。

粵語幾十年前後嘅差別，上面所講嘅只不過系略舉幾例，如果睇完一部粵語殘片，可以舉出比呢度多出好多倍嘅例子。