逃学威龙之二

逃学威龙II
　

（救人质演习）
（周星星好淡定噉样坐喺度食即食面）
（突然间身边嘅人形纸板不慎畀啲手下射中，周星星停止食面，出去闹班手下）
手下（异口同声）：Sir!
周星星：你哋今日嘅任务系咩呀？
手下（异口同声）：救人质，Sir！
周星星：咩话？
手下：救人质，Sir！
周星星：杀人质咋啩？一位咁天真可爱嘅小妹妹，就噉畀你哋摧残咗。敌我不分！（闹手下）你有冇话畀你听有几多个人质？
手下：冇呀，Sir！
周星星：噉你老奉以为得我一个啰㖞？
周星星（冚咗另外一个人一巴）：你呀，正话飞身入嚟开枪，好有型呀哗？睇前唔睇后，你后尾枕镶钢板咋？！
周星星（闹返第一个人）：我呀，正话谂住等佢坐喺度，我趷起身咋。如果系噉样，我咪畀你啡死咗？啊！到时呀，你帮我办身后事，养埋我老窦老母呀？！你噉嘅死款嗱，你点养得起呀？啊！闹够未？
手下：够嘞，Sir！
周星星：好，以后冇得闹了嘞。由听日开始，我就调出去升职加人工住洋楼养番狗。你哋自己执生。
手下（行礼）：Yes, Sir!
（周星星行礼）
（周星星转身离去）
（手下击掌庆贺）
手下：Yeah!
（周星星返转头）
周星星：我走咗大家好开心吓哗？唔怕话畀你听，我重开心呀！（大笑而去）

（周星星同曹达华坐埋一张台，曹达华揸住支笔，黑口黑面，周星星扯住口烟）
女警员（嚟到周星星身边）：周Sir，你份快劳未返到，Madam等一阵会见你哋。
周星星（叫住女警员）：哎！（摆手示意女警员走开）冇嘢。
周星星（搭住曹达华手臂）：我知你可能以为我嚣，但系你谂吓，阵间我就会“得”入间房里便“奀奀”脚指人做嘢。唔嚣佢一嚣，点对得住自己？
曹达华：我失恋嗱！
周星星：升职嘞啊，终于轮到我。
曹达华（忟）：我失恋嘞！
曹达华（拗断支笔）：失恋嘞！
周星星（除低副黑超）：你失恋？
曹达华：嗯！
周星星：有冇可能呀？你拍过拖咩？
曹达华（摇头）：未吖！
周星星：噉咪系啰。
曹达华：我哋笔友嚟嘅。
周星星：哦！笔友！
曹达华：通咗信三年几架嘞。最近佢突然间唔睬我。
周星星：点解呢？
曹达华：因为你寄咗幅相畀佢。
周星星：噉你自己断正啊。你噉嘅相貌点寄得相畀人睇架？
曹达华（揸住周星星衣襟）：系吖，所以我寄咗你幅相畀佢。
周星星：我幅相？！
曹达华：系吖！佢一见到你幅相就以后都唔睬我嘞。
（周星星若有所思，戴返副黑超）
曹达华：唔关你事嘅，样衰都唔系罪过嗻。（叹息）问世间情是何物？直教生死相许。乌啄啄兮乌啄啄，莫奈何兮莫奈何！你阿妈兮……（畀人泼咗一面水）

（柯受良喺度落口供）
柯受良（闹女人）：我饮冻水嘅咩？啊！你跟我咁耐，你见到我饮冻水咩？
女人：冇！
柯受良：冇呀？（打女人）冇你又斟冻水畀我饮？
警员（拍台）：喂，呢度差馆嚟架，唔好乱嚟！
柯受良：咩差馆嗱？啊！我钟意打佢呀，佢又钟意畀我打。你吹呀？你吹呀？（好鬼嚣）
柯受良（问女人）：你钟唔钟意呀？
女人：钟意！
柯受良：大声啲！
女人：钟意！
柯受良：大声啲呀！（打女人）钟意同我去斟水！
你惨得过我女人多咩？我唔志在啊！（点烟）
（曹达华睇唔过眼，想教训吓柯受良）
*曹达华：我嚟！
警员：系，阿Sir！
曹达华：过嚟！
柯受良：过去边呀？
曹达华：过嚟吖！

（审讯室）
（曹达华揸住鎚仔）
柯受良（惊惊哋）：喂喂喂！问嘢㖞，使唔使攞鎚仔吖？
曹达华：问嘢？！打完至问呀！捉住佢！唔好畀佢喐。（走去揾啲嘢）
周星星：等等！
柯受良：喂喂喂！你哋想搞咩呀？
周星星：收声，坐喺度！
周星星（劝曹达华）：阿达！阿达！喂！你噉样做唔系好啱规矩嘅。
曹达华：你审过犯未啊？
周星星：未，但系打伤佢咪“盏”自己拿屎上身。
曹达华：点会打得伤嘅啫？审犯梗系攞个电话簿垫住佢心口，一个扑鎚槌埋去。乜嘢伤都验唔到架。
周星星：呢个时候你无谓搞啲噉嘅嘢啊嘛，你。
曹达华：喂！有冇电话簿啊？点解冇电话簿，个差馆真系奇怪……
周星星：好似冇带出嚟，（摷摷吓，扐出一本好细嘅电话簿）啊，有带㖞真系。
曹达华：哎！啱喇！啱喇！嚟！垫喺佢心口，垫喺佢心口。
周星星：我好唔赞成你噉样做。
（揭开本电话簿垫喺柯受良身上）
曹达华：唔怕㖞，你垫喺度，唔系打伤佢添呀。嚟嚟嚟！三下至打吓。
柯受良：喂！喂！喂！阿Sir，你本电话簿咁细，打死人架。
曹达华：揭开佢！揭开佢！第三下！（欲打）
柯受良：揭开都打死人架。（用手护住心口）
曹达华：松开只手啊，拑住佢！拑住佢！拑住佢！拑住佢喂！
周星星：唔关我事啊！我被迫架咋。
曹达华：第三下呀！
柯受良：嗱嗱嗱，你唔好玩呀！
周星星：嗱嗱声呀！
曹达华：一……二……
（柯受良一脚踢开曹达华）
周星星（拑住柯受良）：喂！想死呀你？
曹达华：放开佢！我要同佢只耷！
周星星：重耷乜Q呀？
曹达华：放开佢！
周星星：啊！我怕咗你，自己耷到够啦！
（曹达华一脚踢中周星星）
周星星：哗！你耷我定耷佢呀你呀？！
曹达华：耷佢！
（曹达华处于劣势）
曹达华（求救）：星啊！星！
周星星（欲出去）：做咩呀？
曹达华：接力！
周星星：又话只耷？
曹达华：你耷咪一样。
周星星：早话呀你！
（周星星两三下手势就制服咗柯受良）
周星星：摔角吓哗，僆仔？！
曹达华：到我！到我！到我！到我！接力！接力！接力！（同周星星击掌）
曹达华（又衰咗）：星呀！星呀！星呀！接力！接力！
周星星：真丢架呀，识着你！
曹达华：啊！唔好讲咁多啦！快啲喇，快啲呀，嚟呀，嚟呀，嚟！快啲！快啲！快啲！
（击掌）
（周星星点烟）
柯受良：喂，整口嚟食吓嘞喂！
周星星：你就想，个几银钱口呀！
曹达华：接力！接力！接力！
周星星：你重嚟？！
曹达华：睇过！
周星星：你话架！（击掌）

（Madam推门入嚟，柯受良畀咗曹达华面，喺Madam面前表现得好有男子气概）
Madam：你做咩打原告呀？
曹达华：牛高马大掐女人，抵打。（谰cool）我最睇唔起唔尊重女性嘅男人。如果你觉得我做得唔啱嘅，你port我啦。
柯受良：我要投诉，我要投诉呀，差人打人嗱。
Madam（问曹达华同周星星）：你哋啲快劳返嚟未呀？
曹达华：未！（梳头）
Madam（同柯受良讲）：呢位先生，好对唔住，照程序嚟讲呢，呢两位已经唔系差人嚟架嘞。
柯受良：吓？！有冇搞错呀？唔系差人你又打人？！
Madam：政府系唔会搞错架，我哋系讲道理嘅。如果呢位先生系要告佢两位架，我唯有charge……你哋三位殴斗，有冇兴趣呀？
*柯受良：有，你点放两只癫狗嚟打我呀？吓！你讲呀！我要port佢（手指周星星），port佢（手指曹达华），我要port埋你个死肥婆！（手指Madam）你唔好以为呢度黑鼆鼆就唔认得你哋呀！我最认得系你吖！又矮又肥又巢皮吖！
*Madam（插佢双眼）：
*柯受良：插我对眼嗱！
Madam：呢一区最大就系我，你要port我就嚟我面前port我啦！有冇人见我插眼嗱？
周星星、曹达华：有！
Madam：系啦！就插多你一眼嗱！（踢下便）我伸多一脚你下面都得呀！你port我，睇吓有冇人信你呀喇？收队！
周星星、曹达华：Yes, Madam!
（三个人行出去）
Madam：有冇人见我伸脚呀？
周星星、曹达华：有！
Madam：有冇人见我又矮又肥又巢皮呀？
周星星、曹达华：冇！
Madam：Good! Good! Good! Good!

（Madam办公室）
周星星：Madam，其实正话嗰单嘢系，系误会嚟架。但系，好多谢……
曹达华：我曹达华啦吓，一人做事一人当。头先条躝瘫我打得好happy。如果你觉得我系唔着嘅，随时钉死我。
Madam：你两位上个月破嘅军火案呢，做得非常之好。
周星星：系！啊！因为……
曹达华：冇乜嘢啫，呢个系我哋应份做嘅。冇乜特别呀。
Madam：你唔好咁谦啦，你想做啲咩呀？
曹达华：警察部边个部门最危险？
Madam：重案组。
曹达华：我想入重案组。
周星星：你去咗重案组，噉我点呀？不如我去交通组啦，不如，真系！（三人皆笑）

（周星星喺马路上维持交通）
周星星：究竟做错啲乜嘢呀？

（周星星沦落到推车）
细路（推推眼镜）：唉！无前途！

（周星星畀架车撞到，成个人贴住架车，架车里便）
黄小龟（好惊）：死嘞！死嘞！
周星星：熄匙，车牌，身分证！
车上嘅人：大镬嘞！
黄小龟（欣喜若狂）：啊？！星哥嚟架！
番薯：星哥嚟架！以前大佬嚟架，唔使惊呀。
*周星星：番薯㖞。好耐冇见嘞！
黄小龟：星哥，我哋冇事架啦呵？
周星星：死仔，好彩撞着我咋，下次冇咁好彩架嘞。小心啲啊嘛。
黄小龟：噉走得架嘞㖞。
周星星：走呀，走呀。
黄小龟：喂，点解咁兜踎，着住件蛤蚧衣周围走架吓。
番薯：系㖞！
解释吓！
周星星：熄匙，车牌，身分证！
黄小龟：讲笑，我哋去饮茶啦！
*番薯：
周星星（扐出枪）：绝对唔系讲笑。全部落车，双手摆头！（落晒车）揸实啲！而家charge你，危险驾驶，企图谋杀。
*番薯：
周星星：Shut up!
周星星（同黄小龟讲）：你，同未成年少女发生性行为。
黄小龟：我都未……
周星星：Shut up!
周星星：Shut up! 自己睇啊！走呀！
（三个人走咗）
周星星：死仔，我噉叫兜踎咩？噉叫折堕。

（周星星坐喺路边，食住肠仔管理交通）
周星星：重唔收油吓哗？（影相）

（曹达华架车喺周星星面前停低落嚟）
曹达华：喂，星呀，星！
周星星：阿达！
曹达华：哗！咁好闲情喺度烧嘢食呀？
周星星：梗系啦。
曹达华：喂，整条肠仔嚟。
周星星：里便重有呀。
曹达华：喂，件蛤蚧衣着得惯唔惯呀？
周星星：几好呀，色彩艳丽，我都好满意。
曹达华：系咩？
周星星：系。
曹达华：哦！噉就着耐啲啦，你。哈哈！你又系嘅，唔识凼Madam欢心。
*周星星：我唔耷佢算佢好彩嘞。好似你咁无耻呀，沟埋晒啲驱风老饼。
曹达华：喂！家阵唔系我沟佢㖞，系佢自己唔知埞，舂个头埋嚟我处咋㖞。呢件嘢呀，我啅硬佢呀。（样衰衰）
周星星：哗！你睇吓你个样衰成噉，我真系唔明佢会钟意你啲乜？
曹达华：佢就系钟意我乜。
周星星：啊？！
*曹达华：你就实冇行啦。你系出咗名飞虎队第一号快枪手……
某甲：阿Sir，架车走咗呀？！
曹达华：系噉呀，有单大case做紧，系噉，系噉。
周星星：咩大case呀？喂！大case？

（重案组班友前去围剿班恐怖分子）
（曹达华好鬼论尽噉样）
组长（对讲机）：系咪有第二组人喺度啊？

匪徒甲：I've got a hard band transmission. We have company gentlemen.
（卧底畀识穿咗身分）

曹达华：对方有证架㖞，唔系市政府派嚟清垃圾咩？Check Check佢！

周星星（挟持柱组长）：咪开枪，自己人……
组长：我哋有个卧底喺上便啊。放手！
（卧底死咗）
曹达华：大家安全嘞！

（办公室）
政治部大佬：嗰个系我哋个卧底嚟架。佢喺国际学校系查紧一单恐怖分子嘅case。呢班恐怖分子呢喺英国已经搞咗两单学校炸弹案嘞。今次嚟香港嘅目标系边间学校呢，我哋重查紧。
鬼佬上司：Thank you Peter, Lydia, 你讲！
Madam：我哋冇接到政治部任何通知话有卧底㖞。
政治部大佬：我哋政治部做嘢要通知你嘅咩？
鬼佬上司：阿P，唔好劳气，两个部门都冇错。（问周星星）小朋友，叫咩名啊？
周星星（企正）：交通部PC，编号167周星星，Sir！
鬼佬上司：有冇后台？
周星星：后台？！（摇头）冇！
鬼佬上司：Good，噉你挨吓义气同我孭咗呢个镬佢啦。好唔好？

（周星星同曹达华行出办公室）
周星星：唔得呢镬，噉即系屈我。
曹达华：系，冇面嘞嘛。
周星星：冇嘢嘅，咪打佢一镬啰。
曹达华：抵打！
周星星：你话抵打吓哗？你话抵打吓哗？我而家就打佢一镬。（行入办公室）
曹达华（叫住周星星）：系噉易打几嘢好嘞，唔好打死！
周星星：噉就难讲嘞，我拳脚无眼！
曹达华：放轻啲手啊。
周星星：我拳拳都咁重！
曹达华：噉物系。
周星星：当今世上边个受得我一拳？
曹达华：眼睇又冇。
周星星：噉咪得啦，我就打。
曹达华：喂喂喂，睇住打亲我Madam㖞！
周星星：边个屈我就打边个而家。
曹达华：啱啊。啱啊。
周星星：系咪先？
*曹达华：系啊，系啊，噉就嗱嗱声噍几嘢饮咖啡啦。
周星星：你想饮咖啡咩？
曹达华：饮咖啡！
周星星：饮咖啡先。
周星星：我话你听，我周星星今时今日天不怕地不怕。边个屈我，我就打！

（周星星屋企，见家长）
周星星（端茶畀伯母饮，双手颤抖）：伯母，饮茶，伯母！（返埋去张敏身边）
伯母：乖嘞！乖嘞！
张敏：妈咪呀，你唔好迫佢啦吓。
伯母：我迫佢？我几时有迫到佢吖？嗱，你讲喇，我有冇迫到你吖？吓？你讲啦。
周星星：理论上，冇！
伯父（企喺伯母身边）：你妈咪唔会迫佢架。
伯母：喂，我同人哋倾偈吖，你唔好搭嘴好唔好？
伯父：Oh, yes!
伯母：老实讲嘞，你有冇想过要结婚啫？吓？
周星星：喺正常嘅逻辑性道德观念底下，有！
伯母：即系点啫？
周星星：即系冇！因为点解呢？我冇钱！
伯母：冇？！唔系啩？当咗咁多年差，冇钱？你讲笑咋吓哗？“昆”我系咪吖？
周星星：结婚要用嘅婚纱、礼金、礼券、礼饼、酒席、度蜜月、买新屋、揭力夸啦各样，我都负担唔起，冇！
伯母：人哋嗰个有五亿架㖞。
伯父：哦！嗰啲系以前嘅事喇。
伯母（闹伯父）：又关你嘅事啫？
周星星：五亿？！五亿有，五亿。多就话啫，不过我用嚟买晒嗰堆嘢。（指组合音响）
伯母（走去睇组合音响）：唔系吓嘛？！呢摊噉嘅嘢就五亿架喇？
周星星：就系呢摊嗱。
伯母（厾音响）：喂，纸嚟架咋㖞。
周星星：系吖，正话厾走咗我亿五，已经。
伯母：唔系咁贵吓嘛？！
张敏：喂，你有钱架。
周星星：我边度有钱？
张敏（攞出存折）：呢个户口我哋一齐开架。
周星星（揭开存折）：我记得，一人夹十文架嘛。
张敏：而家唔止十文架嘞。
周星星（睇存折）：十万？！你储咗咁多钱嗱？
张敏：喂，你都有份储架，你唔记得咗啊？啊？
伯母：冇法啦，个女似我噃，你有福喇，准备办婚事喇。
张敏：妈咪啊，你放心啦，佢会搞架嘞。哦？
周星星：哦！

（周星星屋企，周星星喺度睇紧张存折）
（门钟响，周星星走去应门，原来系阿达）
阿达（夹住份文件）：喂，星啊，喂，有啲好紧要嘅嘢揾你帮手。政治部同重案组第一次携手合作，今次我抛头露面嗱。
阿星（叼住口烟仔）：派你做鸡呀？
阿达：唔系吖。
阿星：噉抛头露面？
阿达：唔系，我意思即系话好出位，好架势噉，应该点讲？
阿星：出人头地。
阿达：系啦，系啦，出人头地啰，我正话咪讲出人头地啰，做咩啫？
阿星（唔耐烦）：系啊，系啊，噉点？
阿达：冇，呢度啲英文呢我就冚棒唥都识，就唔知点解。你解我听啊。
阿星（睇份文件）：佢呢度话……啊？啊？
阿达：咩话？
阿星：啊？
阿达：咩话？
阿星：唔系啩？
阿达：吓？做咩呀？

（Madam办公室）
阿星：Madam，我建议你考虑清楚至好。我相信呢单case除咗我之外你唔应该揾第二个人去做。
Madam：曹达华系我哋重案组之虎，佢一定能够胜任嘅。
阿星（问阿达）：你自己讲，你掂唔掂？嗱，嗰班恐怖分子呢癫架，我话你听呀，你唔好扮嘢，你讲！
阿达：我知，我知，呢份资料写得好详细，呢单case呢就好危险。但系我一直都唔怕危险架。
Madam（同阿星讲）：你唔好咁高估自己啦。你上司向我投诉，话你唔适合做交通差㖞。我考虑调你去东龙岛。
阿星：个荒岛嚟㖞。
Madam：系吖，冇马路啊嘛。
政治部大佬（行入办公室）：哗！噉你咪好得闲，恭喜晒㖞。啊，唔该啲低级警务人员出出去先，我哋要开会。
阿星（除咗件蛤蚧衣）：Sorry，我唔系低级警务人员。Actually，我唔再系警务人员嘞。（喺件蛤蚧衣上便擤鼻涕）我唔捞嘞。（行出去）
阿达（叹息）：唉！一江春水向东流，而家啲年轻人真系冇啲修养吓。
Madam：达，重案组好彩有你咋。
*阿达：唔好咁大声啦，招妒忌架。
Madam：Sorry!

（阿星屋企）
*阿达（拿住份报纸）：星啊，星啊，喂，同你揾到几份工都啱架。嗱，你听吓，吓。（读报纸）电子厂请熟手啤胶员，人工高、福利好、有厂车接送。唔啱呵？（又睇到一则广告）呢份啦，呢份啦，（读报纸）东华三院请看更，有鲜明制服。喂，啱晒你啊，你咁钟意着制服架。
（阿星突然间拧转身睥住阿达）
阿达：唔啱，唔啱，（又睇到一则广告），喂，呢份啱晒你啊嗱，电影公司请男主角一名，无不良嗜好，年轻力壮，身手敏捷，气宇轩昂。喂，所有条件同你好配合㖞。
阿星（埋嚟睇报纸）：系？
阿达：系。喺呢度有少少同你有出入。
阿星：边度？
阿达：佢系请狗公一只，拍《人狗情未了》。差少少啫，不妨试吓。
（阿星挞低报纸）
*阿达：喂，你唔系谂住自己差过只狗吓哗？未必架㖞。喂，星啊，噉你要打算吓得架。后生聊聊，唔通唔做嘢，真系做飞仔咩？
阿星：跟住点样，我已经决定咗。
阿达：决定点呀？喂，做生意就预埋我呀。
阿星：做返我至精嗰瓣。
阿达：系唔系啊？只狗嘅角色其实好适合你架。（畀阿星打咗一拳）
阿星：做卧底，我要返返学校做卧底。

（海边细龟、番薯、周星星、）
周星星：我要返学校做卧底，需要揾几个助手同我一齐扮学生混入去学校里便。呢几个人，一定要坚强敏捷，智勇双全，所以我揾你哋。
细龟、番薯、某某：唔制！
细龟：你分明“昆”我哋。
周星星：你点知架？
细龟：我哋咁狗，点似坚强敏捷，智勇双全呀？
番薯：你咪以为我哋真系傻至得架。
某某：咪系。我哋虽然狗，但系都狗唔晒。咁易畀你呃到架？唔制！
番薯：唔制！
细龟：唔制吖！老大都唔制吖！
某某：唔制！唔制！
周星星：想要几多钱，讲啊！
细龟：万五！
番薯：三万！
细龟：每人万五㖞！
番薯：逐个月计㖞！
某某：港银㖞，唔系yen㖞！
周星星：成交！
细龟、番薯、某某：多谢老世！多谢老世！
番薯：食饭嗱！食饭嗱！
细龟：一齐食饭！（拍住番薯膊头）都唔明点解又要搞单噉嘅嘢。
番薯：咪系。
周星星（拍住细龟膊头）：因为我要话畀人听，我系飞虎队第一号杀手。上一镬学校失枪案，我一夫当关，万夫莫敌，（拉住细龟衣襟）而家就算唔系总警司，都应该系总督察。绝对唔系交通部PC编号167。你明吗？
细龟：我明。
周星星：你讲大话！你咁狗，点会明呀？
细龟：星哥，我很狗，但我很聪明。

（几个人睇地图）
周星星：英国政府如果系一个礼拜之内，亦即系嚟紧呢个平安夜凌晨之前，重唔释放呢一个恐怖组织嘅阿头嘅话，班恐怖分子就会喺香港其中一间学校里便搞大镬。
细龟：喂，星哥，英国政府嘅嘢关香港咩事啫？
某某：系㖞。
周星星：英女皇生日你放唔放假？
细龟：放啊。
周星星：即系关事啊。
细龟：系㖞。
番薯：但系香港有咁多间学校，我哋入边间好啊，星哥？
周星星：我已经分析过架嘞。正话香咗嗰个政治部卧底就系伏喺呢间Adam Smith国际学校里便。而喺呢间学校里便读书嘅呢，全部都系啲乜乜领事物物大袋嘅仔仔女女嚟。所以如果我系恐怖分子嘅话，我一样会喺呢度搞事。
细龟：噉万一你估错呢？
周星星（同细龟讲）：万一估错就打镬你。
细龟：金唔金架？
周星星：999千足纯金。嗱，而家你去准备，我去报名。
细龟（双手合十）：星哥，唔好估错！星哥，唔好估错！星哥，唔好估错！

（Adam Smith国际学校）
周星星：请问阿金校长喺度吗？
职员：金经理吓嘛？
周星星：校长，唔系经理。
职员：都一样架啦。直行转左第一间嗱。

（周星星喺校长室门外敲门）
周星星：金校长吓哗？
*金校长（打紧电话）：入嚟呀！入嚟呀！喂，我有客走咗嚟，迟啲再倾呀。（收线）Hello! Hello!有咩可以帮到你啊？
周星星：我想报名读书。
金校长：边一间呢？
周星星：Adam Smith International.
金校长（揿电脑）：Form几啊？
周星星：Form 6, 四位！
金校长：啊，有位。等我帮你办手续。
金校长（睇周星星嘅资料）：周星星同学，你几多岁呀？
周星星：十八岁。
金校长：唔系吓哗？睇落至少廿八㖞。
周星星：唔系吖哗？
金校长：哎！唔紧要！唔紧要！廿八又好，卅八都好，你千祈就唔好自卑，至紧要你哋肯读呢就我哋肯教架嘞。
周星星：噉物最好啰㖞。
金校长：学费呢就每月四千文，四位呢就万六，重有呢书簿费呢就每位就三千六，就运动装费呢就每位就二千八，总数加埋就四万一千六。老世，多谢！多谢！
（周星星打冷震）

（第一日返学）
政治部卧底：喂喂喂喂喂喂喂喂喂喂喂！你嚟呢度做乜嘢呀？
周星星（咬耳仔）：读书！请问教务处喺边嗱，哥哥？
政治部卧底：有冇搞错呀？
周星星：唔该！唔该人嗱！
细龟、番薯、某某（鞠躬）：唔该，哥哥！

（四人等训导主任，气氛紧张）
手足：You four wait here and Mr. Bond, would see you later.
细龟（同番薯讲）：唔知个训导主任恶唔恶架呢？
某某：恶得过以前学校个林主任？
番薯：傻嘅，我哋畀钱嚟返学架嘛，星哥，呵？
周星星：嘘——！

（训导主任入嚟，原来系阿达，各自愕然）
阿达：啊？！
周星星、细龟、番薯、某某（书包跌晒落地）：啊？！
细龟：啊？原来系达叔呀！
阿达：No, call me Bond, Jame Bond!
细龟：你系占士邦，噉我系Batman。
（阿达用文件扑细龟个头）
细龟：哎吖！
阿达：听住，我系你哋训导主任James Bond。（逐个打过）唔系Batman，唔系超人，更加唔系达叔！
（举起双手欲打周星星）
周星星：嚟啊！嚟啊！嚟啊！够姜你打落嚟呀，嚟呀！
阿达：政治部班大佬喺出便（目及）住呀！
（周星星见到政治部班卧底喺出便）
周星星：我唔理咩上中下部呀，我嚟读书架啫。你训导主任咋噃，可以立乱打人嗱？
阿达：唔系打人，柯打净系打你一个啫。嚟啦，嗱嗱声畀我噍镬噉咪收工啰。最多我请消夜呀！
周星星：当我傻架？畀你噍镬我重食到消夜？
阿达：放心啦，我保证细细力架咋。如果真系打到你痛，即时还拖呀。
周星星：噉就得！
阿达：嚟呀！
周星星：消夜无谓嘞，折现一千啦。
阿达：五嚿！
周星星：八嚿！
阿达：杀你！

（出便）
政治部卧底：哗！佢哋两个有仇呀？
阿达（扮打周星星）：喂，头先赚我八嚿水，攞出嚟请我食餐饭得唔得呀？
周星星：请你食条就得。
阿达：乜你成世人都咁孤寒架？
周星星：喂，系噉左右左右，有冇单调啲架？我好攰吖。
阿达：我打你都未攰，你攰？！
周星星：我条颈好攰吖，系噉“发”，有冇第二招呀？
阿达：有！（扐出碌棍扑晕咗周星星）啊！点会无情情多碌棍架？

（几个人扶住周星星）
细龟：星哥，你冇事啊嘛？
周星星：冇事！冇事！
某某：而家点呀？
周星星：揾机会扮返个冚家铲一镬啰。
某某：唔系吖，我问下一步任务点呀？
周星星（戴返副超）：噉样，我哋要搭通呢间学校嘅天地线，我要知道以前阿Mike喺呢间学校里便嘅一举一动。
番薯：明白。噉我哋行先咯。
周星星：你行去边呀？
番薯：嗰边啰。
周星星：嗰边做咩呀？
某某：啊，你理得我哋啫。（行开）
*周星星（指指厾厾）：你话呢啲咩态度呀？呢啲呀？
细龟：啊，星哥，噉我哋又去边便嗱？
周星星：是但喇，嗰便喇！（手指天花板）
细龟（向上跳）：哦！
周星星：玩吓哗？僆仔！

（细龟饮水）
周星星：饮完未呀？
细龟：就得架嘞，星哥。畀啲耐性呀。
1周星星：快啲啦！
（细龟畀周星星一嘢拉返去自己身后，细龟撞跌咗迎面行过嚟嘅人嘅嘢）
细龟：对唔住呀，哥哥！
系姐姐呀！
细龟：你唔讲我唔知呀！
噉你而家知啦。
细龟：都唔觉。
道歉！
（细龟忍唔住笑）
细龟（舐嘢）：哎吖！
道歉！道歉呀！道歉嘞嘛！
细龟：对唔住呀，姐姐！
周星星：得未呀？
细龟：星哥！（想讲又唔想讲）
周星星：行呀！

（周星星同细龟周围揾班房）
细龟：星哥，天黑咁滞啰㖞，重未揾到班房噃。
周星星：重唔问吓人？
细龟（见到Sandy坐喺度睇漫画）：呢个系姐姐嘞啩？（推Sandy，声大大噉问）喂，姐姐，班房喺边呀？
周星星（好声好气）：妹妹呀，请问你Room 507喺边处？
Sandy（手指楼下）：楼下！
周星星：Thank you!
周星星（睇Sandy睇紧嗰本书嘅封面，发表高见）：《浪》呢本小说唔系好啱你。男女主角萍水相逢，卷起惊涛骇浪，可惜最后冚家都死晒，悲剧收场，太惨嘞。应该拣啲开心少少嘅睇吓。
Sandy：开心？
周星星：开心！譬如亦舒嘅《春之梦幻》、北条司嘅《城市猎人》、鸟山鸣嘅《IQ博士》。啊！黄玉郎嘅《龙虎门》我相…相信会最适合你。（落楼）
细龟（敬佩）：哗！星哥，估唔到你嘅文学根基原来咁深厚架，太有内涵嘞。我真系唔明点解啲人话你无厘头呢。
周星星：咪系。
细龟：真系唔抵嘞。
周星星：冇天理。
（撞到番薯）
番薯：星哥，星哥，我收到条僆呀。
周星星：凭你？
番薯：系咯，我都觉得奇。
某某（同新僆Albert讲）：叫大佬呀。
Albert：大佬！
周星星：Hello! How are you?
Albert：要几多钱嗱大佬？
周星星：咩几多钱？
Albert：个个大佬都要钱架嘛。
周星星：咩意思？
番薯（解画）：阿Albert喺间学校咩会都入匀架。
某某：系吖，由班会到黑社会，所有会费都交足架佢。
周星星（问Albert）：呢度有黑社会架咩？
Albert：有，呢（指远处），嗰个咪B字头啰。
周星星：嗰个黑人嚟啫，未必系黑社会吓哗？
Albert：黑人都有黑社会架嘛。（指远处）嗰个C字头啰。
周星星：C？
Albert：C for“CA LI FRA GA LIS TIC EX PE ALA DOCIOUS”咋嘛。
周星星：I see! 不过其实我只系想问你关于一个人。跟我嚟！

（班房）
Albert：畀钱啦。
（番薯畀咗个黑鬼三十文）
黑鬼：三十文？！
Albert：收顺啲呀，FRIEN嚟架。
黑鬼：唉！算啦！算啦！算啦！
番薯：多多包涵！多多包涵！
某某：射住呀！

周星星（嚟到门口）：番薯！
番薯（嚟到跟前）：系！
周星星：搞掂晒未呀？
番薯：我已经搭通晒呢度啲天地线嘞，星哥！绝对冇问题。
周星星：呣！（行入课室）

番薯（带路）：买咗位架啦。喺嗰度呀！呢度呀！呢度呀！呢度呀！畀咗钱架啦。
（周星星坐低）

（头先个Sandy行入嚟坐低）
细龟：姐姐呀！
周星星：妹妹吖！

（周星星见到一个鬼佬喺度怼草）
鬼佬（问周星星）：Do you want some?
（周星星摇头）
鬼佬：Ten dollar one stick. Good glas.

周星星（同细龟讲）：无法无天！
细龟：无法无天咪好啰，做乜都得。唔通好似监狱噉好咩？
（后便条友叹气）
条友：唉！真系二号！
细龟（转身）：咩二号呀？
条友：第五场二号啊嘛。
条友：喂，第六场就开啦，我呢度外围有九折，有冇兴趣？冇呀，股票、金融、期货、外币、喂，日本纸升紧㖞，点呀？唔啱？女人嗱，中、英、美、法、苏，十八岁，全套。唔啱？男人？畜生？狗？老鼠？

（课室一片混乱）
阿Sir：Excuse me!
学生：Hi Sir, nice hair cut!

（台面摆咗本色情杂志）
学生甲：阿Sir，本书益你架，正唔正呀？
学生乙：好嘢嚟架。
学生甲：睇清楚！好嘢啊。
阿Sir（睇咗一下本杂志然之后摆低）：我都好少睇波架你真系。
阿Sir：我哋不如，点点名先好吗？
（Sandy想入非非，听唔到阿Sir叫佢嘅名）
阿Sir：Sandy Lai! Sandy!
Sandy隔篱：喂！
Sandy（大梦方醒，举手）：我喺度呀。
阿Sir：跟住呢个，咦，新同学㖞。Stephen Chow!（拧头）
周星星、细龟、番薯、某某（同时举手）：喺度！
周星星（放低只手）：周呀，嗌周呀，有！（举手）喺度！
阿Sir：Mr Chow，欢迎你！

（灵修堂）
王牧师：马太福音第二十七章：这时候，卖耶稣的犹大，看见耶稣已经定了罪，就后悔。（见到四个瞓着咗，拍台）
（周星星同其他两个醒咗，细龟重未醒）
周星星（凑近细龟耳仔讲）：打牌。
细龟：好呀，打几大？
王牧师（忟）：你而家做乜嘢呀？
细龟：Goodbye, Sir! 打牌啦！（起身欲走）
王牧师：你！罚抄圣经旧约加新约一次。
细龟：做咩呀？做咩咁认真架？（坐返低）又话打牌嘅？
周星星：迟几年先啦，本嘢咁厚。呢一、两年你莫讲话打牌啦，打飞机都唔得闲咋㖞。
细龟：噉点得呀？
王牧师（继续讲课）：讲返后悔嘅犹大，佢将嗰三十块钱掉咗喺圣殿嗰度，走出去就吊死咗嘞。
周星星（抹镜片）：咩嘢事咁睇唔开要走去死吖？
王牧师（除低眼镜）：唔通你认为出卖耶稣嘅犹大系好人？
周星星：犹大，过得去啦，OK啦。如果佢唔出卖耶稣，耶稣就唔会钉十字架。佢唔钉十字架嘅话呢，你都冇十字架揽架啰㖞。喂，你冇得捞架啰㖞，你惊吗？
（四人皆笑）
王牧师：犹大出卖耶稣系神嘅安排嚟。
周星星：系吖，系吖，即系神专登跣犹大一镬。（大笑）
（王牧师用本圣经扑周星星个头）
王牧师（后悔）：神！请你原谅我嘅暴力。请你启示我点样去打救呢个学生。

（周星星揞住鼻）
细龟（喺隔篱）：喂，星哥，呢度冇王管架㖞，你想做就去做啦。
（周星星起身，企喺王牧师面前）
王牧师：做咩呀？你又想抄圣经呀？
周星星：哦，呢啲小事啫，至于神打唔打救我，都迟啲先讲。但系我而家就想即刻打救你。（打倒黄牧师）
（众人拍手）
*细龟：星哥好嘢，星哥，你呢拳真系准嗱。不过我有啲唔系几好嘅预感㖞。

（周星星惨畀钉十字架）
阿达：你又系嘅，好得罪唔得罪，得罪王牧师？王牧师系全校最大嘅，重大过我同校长。你得罪佢呀，随时飞你出校呀。
周星星：唔早讲呀，你呀？
阿达：唔记得咗啊嘛。行呀！行呀！
王牧师：我睇你点样打救我？
阿达：行呀！
周星星：哗！你好嘢，训导主任！
阿达：使乜讲呀？咪走呀！

（阿达喺度食烟兼睇杂志）
周星星：训导主任！
阿达：做咩事呀？
周星星：哦，冇，有啲嘢想入厕所请教吓你啫。
阿达：唔使入厕所呀！
周星星：阻你一阵嗱。
阿达：就呢处嘞，好吗？
周星星：入厕所好啲。
（阿达撇）
周星星；喂，唔好走！训导主任！

（厕所阿达畀周星星打镬金）
阿达：哎吖！大佬，学校规矩系噉，我都唔想打你架。
周星星：傻仔嚟架，我几时有同你计较过啫，你见我净系打到你爆晒光就知我冇嬲过啦。
阿达：系，你唔攞我命都算畀面我架啦。多谢晒！多谢晒！
周星星：惜住你架嘛。嗱，抵请饮茶嘞啩呢镬？
*阿达（攞钱）：哦，抵，抵，饮完茶执返只糯米鸡、两笼虾饺我食得唔得呀？
周星星：嘘——！

（隔篱系政治部班友喺度盥洗）
条友仔神神化化，入嚟搞咩呢？
理得佢咁多呀，总之佢唔阻住我哋做嘢就得架嘞。
最紧要唔好畀佢接近Sandy呢。

（周星星同阿达出厕所，撞到政治部班友）
周星星：阿Sir，下次我真系唔敢喇。
阿达：乌啄啄，睇吓你以后知唔知死？
周星星：当然知啦，但系下次唔好咁重手得吗？
阿达：唔重手你点得惊呀？
周星星：噉物系。
阿达：返课室！
周星星：Thank you, Sir!

（体育馆，周星星同Sandy又碰面）
周星星：呢个Sandy同件案真系有关？

（政治部卧底见到Sandy望紧周星星，将一个篮球掟向周星星，个波畀周星星打爆咗）
（周星星非常之cool噉样走开，Sandy对周星星嘅敬慕之情油然而生）
（周星星行落楼梯）
番薯（埋嚟）：星哥！星哥！头先你就威到尽啦。真人表演打爆波，简直出神入化，叹为观止吖。
周星星：攞唔攞彩呀？
番薯：攞到七彩吖！
某某：九彩耶！
周星星：有冇靓女尖叫呀？
番薯：何止呀，呻吟嘅都有呀！
某某（手指番薯）：呢！
周星星：边个呀？边个呀？
（番薯扮呻吟，畀周星星拉埋一边猛批）
某某：星哥，想当初你嘅功力只系能够去到接粉擦，估唔到而家经已能够提升到打爆波嘅境界，重打得咁有型，你真系犀利呀，星哥！
周星星：接粉擦就止呀，家阵？
某某：噉接咩呀？
周星星：子弹都接得住呀！
某某：哗！咁犀利呀，噉物要表演嚟睇睇啰。
周星星：有机会嘅，畀啲耐性呀。
某某：噉我等你呀，知唔知呀？我等你呀！

（校园内）
周星星：原来政治已经重兵部晒喺里便，证明我嘅估计冇错。呢间学校的而且确系有景轰哩。
细龟：好咯，好咯，今次唔使噍镬金嘞吓。
（番薯、某某打电话）
周星星：你做咩呀？有料到呀？
番薯：冇，谂住约女朋友食饭之嘛。
细龟：系呀。
某某：我都系呀。我都系。
周星星：做咩？而家够钟嘞咩？吓？返屋企做功课呀。

（政治部班友失惊无神喺架车里便钻出嚟）
条友：周星星，我哋政治部想请你返去饮咖啡。
Albert（喺后便冒出嚟）：大佬，大佬，饮咖啡呀？我又去。

（Madam办公室）
政治部大佬：你哋喺学校做咩呀？
周星星；你失忆架，我讲过好多次啦，读书啊嘛，哥哥！
政治部大佬：阿Sir呀！
周星星：阿Sir嚟咩？咦，你教边科呀？啊，睇你个样一定系教“柯史”，啊，唔系，“中史”。
政治部大佬：我警告你哋呀，以后唔好再跟佢返学呀。如果唔系我拉晒你哋架。
（Albert举手）
政治部大佬：咩事呀？
Albert：我唔读书冇嘢做架，我系学生咋嘛。
Madam：噉又系嘅，冇理由唔畀人读书架嘛。周星星都唔系我哋警队嘅人嘞。系唔系，阿达？
阿达：点呀？你好惊佢咩？我一啲都唔惊佢。嗱，听住，以后畀心机读书，唔准查案，唔准沟女，唔准打训导主任。
周星星：Yeah, Sir!
阿达：出去啦！
（周星星打咗个响指）
细龟、番薯、某某：Goodbye, Sir! Thank you, Sir!
*周星星：收队！
（周星星同四个人行出去）

政治部大佬（同Madam讲）：呢单case如果有咩差错呢，由你负责。Let's go!（同班手足行出去）
Madam（起身问阿达）：系咪你安排架？
阿达：我点做，你唔好过问得吗？
Madam：好，我信晒你架嘛。你块面冇事吖嘛？
阿达：多事哩。（走开）

（警方采取行动围剿啲恐怖分子）
*A（对讲机失灵）：点解唔work嘅？
B：唔好理咁多喇，线报话喺里便，攻入去呀！
（扑空）
A：冇人嘅？
B：小心啲呀，佢哋一定喺度架。
（爆炸，冚家铲）
匪徒A：Alright, we do it as planned. The target is Adam Smith Inrternational School.
匪徒B：But the cops already in school.
匪徒A：Cops? You afraid of cops?

（周星星屋企）
细龟：喂，星哥，畀呢条友知道咗我哋嘅身分，我哋好危险架㖞。不如……
Albert：大佬，你哋唔好杀我灭口呀。
周星星：总之我哋嘅秘密如果畀人穿咗出去嘅话……
（细龟大Albert）
Albert：点会啫？我已经入咗你哋个会啊嘛。
番薯：想冇事你就嗱嗱声做晒啲功课先嗱！
Albert：做完嘞！做完嘞！

（细龟见星哥套Hi-Fi冇咗，觉得好奇怪）
细龟：咦，星哥，你套Hi-Fi呢？
周星星：卖咗嘞。
细龟：Upgrade呀？
周星星：冇钱嗱，我十万银你班友仔两嘢同我使晒。有乜办法唔卖呀？

（周星星揭开本簿仔，见到啲啲咁多嘅存款，即时面青青）
细龟：星哥！唔使面青㖞。我介绍个贵利佬畀你识呀。
周星星：边个呀？
（细龟指自己）
（周星星欲批细龟，番薯走埋嚟）
番薯：星哥，六点喇，再唔收工同你起O.T.架。
周星星：收啦！收啦！收啦！收啦！

（番薯开门，撞啱张敏返屋企）
某某：咦，Miss Ho，好耐冇见㖞。
张敏：好耐冇见㖞。
细龟：唔同你讲咁多嘞，我哋收工嘞。
张敏：收工？！
细龟：收工嘞！
张敏：拜拜！
细龟：拜拜！
张敏：收工？！
Albert：拜拜！
张敏：哦！拜拜！

周星星：敏！
张敏：喂，佢哋话收工嘅。
周星星：系吖，啱啱上嚟整水喉之嘛。
张敏：水喉？！
周星星：成班友仔而家学人做水喉佬。
张敏（除咗外套，坐低）：我啲发尾呢又长咗呀。
周星星：冇问题吖，坐呀。
张敏：唔该！
周星星：先生，几多位吖？
张敏：一位吖！
张敏：你订咗酒席未呀？
周星星：订咗，订咗。

（周星星同张敏整头发）
张敏（见到啲Hi-Fi唔见晒）：做乜唔见晒啲Hi-Fi嘅？吓？
周星星：唔使Hi-Fi吓哗？而家有你Fi-Hi，重使Hi-Fi？
张敏：你噏乜嘢呀？
周星星：即系话听你唱歌好过听Hi-Fi啰。吓！
张敏：听日呀，我约咗个地产经纪吖，你记得带check-book呀。
周星星：你想落订呀？唔使咁急吓哗？
张敏：做咩呀？你冇钱咩？
周星星：有，喺度。你上次畀我嗰啲我全部都喺度。但系如果你嗱嗱声就落咗订先噉咪即系要供楼架啰㖞。
张敏：供咪供啰，你可以申请公务员津贴架嘛。
周星星：重边有啲噉嘅嘢呀？
张敏：点解冇呀？
周星星：我系卧底嚟架嘛。
张敏：卧底？你话升咗级嘅？
周星星：系升咗级呀，不过都系卧底呀。
张敏：吓？
周星星：但系而家已经系卧底之中嘅指挥官。呢个位唔系人人都做到架。你应该戥我开心先系。你开唔开心？
张敏（点头）：嗯！
周星星：笑呀！
（张敏微笑）
周星星：嗯。
张敏：噉会唔会阻迟我哋嘅婚礼架？
周星星：唔好呀，千祈唔好，大佬！迟咗我重有命？（失手）
张敏：你做咩呀？
周星星：冇嘢呀。
张敏：继续啦。
周星星：重嚟？
张敏：系吖！
周星星：你话架吓？
张敏：系吖！快啲啦！唔该！

（体育堂，林尚义教柔道）
（周星星企喺林尚义隔篱畀林尚义做示范）
林尚义：今日我教大家打柔道，柔道要练得好呢，腰力呀，系最重要架。（掼低周星星，周星星即刻爬返起身）除咗腰力之外呢，脚力呢都非常之重要架。嚟！（踢周星星小腿）
周星星：哎吖！哎吖！哎吖！
林尚义：嗱！见到未呀！其实柔道呢系千变万化嘅。嗱，譬如……，嗱！
（周星星自己瞓低）
林尚义：Sandy，你出嚟同佢比试吓。
Sandy：系！
周星星：阿Sir，佢女仔嚟架㖞。
林尚义：我特登揾个最细粒嘅出嚟出嚟同你比试呀。揾第个我惊打死你呀。

（双方准备就绪）
*林尚义：Ready!
（周星星同Sandy跳起舞上嚟添）
*林尚义：Cut! 做咩要跳喳喳呀？打！

（打完）
周星星：承让！承让！
林尚义：好喇，算打和啦。

（浴室）
（政治部卧底经过阿达身边）
阿达（刷牙）：咁快冲完嘅？
政治部卧底：你有打柔道咩？
阿达：冇呀！
政治部卧底：噉又冲凉嘅？
阿达（细细声）：我哋系partner嚟架嘛！

（周星星剃紧须）
政治部卧底（咬耳仔）：Sandy同呢单case系冇关嘅。
周星星：Sandy?! 唔明。我嚟读书架咋。
政治部卧底：噉如果你系读书，你更加唔好沟女啦。
周星星：冇。
政治部卧底：噉唔通佢沟你呀？！（照镜）你望吓自己个样，你睇吓侧面，你望吓你个头顶呀，边一忽会有女人钟意呀？你讲呀！你讲呀！有冇呀？你讲呀！有冇？
周星星（摆手）：冇！
政治部卧底：咪啱啰。You've got it, give me ten!（拍掌）
周星星：Yeah! I've got it, give me five! Yeah! 就算有都系Sandy啫。
（政治部卧底拉住周星星打茄轮）
（林尚义见到）
林尚义：哎！做咩打茄轮？（埋嚟）打茄轮点解唔预埋我呀？
周星星（大笑）：哈哈哈！下次呀！下次呀！
政治部卧底（拉返周星星）：唔该再掂佢呀。
阿达：喂，有冇护发素呀？整啲护发素嚟！

（快餐厅）
周星星：Thank you!
服务员：唔使Thank you，你讲唔该得架嘞。
周星星：唔该！

Albert（汇报）：大佬！大佬！
周星星：你识唔识短头发嗰个女仔？
Albert：边个短头发嗰个？
周星星：哎！短头发睇紧公仔书，一望就知佢水性杨花噉嗰个呀。
Albert：哦！嗰个系Jacky吖，Sandy嘅家姐呀。系人都怕咗佢呀。
细龟：点呀？有咩大计呀？
周星星：啱啦，你而家嘅任务呢就系负责引开睇紧公仔书，个样好水性杨花嗰条女。
细龟：嗰个？唔好嘞啩？不如引开隔篱嗰个呀。
周星星：隔篱嗰个我搞掂呀，你负责“水性杨花”。
（细龟摇头）
周星星：This is an order!
（细龟猛摇头）

（细龟硬住头皮走去引开Jacky）
细龟：姐姐，你有冇空呀？
Jacky：你讲咩呀？
细龟：小小就够架嘞。
Jacky：我个胸细关你鬼事呀？
细龟：我系话时间嗱。
Jacky：冇呀！

（细龟夹硬惜咗Jacky，Jacky追细龟）
Jacky：你死仔，你噉就想走？你唔好畀我追到你！
Sandy：喂，家姐！

（周星星抢去Sandy前便）
周星星（喘晒气）：咦？乜咁啱呀？
Sandy：咁啱嘅！你喺度做咩呀？
周星星：晒紧太阳之嘛。
Sandy：好。（周星星做咗一个手势）
Sandy：好呀。
周星星：噉行呀。

（两个人坐喺嚿石头上）
Sandy：我觉得我哋好似识咗好耐噉呀。
周星星：系，我都有噉嘅感觉。
Sandy：唔怕坦白同你讲呀，我几钟意你。
周星星：我知，唔怕坦白同你讲呀，其实我系冇近视嘅。
Sandy：阻住！
（Sandy惜咗周星星一啖）
*周星星：言归正传嗱，我头先讲到边度话？
Sandy：言归正传！
周星星：系。我想问吓你重记唔记得一个叫Mike Chan嘅人？你识唔识Mike Chan？
Sandy：唔识！
周星星：咩话？
Sandy：唔识！
周星星：Mike Chan㖞！
Sandy：我唔识！
周星星：Mike……Chan㖞！
Sandy：Mike Chu就有，Peter Chan我都识。确系唔识Mike Chan。
周星星：搞错呀？你系咪唔记得咗呀？你谂真啲呀。因为对我好紧要架。
Sandy：我谂我家姐会知啩？
周星星：噉嗱嗱声去揾佢啦。

Jacky（捏住细龟个鼻）：我睇你忍得几耐。
（细龟忍唔住，张口，Jacky乘机嘴落去）
（周星星同Sandy行过去，Jacky趸低细龟，扐起）
Jacky：玩吗？一齐呀。
周星星：唔好客气，你哋自便啦。
Jacky：起身嗱，冇事吖嘛？
细龟（起身）：冇事！
Sandy：家姐呀，你识唔识一个叫Mike Chan嘅人嗱？
Jacky：Mike Chan?!
周星星：Mike Chan!
细龟：讲佢听啦！
Jacky：边个Mike Chan啫？
周星星：呢个Mike Chan。（扐出一张相）
Jacky（睇相）：哦！缩骨遮吖嘛。
周星星：缩骨遮？！
Jacky：系佢啦，佢出名私私缩缩嘅。一个礼拜四日唔返学，返亲学又瞓觉架啫。
周星星：系咩？
Jacky：系。
周星星：佢平时有咩活动你清唔清楚呀？
Jacky：有活动唔系叫缩骨遮啦。缩骨遮摺埋架嘛！吓！哎！（搭住细龟膊头）玩波！
周星星：玩波。

Sandy（将周星星拉埋一角）：今次无论如何我点都要试一次架嘞。
周星星：我睇不如算呢，因为呢啲嘢都唔系我哋啲细路仔玩架。
Sandy：家姐都唔怕咯，乜你咁老土架。你未试过咩？
周星星：系吖，我未试过架。
Sandy：我都未试过呀。
周星星：系咩？
Sandy：我哋试吓。嚟啦，试咗就唔系细路仔架喇。嚟啦，试一次吖。
周星星（周围望）：我睇唔好嘞啩。
Sandy（拉周星星衣袖）：唔怕啦，呢度冇人嗱。
周星星：唔使吓？
Sandy：一次吖！
周星星（除咗眼镜）：OK，OK，你顶得住吖嘛？
Sandy：嗯！快啲啦！
周星星（搽润唇膏）：嚟紧！嚟紧！嚟紧！你唔后悔啊嘛？
Sandy：唔后悔。
*周星星：噉“hip7”埋双眼先。
*Sandy：唔“hip7”。
周星星：噉嚟嘞㖞。
Sandy：嚟呀！
周星星：嚟呀！（惜Sandy）
（周星星喘晒气）
Sandy：你做咩呀？（周星星攞出喷雾对住口喷）你哮喘？！
周星星：唔系，唔系，扯虾啫。
Sandy：扯虾？！
周星星（周围揾眼镜）：咦，我副超呢？我副超呢？
Sandy：咩超呀？
周星星：副超呀！超呀！
Sandy：副超！超！（指周星星心口）
（周星星戴返副超）
周星星：OK，你觉得点呀？
Sandy：几好，你呢？
周星星：Very Good! 不过细路女真系唔应该立乱试呢啲嘢。如果你下次想试呢记得揾我。
Sandy：你唔怕扯虾咩？
周星星：会架，不过就为咗你冇法啦，吓嘛？

（阿Sir失惊无神走出嚟，吓到周星星同Sandy猛咁走）
阿Sir：周星星！
周星星：走鬼吖！
阿Sir：喂喂喂。咪住，我都有嘢想请教你嘅，唔使惊，唔使惊，唔使惊！
周星星：咩呢？咩呢？
阿Sir：我谂咗好耐嘞，净系你至可以教到我啫。点可以追女仔？
周星星：追女仔？！点解问我呢？
阿Sir：我头先睇见你哋两个，技巧几纯熟噉呀。
周星星（笑）：基本嘢嚟啫，有对象咩？
阿Sir：有有有，不过…，硬系唔知点解咁细胆呀。
周星星：冇问题，大家研究吓。其实追女仔嘅嘢胆固然之要有啦。不过我觉得你当务之急呢就搞搞个发型先。
阿Sir：哦哦哦！呣呣呣！

周星星：嘥心机挨眼瞓，原来全部都系冇料到。你见点呀，阿龟？龟！
细龟：太厉害嘞，（比划）点解一巴嘴加一巴嘴会有咁大嘅威力嘅？一定系爱情嘅威力呀，星哥！
周星星：几时结婚呀？
细龟：佢话等佢有经济基础先嗱。
周星星（笑）：都好嘅，噉而家最无辜嗰个咪系我啰。无端端黐咗条靓妹度都唔知点收科。
某某：星哥，你有女朋友架㖞，会唔会把持唔住呀？不如噉呀，我蚀底啲我同你啃咗佢先嗱。
周星星：好呀，嚟呀。
某某：傻啦，讲笑咩？你睇吓我，噉样嘅头你叫我点……
*周星星：你知就好啦。总之呢铺就“漏苞”系喇。

（Albert失惊无神串噉出嚟）
Albert：大佬，有料到呀！大佬！
周星星：系。咩料？
Albert：呢，Mike Chan同嗰两条女去过街。（指离远两条女）
周星星：嗰两条女？（同番薯讲）而家噉样，你两个负责过去同佢哋沟通沟通先。
番薯：星哥，你成日嗌我哋噉样做，我哋发觉好似舞男㖞。
某某：系咯！
周星星：噉你上唔上呀？
番薯、某某（支箭噉样标出去）：上！
周星星：后生仔即系后生仔。你睇，一啲定力都冇。点做大事呀你话，真系！
Sindy（喺后面窜出）：喂！
周星星：喂！喂！喂！
Sindy：陪我买汽水呀。
周星星：净系买汽水咋咩？不如呀，一齐食埋饭啦。

（细龟 Jacky 某某番薯）
（细龟同某某、番薯玩斗机）
Jacky：斗机？我问你哋吖，周星星系咪真系有女朋友呀？
*番薯：噉梗系有啦。不知几靓呀！何似你呀？
*某某：系咯，系咯，噉啦，你叫Sandy考虑吓我呀。我都几好呀，系咪？系个头Cheap啲咋嘛。
细龟：衰仔嚟架！
Jacky（掹住细龟衣襟）：你！系咪有第二个女朋友？系咪有第二个女朋友？你讲！
细龟：冇呀！
Jacky：冇个耳仔会咁红嘅？
细龟：唔知哩。
Jacky：你吖，识埋啲噉嘅朋友呀，映衰我呀。我话畀你听呀吓，你唔好再畀我见到周星星呀吓。再畀我见到佢嘅话呢，我溶咗佢，听唔听到呀？

（周星星同Sandy一人拉一根书包带）
Sindy：你系咪好唔想同我出嚟吖？
周星星：都唔系，两睇呀。
Sindy：如果你唔想同我出嚟咪唔好出啰。你想同我出应该畀我拖住你只手吖嘛。唔好要人拖书包。
周星星：噉所以就话两睇吖嘛。买嘢食。

（周星星见到番薯畀Jacky同细龟掐）
Jacky：你头先讲咩话？我而家再问你，我靓唔靓？我靓唔靓呀？讲！
番薯：靓啦！靓啦！

（周星星改变主意）
周星星：不如我哋去第二度食。

（头头碰着黑，撞到张敏，周星星转身）
Sandy：做咩呀？
周星星：冇，我想去厕所小个便。
Sandy：我等你呀。
周星星：唔好，一齐吖！

（厕所迫晒人，周星星又改变主意）
条友：唔好啊，唔好去厕所倾啦，有嘢喺呢度讲啦。
（周星星拖住Sandy转身走）
Sandy：你唔系去厕所咩？
周星星：我想忍忍先。
（周星星坐低）
Sandy：你忍到架喇？
周星星：世上无难事嘅，睇你有冇诚意嘅啫。你买啲嘢食先嗱。
Sandy：哦！噉你忍忍先嗱。（走去买嘢）
周星星：得！
（周星星即刻除低眼镜，喺个包里便扐出一个面具）
（戴上面具）
周星星：做得卧底，呢啲环境我早有准备嘞。

（周星星自己攞嚟衰，荡咗去张敏嗰张台）
（周星星起身想走）
Sindy（买嘢返嚟）：哗！你做咩搞成噉呀？
周星星：走嘞！走嘞！
Sindy：未吖，未吖，撞见熟人嗱。（打招呼）世伯！伯母！
伯母：咁啱呀。
Sindy：系吖，咁啱呀，（同周星星介绍）呢位呢系Miss Ho，系我以前嘅补习老师。（同张敏讲）Miss Ho呀，冇咗你同我补习之后呢，我啲成绩差咗好多呀。
张敏：噉你得闲咪嚟我度啰。不过我就嚟搬喇。
Sindy：系吖？
张敏：我结婚嗱。
Sindy：你结婚嗱？恭喜晒！
张敏：多谢晒！
Sindy：恭喜！恭喜！我都拍紧拖。
张敏：你男朋友嚟架？（伸只手出嚟同周星星扼手）Hello，你好吗？
Sindy：不过佢好曳呵？成日都系噉。
伯母：又几趣怪架㖞。
周星星（起身）：走喇！走喇！
Sindy：未食嘢㖞。
周星星：我唔舒服呀。
Sindy：哦！
周星星：走喇！走喇！
Sindy：唔好意思，咁多位！走先喇！
张敏：OK，拜拜！
周星星：拜拜！

周星星：拜拜你条尾，又过一关。

（阿达突然间喺身后拍周星星膊头）
阿达：星呀，星！
周星星（转身）：边位呀？
阿达：我呀！
周星星：认错人嘞，大佬！
阿达：认咩错呀？（揭咗周星星嘅面具，死火，穿煲嘞）
阿达：啊！唔系听到你把声，几乎唔认得系你呀。喂，坐坐坐坐！
伯母（指指厾厾）：乜原来系你吖！
阿达：系，佢佢佢！坐坐坐坐！喂，呢啲环境我帮你搞掂佢！Miss Ho，嗱，你唔使嬲呀。星仔点解成日同Sandy喺埋一齐呢，主要就为咗公事架咋。噉物中间佢哋两个有冇少少私事噉就好难讲喇。
（周星星想讲）
阿达：唔好嘈呀，呢啲嘢呢你就唔好当真吓。（同Sandy讲）你都唔好认真呀！其实星仔份人呢就好有上进心架。嗱，今次畀警察部炒佢鱿鱼呢，佢都要死返嚟做卧底。重有呀，佢为咗做卧底呀，连你哋预备结婚嗰十几万都用埋呀！阴功！你话几难得呀！而家佢好闭翳，你睇吓佢样几咁闭翳吖，吓哗？所以而家大家想吓办法，帮佢谂掂佢。大家想吓办法。
张敏：即系唔使结婚！（拂袖而去）
阿达：哎吖！好办法呀。嗱，噉咪搞掂啰，一谂就谂到嘞，唔结婚咪得啰。
周星星：今次我畀你累死嘞，你条猪揼兜！（撇）

阿达：做咩侮辱我呀？我帮你架㖞。

政治部卧底：好彩我哋政治部，冇你呢啲噉嘅人。猪揼兜！
阿达：猪揼兜你叫架？
A：咩呀？猪揼兜唔叫得呀？
阿达：叫多声呀。
A：猪揼……
（阿达用拳头猛打A）
B：你做咩打佢啫？
阿达：鬼叫佢窒我呀？
政治部卧底：我够窒你呀，又唔见你打我。
阿达：我唔够你打。
政治部卧底：你知就好嘞。

（Madam办公室）
Madam：饮茶啦！你唔好焗气啦。政治部对你千port万厾，无非都系嫉才咋嘛。你唔使惊，有我，我顶得住。但系单case就要靠你喇。其实问题唔系出喺你身上，系嗰个周星星。呢位小朋友过分走喇，佢迟早出事架啫。你都要小心啲嘞噃。（攞出一张卡）嗱，去开心吓啦。我畀你嘅附属金卡。
阿达：你教我做嘢呀？
Madam：唔系呀！
阿达：以后喺我面前唔准讲我朋友坏话。（收埋金卡）
Madam：我就系最欣赏你个人咁有骨气。你知吗？警局上上下下嘅人都对你好钦佩架。话你为人正直，办事得力，乐善好施。如果呢个世界多啲你噉嘅人，就世界和平嘞。噉你准备点呀？
阿达：赶个衰仔出校！
Madam：好呀！

（学校，Sandy形影不离噉黐住周星星）
周星星：我就嚟结婚嘞㖞，你跟住我冇用架。
Sandy：我钟意呀。
周星星：你噉冇前途架㖞。
Sandy：我唔要前途呀。
周星星：你唔要畀第二个呀。你唔好嚟烦我得架。
Sandy：噉我点㖞？
周星星：你点问你阿妈呀，你唔系嚟问我架嘛。
Sandy：你到底有冇钟意过我嘅？
周星星：哈！哈！哈！大家逢场作兴嘅嘢，心照啦。
Sandy：吆！（嬲爆爆噉行返去自己嘅位）

周星星（坐低，细龟离佢成尺咁远）：做咩呀？而家我带菌架？
细龟：Jacky话你份人无情无义，叫我唔好黐埋你度呀。

阿Sir：各位同学：我哋今日嚟个测验，好唔好呀？
学生（掟嘢）：梗系唔好呀！收皮呀你！
（周星星接粉擦）
周星星：仆你个街吖！喺我面前掟粉擦？我掟粉擦嗰阵嗱，鱼蛋重系卖一毫子串咋。（同阿Sir讲）叫佢上堂呀！
阿Sir（细细声）：你叫呀！
周星星：我叫？！
阿Sir（细细声）：系吖！
周星星：呢期你系阿Sir嚟呀嘛。你尊严摆边度呀你？你点教学生呀？叫呀！
阿Sir：上堂呀！
周星星：大声啲！
阿Sir：上堂呀！！
周星星：成句讲！而家上堂，今日测验！
阿Sir：而家上堂，今日测验！好唔好呀？测验，测验呀！

阿达（企喺门口）：周星星同学，你出嚟！

（两个人行入校长室）
周星星：我今日心情唔好呀，你想点呀你呀？
阿达：嗱，讲明呀，我身不由己架。
周星星：喂，校长！
校长：喂，周星星同学，好耐冇见你㖞。
周星星：系吖，唔见你返学嘅？喂，生意点呀？
校长：咪全靠班同学畀面咯。喂，而家喺边度发财呀你？
周星星：发咩财呀，最紧要你射住。
校长：喂，我喺庙街顶咗档打冷，有冇兴趣先？
*周星星：咦，打冷？有得谂架㖞。
校长：噉就预咗你啰㖞。
周星星：噉多谢先。
校长：喂，你家长嚟揾我做咩事啫？
周星星：边个家长？
校长：你老母！
周星星：你老母！
阿达：你老母！
周星星：你老母！
阿达：嗱，嚟咗喇。伯母！
*Madam：

Madam：你个衰仔，我而家嚟同你退学。（同校长讲）校长吓嘛？我同我仔退学。
阿达：欢迎！欢迎！
校长：细路仔冇书读，好阴功架。
Madam：阿边个话架？边个话架？
周星星：咪住先，边个话要退学架？
Madam：我话啦。
周星星：喂，Madam！
Madam：咩Madam呀？叫我阿妈。
周星星：有冇搞错？你同我老窦嚟过咩？
Madam：哎吖，当然同你老窦嚟过啦，唔系边会有你呀？哦！而家唔认我嘞系咪吖？（摷出世纸）
周星星：佢同我老窦嚟过？
阿达：我都嚟过。
Madam：你睇吓，我出世纸都带嚟嘞，你睇！（畀人睇出世纸）嗱，佢老母，于素秋，我啦。
校长：吓？你系于素秋？
阿达：系，我曹达华最有资格证明佢系于素秋。
周星星：大家唔好嘈，静静先。畀少少时间我谂吓究竟发生咩事。

校长（咿咿哦哦）：系咯，细路仔唔读书呀……
Madam：乜鬼嘢呀，你噏乜鬼啫你？你睇过，我似乜嘢？你睇吓，我似咩呀？
校长：唉……
Madam：唉乜鬼嘢呀？系吖，你估中咗，我系鸡。系咯，我就系砵兰街167C座黄色光管招牌写住青春玉女波后。做咗25年嘅老鸡。得闲嚟较量吓啦。
校长：噉收开几多啫？
阿达：吓，你？！
校长：得个知字。
Madam：一百文咋，重要买一送一呀，阴功。一晚做足十个，都系得个五百文。我话之你成个月打喺度，瞓喺度，唔喐架，都系掹掹紧咋，你帮我揸住。（将烟仔交畀校长）我要闹过个死仔。你个死仔！你话去读英文学校，帮我勾啲鬼佬返嚟嘅，点知你就走咗嚟风流快活，重唔认我！哎吖！冇阴功！（唔小心掉咗只枪喺地板度）
A（喺出便睇热闹）：大家做鸡都有枪嘅？
B：系咯！系咯！
Madam（执返支枪）：哎吖！我做鸡都记得买支玩具枪过佢玩，佢钟意玩玩具枪。
周星星（拿过枪）：多谢阿妈。
Madam：你你你，畀…畀返我！
周星星：呢支枪买畀我架嘛。
Madam：系，系，你畀返我！
周星星：你买畀我架嘛。
Madam：系，系，系，我买畀你。
周星星：噉即系我架啦。我钟意而家玩，我而家玩枪，我而家就要试。（Madam吓到死）啊，你望望上便。嚟呀。你咁惜吖嘛，你买支枪我玩吖嘛，嚟呀，嚟呀。玩呀！
Madam：你玩还玩，你唔好对住我。
周星星：唔好对住佢。
阿达（惊）：嗱，嗱，嗱，指开边个指边个呀。嗱，周同学吓，学校范围之内玩枪好严重嘅，呢个问题。（弹开）
周星星：我要读书！
Madam：唔得，你放低支枪。
周星星：唔读书我就要玩枪，我而家即刻就玩。（矛头指向阿达）

（两人争执之中扣动咗扳机）
Madam（以为校长中枪）：你冇事吖嘛？你冇事吖嘛？
校长：冇事！冇事！嗰支玩具枪真系好响㖞。
（Madam走去抢周星星手上嘅枪，点知渔翁得利，支枪到咗校长手上）
周星星：唔好抢！唔好抢！
*校长：抢咩呢？喺度。把枪又几似㖞。（对准周星星）
周星星：嗱，嗱，嗱，唔好玩枪。
阿达：唔好玩枪，好严重架。
校长：怕咩呀？呢度我管架嘛。（连开几枪）
校长：哗！连声都咁似架㖞。哗！支枪真系好响呀！
（Madam抢过校长手中嘅枪）
校长：周太，咁似嘅玩具枪你喺边度买架？
Madam：买你老母！
阿达：周太，我同你训导你个仔。嚟！（将周星星拉埋一边）

（周星星同阿达调返帽）
*阿达：大佬，你系咪一定要叉镬我先？
周星星：而家你叉镬我咋吓哗？你而家焗我退学系咩意思先？
阿达：你喺呢处做乜嘢得架？呢处系我揸fit架嘛。
周星星：你唔好咁冇良心好㖞。我不嬲都系想帮你咋㖞。吓？
阿达：你想帮我，你想帮你自己咋啩？你根本就系自私。畀我自己试一次好唔好？赢又好输又好，我自己孭呀！大佬，我嘅事业、爱情、前途冚棒唥喺晒你嘅手上呀。你肯帮我嘅你而家走。你唔出声我当你应承架。

校长：玩具枪咋嘛，咁紧张做咩啫？
Madam：就系玩具枪，细路哥玩嘅之嘛。你大人玩乜鬼嘢呢？打晒我啲子弹，我点报销呢，你话抵唔抵死呀？
阿达：周太，你可以带你嘅仔走喇。
Madam：好呀！好呀！
（周星星快步走出校长室）
Madam：你行得咁快呀而家就……（同阿达道别）我而家走喇，拜拜！（走出去）
校长：同佢玩吓之嘛，噉就啄我呀？
阿达：你见人哋做鸡就唔尊重认，抵人哋啄你架。快啲返去打冷呀。

（校园内）
（周星星好唔开心）
Albert（埋嚟）：大佬，走呀？
（周星星点头）
Albert：等我写低个电话畀你呀，第日饮杯咖啡呀。
周星星（指Albert本笔记本）：咩嚟架？
Albert：学校地图，较脚几好用架。
周星星：你画架？
Albert：唔系，执嘅！
周星星（睇地图）：有边个会画啲噉嘅地图？
Albert：Beat the shit out of me.（我唔知。）

（Madam办公室）
阿达（将地图交畀政治部大佬）：嗱。
政治部大佬：呢啲地图喺边度得返嚟架？
阿达：周星星畀我嘅。
政治部大佬：噉周星星又喺边度得返嚟架？
阿达：唔知呀，我点知呀？
政治部大佬：Madam Wong，你信唔信周星星？
Madam：我信阿达。
阿达：我信周星星。我信星仔呀。
政治部大佬：噉你叫我点信你哋呢？
（畀返地图阿达）
Madam：我信你架。我信你架。
阿达：你信星仔呀，佢话得架，佢话真系得架，佢……
政治部大佬（回马枪）：Madam，我同保安司倾咗嘞。呢单case都唔使你哋重案组理喇。我哋政治部会搞掂架嘞。啊，你哋继续信你哋只星星仔啦。

（Adam Smith国际学校）
（班同学喺度搞紧布设）
Jacky：Sandy呢？
细龟（食香口胶）：唔见呀，你唔见我而家好忙咩？
Jacky：搞错呀？我叫你帮我睇住佢架嘛。
Albert：佢好似落咗去下便㖞。
细龟：你唔早啲讲！
Jacky：喂，重有啲呀，噍埋佢呀。

（政治部行动）
政治部卧底：嚟！对表！
A：冇表㖞！
政治部卧底：开工！李Sir，我哋On Position。见到Sandy行上楼，惊佢有危险）Over!

B：喂，去饮杯嘢先嗱！
C：好呀！
（恐怖分子开始行动）
匪徒A：Make sure you know where they are.
匪徒B：Got it!
匪徒A：These guys are really amateurs.
收音机：Yesterday Prime Minister John Major told reporters that Britain has no intention on building to any terrorist demands. He denied that any negotiation have taken place between the terrorist group and the British Government.
匪徒A：It's now how tough they play when I have 300 school kids in my hands. Roll the ball!
匪徒B：See you later!

A（对讲机信号唔通）：喂喂喂，啲机冇料到㖞。
B：等我check check呀。

（课室）
黑仔：喂，讲个秘密你知吖，香港呀，有恐怖分子架。
其他人：黐线！
（黑仔中弹，恐怖分子杀到埋身嘞）
（啲人踎低晒）
匪徒A：Merry Xmas.

（学校被恐怖分子控制住）
（班师生四围走，撞正恐怖分子）
恐怖分子（揸机关枪）：Don't move. I don't want to hurt anybody.

（哭叫声不绝）
（细龟喺众人嘅哭叫声中打电话畀周星星）
周星星（接电话）：喂！
细龟：星哥！
周星星：大声啲呀！
细龟（好大声）：星哥！
周星星：政治部班友呢？达叔呢？你哋而家即刻报警呀，即刻报警，我马上到。（流晒汗）
（周星星打电话去政治部）
周星星：喂！
政治部：政治部！
周星星：我系周星星！
政治部：你都黐线嘅。
周星星：喂喂喂！……

*细龟（哭丧着脸）：
*Jacky（哭丧着脸）：

（恐怖分子查到有人喺现场用紧移动电话）
匪徒：We have got a mentle of frequency in here from around here with intention to jam the signal. I can't exact the signal path is moving too fast. Johnnason go check it out.

（人性嘅丑恶系呢个时候尽显无遗）
（阿Sir竟然将只手提塞入Jacky件底衫里便）

（政治部卧底一路陪住Sindy）
（政治部卧底不幸中咗一枪）
（政治部卧底带住Sindy逃命）

（阿达以一身劲爆造型出场）
阿达（同政治部卧底讲）：Follow me!

（恐怖分子搜身）
匪徒：Wait! I'll do this one.（对讲机响）What's the problem?
匪徒X：Someone discarded.
匪徒：Shit! Get them to basement.（师生畀带入地下室）

（飞虎队）
周星星（行礼）：Sir!
军官：周星星，你返嚟做咩呀？
周星星：而家有一批火力好强劲嘅恐怖分子胁持住一班人质，我想请你即刻派一对SDU去救佢哋。
军官：我收唔到上头柯打㖞。
周星星：唔会有柯打架。因为呢件事暂时嚟讲得我一个人知嘅啫。
军官：你以前都系呢度嘅队长。我哋冇收到柯打，系绝对唔会出发嘅。
周星星：我知，但人命关天，同埋而家十万火急，冇时间架嘞。
军官：对唔住，帮你唔到。
周星星：噉唔该你借借个Warrant Card我。
军官：喂喂喂！你噉唔得。周星星，你系咪想坐监呀？
周星星：Yeah, Sir!（打晕军官）
周星星：第三中队，ABC Unit立即出发。有百几条人命等紧你哋去救。一切后果由我负责。信唔信我？
飞虎队：Yeah, Sir!
周星星：出发！

（阿达就咗阿Sir一命）
阿达（畀把机枪佢）：揸住！
阿达：泳池下便有个防空洞可以出到去架。大家跟我嚟。

（成班人跟住阿达走）
阿达（指出口）：嗰便！快啲！
阿达：行开，等我嚟！（开枪打烂咗个锁）走！
（鱼贯而出）
阿达：走！
阿Sir：嗯！
阿达：点解突然间咁光掁掁嘅？（眼镜冇咗）咦，我副眼镜呢？冇副眼镜好似周身唔聚财嘅。（见到自己副黑超）啊！喺度！（戴返）
（激烈枪战）
（阿达自己断正，炸咗条出口）
阿达：仆街，炸烂咗条出口添。

阿达（计上心头）：炸死你班仆街！（摷唔到炸弹，却摷到热狗）点解会系热狗嘅？

（班人出咗学校）
政治部卧底：快啲啦！快啲！小心！小心！
飞虎队：差人！咪喐！
政治部卧底：唔好开枪呀，自己人嗱。
*飞虎队：周Sir，喺隧口见到佢哋呀。

细龟（好惊）：星哥，好恐怖呀！恐怖分子呀！好恐怖呀！……
周星星：Shut up!
周星星（问政治部卧底）：你哋点出嚟架？
政治部卧底：我哋喺学校地下防空洞出嚟架。不过而家畀人炸咗。我谂入唔返去架嘞。
周星星：有冇人受伤？
政治部卧底：冇呀，大家都安全嗱，除咗我之外。
周星星：都系你至叻嘞。
Sindy：系吖，佢真系好叻架，好彩得佢……
（沉默）
周星星；噉重有冇学生喺里便嗱？
细龟：唔知呀，不过达叔喺里面。
周星星：达叔？
政治部卧底：佢救我哋架嘛。
周星星：佢救你哋？
政治部卧底：成个未来战士噉呀。
周星星：未来战士噉样？
政治部卧底：不过唔知死咗未啫？
周星星（发布命令）：即刻攻入去。
手下：Yeah, Sir!

（阿达同班恐怖分子激战）
阿达（冇子弹嘞）：死嘞，等阵先嗱，等阵嗱，等阵嗱。
（阿达叉起条白色底裤表示投降）
阿达：唔玩喇，咁鬼茅，两个掐一个，等埋我partner嚟你就知死。

周星星：Fire!
（飞虎队大放烟雾弹）
（飞虎队攻入学校）
…………
周星星：大家小心，里便一定重有学生。

*周星星：带佢哋走！

周星星：大家听住，我哋而家要揾嘅人系一名中国籍嘅胡须肥佬。有冇发现？
手下：冇发现，阿Sir!
手下：阿Sir，噉佢有啲咩特征呀？
周星星：特征？！猥琐，非常猥琐！
手下：噉佢人品好吗？
周星星：叫你相睇吖？人品点？边条粉肠喺度乱咁问嗱？

周星星：有冇发现嗱？
手下：冇呀！
周星星：所有课室都搜查过嘞。

（恐怖分子基地）
匪徒A：There's a whole fucking army out there.
匪徒B：Oh, dear! Move!

（周星星拉住逃紧命嘅一个同学）
某同学：咦，你咪周星星？
周星星：周Sir！
周星星：有冇见Terminator呀？
某同学：边个Terminator呀？
周星星：占士邦呀！
某同学：边个占士邦嗻？
周星星：训导主任呀！
某同学：边个主任瞓咗喺度呀？
周星星（吩咐手下）：拖出去打！
手下：Yes, Sir!
手下：拖出去打！
某同学：喂，唔好呀！喂，唔好呀！

周星星：闪光弹！

（有人受伤）
手下：周Sir，而家点呀？
周星星：抬佢出去急救。
手下：噉你呢？
周星星：救人紧要，快啲！
手下：周Sir！
周星星：我掩护你哋，预备，走！（狂扫）

周星星（开蒸汽）：蒸熟你班仆街！

周星星：有冇人重未死呀？Anybody still alive? 有就应应我，大佬！我而家已经去到最后一个机房度，Over！有冇人收到？Over, over!（耳筒仔失灵）喂喂喂喂，hello！（抌咗耳筒仔）

周星星：Freeze!
（阿达畀个鬼佬踩喺脚底）
阿达：星呀，星呀，接力！接力！接力！接力！
鬼佬：No weapons please.
（周星星抌咗机枪）
鬼佬：And hand gun. Easy.
（周星星抌埋手枪）
鬼佬：Very nice, turn around.
周星星：Why?
鬼佬：Because I want you to turn around.
（周星星拧转身）
（电光火石之间，周星星拧转身，扮接到粒子弹，鬼佬畀佢呃到）
鬼佬（惊讶）：What?
（周星星慢慢摊开手掌）
鬼佬（发现自己畀人老点）：You fool!
（周星星一脚踢飞咗鬼佬嘅手枪）
周星星：拜拜！（开枪）

周星星（扶起阿达）：冇事吖嘛？
阿达：冇事，冇事，喂，你粒子弹呢？收埋喺边呀？
周星星：收埋喺背脊。
阿达：系咩？（睇周星星背脊）
周星星：入晒里便喇！
（阿达睇到周星星嘅伤处）
阿达：哗，你中咗枪呀？哗！你头先呃人架咋。哎吖，后生仔，做人最紧要脚踏实地，唔好成日呃呃骗骗得架。
周星星：唔好讲咁多废话，我好痛呀。
阿达：我同你call白车。
周星星：咪住！
阿达：做咩呀？
周星星：而家大队人马嚟紧，等我领埋功先。
阿达：你又贪慕虚荣？！
（周星星睥阿达）
阿达：望咩呀？你系啊。

政治部大佬：佢唔系差人嚟架，我要拉佢。
Madam：周星星一切嘅行动，系由我重案组之虎曹达华……
阿达：唔好失礼人。
Madam：安排嘅。有咩事我上身。
鬼佬上司：今次你哋做得好好，一个学生都冇受到伤。
Madam：Thank you, Sir!
政治部大佬：但系，阿Sir，你应承过重案组唔理呢单case架㖞。
鬼佬上司：冇呀。
政治部大佬：有，（扐出张烂鬼纸）柯打都出埋嚟。嗱，你睇吓。
鬼佬上司：你越嚟越乞我憎。
（有一个漏网之鱼）
政治部大佬：哗！手榴弹！（推鬼佬上司去前面挡住自己）
（Madam眼疾手快噉喺政治部大佬身上抽出一把手枪，搞掂咗个恐怖分子）
Madam：躝瘫，阻住阿姐讲嘢，咪以为死咗就唔使拉。帮我锁佢返去！

鬼佬上司（怪责政治部大佬）：边个契弟推我上前便？返去慢慢同你讲。
Madam（交返支枪畀政治部大佬）：唔该晒！
政治部大佬（怪责政治部卧底）：你今次累死我喇。阿Sir！（追鬼佬上司，政治部卧底都走埋）

Madam（嗲声嗲气）：我今次有冇失礼吖？
阿达：嗯，跟我咁耐，总算学到少少嘢喇。
Madam：Thank you!
阿达：嗯！
Madam：周星星！
周星星：Yes, Madam!
Madam：你今次立咗大功，警队欢迎你复职。
周星星：不过，交通警我冇乜兴趣。
Madam：你唔使担心，今次就算唔系总警司都会系总督察架啦。
周星星：Thank you, Madam!（行礼）
Madam：听讲，你中咗枪吓嘛？
周星星（好淡定）：系，不过呢啲对于我嚟讲，只不过系皮外伤。我完全唔摆喺眼内。
Madam：Very good，有冇要求？
周星星：我想叫白车。（突然晕低）
阿达：叫白车啦！
Madam：白车！

（Adam Smith International School）
（周星星戴住一副黑超，咬住一朵玫瑰花想嚟追返张敏，点知……）
（阿Sir送花畀张敏）
张敏（受）：我都有人追呀。你追赢佢先啦。
阿Sir（问周星星）：好唔好呀？我大胆咗好多架啰㖞。
周星星：我有话嚟追你咩？我嚟学插花之嘛。（突然态度大变）你条粉肠撬我墙脚，边个撬我打边个！打！

（剧终）