冇散紙點算？

各位，今日同大家講個“暢”字，大家都應該知道，喺漢語字典裏面“暢”字係“通暢”，“順暢”噉解，但係喺粵語裏面，呢個字原來仲有一個特別用法，呢個用法同錢係有好大關係嘅。大家去買嘢嘅時候，身上只有一張“四個人頭”，但係你買嘅“濕碎嘢（零散的小東西）”只需要幾毫（角）或者幾蚊（元），呢個時候，你就要“暢”散你張一百蚊大紙喇。

「暢」

讀音：粵語coeng3，國語chang4 

字義：解作破開、分開(鈔票)

例: 「暢」十蚊散紙 (找開十塊錢零錢)
    「暢」唔開 (錢分不開)
 

僆仔唔一定靚仔

   我哋睇報紙電視，經常睇到用[靚仔]呢個詞嚟形容一哋青年人，意思係話佢哋年輕幼稚，乳臭未乾。但係有冇人覺得個[靚]字用錯咗呢？

   其實正確用法應該係個[僆]字：

   僆 leng1[靚1]，lian
   1、年輕而幼稚
   2、幼小的動物

   個[靚]字只有一個讀音leng3，[靚仔]係形容男仔好英俊，[靚仔]係一個百分之百嘅褒義詞。而[僆仔]好多時候都帶少少貶義，通常用於暗示對方幼稚無知，見識膚淺。

例：[僆]仔，唔好咁串。

    阿叔食鹽多過你食米啦，[僆]仔。

    當然，[僆仔]有時都可以用嚟稱呼年紀比自己小的晚輩，不含貶義。

例：[僆]仔，畀心機讀書啊。

    呢個[僆]仔有前途。
    所以大家要小心啲用個[僆]字同[靚]字喇，唔係就會鬧人變咗贊人架喇。
 　

「哽」字雙解

    講起個「哽」字，係人都知道有「哽塞」、「哽咽」呢啲詞，呢個時候，「哽」字嘅係「聲氣阻塞」嘅意思，讀gang2「耿」。但係大家知唔知呢個字重有另外一個讀音同用法？

  冇錯喇，呢個讀音就係 ang2 [鶯2]，意思係「觸著硬的不平的東西」。對粵語熟悉嘅朋友相信已經明白呢個意思係咩回事喇，等我再舉兩個例子啦：

    張床好似有嘢「哽」住我。  

    條路啲石仔「哽」腳。

    有時呢個意思重可以引申為「令人不舒服」，例如：

    啲飯好硬，食落肚「哽」住個胃。

    佢講嘅說話好「哽」耳。 

    希望細佬我講嘅嘢唔會「哽」親大家只耳啦。^_^

呢啲字你點讀（一）

  我哋讀中學上語文課嘅時候，遇到好多生僻嘅字詞。當時老師淨係教我哋讀普通話發音而我哋唔知道粵語究竟係點讀，宜家幫大家補嚇課啦：

  躑躅 zaak9[摘] zuk9[濁]
  蹂躪 jau4[由] leon6[吝]
  倉猝 cong2 cyt8[撮]

  （[倉]字單字發第一聲，當與[猝]連用時發第二聲）
  酗酒 hoey3[去] 
  齷齪 ak7[扼] cuk7[促] 
  嫋娜 niu5[鳥] no4[挪]
  佝僂 koey1[驅] lau4[流]
  桎梏 zat9[侄] guk7[穀]

  雖然呢啲字用嘅機會唔係太多，但係想成為百分白粵人，講一口流利嘅粵語，唔好失禮街坊，都應該知道佢哋嘅正確寫法。想認識更多生僻字，請留意《呢啲字你點讀（二）》啦。

[姣]好唔好？

  [姣]字，本來係一個褒義詞，佢嘅意思係指相貌美，讀gaau2[絞]。[姣美]，[姣好]呢啲詞語都係形容女子相貌美好。

  但係，你講粵語嘅時候，千祈唔好用個[姣]字嚟形容人哋啊，特別唔好對住女士講添。因為個[姣]字喺粵語，重有另外一個意思，而且對於廣東人嚟講，幾乎只有呢個意思。呢個時候，[姣]字讀haau4[孝4]， 係[淫蕩，淫亂，風騷]嘅意思，係一個對女性嘅貶義詞。

  如果我哋遇到哋成日喺男人面前賣弄風情嘅乞人憎嘅女人，就會叫佢[姣婆]，對於佢哋嘅表現，我哋可以用[姣屎扽豚]嚟形容，不過記住唔好亂咁用啊！ 

[冧]友與[冧]人

  前幾日，我學校有棟舊樓倒塌，造成一死幾傷嘅事故。有個朋友發條資訊畀我話：“呢度[林]咗樓啊，好大鑊！”佢又用錯字喇，喺粵語裏面，表達呢個意思嘅正確寫法 係[冧樓]，呢個時候個[冧]字讀lam3[林3]，表示[倒塌]嘅意思。例如：

  舊年911，世貿中心冧咗。

從呢個意思可以引申出[殺人]呢個意思，相信大家都聽過黑社會用語[冧友]嘅意思喇。

另外，[冧]字重有另外一個讀音lam1[林1]，有三個意思：

  蓓蕾：花[冧]
  哄（用法同[氹]）：[冧]掂佢
  甜蜜：好[冧]

[冧]字兩個讀音嘅意思係絕然唔同架，冧自己嘅女朋友就幾時都應該，冧友就千祈唔好制。