行运一条龙

（行运茶餐厅）
（生意兴隆）
顾客：鸳鸯走糖呀，唔该！
田启文：早餐差个双蛋喺上面，快啲！
阿基：热蛋挞出炉，唔该借借！热蛋挞呀，唔该借借！
顾客：两个蛋挞呀，唔该！
阿基：新鲜出炉热蛋挞！

甜筒辉：可……可唔可以讲多次呀？
顾客：大佬呀，我已经讲咗好多次架啰㖞。
李老板：等我嚟！等我嚟！（将甜筒辉推埋一边）超哥，早晨！
*吴孟达（同甜筒辉讲）：孖挞，冻奶茶，跟住火腿通粉，佢系梗架嘛。
甜筒辉：哦！哦！哦！
顾客（竖大拇指）：好呀，李老板，好嘢！
*李老板：使乜讲㖞，李老板㖞。（赔罪）喂，唔好意思，新嚟唔知埞。

小芬女：老板，买嘢呀！
吴孟达（乌低身）：哎吖！早晨呀，小芬女！帮爷爷买早餐呀？
小芬女：系吖，例排呀。
吴孟达（收钱）：好，等阵吓。辉仔，落单！蛋挞面就淋炼奶，葱花炒蛋治飞边烘底，三七鸳鸯，走糖。
*甜筒辉：个零钱嘅生意使咁招积嘅？
李老板：唔系招积，呢啲叫性格。做我哋街坊生意，最紧要记住每个街坊嘅口味。唔系点同啲快餐店挥呀？
甜筒辉：哦哦哦！
李老板：哦咩呀？重唔落单？
甜筒辉：哦哦哦！
李老板：重哦？
甜筒辉：哦！（闪）

（茶餐厅门口）
阿男：基哥，早晨！
阿基：喂，早晨！阿男！又通顶呀？
阿男：特发嘢。
*基哥（见到阿男拎住啲快餐）：喂，你又买啲噉嘅嘢，假如畀你老窦见到……
吴孟达（行出门口）：咩畀我见到呀？（见到阿男啲快餐）衰仔！身为太子爷，唔帮我手不得止，而家重倒我米吓哗？
阿男：使乜咁紧张呀？一盒汉堡包咋嘛。
李老板：家吓食自己蛋挞会死得人咩？
阿男：餐餐食，食咗廿几年嘞㖞。
李老板：噉你系我个仔嚟架嘛，畀啲街坊见到有咩好呢？（阿男冇厘神气噉返上自己房）好食唔食，食埋啲噉嘅快餐嘢。至憎啲快餐嘢架嘞。冇厘变化，千篇一律。

（茶餐厅内）
*田启文：五分钟至到。（摆低电话）喂，阿福！阿福！咦，重未返嗱？
李老板：未返嗱？
田启文：揾佢送外卖，噉点呀？
李老板：两个街口咋㖞，去咗个几钟呀？（睇表）
阿基：慌唔系去咗帮人嗱！
李老板：啊，呢个人实在心肠太好。

（阿福帮人搬嘢）
阿福（挥手）：努力呀！

（阿福帮人泊车）
阿福：师傅，呢度。回轪，回轪，慢慢，慢慢，两尺，后后后，直后，直后。O.K!
司机：喂，唔该晒！

（阿福帮人开门）
阿福：我帮你开门。
路人：好呀，唔该晒！唔该晒呀！
阿福：Byebye!

（阿福唔小心撞跌杨恭如手中嘅牛奶，阿福表演空中接牛奶）
Fanny：点呀？你冇嘢吖嘛？
（杨恭如将阿福拉返上嚟）
阿福：唔该！唔好意思呀，头先整亲你。
*Fanny：啊，唔系，我唔好意思就真呀，你成身都湿晒。
阿福：你个奶呀，好彩冇湿到。
Fanny：饮完架嘞。头先我想抌架喇。
阿福：系咩？不如我帮你抌埋呀。
杨恭如（）：哎，你喺行运做架？
*阿福（畀张卡片杨恭如）：系吖，系吖，我哋嗰啲蛋挞好驰名架。如果你生理上有咩肚饿需要呢，打个电话嚟，我会随叫随到架嘞。
Fanny：你系送外卖嘅。
阿福：系吖，外卖嘅。
Fanny：我都系附近返工架。（畀张卡片阿福）呢张我卡片呀。我赶时间呀，我走先架嘞。拜拜！
阿福：拜拜！
Fanny：你真系好人嗱。拜拜！
阿福：拜拜！
（杨恭如入晒阿福眼）

（茶餐厅）
*甜筒辉：姐姐，要咩呀，姐姐？
女客：水哥返过嚟未呀？
甜筒辉：我新嚟㖞，唔知乜水㖞。
女客：噉等水哥返嚟再讲呀。
甜筒辉：哦。

阿基：盛惠！廿五个半呀。
一女客：唔该，帮我畀水哥。（递上心意卡）
阿基：哦。水哥吖嘛，好呀。喂，（递畀田启文）水哥架。
田启文：又系水哥呀？（递畀另一个人）水哥架呀。

甜筒辉（见到水哥收到嘅卡成箩咁多）：哗！阿水系乜水呀？咁厉害嘅。
*田启文：阿水个朵你都未听过，你新嚟呀。噉就难怪。（转身）阿水系出咗名沟女无数。系我哋所有男人嘅眼中钉。
（田启文眼前浮现玉树临风嘅阿水）
基哥（加入吹水队伍）：佢嗰双令人心醉嘅眼睛，无论几冷傲嘅女性，都会畀佢温柔嘅眼神所融化。
李老板：佢系众所公认嘅街坊情圣，行运茶餐厅嘅灵魂，系人都知蛋挞王子。

（阿水咬住口烟仔入嚟）
阿水：阿媚，你做咩啫你而家？
阿媚（咬住口烟仔）：你扯啦。
阿水：我做错咗咩嘢先？
阿媚：你冇错，你对我好好添。不过，我而家唔钟意呀。大家都唔啱feel嘅。
阿水：咩唔啱feel啫？我可以改嚟就你架嘛。
阿媚：就你老母呀！一个AM，一个FM，大家都唔啱channel嘅。
阿水：我可以转channel架啫。
阿媚（拍台）：转你老母呀？我哋缘已尽喇！（走出茶餐厅）
阿水：媚！

甜筒辉（不解）：蛋挞王子你沟啲……沟啲女咁“yat”嘅？
（一架车喺出便停低，好嗍嘅一条女喺车钻出嚟）
嗍女（踎低身同阿水讲嘢）：水哥呀，我买咗架新车送畀你呀。
阿水：你买架车畀我做咩啫？
嗍女：你觉得唔够呀，噉我畀埋我住嗰层楼你吖，你开心就得架嘞。
阿水（起身）：原来你以为我攞你啲车，攞你啲楼会开心嘅咩？
嗍女：有咩唔妥呀？我爱你先噉做咋嘛。
阿水：原来爱可以用物质同埋钱嚟到衡量架咩？
嗍女：唔系吖，水哥，我唔系噉嘅意思呀，你误会咗喇。
阿水：我对于你呢种人好反感。
嗍女：唔系吖，水哥，对唔住呀！对唔住，系我唔啱。
阿水：你扯！
*嗍女：唔好呀，水哥！水哥，你唔好噉样对我。我唔可以冇咗你架，水哥。……
阿水：你唔扯嘞嘛？
嗍女：我唔扯！我唔扯！
阿水：我扯！（跑出茶餐厅）
*嗍女：唔好呀，水哥！……

甜筒辉（睇到目定口呆）：点解会噉嘅？
*吴孟达（解画）：佢纯粹系享受沟女嘅过程，捕捉嗰种幻得幻失嘅感觉。沟唔沟到女对佢已经唔重要。
*阿基：沟女沟成噉，真系高。
甜筒辉：水哥，好嘢呀。

（茶餐厅外）
（阿水畀啲演员人工）
阿水：有冇眼泪呀，头先？
嗍女（收钱）：有呀，有呀。
阿水：做咩呀？
道具甲：放雀！
阿水（畀钱）：你呢？
道具乙：风扇！吹风！
阿水：我边有卜风扇啫？
*道具乙：噉你要求啲报纸喺你左右隔离飞架嘛，冇风扇点飞呀？
阿水（畀钱）：唔该晒，散水！

（阿男出去见网友，点知见光死）
阿男：哗！小丸子呀！
小丸子：Hi!
*阿男：咪埋嚟呀！
*小丸子：我等呢个机会好耐嘞。小新，我终于见到你呀！
（阿男掟个蛋挞过去，畀小丸子食咗）
（小丸子猛咁追阿男）
（阿男匿喺盆花后面，终于擗甩咗小丸子）
小丸子：小新！

（舒淇无意间撞到阿男）
阿男：唔好意思。
舒淇：唔紧要。
（舒淇失惊无神就嘴阿男）
追舒淇嘅人：过嗰边睇吓。（行远咗）

舒淇：唔好意思，啲大耳竉追紧我。
阿男：唔紧要，我都畀人追紧。
舒淇：吓？又系大耳竉呀？
阿男：大镬过大耳竉。
舒淇：喂，呢度咁危险，我哋走嘞。
阿男：走？走去边呀？

李老板：喂，多谢，阿姐！
（电话响）
（阿福成个碌落楼）
阿福：系咪有电话？等我听，我听，我听，……
李老板：做咩呀？
阿福（拎起电话）：喂，（失望）两个奶挞，好，五分钟后到。
李老板：沟女呀？
阿福：唔系呀。

（阿福将吴孟达推埋一边，吴孟达手中嘅蛋挞烂晒）
李老板：做乜嘢呀？
阿福：老板，你对一见钟情有咩睇法呢？
李老板：喂，喂，噉，噉你又有咩睇法呀？
*阿福：一见钟情，模模糊糊噉啰。好似我哋煠蛋呢，乌个头埋去睇，揸住副眼镜。啲水蒸气呵到眼镜。朦朦胧胧见到啲蛋喺度滚动滚动。差唔多熟嗰阵，扐开副眼镜嘅时候，睇到只蛋熟喇。水里便少少蛋白散出嚟。“咇”，啊，噉样，好有生命力噉哩。
田启文：阿福，你讲紧咩呀？
阿基：喂，完全唔明㖞。
李老板：佢意思即系话好似你睇紧有格仔嘅咸片噉，突然间啲格仔冇咗，噉就眼前一亮，打个料阵啰。
田启文：哦，噉就明嘞。
阿基：一睇就知道你未沟过女架，表达能力咁差。沟女呀？
阿福：唔系吖。

画外音：喂，伙计！
（田启文同基哥走去招呼客人）
田启文：啊，系啊。

阿福：老板！老板！
李老板：又点呀？
阿福：你嘅初恋系点架？
李老板：我嘅初恋？噢，三十几年前，我读紧中学嗰阵，我真系冇时冇刻噉去挂住佢。有时屙吓尿都会突然间停一停，然后谂起佢，个心度甜一甜。跟住嗰半涿尿就唔记得屙啰。
*阿福：系吖，系吖，系吖，唔怪得之今日屙涿尿，屙几十匀都屙唔完啦。
基哥（凑近）：阿福呀，沟女吖？
阿福：唔系呀。
阿福：李老板，李老板。
李老板：咩呀？
阿福：我就冇乜嘢叻，净系识得煮嘢食。如果我亲手煮啲嘢畀佢食，你估会唔会感动佢呢？
李老板：千祈咪吖。而家啲女仔最憎啲婆婆妈妈嘅住家男人嘅。

阿水：阿福，做乜坐晒喺度重唔做嘢？
*甜筒辉：蛋挞王子吖，蛋挞王子，佢哋讲紧初恋嗱。你呢段初恋点架？
阿水：我啲噉嘅浪子，点会有初恋架呢？
甜筒辉：系㖞。好嘢。
阿福：水哥，如果我想得到一个异性嘅芳心，应该点架？
阿水：有噉嘅事咩？好！（说教）我话畀你听呀，沟女嚟计两个字架啫——靓仔！
（起风）
（一只雀仔停喺阿水头上便）
甜筒辉：靓仔？！噉我咪冇问题？
阿水：你完全冇问题呀，你爹啲妈咪有问题咋嘛，生成你噉。
阿福（埋去阿水身边）：阿水吖，噉我点算嗱？
（阿水扮嘢）
（阿福明白阿水嘅意思，畀钱阿水）
阿水：唔靓仔唔紧要嘅，有钱咪得啰。
阿福：但系我都冇㖞，噉点呀？
阿福：啱先我有架，水哥。不过我畀晒你啫。
*阿水：哎，你只玉扼几靓㖞。新买架？
（阿福除低只玉扼畀阿水）
阿水：嗱，样又冇，钱又冇呢，就唯有投其所好嘞。沟件咩女呀？
阿福（畀张卡片阿水睇，上面写住“皇極驚天拳”）：呢件。
阿水：咦，好简单啫。

（阿福一身柔道打扮）
阿福：水哥，我而家充满信心嘞。
李老板：阿福，武馆外卖！
阿福：水哥，我而家点算嗱？我嘅样得唔得呀？
（阿福畀钱阿水）
阿水：咦，你个样今日几得㖞。
*阿基：
（阿福畀钱阿水）
阿水：咦，你个样今日好得㖞。好正呀真系！准备好未呀？
（阿福点头）
阿福：准备好！
阿水：恨恨地去沟女啦！

（武术馆）
阿福：送外卖呀！
细路：几钱嗱？
阿福：四呀八个半。
细路：五十文，唔使找嘞。
阿福（东张西望）：好呀，好呀，多谢。蛋挞。
（阿福掹住蛋挞唔放）
细路：放手啦，畀咗钱你重唔放手？喂！
（阿福放手，细路躀低）
Fanny：你嚟咗呀？
阿福：系吖！
Fanny：你今日嘅打扮咁特别嘅？
阿福：系吖！系吖！系吖！你都察觉得到架呵？查实，呢个先系真正嘅我。我都几man架，一啲都唔婆乸架。几好，几好。试吓我哋公司啲蛋挞啦，好好食架。
Fanny：好呀！
阿福：咦，点解啲蛋挞，烂晒嘅？

阿福；早晨，经理。
细路：大师兄，就系佢踩我哋场呀。
大师兄：睇到呀。
Fanny：一场误会嚟架咋，大师兄。
*大师兄：Fanny，你唔好插手嘞！（同阿福讲）睇你一身嘅打扮，就知道你系武术界嘅人嗱。就用武术界嘅方法嚟解决。
阿福（面懵懵）：噉即系点呀，经理？
*大师兄：即系噉呀！（将一碌木拗断）出句声呀，讲嘢吖嘛。你系咪男人嚟架？婆婆妈妈噉。好，畀个机会你。喺我哋咁多个拣一个同你打。
众人：拣呀！……
细路：够胆同我打？！
阿福：我拣嗰边扫紧地嗰个矮仔。
掌门：等我喐手得嘞，你已经收山咁多年，无谓破戒呀，掌门！
阿福（吓到呆晒）：掌门？
掌门：僆仔！我佩服你年纪细细竟然够胆走上嚟踢馆。我虽然两年未喐过手。但系今日点都会一会你！报上名嚟！
阿福：行运茶餐厅阿福。
掌门：皇极惊天拳第十代掌门人，吴留手。（爆衫）接招！
（阿福中咗一拳）
掌门：做咩唔还拖呀？
阿福：你叫我接招咋嘛，你冇叫我还拖。接完嘞呵？（转身，口吐白沫）Fanny呀，其实今次我嚟嘅目的系噉嘅。（倒下）
Fanny：福！

杨恭如（扶起阿福）：福，你冇事吖嘛？
掌门：好彩我见到佢冇反应，即时硬生生收返九成功力。如果唔系，佢唔死都一身孱嘞！练功，继续练功！

Fanny：唔识就唔好死顶啦！
阿福：我以为你钟意吖嘛。
Fanny：点会钟意㖞？我至啲打打杀杀架嘞。
阿福：噉你又喺度练拳嘅？
Fanny：我喺度做秘书架咋。
阿福：哦。
Fanny：唔系你以为咩？扮到噉嘅样，有咩居心先？
阿福：冇呀，冇呀，查实我想问吓即系如果你有啲时间，你又一个人喺屋企闷闷哋，又想去街，又想揾个伴噉你又想……
Fanny：你想约我去街吖？
（阿福好好开心噉返去茶餐厅）

（阿男房间）
（阿男玩紧电脑）
舒淇：啊，原来你就喺呢度识小丸子架？小新，你真系好多情㖞。
阿男：哎，唔好笑我啦。喂，你叫我阿男得架嘞。
芳芳：阿男？
阿男：喂，系啦，你呀。
芳芳：我叫芳芳，但系你都可以叫我小丸子嘅。
阿男：喂，你又话打电话嘅？（畀电话芳芳）
芳芳：啊，系吖，打完我即刻走嘞。好肚饿呀，煮啲嘢食。
阿男：喂，喂，喂，唔使，我落去茶餐厅攞啲嘢食呀。
芳芳：好呀，我食完即刻走呀。
阿男：喂，唔该唔好再掂小丸子。

（芳芳冲入吴孟达间，大模鼠样食薯片）
李老板：喂，你系边个呀？
芳芳：你系边个呀？
李老板：我问你系边个呀？大模鼠样噉摊喺我屋企，重食我啲薯片。
芳芳：你系阿男嘅阿爸？
李老板：系吖，你系边个呀？
芳芳：我系阿男嘅未婚妻，我叫芳芳。
*李老板：未婚妻？咩未婚妻呀？佢冇同我讲过呀。佢当我老窦冇到呀？
芳芳：阿爸，其实……
李老板：闸住！嗱，呢头亲事我唔承认架。结婚咁大件事呀，唔使同我商量吓架咩？我同佢嗌霎两句咋嘛。
芳芳：其实佢同你顶完颈之后，佢都知道自己唔啱，佢好内疚架。
李老板：梗系个衰仔唔啱呀。
芳芳：其实你哋两个麻甩佬，又好难叫佢当口当面同你讲声对唔住。其实佢成日喺我面前话，激嬲咗你呀，好对你唔住呀。有次讲讲吓，重喊咗出嚟添。
李老板：真系？
*芳芳：我哋决定订婚嗰日，佢都唔敢同你讲住呀。（热泪盈眶）话等你下咗啖气呀，先至一次过畀两个惊喜你吖。
李老板：两个惊喜？！
芳芳：我哋喺出便买咗层楼畀你吖。不过阿男唔想畀你知住吖。
李老板：个衰仔边有咁多钱买楼呀？
芳芳：我哋冇钱架，所以咪死悭死抵啰。连喺街边睇到嘅鱼蛋都唔舍得买添。重有呀，日日等啲街市收咗铺之后呢，去执人哋啲菜头菜尾返嚟煮嚟食架。（双手捧起地下啲薯片）呢啲咁贵嘅薯片呀，我已经成年都未食过嘞。
李老板：啲薯片咁污糟，唔好食，唔好食。我开过包畀你呀。
芳芳：阿爸，你千祈唔要怪佢呀。
李老板：唔会，唔会。
芳芳：你要怪就怪我好嘞。
李老板：唔会，唔会，你两个都咁乖，我唔会怪，两个都唔怪。

（阿男走入嚟）
阿男：爸，你喺度做咩呀？
李老板：男，男！（抱起阿男）
李老板：结婚咋嘛，怕咩同阿爸讲呀？
阿男：结婚？！
李老板：阿爸闹错咗你。乖，你真系乖仔。（惜咗阿男一啖）阿爸今日好开心。几呀岁嘞，阿爸会照顾自己架。呢啲钱攞去使住先。唔够同阿爸开声。芳芳，噉你喺度住呀。
芳芳：好呀，我屋企一装修好呢，我就即刻走嘞，我唔会阻你哋好耐嘅。
李老板：都自己人啦，钟意住到几时咪几时啰。
芳芳：唔该晒，阿爸。
吴孟达（抢过阿男手中嘅嘢）：哎，食呢啲冇益架。我落去整两味你食呀，家嫂。
芳芳：唔该晒，老爷！唔该㖞。
阿男：家嫂？！
阿男：你又话打咗电话就走架啰㖞。你无端端做乜做咗我老婆呀？你重系瞓喺度？你讲乜嘢呀你呀？
芳芳：咪咁小气啦，人哋畀大耳竉追数先至讲大话架嘛。你睇吓，我氹得你阿爸几开心，畀埋我咁多钱㖞。
阿男：我唔该你而家即刻走。
芳芳：你要我走？
阿男：系吖，即刻走呀！
芳芳：你唔多谢我不得止，重要我走？
阿男：唔好讲咁多！扯！
芳芳：你忍心我畀大耳竉斩死都唔理我，要我走？我走畀你睇，我去死畀你睇。我出去死畀你睇吖我！
阿男（拉返芳芳）：疏利，疏利，我唔系噉嘅意思。当我唔啱。
芳芳：知道自己唔啱嘞呵？你重以为你会见死不救添。
阿男：我警告你呀，你今日留喺度瞓。听日一朝早唔该你即刻走。
芳芳：小新，我知道你唔会唔理我架。你真系好人呀。

（阿男梦见芳芳推倒自己啲公仔）
芳芳：哗！好靓呀！

阿男（接电话）：喂，哎，老总。哦，冇，寻晚有啲麻烦嘢。冇嘢嘞而家。得得得。即刻返，即刻返，即刻返。

（阿男开门出去，竟然见到芳芳喺度教啲茶餐厅员工跳啲烂鬼舞）
芳芳：一二三四，二二三四，三二三四，四二三四，五二三四，六二三四，一二三四，小新，早晨！

*阿男：一朝早你喺度做咩呀？
田启文：快啲过嚟跳呀，壮阳舞呀。
阿男：壮阳？！
芳芳：系吖，大家要有恒心啲呀。上次呢嗰个撒哈拉非洲和尚话呢，跳呢个舞呀，起码要跳一个月呀。女仔呢就可以靓靓，男仔呢就可以壮阳。一二三四……
*阿男：全部走上嚟，下便点呀？
阿基：老世话有益，嗌我哋勤力啲，佢顶住先。一阵佢都上嚟吖。
（阿男将芳芳拖入自己间房）
阿男：我唔该你唔好成日喺度老作好唔好呀？
芳芳：冇㖞，我见佢哋个个咁大肚腩，咪氹吓佢哋开心，做吓运动，对佢哋有益架。
阿男：冇得倾呀，对唔住，我唔准再听你喺度讲大话。你，即刻走！
阿男（开门，班友戙喺门口偷听）：做咩呀？重唔去帮手？
班友：落去帮手！

（阿男赶芳芳扯）
芳芳：你见死不救，你忍心我畀大耳竉斩死咩？
阿男：你唔好再讲呢啲废话呀！
芳芳：畀我留喺呢度呀，小新。
阿男：唔好再叫我小新！

（阿男同芳芳撞到吴孟达）
李老板：去边处呀？
芳芳：阿爸，我要走呀，佢要我走呀。
阿男（支吾以对）：啊，系吖，我叫佢走，走落去帮你手。
李老板：哎，粗重工夫，边啱啲后生女嘅啫？
芳芳：咪系啰，啱啱谂住偷懒瞓多一阵，但系畀阿男闹我呀，佢话做人呀，要孝顺啲呵？
（阿男点头）
李老板：有阿爸心得架啦，阿爸发吓噏风咋嘛。后生仔梗系有后生仔自己嘅事业架嘛。唔通真系落去做企堂架咩？
*李老板：嗱嗱，呢碗清保凉瘦肉，寻晚漏夜煲架。快啲饮咗佢啦。
芳芳：唔该阿爸。
李老板：成日食埋街边啲烂菜有鬼益咩？
阿男：咩烂菜呀？啊？烂菜？
芳芳：快啲饮汤！呀，好热呀，小心。

李老板：哎吖，弊啦，弊啦。茶餐厅今次要执笠喇。
田启文：咩事呀？咩事呀？
甜筒辉（睇吴孟达手揸嗰张纸）：哗，加成廿倍租㖞。
李老板：系咯，呢份约十年前我同个姣婆四签落架，原来下个月到期，我一下唔记得。今次大剂喇。
阿基：喂，噉我哋咪冇得捞。
田启文：喂，就过年嘞㖞，你谂谂计得架。
甜筒辉：同佢讲吓耶稣啦。
阿基：嗌吓佢得唔得呀？
田启文：试吓啦。
*李老板：边有得嗌吖！姣婆四出咗名狼戾架啦。除非佢系你条女啦。

（众人向阿水求救）
*李老板：水呀，水呀，讲到呢瓣真系要你帮手嘞。
田启文：谂吓计呀，水哥！
阿水：今次关乎到茶餐厅嘅生死存亡，我出手系嘞。
（点烟）
阿水：对方咩人？
李老板：盛世地产揸弗人，我哋茶餐厅嘅业主，绰号姣婆四。
阿水：真名？
李老板：姣婆四。
阿水：咩岁数？
李老板：三十六。
阿水（分析）：卅六即系属虎。哗，狼虎年华，性欲强。点嘅样？
李老板：年初四噉嘅样。
阿水：咩话？年初四噉嘅样？
甜筒辉：水哥面都青埋嘅？
李老板：年初四，假又放完，钱又使晒，工又要返，点会好样呢？
阿水：算盘有冇？
阿基：有。

*阿水：如果我冇计错，佢应该系水瓶座，水瓶座嘅特性：外冷内热。（拿起一樽水瓶）就好似呢个水瓶噉嘅样，樽颈位好似好窄，但系如果你有本事窒到去，里便其实系原始大森林。打关斗都重得。我讲畀你听呀，对付呢种女，一嚟就要用一对居高临下嘅眼神，一条强而有力嘅臂弯，将佢由欲海里便拯救出嚟。
吴孟达（拍手）：好嘢！好嘢！阿水呀，今次靠晒你，行运有救。有……
（姣婆四到）
李老板：哎吖，嚟嘞，嚟嘞！

（姣婆四跣脚）
阿水：一条强而有力嘅臂弯，居高临下嘅眼神！（同姣婆四讲）你冇嘢吖嘛？
姣婆四：仆你个街呀！臭乞儿呀！咁样衰呀！扮靓仔！死开！
（姣婆四一个人同几个人炼）
李老板：通融吓。通融吓。通融吓。
姣婆四：唬我呀？铺租我加架嘞，冇钱就即刻躝。两个礼拜后嘅十二点我嚟封铺。
（阿水偷袭，畀姣婆四咬咗只脚）
阿水：啊！——

（医院）
谷德昭：原来啱啱咬你嗰个吴夫人系患咗疯狗症架。
阿水：唔系啩？个八婆畀狗咬过架咩？
谷德昭：唔一定要畀狗咬过先会传染嘅。假设吴夫人有同只狗打茄轮嘅，都会有架。
阿水：噉我咪仆街？
谷德昭：几仆街架。所以为咗安全起见呢，我建议你整返个疯狗症特惠套餐。喺未来七个礼拜里便呢，就打七七四十九支防疫针。打完晒之后包你成世唔怕畀狗咬。
阿水：噉咪即系一个礼拜要……要打成七支？
谷德昭：No，no，系一日打七支，一个礼拜总共七七四十九支，七个礼拜总共三百四十三支，其间假设有任何一支打歪咗嘅话，由头再打过。
（阿水呆咗）
（阿水走出间房）
*阿水：三百零支针，黐架嗰条肥仔！（入升降机，见到旧同学，出升降机）
细路：快啲，快啲，快啲。
Candy：得喇，好快喇。坐稳嗱！火车到站喇，快啲坐低。
细路：护士姐姐，几时可以再坐过呀？
Candy：做咩呀？你想再坐过咩？乖乖哋食埋啲药就有得坐喇。（见到阿水）揸住啲药呀。
（阿水转身走）
Candy：先生，你咁面善嘅，我哋系咪识架？
阿水：认错人㖞。
Candy：冇理由，你把声真系好熟，可唔可以再讲啲嘢听吓？
阿水：I'm sorry, I'm see doctor, very hurry.
Candy：何金水！
阿水：我唔系何金水㖞。
一护士：咦，何金水，嚟睇医生呀？今日唔使返茶餐厅咩你？噉我走先嗱，拜拜！
Candy：何金水。
*阿水：一睇就知我喺中环返工啦，茶餐厅？呢啲噉嘅人渣喺度白撞。
路人甲：阿生，你跌咗身分证㖞。
阿水：啊？
路人甲：何金水吖嘛。
阿水：唔系我跌架㖞。
路人甲：明明系你个样嚟㖞。
阿水：人有相似得唔得呀？
路人甲：唔系㖞，我睇住你跌架㖞。
阿水：睇错得唔得呀？
路人甲：我发誓，如果我睇错嘅，肠穿肚烂，生仔冇屎窟，即刻仆街死。
阿水（接过身分证）：哗，你讲到噉样可能真系我跌架㖞。
路人甲：系你啦，唔好扮嘢啦。
Candy：都话你系何金水架啦。认唔认得我呀？我系叶玉芬嗱，Candy哩。冇见咁耐，重系咁钟意玩架，你真系衰呀。
阿水：下次见嗱。
Candy：咪走呀！你记唔记得中学嗰镬嘢呢？你整烂我条裙，我都未同你算账。
阿水：嗰镬嘢呀。其实嗰镬嘢我自己都好Sorry。
Candy：Sorry都冇用呀，冇咁易㖞。
阿水：你靓咗㖞。
Candy：唔好讲废话啦，赔钱啦。做咩呀？你整烂我条裙唔使赔钱嗱？赔唔赔呀？报警架！
阿水：唔使报警，赔畀你呀，大家一场同学。
Candy：咪系啰。
阿水（畀钱）：赔畀你啦。报警？找返嚟呀。
Candy（用钱挞阿水）：唔好玩嘢㖞，僆仔！（凶阿水）做咩呀？当我流架而家？（一护士喺侧边睇）做咩呀？行开！信唔信我揾人喐你吖嗱？
阿水：重差啲。
Candy：差咩呀？
阿水：差把刀。（笑）
Candy（笑）：好衰架，噉都凶你唔到。
阿水：凶到半架嘞。其实我正话有啲怯架嘞真系。
Candy：最衰系你啦，整烂我条裙。不过算啦，咸丰年啲嘢。我唔会记住嘅。
阿水：哗，噉我安乐晒咯。
Candy：放心啦，我做嘢喇。Bye!
阿水：呢张我卡片，你得闲call我呀。
Candy：见返你真系好开心呀，谂返起学校嗰啲嘢。Bye!

阿水（推开谷德昭间房）：医生，区区三百零支针啫，我打！

（
阿福：我今日真系好开心呀。
Fanny：我都系吖。
阿福：估唔到可以同你发展得咁快“he”。我同女仔真系第一次架咋。
Fanny：我唔信。点会呢？你都咁大个人咯。
阿福：真架！真架！我冇讲大话，你真系我第一个嚟架啫。
护士：唔该两位唞五分钟可以走嘞。
Fanny：点解咁奇怪嘅？好似你咁好人，一定会成日捐血架。
阿福：哦，因为阿水哥啰，阿水哥好惊打针架。所以我咪以为捐血都好痛啰。如果冇你嚟陪我呀，我都唔敢嚟。
Fanny：阿水系边个呀？
阿福：阿水哥呢，其实呢，真系一个好好嘅人嚟架。呢，我哋嗌佢做浪子，佢一啲都唔介意架㖞。我哋重改咗个花名叫做蛋挞王子添呀。
Fanny：蛋挞王子？
*阿福：你睇吓啲蛋挞，外便好似实刮刮，冷冰冰。其实里便甜丝丝，软绵绵。简直呢个名改得冇得顶，一百分嗱！
Fanny：真系有啲噉嘅人嗱？
阿福：请你食个挞啦。
Fanny：多谢。
阿福：多谢。喺茶餐厅呀，我同阿水哥就最FRIEN架嘞。
*Fanny：但系我哋倾咗咁耐，都重系讲紧佢。不如讲吓你自己呀。
阿福：讲我？查实我个人都几闷架。又冇乜嗜好，又唔多讲嘢嘅。
Fanny：但系你喺茶餐厅做，一定好钟意煮嘢食架系咪？
阿福：煮嘢？唔啱我，我至憎煮嘢架嘞，你要我煮嘢食真系咪使旨意呀，我唔系嗰啲煮嘢食嘅住家男人嚟架。
Fanny：但系我睇你个样，重以为你系。
阿福：哎，人不可以貌相吖嘛。呢，就好似阿水哥噉呀，睇个样呢傻仔噉㖞。但系平时佢讲笑话七条街嘅观众呀，笑破肚皮呀。哈哈哈！

（餐厅）
（阿福同杨恭如撑台脚）
阿福：哎吖，所以阿水哥呢都好鬼得到啲少女嘅欢心架。啊，真系希望水哥可以好快揾到佢嘅真爱。
Fanny：你真系关心朋友嘅啫。
阿福：我见到佢哋开心，我就开心吖嘛。
Fanny：噉我呢？你见到我开唔开心呀？
阿福：梗系开心。唔系普通开心添呀。直头开心到死吖。头先呢，（扐出包饼）我喺红十字会度攞咗呢包饼，我永远会留住佢嚟纪念我哋嘅第一次。
Fanny：哎吖，死嘞，头先食咗呀。冇得留为纪念啦。
阿福：噉我畀呢包你先啦。
Fanny：唔得，呢包你架嘛。
阿福：唔好，你攞咗佢先啦。
Fanny：唔好，你收返佢啦。
阿福：唔好，我送畀你啦。
Fanny：唔好哩。
阿福：而家我送畀你啦。
（成杯咖啡倒落杨恭如大髀度，冇眼睇）
Fanny：哗！
*阿福：对唔住！对唔住！哗！好热呀！唔使惊！唔使惊！（将成杯酒倒落大髀度）好唔好啲呀？
Fanny：湿晒嘞！
阿福：我帮你抹！（火烛添）

（行运茶餐厅，几个伙计喺度吹水）
阿基：条女真系蠢呀，佢居然话巴西嘅首都呢系利智㖞。有冇搞错呀，大佬？
阿水：喂，啲女咁蠢，真系抵畀你飞呀。
*阿基：噉咪系啰，稍微有啲地理常识都知道啦，利智个波再大呀，都唔会系巴西首都！哈哈哈！
阿福：哎！讲咩讲得咁好笑呀？
阿基：有咩好笑过讲沟女呀？
阿福：哎吖，讲开又讲嘞，我头先同阿Fanny去街呀，重好笑呀真系。
阿水：系咪架？唔好笑回水架。
阿福：哎，惊笑死冇命赔添呀。头先我咪同阿Fanny去烛光晚餐嘅。食到最好feel嗰阵呢，一个唔觉意，成盘忌廉鸡汤倒落佢身度，哎吖，攞命呀。
（众人皆笑）
田启文：噉咪成条裙湿晒嘞吓？
阿福：点止呀？啲汤几鬼滚呀？哗，渌到大髀度！哗，成只红晒呀！攞命。
田启文：噉跟住点呀你？
*阿福：噉我嗱嗱声咪去攞把台布谂住帮佢抹啦。一扯，成个蜡烛台跌咗落佢嘅身度。哗呀！死火咯！
阿基：喂，噉咪烧着条裙？
*阿福：话你冇良心即系冇良心呢，湿咗架嘛，点会烧得着架呢？支蜡烛重烧着佢只鞋呀，攞命！
田启文：噉跟住你又点呀你？
*阿福：跟住咪嗱嗱声啰，“dem6”啲骨叭叭声，断咗骨噉嘅死嘢！
田启文：噉佢重行唔行到返屋企呀佢呀？
*阿福：行到呢。我送佢返屋企嗰阵呢，佢同我讲呀。佢话：哎，以后都唔想见到你嘞，你唔啱我呀。哈哈哈！嗰下嘢呢好似攞把刀喺个心度，刮咗个大竉，攞个心出嚟。掉佢落个深渊度，一个无底嘅深渊，系噉沉落去，沉落去，沉落去。沉到唔知几时先停，而家重沉紧呀。嗰种感觉好似呀，哗，生仔咁痛。痛到呀！哎吖！（苦笑）哈哈哈！好痛呀！痛到而家呀！都唔知停呀！（苦笑）哈哈哈！
阿基：几好笑呀！夜嘞！我哋走咯！
田启文：执埋啲嘢。执埋啲嘢。
（基哥、甜筒辉、田启文返归）

*阿福：都唔系好笑咋嘛。唔好笑唔笑算啰。

（阿水拍阿福膊头）
阿福：水哥，我点算呀？
阿水：你而家噉嘅情况唯有靠自己嘞！
阿福：点靠呀？（畀钱阿水）
阿水（推开啲钱）：你傻架咩？我同你兄弟嚟架嘛。有乜点靠啫？你咪再去揾佢同佢讲清楚啰。
阿福：点讲呀？（畀钱阿水）
阿水（受）：三个字，都系“靠自己”。呢啲冇人帮到你架，你信我啦。你得嘅，嚟呀，唔好噉嘅衰样。返去攞罐啤酒嚟先。
阿福：我唔系好想用酒精嚟麻醉自己㖞。
阿水：我知，攞畀我架叫你。
阿福：哦。

（医院注射室）
Candy：疯狗症㖞。
阿水：预防吓啫。咦，我上次系咪未畀电话你呀？
Candy：有呀，卷高衫袖唔该。
阿水：噉你唔call我嘅？
Candy：唔好讲嘢。嚟，有少少痛架噃。
阿水：系？噉你惜住吓㖞。
Candy：梗系。嚟啰噃。（支针插入阿水手臂，阿水大嗌）点呀？你冇事吖嘛？
阿水：原来真系有少少痛架㖞。
Candy：噉你准备好未呀？
阿水：准备咩呀？
Candy：掹返出嚟重会痛少少架。
阿水：系？噉你惜住吓㖞。
Candy：梗系。

阿水（追Candy）：Candy呀，域名机会一齐食餐饭呢？
Candy：点解？
阿水：因为我有啲医务常识想请教吓你嘅。
Candy：你悭啲啦，你系咪见到我靓想追我呀？听晚八点，等我收工，食饭。

（茶餐厅门口）
阿基：老板呀，食饭喇！
李老板：睇吓，旧年个窦就生咗三只，大大话话呢个窦呀生咗四五十只。
阿基：噉即系点呀？
李老板：有计呀！我谂到嘞！

（茶餐厅）
李老板：大家喺我茶餐厅都咁多年，唔怕同各位讲，今次呢个浪都咪话唔大。不过大家放心，终于畀我谂通咗。
田启文：唔系减人工吓哗？
李老板：唔系，就系有咁快得咁快，执咗“行运”佢。
众人：执咗“行运”佢？
*李老板：冇错。而家行运唔系冇生意呀，不过赚得少咋。湿湿碎碎一角几毫赚得几多先？就讲我哋最卖得嘅蛋挞，（问田启文）一日最多卖几多个？
*田启文：九百两呀。
李老板：我畀够一千呀，噉都系三千银咋嘛。所以我谂落呀，茶餐厅根本就冇得做嘅。（问阿水）系咪？
田启文、阿水、甜筒辉：系吖。系吖。
*阿基：噉讲真系冇得做架啦。
李老板：冇错喇，所以而家只有一条生路，就系转为“行运海鲜火锅酒家”。
众人：火锅海鲜？
*李老板：有噱头哩。（同阿水讲）海鲜几好利市得架。我蒸佢一条石斑呀，闲闲哋赚佢一千几百银。我重加埋火锅，我斋卖料。啲客自己弄。我食水几深呀，系咪好计先？（同阿水讲）掂唔掂，阿水？
阿水：好嘢㖞。
李老板：哗，正话一道灵光“嘭”声打落我个头，我就谂通晒喇。
阿水：噉道灵光都打得你个头好应㖞。
*李老板：所以我就行运嘞嘛。我仆你个臭街，你再加多我十万两租我未使射你呀。呢处明明系风水靓宝嚟架嘛。风水唔好呀，啲雀仔会喺处起窦？
阿水：系吖。
李老板：所以我哋只要上下一心，一定打赢呢场仗！打赢呢场仗！阿水，打唔打？
阿水：打佢老母！
李老板：阿基，打唔打？
阿基：打佢老母！
李老板：打佢老母！
众人：打佢老母！
李老板：打佢！
众人：打佢！
基哥（问阿水）：我哋打边个呀？
（阿水侧侧膊）
李老板：打仗呀！海鲜火锅酒家！
阿基：海鲜火锅！得！我有几百兄弟，都系做装修嘅，带佢哋嚟装修，收平啲。
（众人拍掌）
田启文：我谂到嘞！我谂到嘞！
李老板：谂到乜嘢？
田启文：边度买火锅架撑平呀。
李老板：边度？
*田启文：就斜对面嘅嗰个海鲜酒家咋嘛。开咗一个月唔够就执鬼咗喇。啲嘢好新嘅。啲碗好平架。我哋可以擸埋啲台凳，擸埋啲架撑，好平呀。系啦！……
*李老板：啱啱执。哗，又
李老板：啱啱执？
田启文：系吖。
李老板：海鲜火锅呀？
（情绪又一次低落）
李老板：我再谂谂先。天无绝人之路架嘛。
甜筒辉：老板，唔食饭呀？
李老板：我食，我屙个尿啫。

（杂志社）
老总（将啲相擗落阿男张台上面）：呢啲相边有咁值钱架！
*阿男：老总呀，呢啲雀窦屋就嚟拆架嘞。而家唔影迟啲冇得影架嘞。
老总：关我咩事呀？我而家要噱头呀！而家差馆畀咗一单独家料畀我呀，话低调地产商罗七辉嘅独身女失咗踪呀。你话如果影到佢同人私奔，或者畀啲古惑仔卖去做鸡。噉就发达嘞嘛。做啦，大学生。
（阿男扐起老总摆喺佢台面啲相，发现芳芳原来就系罗七辉嘅独身女）

（行运茶餐厅）
李老板：哎吖，又阴到畀你呀。
芳芳：你输嘞，快啲饮呀。
李老板：O.K. 哎，我唔同你玩IQ题嘞。猜枚哩。
芳芳：唔要呀，猜枚咁麻甩佬嘅，唔猜呀。饮啦。
李老板：O.K.（电话响）听唔听到？好似电话响呀。
芳芳：咦，咪整蛊做怪啦，你一啲恒心都冇你？快啲饮啦你。
吴孟达（引颈饮啤酒）：哦……，冇理由输畀你嘅，问多一条。
*芳芳：好呀，呢条题要答得好快架㖞。
李老板：好！
芳芳：黑猫咩色？
李老板：黑色。
芳芳：白猫？
李老板：白色。
芳芳：熊猫？
李老板：呢个我听过喇，熊猫系黑白两种色架嘛，饮。
芳芳：重未问完嗱！钉喺墙上嘅死猫系乜色呀？
李老板：冇晒气息。
芳芳：错，系装饰呀。
李老板：哎吖，哎吖，装饰呀，哎吖，畀你阴到！（饮咗啖啤酒）好，我问返你一条，全世界咁多火箭射上太空喇，点解硬系射唔到啲落嚟呢？
芳芳：因为啲星星好高。
李老板：错，因为嗰啲星星识得，闪吓闪吓，噉就避开咗咯。
*芳芳：你又奸茅，噉都畀你阴到。唔得，再问多一条问题，有几难得几难嘅。
李老板：好，行运茶餐厅下个月执笠，跟住我班伙计就冇得捞，如果你系我，噉你点做呢？冇计哩，冇计嘞。
芳芳：咪揾钱啰。
李老板：就系冇钱。（趴喺台）
芳芳：阿爸，唔使惊㖞。我老窦呀，大把钱㖞，借畀你吖。
李老板：哈哈哈！你老窦差人贵利，畀人追到裤都烂埋。我借畀佢差唔多吓哗？
芳芳：你唔相信我？
李老板：我信。
芳芳：我屋企大把钱，多多都有。即刻返去攞。
李老板：好呀。
芳芳：你等我！
李老板：我等你。
芳芳：咪走。
*李老板：我走咩？喺度我屋企㖞。哈哈哈！傻瓜！

*阿男（听电话）：走咗？走去边度呀？
李老板：啱啱走咋嘛。
（阿男啱见到芳芳钻入一架的士）
阿男（追架的士）：芳芳！芳芳！芳芳！芳芳！芳芳！芳芳！

（阿男好失望噉样返到屋企，见到芳芳瞓喺楼梯度）

（喷水池边）
阿福（画外音）：Fanny呀，无论如何我有啲嘢想同你讲架。要当面同你讲架。十二点，喺公园等你呀。不见不散。
（Fanny等到黄昏阿福先至匆匆赶嚟）
阿福：对唔住！对唔住！我迟咗少少，你唔嬲架呵？
Fanny：唔嬲，你约咗我十二点钟，而家成五点嘞。你迟咗五个钟头呀，唔嬲？
阿福：Fanny，你听我解释先啦。头先因为有个人呢，真系冇办法唔帮，我先至迟架啫。
Fanny：但系都唔使帮成五个钟头咁耐吖。
阿福：唔系哩，我头先因为呢有个婆婆攞住好多嘢唔识路搭巴士，我咪送佢去巴士总站搭巴士啰。
Fanny：于是乎呢，就陪人哋去搭车兼且送埋人哋返屋企吖嘛。系咪？
阿福：系吖。不过，势估唔到㖞，我送到婆婆返屋企呢，佢个心抱呢好似苏啤啤㖞。噉婆婆帮唔到手，噉我咪即系孭个心抱落楼啰。落到楼呀，个心抱已经穿咗羊水嘞。情况几危急呀。人命关天，性命尤关，冇理由见死不救吖嘛。
Fanny：噉后尾呢，后尾个心抱点呀？
阿福：哦，心抱冇事，佢去到医院呢一路捉住我只手唔放㖞，直至个啤啤出世啰。
Fanny：吓？你睇住个啤啤出世吖？
*阿福：系吖，噉原先我都可以走架嘞。不过啤啤个爸爸嚟到医院呢就住我嘞，帮个啤啤改个名。噉你知我啦，读得书少，盲字又唔识多个。你叫我改名㖞，唔系啡啡、挞挞啦、治治吖，重有咩名改吖？噉大家呢都唔系好钟意啰。噉后尾婆婆呢就话：哎，啤啤，如果冇你，可能出唔到世架嘞。不如就改你个名啦。
Fanny：叫阿福呀？
阿福：系吖。佢哋都几钟意嘅。不过我就觉得唔系几好啰。
Fanny：点解呀？
阿福：我觉得个啤啤应该叫做Fanny呀。因为嗰个系啤啤女嚟架嘛。肥嘟嘟，滑捋捋，好可爱，好甜架。佢叫Fanny一定会好好架。
Fanny：点解叫Fanny，唔叫其他名嘅？
阿福：因为Fanny好咯，同埋我只系识Fanny一个女仔名架咋。其他啲女仔名我——唔识架。
Fanny：噉中文名改咩呀？
阿福：我就噉直译，叫佢做芬妮啰。你话好唔好呀？
Fanny：梗系唔好啦，芬妮分离，咪即系分开？咁伤感！
阿福：哦，噉我改改先。
Fanny：你叫我喺度等你几个钟头就系听你讲故仔吖？
阿福：唔系吖，唔系吖。哎，查实，Fanny呀，我好想同你讲。哎，我……我好喜欢你啰。上次呢我唔系有心架，希望你唔好嬲我啦。我……我希望我可以同你做到朋友，唔好分开吖。唔知得唔得啰。
（Fanny起身走）
阿福：喂，Fanny，Fanny，Fanny，噉即系点呀？
Fanny：我都话英文名OK，中文名唔好咯。
阿福：我唔系讲紧改名呀，我……我系讲紧我哋呀。
Fanny：我话分离唔好呀，你明唔明啫？

（阿福摇头）
（Fanny转身走，阿福拉返）
阿福：我明喇！（笑）
杨恭如（笑）：明你个死人头呀明！
阿福：系咪好Q呀我？

Fanny：行啦。
阿福：哦。我想去见吓啤啤女吖。我同佢改咗个名叫虫虫呀。你话好唔好呀？
阿福：唔好，唔好！佢屋企人姓史架，史虫虫，史虫虫，唔系几好听，唔系几方便㖞。
Fanny：噉改咩好呢？

（阿男起身，见到自己心爱嘅小丸子畀人整烂咗）
阿男：边个整烂架？
芳芳：对唔住，今朝早八卦，唔小心整烂咗。你唔嬲架呵？
阿男：唔嬲？
芳芳：得得得，我帮你整紧一个重靓啲嘅。你千祈唔好出去吓。

（阿男行出房门，唔小心仆亲）
芳芳（揸住电锯）：对唔住，头先试锯，唔小心，你唔嬲架呵？
阿男（有气无力）：唔嬲，点会嬲呀？
吴孟达（行入嚟）：哈哈哈，芳芳真系叻嘞，原来呢佢阿爸做建筑架。啊，估唔到佢连三行都晓架。（问芳芳）哎，啲地板起唔起到呀？
李老板：小心㖞。
*芳芳：哎吖，唔得呀，黐得太实嘞。阿爸，你死咗呢条心算嘞。
李老板：冇计呀，尽咗力咪就算啰。
阿男：喂，你喺我嘅厅度噉样整咗个竉，你而家点收科呀？
芳芳：好易咋嘛。（揾只痰盂遮住个竉）嗱，噉咪遮住晒啰。
李老板：呵，系㖞，你真系专家嚟架㖞。
芳芳：梗系，但系呢度重有少少……
……
（阿男转身，眼神变得阴森恐怖）

（杂志社）
老总：咩话？你有罗七辉个女嘅独家料？哗，系就发达喇。嗱，你总之写得有咁煽情得咁煽情。我留返下下期封面畀你。

（阿男偷影芳芳）
（阿男作新闻）
（有錢女淪落倒垃圾）
（富豪獨女沉淪毒海）
（千金小姐做雞）

芳芳：你睇，几靓。
*吴孟达（竖大拇指）：好嘢呀。

（吴孟达畀件行运衫芳芳）
芳芳：我嘅？
李老板：系吖。
田启文：你嘅。
某甲：整口烟先。

（阿男鬼鬼鼠鼠）
芳芳：你睇！呢个小新系你，小丸子系我。似唔似呀？哎，有相机㖞。影相呀！
（芳芳摆甫士同阿男影相，阿男面无表情）

（武术馆）
阿福（送外卖）：外卖到！（问细路）阿Fanny呢？
细路：头先有个男仔嚟揾佢，落咗公园嘞。
*某甲：
阿福：男仔？
大师兄：哦，阿Fanny以前男朋友吖嘛，高高大大，几靓仔架，重大学生添㖞。好似话专程喺美国返嚟向佢求婚呀。
阿福：求婚？
大师兄：系吖。
（阿福飙出去）

（公园）
（有咁啱得咁桥，阿福见到Fanny同男朋友拥抱）
（阿福抱头跑开，伤心到极，唔小心撞跌咗一个学生妹手中嘅冰碎）
（阿福执起啲冰，摆返入个杯）
阿福：哎，唔好意思，小姐。畀个杯你。畀个杯你。
Fanny：福！
学生妹：黐线！（撇）
Fanny（手指学生妹）：佢？！
阿福：你今日真系好彩呀，畀你见到我嘅真面目。其实，（扮有型）我就系蛋挞王子！我同你讲嗰个阿水咪系我啰。
Fanny：系你？
*阿福：你唔好睇我个样傻吓傻吓，不少少女死喺我手上。头先个学生妹，你睇到架。我同你之间嘅感情，你唔好当真㖞。同你玩吓咋。
杨恭如：你玩我呀？
阿福：冇咩嘅，咪当上咗人生宝贵嘅一课啰。下次带眼识人呀，忘记我呀，唔好再记住我呀。哈哈哈！（苦笑）

（阿福“帮”人搬嘢）
阿福：师傅，使唔使帮手呀？
师傅：好呀。
阿福：哈哈哈！

（阿福“帮”人泊车）
*阿福：直后，多啲回退，后后后，（两架车撞埋）哈哈哈！

（阿福“帮”人开门）
阿福：我帮你开门呀。
路人甲：唔该！

（芳芳嘅相喺打印机里便慢慢出嚟）
阿男：喂，搞掂晒嘞。系吖，随时嚟攞得架嘞。够唔够煽情？我觉得简直可以用卑鄙无耻嚟形容。（笑）都系跟你学嘢啫。
（芳芳喺阿男身后失惊无神噉出现）
阿男（吓到半死）：芳芳。
芳芳（见到自己啲相）：你噉样嚟屈我？噉我以后点见人嗱？你即系想我死啫。
阿男：唔系吖。
芳芳：你有冇良心架？
阿男：我有我苦衷架。
芳芳：你个人面兽心，衣冠禽兽。我真系想睇吓你个心系咩颜色架。
（发梦）

（芳芳失惊无神喺阿男身后出现，今次唔系发梦）
芳芳：小新！
阿男：啊！（仆倒）
芳芳：你冇事啩？撕烂啲乜嘢呀？
阿男：冇。（将啲相塞入碎纸机）
芳芳：做咩咁惊呀？系咪头先吓亲你呀？
阿男：冇，做嘢做得太……太投入嘞，入咗嚟都唔知。
芳芳：食得饭嘞，走呀。

李老板：哎，食饭！食饭！
芳芳：帮手！
李老板：唔使，唔使。阿男呀，正话你公司有人打电话嚟话转头有人上嚟攞相㖞。
阿男：系咩？
芳芳：咩相呀？
阿男：哦，冇，冇，冇，冇。
芳芳：系㖞，都唔知你做咩架㖞。
李老板：你唔知阿男做……
阿男：阿爸，食饭先啦。
李老板：食饭食饭食饭。
（门钟响）
阿男：唔使开门，唔使开门。
李老板：做咩唔使开门啫？
芳芳：我嚟开。
阿男：唔好呀。
李老板：咩唔好开啫？
芳芳（开门，见到个人好生暴）：你系？
生暴人（入屋）：哎，李老板！唔好意思，带个客上嚟睇层楼。
李老板：唔紧要，唔紧要，随便……随便睇呀。
阿男：阿爸，乜你卖楼咩？
*李老板：系吖，哎，由头谂过架嘞，茶餐厅噉来都唔系计嚟架。横掂老窦都几呀岁，得闲咪当退休啰。噉有时嘅嘢呢唔系话执就执嘅。噉茶餐厅班伙计个个跟我咁多年架嘞嘛。咪谂住卖咗层楼，套返多少现。当遣散费又好，乜都好啦。大家重要生活架嘛。呀，系呀，第日你哋两个嗰层楼呢，你两个二人世界得架喇。我谂住喺附近呢租个房仔，租平吖嘛。我重有咩风浪未见过架嘛。家吓冇求呀，只要芳芳开心，你开心，你两个开心，阿爸自然开心。啊，芳芳呀。
芳芳（伤心到食唔落，转身走入阿男间房）：啊？
李老板：你做咩呀？唔舒服呀？
芳芳：冇嘢。
李老板：哎吖，睇吓芳芳咩事。

（阿男间房）
阿男：芳芳！
芳芳（哭丧着脸）：死嘞！死嘞！我唔知点话畀你阿爸听我讲大话。同埋如果你阿爸知道我讲大话嘅话，佢一定好难过架。
阿男：唔使惊，等我同佢讲。冇事嘅。你唔系有心架嘛。系咪？
芳芳：其实我系罗七辉个女呀。因为我喺屋企冇人理我，所以我成日讲大话。嗰日同我爹啲嗌咗交之后就离家出走。我谂住玩吓啫，我冇心害人架。同埋你同你屋企人都对我咁好。*我噉样呃你哋，我觉得好冇良心。（挨落阿男个膊头，阿男笑）你笑咩啫？快啲帮人哋谂吓计呀。
阿男（搭住芳芳膊头）：噉你系小丸子嚟架嘛，小丸子讲大话边度有人嬲架啫？
芳芳：你唔使呃我嘞，我知我永远都做唔到你心目中嘅小丸子架嘞。
阿男：边个话？（扐起阿男同芳芳嘅合照）一个小新，一个小丸子，送畀你。
芳芳：多谢。
阿男：你咩都讲晒畀我听，唔惊我害你呀？
芳芳：钟意小丸子嘅人系唔会害人架。
（阿男揽实芳芳）
阿男：嚟呀，食饭嘞。

（杂志社老总企喺门口）
老总：喂，啲相得未呀？快啲呀，赶住排版嗱！（见到芳芳）哦，原来你沟咗佢。唔怪之啦，有独家料呀。叻仔！
芳芳（愤怒，问阿男）：你系记者嚟架？
阿男：你听我讲呀。
芳芳：你走呀！（见到碎纸机里便啲嘢）
阿男：芳芳……（芳芳掴咗阿男一巴）Sorry!（整多镬）
（芳芳抌咗合照，拂袖而去）

（饭店）
（伺应生倒酒）
阿水：多啲添呀。好！其实呢度我都系第一次嚟。（呷咗一啖酒）
Candy：呣？
阿水：Candy呀，我好爱你架？
Candy：呣？
阿水：你第一日返学嘅时候我经已爱你嘞。我以为呢一份爱，会随住时间而消逝，但系直至到我喺医院撞返你，我对你呢一份爱，又次射返出嚟。
Candy：你呢一份爱会唔会用涌出嚟比较恰当啲呀？
阿水：唔会，一定要用个射字先可以形容到我而家嘅心情。Candy，有封我想交畀你好耐嘞，但一路都冇机会，家吓啱嘞。（将封信交畀Candy）
（Candy睇都唔睇就将封信烧咗去）
阿水：Candy!
Candy：我相信你应该明白，一个女仔肯同你食饭，唔代表佢一定会同你上床。
阿水：梗系啦，上床呢样嘢结咗婚先准做架嘛。同意婚前性行为嗰啲人，我唔同佢做朋友架。
Candy：问题就系，我唔信呢一套啰。如果我知我系钟意你嘅。又使乜嘥咁多时间去食啲谰浪漫嘅饭，讲啲谰浪漫嘅嘢啫？直接上床咪得啰。你同唔同意呀？
阿水：我百分之一百同意。因为喺而家呢个时代呢，直接上床系好好架。
Candy：我有个提议呀。你有冇试过着女装底横呀？
阿水：女装底横？何止着呀，我以前细个偷我阿妈条底横嚟当帽戴嘅。
Candy：不如今晚你着我条底横呀。我谂一定会好sexy架。
阿水：你想我着你条底横？
Candy：得唔得呀？
阿水：我着咗你条底横，你着咩呀？（Candy似有所思）我着，一言为定。嗱，你唔好反口呀。
Candy：我而家就想好要呀！
阿水：而家？喂，呢度餐厅嚟架㖞。
Candy：厕所见呀。（走入厕所）
*阿水（企起身）：喂喂喂，我去去厕所，你褪褪先。
伺应生：噉不如我迟五分钟先同你上菜呀，好吗？
阿水：五分钟？起码都个零钟啦，你当我流架你家吓？

（厕所）
Candy：快啲除啦，我想睇吓你条底横呀。
阿水（手忙脚乱噉除裤）：嚟紧，嚟紧，
Candy：其实你可以sexy啲架。
阿水：点sexy法呀？
Candy：你记住下次呢件恤衫唔好揳埋落条底横嗰度呀。
阿水：梗系啦，下次底横重着咩？
Candy：哎吖，咪住，咪住，快啲着埋我条底横先啦。如果唔系出便啲牛排又冻又硬架嘞。
阿水（着Candy条女装底横）：唔紧要，我叫咗班友一个钟头后先起菜嘅。哗，你而家好急吓哗？
Candy：喜唔喜欢嗱？
阿水：梗喜欢啦，朝思暮想都系呢种无意识嘅兽性呀。
Candy：唔好住呀，你快啲拧转背先啦。
阿水：我拧转？你拧转会唔会啱啲呀？
Candy：我想睇吓你背脊啲肌肉呀！
阿水：哦！哦！哦！
Candy：哗，你背脊好多肌肉呀，系咪成日做gym架？（行出厕所，攞埋阿水啲衫）
阿水：喂，Candy！喂！你做咩呀？
Candy：哈！重唔畀我报咗仇？
阿水：报仇？
Candy：你唔记得咩？嗰次喺party度呀，你整烂我件衫吖嘛。搞到我转咗校啲人都叫咗我五年“长平公主”呀！
阿水：隔咗咁耐，你唔系真系记住吖嘛？你又话细路仔啲嘢唔会摆喺心嘅？
Candy：睇吓十年之后你嬲唔嬲呀？贱人！（撇）
阿水：Candy!

（阿水畀影剥光猪相）
（周街都贴满晒阿水嘅剥光猪相，重有两行字：情場騙子社會敗類）

（阿水戴返副黑超，流埋眼泪）
街坊（转身，见到阿水）：喂喂喂，嗰个咪蛋挞王子？
（阿水即刻走）
*李老板：阿水呀，点解咁大镬嘅？
阿水：唉！
李老板：点会搞成噉呀？
阿水：唉！
李老板：你放心，我叫晒班伙计千祈唔好行电灯柱嗰便。
田启文：系吖，叫晒架嘞。
*阿水：边度止电灯柱呀，周围都系呀。仆街呀！阿基，你即刻同我吹鸡攞一百几呀人落嚟呀。
*阿基：预咗，咁大整蛊，打边个？
*阿水：打咩啫？搣街招呀。
李老板：唔使，唔使，阿水呀，我同你谂到办法架嘞。
阿水：吹咗鸡先啦。
*李老板：唔系，唔系哩，搞得掂架。同你谂掂咗嘞。
阿水：点掂啫？
田启文：坐低。
李老板：实掂架呢镬。
*阿水：
*李老板：
（阿水畀人用纸袋笠住个头）
阿基：嗱，噉咪掂啰。
阿水：我唔信。
田启文：我哋都认你唔到呀。
阿水：得唔得架？
李老板：鬼认到你咩？
*阿水：稳阵啲。（转身问肥仔）啊，肥仔呀，你认唔认到我呀？
肥仔：你乜水吖？
李老板：嗱，噉咪掂啰。
*阿水：真系唔该晒你真系。
李老板：讲啲噉嘅嘢呀？你系我哋行运嘅蛋挞王子，精神支柱嚟架嘛。你千祈唔好冧呀！你冧我哋全部冧架。
阿水：放心呀，一定唔冧。
姣婆四嘅下属：最后两日，我嚟通知你哋，两日后正午十二点钟正式收铺！

李老板：大家放心啦，天无绝人之路架嘛。大家开心做埋呢两日。
Fanny前男友：请问阿福喺唔喺度呀？
企堂：哦，你揾阿福呀？（阿福啱返嚟）哎，佢啱啱返嚟嘞。喂，阿福呀，有人揾你呀。
Fanny前男友：你就系阿福吓哗？（阿福想讲嘢）拜托你好好照顾吓Fanny呀，我系Fanny嘅旧男朋友。我原本想揾佢同佢复合咋，不过佢就拒绝咗。佢同我讲，佢话钟意你。我听日返美国架嘞。希望你好好照顾Fanny呀。（行出茶餐厅）
阿福：再见！阿水！（周围揾阿水）

阿福：啊，水哥，水哥，呢次你要帮帮我嘞。系你先至可以帮我澄清架咋。
阿水：你认得我咩？

阿福：唔系，我认得只扼咋。
阿水：吓得我呀。
阿福：水哥，呢便。
阿水：好，我帮你！

（两个人走去揾Fanny）
阿福：哎吖，哎吖，Fanny喺度架嘞，你过去帮我解释啦。
阿水：你定啲嚟，我喺度傍住你。但系你一定要自己过去同佢讲。如果唔系唔得真诚呀。
阿福：真诚。
阿水：一定要真诚。
阿福：真诚。

Fanny（吓一跳）：你重嚟呢度做咩呀？
阿福：你望住我，你望住我双眼呀。其实我系唔会咗，我以为你会同你旧男朋友一齐。我落唔到台，所以我先讲大话。其实我唔系咩蛋挞王子。我嘅出发点，都系因为我太钟意你。希望你原谅我呀。Fanny，你感唔感觉到我份真诚呀？
Fanny：完全感受到呀。我从来都未见过咁真诚嘅目光。
阿福：系咩？Fanny!
Fanny（推开阿福）：唔该借借！

（Fanny）
吴留手：Fanny，你噉成日望住我，我觉得好唔好意思嘅。你究竟想点啫吓？
Fanny（推开吴留手）：唔该借一借，我唔系望你。（睇纸袋反面阿水嘅衰样）呢对眼神，真情得嚟，又系社会败类。纯情得嚟又系情场骗子，真系复杂。
阿水：个袋，我贪得意借佢戴吓架咋。

阿福（介绍）：Fanny，呢个系我好朋友蛋挞王子。（同阿水讲）阿水哥，呢个就系我个初恋情人，Fanny呀。
Fanny：你就系蛋挞王子呀？（伸手）
阿水：你就系Fanny嚟吓哗？（两个扼手）
Fanny：幸会！
阿水：幸会！
阿福；阿水哥，今日嚟呢就系帮我向你澄清架水哥。
系吖，阿福，其实佢真系好喜欢你架。佢系一个好人嚟架。
Fanny：你唔好再讲嘞，我唔想听呀，我好乱呀！
阿水（揽住Fanny）：Fanny，你唔好噉啦，有我喺度你唔使惊，定啲嚟呀。唔使惊！唔使惊！Fanny，你听我讲。你今晚得唔得闲？
Fanny：得闲，你想点呀？
阿水：我！（两人欲吻）

阿福：阿水哥，阿水哥！
阿水：蛋挞王子其实系浪得虚名你知架啦。
阿福：系，我知。
阿水：我同你一样，其实都系一条沟唔到女嘅可怜虫。嗰种感觉你明架喇。
阿福：我明白。
阿水：但系爱情其实系……系好奇妙架，你同唔同意呀？
阿福：我同意。
阿水：我正话同你条女阿Fanny一见钟情架，你睇唔睇得出呀？
阿福：我睇得出。
阿水：噉你话系咪要开香槟庆祝呢？啊？系咪吖？
（阿福点头）
（拥抱）
阿水：全靠你咋，好兄弟吖！
阿福：好兄弟！好兄弟！

（走去Fanny身边）
阿水：Fanny，我有好多嘢同你讲。
Fanny：我都系吖。
阿水：我哋走嘞。
Fanny：但系，但系太突然嘞，我接受唔到呀。同埋，同埋阿福佢好似好可怜嗱。我唔忍心呀。
阿水：Fanny，做咩啫？我……我真系……
Fanny：你唔好迫我呀。希望你明白。
阿水：唔系啩？
Fanny：讲真架。

（阿水加入阿福行列）
阿福：你个社会败类！头先一个唔觉意，差啲同你开埋香槟。嗰个系我初恋情人嚟架，你撬我墙脚。你个人渣！
阿水：系！我系想撬你墙脚，但系唔成功。Fanny始终都系钟意你。而我就始终都系一个沟唔到女嘅可……怜……虫！（喊）
阿福：唔好噉啦，阿水！
阿水：我冇事！嚟呀。

阿水：头先只系一个美丽嘅误会。你哋两个先系一对。而我亦都将会喺你哋嘅生命里便，彻底噉消失。
阿福：阿水，唔好噉啦。
Fanny：我哋一样可以做普通朋友架啫。
阿水：返唔到转头。但喺我走之前，我要话畀你听，头先我同你嗰两分钟，我呢一世都唔会忘记。我已经深深噉爱上咗你。

（Fanny同阿水热吻）
（阿福精神失常）
（阿福受伤入厂）

（阿福发梦）
阿水：福！福呀！福！
阿福：水！你嚟探我呀，阿水？我以为你以后都唔理我嘞。
傻架你，我同你系生死之交嚟架嘛。你冇事我就安乐晒嘞。
阿福：水！
阿水：你听日记得到啰㖞。
阿福：到咩呀？
阿水：我同Fanny结婚嘞嘛。
阿福：唔好呀，何金水！唔好呀，阿水！唔好呀！
（阿福醒返）
Candy：冇事架嘞。
阿福：做咩呀？
Candy：你头先晕咗喺街度，有人送咗你嚟医院呀。你做咩成日嗌住：何金水，唔好，唔好。佢究竟系你咩人呀？
阿福：佢……佢系我唯一嘅朋友，我嘅死党，生死之交。但系，佢当住我嘅面抢咗我嘅初恋情人。
Candy：原来你都系嗰个禽兽嘅牺牲品。
*阿福：你唔会明白我架嘞，我真系好想死咗佢呀！
Candy：你千祈唔好噉谂呀。我知你受咗好大嘅打击。我都系过来人，我明架。我真系明架。

（Fanny同阿水）
Fanny：爱过方知情重，醉过方知酒浓。
阿水：好诗。爱情嘅感觉真系奇妙呀。
Fanny：但，硬系觉得有啲对唔住阿福呀。
阿水：傻架，唔好讲埋啲咁扫兴嘅嘢得架。

（阿福同Candy）
Candy：嗰个咩何金水正一社会败类嚟架。不过你放心啦，佢实有报应架。
阿福：你做咩当住我嘅面闹阿水哥呀？
Candy（忟）：又系你话佢抢咗你初恋情人嘅？噉你想点架？
系，佢系唔啱，但系你唔应该怪佢吖。要怪都系怪嗰个女人。佢都系畀人哋误解咗，受咗打击，先至用沟女嚟麻醉自己咋嘛。要怪就要怪嗰个死八婆。个死八婆唔听人解释。啊？啊？女人边有噉架？嗰个死八婆就系累到我同阿水哥咁痛苦嘅罪魁祸首喇。
Candy：噉嗰人系边个呀？
阿福：我记得架，佢叫做叶玉芬，Candy吖嘛。系阿水而家重深深爱住嘅初恋情人。
Candy：初恋情人？

（Fanny同阿水）
Fanny：蛋挞王子，蛋挞王子，你嘅初恋系点嘅样架？
*阿水：我啲噉嘅浪子，又点会有初恋架呢？
Fanny：系㖞。
阿水：梗系啦。

（回忆）
阿福：阿水哥呢一段初恋，佢只系同我讲咗一次。我呢一世都唔会忘记。
阿水：我唔怕话畀你听呀，阿福。初恋，系最刻骨铭心架。

歌词：
可知我情投入那种程度
在这崎岖的旅途
而你不可感觉到
心伤痛从来未彻底流露
但你口中心里各一套
我知你仍然在找更好
而在那半夜里恬静里
即使看见预告
前面有着那各自个的路
为何重头又是这样错又这样错
深宵我哭泣静待清早
当天我与你真的相爱过
今天我爱你又如何
为何又在伤害我又感动我
麻木天真的爱慕
回忆里都是你一哭一笑
是最美丽都不会老
回忆里都是你一哭一笑
是最美丽都不会老

（的厅）
*阿水：我咁真系对Candy，点解佢完全察觉唔到架呢？点解啲女硬系要对住啲飞仔先得欢天喜地架呢？哗，你睇，噉样庄法都唔嬲。哎吖，重得埋嘢添呀。而我哋呢一班所谓勤力读书嘅四眼仔就全程白果。
四眼仔：有冇计呀？
阿水：唔通我呢一世都同佢哋一样，要做一条沟唔到女嘅可怜虫？我唔可以噉架，我要扭转我嘅命运。于是乎就下咗一个一生都后悔嘅决定，我要做个飞仔。就系为咗得到Candy嘅欢心。

（阿水整乱头发，出去同Candy跳舞，唔小心整烂Candy件衫）

（阿水非常懊悔，非常伤心）
阿水：估唔到Candy喺party之后第二日就已经转咗校，之但系我呢封信一路都冇抌到。直至到嗰日Candy将佢亲手烧咗去。
（Candy目定口呆）

（行运茶餐厅）
（停止营业）
（李老板满怀上岗噉喺间店堂行嚟行去，追忆过去）
（昔日茶餐厅兴旺嘅景象）
小芬女个阿爷：哎吖，唔记得带银包添。
李老板：哎，街坊隔篱，听日啦，听日啦。
（李老板见到地下嗰张“生意兴隆”，不禁流泪）

（有人拍门）
李老板：哎，小芬女。
小芬女：买嘢呀，例排。
李老板：你返去同爷爷讲，茶餐厅执笠嘞，冇蛋挞卖嘞。
小芬女：噉我一阵见嚟买呀。
李老板：阵间都冇啫。
小芬女：噉我听日嚟买呀。
李老板：听日都冇，后日都冇，以后都冇呀。行运茶餐厅冇咗架嘞。返去同爷爷讲，唔好嚟买早餐嗱。返去啦。小心过马路呀。
小芬女：哦。

（李老板除眼镜抹眼泪，情景认真凄凉）
甜筒辉：早餐嗱，老板！
阿基：早晨！
田启文：早晨嗱，老板！
李老板：早晨！早晨！
阿基：老世，咁大风好易吹啲沙入眼架。
李老板：系吖，啱啱咪就系有沙吹入眼啰。哎，咁人齐嘅？
田启文：冇，我哋惯咗早起身，谂住嚟请你食饭咋嘛。
阿基：哎，（拎起甜筒辉扐住啲嘢）甜筒辉话今日要亲自下厨，整餐好嘢过你食呀。
甜筒辉：系吖，多谢各位照顾呀。多谢晒！
李老板：哎吖，咁有我心。哎，横掂重有几粒钟，用尽佢。
甜筒辉、田启文：好呀！好呀！

（罗七辉钻入自己架车，见到自己个女芳芳坐喺里面）
芳芳：爹啲。
罗七辉：咦，芳芳，嚟陪爹啲食饭呀？
芳芳：系吖，你钟唔钟意呀？
罗七辉：梗系钟意啦。你返嚟之后成个唔同晒㖞。
芳芳：做咩呀？我肥咗呀？
罗七辉：唔系。芳芳，我再听唔到你讲大话。而且又识得关心人。虽然我唔知边个会令你变成噉。但系，有机会我都好想当面多谢佢。
芳芳：我谂以后都冇咩机会见到佢架嘞。
*司机：喂，老世呀，今期丑闻周刊个封面好离谱呀，（递畀罗七辉一本周刊）你睇吓。
芳芳：老窦，唔好睇呀。
罗七辉：畀我睇吓！（睇周刊）哗！有冇再离谱啲呀？芳芳，你自己睇吖。
芳芳（接过杂志）：“两个茶餐厅基佬的自白”？（即刻揭去嗰页睇，见到“I'm Sorry”，明白晒）

（回忆）
芳芳：嗱，呢个小新呢系你，呢个小丸子呢系我。钟意小丸子嘅人系唔会害人架。

（芳芳揸住本杂志等阿男）
阿男：芳芳，估唔到你会嚟，多谢。
芳芳：多咩谢呀？我嚟行街买嘢咋嘛，唔得呀？你咪以为呀，你落晒嗰啲广告呀我就会原谅你呀。
*阿男：我知我系衰。我都唔会奢望你就噉就原谅我。
芳芳：你做咩唔落我啲相呀？如果你落我啲相嘅话呢，咪起晒朵啰。
阿男：我系都唔会益嗰本垃圾杂志吖。我系我都自己出啦。
芳芳：噉你重唔出？出到派通街吖你！（掉头走）
阿男：出咗嘞。（喺个包里面扐出自己同芳芳嘅影集）不过净系出咗一半。全世界净系得你一个可以拥有。希望你会钟意啦。我烧晒相底架嘞。你唔使惊会畀人睇到呀。拜拜！
芳芳：喂，你有冇搞错呀？烧晒我嘅底片？噉我重要晒返去畀啲亲戚朋友架嘛。
阿男：噉我冇办法架㖞。
芳芳：你真系好鬼麻烦㖞。你呢，就最好趁我呢排得闲呢，卜个时间我哋就返去茶餐厅影过啦。
阿男：好呀。
芳芳：重——有呀，你睇吓呢张相“噉”肥腯腯出嚟嘅？
*阿男：呢啲系baby fat嚟架，呢啲Q架嘛。
芳芳：梗系唔系啦，你真系完全唔掂呀，噉你都登到出嚟嘅？
阿男：呢张咪几好，你快啲睇吓。
芳芳：都话你唔掂咯。

（行运茶餐厅）
姣婆四：嚟！入嚟睇睇间铺。
乜水：咦，又话间铺吉咗嘅？
姣婆四：得得得！你哋咪诈诈谛吖，我准时十二点钟嚟收铺架。咪玩嘢添呀。
（阿基情绪激动）
李老板：阿基，阿基。
*姣婆四（指挥手下做嘢）：拆咗楼梯呀，拆咗会好呀。呢度呢加道墙，方便摆嘢。我我哋上阁仔睇睇。
手下：我哋上楼睇睇。

（陪个孙女入嚟睇间铺）
坚叔：乜真系执笠喇？
李老板（打招呼）：坚叔！
坚叔：我重以为我孙女讲大话。唉，食咗你四十几年蛋挞嘞，到而家冇得食，真系可惜呀。
李老板：对唔住呀，坚叔。
小芬女（摊开只手）：老板，老板，买嘢呀。
姣婆四（落楼，推倒小芬女）：行开啲呀，冇嘢卖呀。
李老板（扶起小芬女）：你做咩呀？细路女嚟咋。
阿基：八婆，你系咪玩嘢呀？
*姣婆四：哼，你哋呢班死穷鬼，咪整鬼整马，你估我唔知你笼嘢呀？揾埋啲死老嘢呀，僆妹呀嚟钱。唔依我规矩吖，听冇运行呀。咪话我唔警告你哋吖。
李老板：你有你嘅规矩，我亦有我嘅规矩。我收得人客钱，就要畀嘢人哋。坚叔，而家我收咗你啲钱，我转头畀蛋挞你。呢啲就系茶餐厅嘅规矩！伙计，开炉！
伙计：好！
姣婆四：你敢开炉？你一开炉我就报警！
阿福：你再唔走我就报警拉你！呢间铺未到十二点都系我哋嘅。
李老板：好！行运茶餐厅，准时十二点正，蛋挞出炉！
姣婆四：我准时十二点正，我封你铺！

（气氛紧张）
（姣婆四坐喺出便等十二点）
（个钟沓正十二点）
阿基：蛋挞出炉！
田启文：蛋挞加炼奶，葱花蛋治飞边烘底呀。
坚叔：李老板呀，有冇危险架？
放心啦坚叔，我一定做埋你生意。
坚叔：不如我哋都系打包拎返屋企食嘞。
姣婆四：封你个铺！
（李老板锁晒度门）
李老板：有本事你就开门！
（坚叔想出去）
李老板：喂！坚叔！
坚叔：开门畀我出去得架。喂！李老板呀，放我出去得架。
李老板：坚叔呀，呢处重安全嗱。饮埋杯鸳鸯先。
坚叔：啊？
田启文（大派定心丸）：放心啦坚叔：冇事架㖞，唔使惊㖞。
李老板：点呀？
阿基：够胆就撞门入嚟！
李老板：系吖。
田启文：冲入嚟呀，够胆就撞门入嚟吖嗱。

李老板：阿基呀，佢吹鸡㖞。
阿基：你老尾吖，你估净系你哋识吹鸡呀？吹鸡！

（各人纷纷打电话）
李老板（问阿福水哥喺边）：阿福呀，咁紧要嘅关头，唔见咗阿水架吓？
阿福：阿水？
李老板：系咯，喺边呀，阿水？（阿福走入后堂）阿福，阿福呀！
田启文：九成未见过大场面，吓惊咗就系。
阿基：喂，唔使惊呀，你哋睇吓。

（黄一飞带住班僆赶到）
李老板：所以话黑社会最讲义气架。
阿基：哗！你哋睇吓，高佬伟真系畀面呀。全家大细全部嚟晒。
李老板：唔该晒，唔该晒，阵间请你哋饮茶，唔该晒，唔该晒。（同坚叔讲）坚叔呀，而家走最安全嗱。
*坚叔：哎，而家你哋又咁沓马，使咩惊佢㖞？我睇吓热闹啲。（小芬女摇头）哎，难得咁大场面吖嘛。

（点知黄一飞一个屈尾十，走去同姣婆四扼手）
*姣婆四：多谢，多谢，多谢沓马。哈哈哈！高佬伟！估唔到你咁沓马呀！吓得我呀！（畀钱高佬伟）
*阿基：高佬伟！仆你个街呀！
李老板：黑社会靠唔住架嘛。
黄一飞（警告李老板）：李老板，精嘅就交茶餐厅出嚟，唔使我啲僆喐手。
田启文：噉而家点呀？
李老板：走嘞！（返入茶餐厅）
坚叔：噉我哋而家点呀？
小芬女：又走唔切嘞，快啲返入去啦。
李老板：坚叔呀，快啲入嚟呀！

*姣婆四：想玩嘢，你重同我玩呀？唔听呀，呢个时候点听电话咋？

李老板：阿水？
阿基：阿水呀！
田启文：真系阿水呀！
阿水：唔该晒你呀，吴留手师傅。
吴留手：唔使客气，警恶惩奸，为民除害，系我哋武林中人嘅责任。

*黄一飞（见形势不利，带班兄弟走路）：哗！撇喇！
姣婆四：喂喂喂！
*阿基：吹鸡吖嗱！唔好走呀！
姣婆四：仆你个街呀！真系黑社会信唔过嘅。唔听，死开呀！
李老板：阿水，哎吖，全靠你，全靠你。赶得切！赶得切！
阿水（揽住Fanny）；唔紧要！唔紧要！
Fanny：多谢你呀，水哥！（惜啖阿水）
阿水：唔好客气！
李老板（疑惑不解）：阿福，佢唔系你初恋情人咩？
Fanny：阿福，我哋要多谢阿水哥呀。系佢令我知道失去咗嘅嘢先至系最珍贵架。
阿福：你失去，你失去咗咩呀？
Fanny：咪系你啰。冇咗你之后，我先知道，原来你对我系几咁重要呀。水哥话，擒晚噉样做系为咗激励吓你架咋。
阿福：激励我？
阿水：梗系，阿Fanny呀，我哋再激励吓佢先喇。
Fanny（推开阿水）：死开啦你！
阿福：系吖，唔使激嘞！

姣婆四：你哋当我死架？我有正式嘅收铺令。发姣就去开房啦。执达吏，收佢铺！
吴留手（阻喺姣婆四面前）：咪住！边个够胆埋去我就打镬佢。“皇极惊天拳”吴留手！今日我就替天……
姣婆四：收皮啦！（一脚踢飞吴留手，睬你都傻）边个够胆再阻我收铺！
画外音（罗七辉）：系我！（阿男同芳芳喺架车钻出）
李老板：阿男同芳芳？阿男！
芳芳：阿爸！
李老板：芳芳！
阿男：阿爸！今次茶餐厅有救呀。
系吖，我爹啲应承咗我，佢话佢唔会收你间铺头，亦都唔会加租。所以我哋可以一直做落去呀！
姣婆四：咩料呀，罗七辉？
罗七辉：我今朝已经全面收购你“盛世地产”。而家呢个铺头唔系你嘅，系我嘅。
姣婆四：你有钱大晒呀？你收购我间地产我会唔知？我会唔知？哈哈哈！
（手下咬耳仔）
姣婆四：顶！你唔早讲？七辉，我收间噉嘅铺仔，使唔使玩到咁大呀？
罗七辉：婆四，系就玩大咗啲。不过有时爱情嘅魔力呢真系大到你唔信嘅。
阿福：系吖，系吖，李老板，今日发生嘅嘢真系不可思议。
李老板：点止呀？你哋睇！（姣婆四晕低）哎，激死佢喇！
罗七辉：你冇嘢吖嘛？
阿福：哦，噉真系冇法解释咯。
*李老板：哎，其实好简单，两个字架啫。（手指店招）“行运”！

（李老板握拳恭贺新禧）
李老板：恭喜发财！恭喜发财！祝各位街坊好似我哋行运噉，吉人有天象，行运一条龙！今日所有蛋挞，免费！
阿基：蛋挞随便食！随便食！
李老板：唔使争呀！个个都有嘅！个个都有嘅！（问阿男）阿男，芳芳呢？
阿男：佢话嚟架㖞。

（芳芳出现）
阿男：小丸子呀！
*芳芳：小新！恭喜发财！
*李老板：恭喜发财！
芳芳：我今日靓唔靓呀？
*阿男：靓到！
芳芳：今日我成个人畀晒你架嘞。（豆利市）
阿男：喂，日光日白！夜晚先啦。
芳芳：讲咩呀？我话今日成个人畀晒你影相呀！行啦。（入茶餐厅）

Fanny：唔该，请问阿福喺唔喺度呀？
李老板：新年快乐，Fanny！阿福出紧嚟架嘞。食个蛋挞呀。
Fanny：好呀。（食蛋挞）好好味呀！我从来未食过咁好食噉蛋挞，边个整架？
李老板：咪阿福啰。
Fanny：我最钟意整嘢叻嘅男人架喇。点解你唔早讲呀？
阿福：系咩？噉你唔早讲？
Fanny：点整架？
阿福：好简单，整蛋挞呀。

甜筒辉（唉声叹气）：个个都一双一对，真系羡慕死人嗱！
阿水（搭膊头）：呢啲嘢唔恨得咁多架嘞。
阿媚：啊，对唔住，我嚟迟咗。
阿水：阿媚？
阿媚：阿水，我卒之揾到同我啱channel嘅人喇！
阿水：咩channel呀？唔系AM，唔系FM。
甜筒辉（举高双手）：系SM。（同阿媚走去一二角）
甜筒辉：你唔恨得咁多架喇。

李老板：哈哈！见到佢哋一个二个咁开心，今年有运行咯。阿水，你有冇运行呀？
嗍女：新年快乐！（除咗副黑超）恭喜发财！
阿水（展开双臂）：有运行喇！
嗍女：我要！（同李老板拥抱）
李老板：哎吖，大年大节，呢啲钱唔悭得嘅。（派利市）
嗍女：多谢！（惜李老板）
李老板：我有运行喇！（入茶餐厅）

（阿水见到佢哋个个都一双一对，羡慕到痹）

（郑秀文出场）
阿福（凑近阿水）：我已经同佢讲晒架嘞。
阿水：Candy，我……
（Candy示意阿水唔好出声）
（热吻）
（阿水、田启文、阿福、阿基、阿男同李老板齐齐舞龙）

（NG片断）
周星驰：返唔到转头。但喺我走之前，我会话畀你听，……（吐舌）

葛民辉：嗰个系我初恋情人嚟架。你个人渣！撬我墙脚！
周星驰：系，我系想撬你墙脚。（电话响，周星驰笑）
葛民辉：有电话响嘅？

舒淇：呢个舞起码要跳一个月，女仔可以壮阳，男仔可以……（笑场）

舒淇：唔系，我见嗰个……（笑场）

Candy：唔好讲嘢。嚟，有少少痛架噃。
阿水：系？噉你惜住吓㖞。
Candy：梗系。（支针插入阿水手臂）嚟咯噃。（周星驰笑）

*吴君如：仆你个街！臭乞儿！……（笑场）

舒淇：你忍心畀，我畀大耳竉……（笑场）
陈晓东：做咩嘢啫？

*吴孟达：系人都知蛋挞王子。

（劇終）