喜剧之王
| （序幕） （天仇喺波涛汹涌嘅海边大声嗌：努力——！奋斗——！） （音乐阴森恐怖，一班似僵尸嘅路人飘嚟飘去） 天仇：（唔满意）Cut！ （临时演员停低，睥住天仇。） 天仇：精神啲！临时演员都系演员嚟。（行到去临时演员前面）而家唔系拍紧鬼片，虽然你哋系饰演路人甲乙丙丁，但系一样系有生命，有灵魂嘅，尤其系我哋今次有机会同动作影后杜娟儿同台演出，应该好好 地珍惜呢个机会。畀啲精神好唔好？ 天仇：（返到去镜头后面）Action！ （镜头中再度出现一班似僵尸嘅路人） 天仇：（恨铁不成钢）Cut！ （嚟咗一个副导演，一把掹住天仇头发，将佢拉开。） 副导演：你边个嚟呀？ 天仇：啊……我系一个演员啰。 副导演：（向住远处嗌）霞姨！ （走嚟一个中年妇女） 霞姨：系！ 副导演：呢个边个嚟呀？ 霞姨：（一把推开天仇）茄哩啡啰。 天仇：啊——，即系演员啰。 副导演：有冇搞错呀？立乱畀啲阿猪阿狗走埋嚟庄机？ 霞姨：对唔住啊，Sunny哥，求先我就去咗屙屎，见佢得闲就叫佢排吓人噉解嘅啫。 副导演：哎吖，嗱嗱林揾一件有反应架识做戏架嚟吖，入便赶住啊！ （霞姨走埋去截住天仇） 天仇：不如等我嚟呀！ 副导演：（唔系好信）你？啊——，做个紧张表情嚟睇吓。 天仇：（若有所思）嗱，紧张嚟讲呢，可以有好几种架。 副导演：喺医院等老婆生仔嗰种啦。 天仇：（表演） 副导：个仔出世。 天仇：（表演） 副导演：老婆死咗。 天仇：（表演） 副导演：个仔识叫爸爸，天才啊。 天仇：（表演） 副导演：条啫生喺个头度，畸形架。 天仇：（表演） 副导演：中六合彩……头奖！ 天仇：（表演） 副导演：个仔死埋。 （睩起白眼，晕咗） 副导演：老婆醒返。 （无反应） 副导演：喂！老婆醒返呀！ 天仇：冇架嘞，个人受咗太大打击呢，会进入咗精神官能嘅休克状态。唔会再有反应架嘞。 副导演：（掹住天仇头发，往后擗）妖！ （向前走）重有冇第二个呀？ （霞姨紧随） 天仇：啊，霞姨呀，我做错咗啲咩呢吓？ 霞姨：唔知你做乜！ 天仇：噉我正话啲戏有问题咩？ 霞姨：我都话唔知你做乜咯。 副导演：霞姨～～喂！你班茄哩啡冇个掂喎！ 霞姨：呢班水准算好架嘞！ 导演：（企喺离远嗌）Sunny！重未得呀？成村等紧架…… 副导演：得得得，导演。好快，好快。 （掹住天仇）啊——就你啊，快去换衫啦！ 天仇：多谢！ （摄影棚 人头涌动） （天仇着住神父嘅服装，畀推向一个指定位置） 副导演：嗱，呢个位啊吓。 天仇：知道。 导演：（指手画脚）灯光！（回应：灯光OK！）道具！（回应：道具ready！）演员！（坐返张凳）Stand——By！ 天仇：对唔住，导演。嗯……根据角色嘅背景性格呢，阵间喺演出上架节奏我想比较跳皮啲，但又有啲矛盾，噉好唔好呀？ 导演：好啊，roll机吖！ 摄影：SPEED！ 剪接：三场shot四take一。ACTION！ （神父畀杜娟儿一枪打死，天仇瞓低） （娟儿大战群匪……） （神父重喺后面摇摇摆摆） 导演：（企起身）Cut！ 娟儿：做咩呀？ 导演：（指住天仇）后面嗰个人做咩呀？死咗家嘛！ 副导演：（冲上前）喂！你做咩呀！霞姨—— 霞姨：点呀，Sunny哥？ 副导演：你啲茄哩啡点搞架？ 导演：（上前）点解你死极都死唔去嘅啫？吓？ 天仇：因为我设计呢个角色性格嚟讲呢系比较跳皮喇。所以我内心架潜台词系：我唔想死住。 导演：（谂咗一阵）你唔想死都要死架！ 天仇：其实我已经死紧架嘞，你再畀多少少时间我呢，我就死晒架嘞。 娟儿：喂！你知唔知一秒钟系几多格菲林？ 天仇：（高兴）系廿四格啊，娟姐。 娟儿：噉你知唔知求先嘅镜头几多秒钟呀？ 天仇：都有成分钟。 娟儿：（好嬲）你知唔知因为你唔想死住啊，嘥咗几多秒、几多格菲林、几多钱同埋几多工作人员嘅时间同埋心机架？！ 天仇：（哑然） 副导演：你系咪捞架？ 娟儿：（闹导演）唔该你哋啊！茄哩啡都揾啲专业啲架啦！换人再拍过！ 导演：（对住天仇发嬲）醒少少啦！ 副导演：（同天仇讲）啊——，返屋企慢慢谂吓几时死啦！ 霞姨：（推天仇离开）得嘞，Sunny哥。 （摄影棚外） 天仇：霞姨呀，我做错咗啲咩呢吓？ 霞姨：你唔好再问我啦，我唔知你做紧乜啊！你闪啦！ 天仇：（突然醒起）啊，你提醒咗我，要返街坊福利会开门，转头就返架嘞。 霞姨：你唔使返嚟喇！唔该你啦！唔好再畀镬我孭喇！ （摄影棚内） 副导演：喂！过去死畀导演睇吓！ 成龙：哦。（行到去导演面前）导演，想我点死呀？ 导演：中枪死，准备啊！（手作枪状）Action！ 成龙：（倒地，挣扎一番，死去）得唔得呀，导演？ 导演：噉先系吖嘛，换衫啦？ 副导演：行喇行喇！ 成龙：（点头哈腰）多谢多谢。 （走去换衫，撞到天仇） 天仇：呢位哥哥仔，喺边度学戏架？ 成龙：我未学过戏架。 天仇：哇！噉真系天才嘞喎！ 成龙：（拍拍天仇的肩膀）你畀啲心机都得架，畀啲心机啦！ 天仇：（握拳，努力） 副导演：（冲上来）你重企喺度做咩呀？走呀！（推天仇） （出口处） （便当饭盒堆埋一堆，天仇走出嚟。） （天仇顺手攞起一盒饭盒，畀另一只手揸住） 场务：做咩呀？ 天仇：场务大哥你好！我想攞个饭盒！ 场务：（甩开天仇手）未放饭啊！ 天仇：哦，因为我走先，所以我…… 场务：（企起身）噉你咪走先啰！知唔知点解未食饭嗱？就系因为你个冚家铲啊！死嚟死去死唔去！累到全世界未放饭，我都未食饭呀！ （扐起一个饭盒，揭开）系咪好想食饭啊？吓？ （掟到路边，一只狗上前）同佢一齐食吖！ （天仇好尴尬噉走开） 场务：（唱）屎，你系一涿屎。命比蚁便宜。我揸Benz，你挖鼻屎咋。食饭！？食屎吖你！ （天仇嚟到街坊福利会返工，打开门，将娱乐用品派畀啲细路） 天仇：食咗饭未呀？ 细路：收嗲啦。扐波拍出嚟啦！ 天仇：得！有！ 细路：波呢？乒乓波呢？快啲呀！扐嚟啊！快啲啦！ 天仇：嚟紧！（扐出一个篮球） （天仇走去打电话，啱拨完号，走入嚟一老人） 老人（指责）：呢度系街坊福利会，你唔做得迟到，好多人等住你架。 （天仇陪笑） 天仇：喂，霞姨—— 霞姨：点呀？ 天仇：冇呀，想check吓听日通告几点？ 霞姨：冇你份呀！ 天仇：后日呢？ 霞姨：后日都冇，大后日都冇呀！（收线） （天仇怅然若失噉慢慢放低电话） （天仇呆坐，福利会全部都系啲无聊嘅老人同细路。） （福利会收档，天仇又拨通电话） 天仇：喂，霞姨，喺边啊？ 霞姨：关你鬼事咩？你又想点呀？ 天仇：冇，我想check多次啫。喂，冇对白嗰啲有冇呀？ 霞姨：冇呀！ 天仇：见得唔系好清楚样嗰啲呢？ 霞姨：都话冇咯！ 天仇：完全见唔到嗰啲有冇呀？ 霞姨：而家咪见你唔到啰，唔好再烦我喇！（霞姨收线） （天仇返去住处－－福利院嘅一间屋仔，屋里面净得一张简陋嘅床，床边墙上便贴满晒啲著名中外演员嘅相） （天仇三扒两拨食完饭，睇表，又走去打电话） 天仇：喂，霞姨，喺边呀？ 霞姨：仆街！（霞姨收线） （返到屋仔，天仇左思右想，心情难以平静） （天仇瞓喺床上边，聚精会神噉睇一本书，书名系《演员的自我修养》） （天仇熄灯瞓觉） （天光嘞，天仇将福利院嘅舞台整成“街坊剧场”，舞台上一牌上写住“明天公演雷雨”） 天仇：（企喺舞台上）各位街坊，《雷雨》呢套剧呢，系由中国文学名著改编嘅。大家都耳熟能详架喇。嗱，听日由我做主角喎，大家系咪好想睇呢？ （观众席净得一个细路女，其他啲老人做紧健身操） 天仇：我约晒你哋喇。 （来到那小孩面前）嘉嘉，听日食完饭有咩做呀？ 嘉嘉：屙屎。 天仇：屙完屎嚟睇叔叔做主角，你话几开心呢！嗱，最紧要叫埋爹哋妈咪一齐嚟睇呀，如果佢哋唔嚟呢，你就喊，扭计，周围累口水，累到佢哋嚟为止噉就乖嘞，惜晒嘉嘉啊！ （大力搣嘉嘉块面） 嘉嘉：（想走，畀天仇掹返凳度） 天仇：嗱，嘉嘉，如果听日我唔见你嚟呢，你嘅下场就会同呢个公仔一样。 （抢走嘉嘉手上嘅公仔，搣咗个头落嚟。） 天仇：（好恶）听唔嘛？ 嘉嘉：（喊……） （办公桌前） 天仇：七叔，《雷雨》呢套剧呢听晚就演架嘞，剧本你读熟好未呀？ 七叔：读熟嘞，你放心啦，我重畀佢唱咗只歌添！老爷见到到妹仔又唱嘞：“You're beautiful， You're beautiful……” 天仇：阿七叔呀，主题曲呢系由我唱嘅。同埋李老爷呢个角色系中国人嚟嘅。 七叔：个妹仔见到个老爷呢，就唱嘞：“You're so handsome， You're so smart……” 天仇：七叔！七叔！ 七叔：（继续唱）“thank you much! Please to me……” 天仇：你唔好噉呀七叔！你冇嘢吖嘛？ 七叔：“I accept you……” 天仇：你睇开啲啦，七叔！人嚟呀，救命啊！ （商店旁） 天仇：早晨呀，洪爷！我哋套《雷雨》即将要演架咯喎。唔啱我嚟再排多次戏好吗？ 洪爷：《雷雨》我使排？《雷雨》讲雷气家嘛！嗱，出嚟行呢就讲两样嘢：第一，就系讲雷气，第二，就系讲money。嗱，首先我讲咗雷气先吓…… 天仇：雷气都好嘅，不过就唔好忽略里便嗰段感情。因为你个角色呢，最后系为咗爱情而畀雷劈死架。 *洪爷：嗱，劈呢，等我讲畀你知！嗱，劈呢，我哋出嚟行呢就分两种，第一个呢就系拖——二呢就系捅！（卷起衫）嗱，呢坛嘢呢，就系畀把老牛拖——出嚟嘅。嗱，捅呢就系噉捅。 （转身对住一条僆，扮用刀捅落去噉样，条僆冇反应） 洪爷：呢条僆新收返嚟，唔好意思，冇表情。 （对住另外一条僆扮捅）嗱，捅呢就系噉捅。 僆A：哎吖！ 洪爷：（恨铁不成钢）认真啲，痛啲好唔好呀？ 僆A：哎吖哎吖—— 洪爷：你啲演技收皮啦！仇哥，帮我教教佢。 天仇：嗱痛嚟讲呢，根据俄国嘅戏剧理论大师史坦尼斯拉夫斯基嘅讲法呢，应该系由外到内，再到返外架。噉你而家再试吓做一次嚟睇吓。 僆A：（扭曲面孔）哎吖。 天仇：（指着他的脸）嗱，好咗好多嘞吓哗？噉系咪成个表演呢立体咗好多呀？你再试一次嚟睇吓！ 僆A：哎吖—— 天仇：系嘞！多啲！多啲添！ 僆A：哎吖——（痛不欲生） 天仇：或者再等我帮帮你。 （上前用力踩条僆只脚，踩到鞋扁晒） 僆A：（……周围拗，好痛苦） 洪爷：咦？呢嘢掂喎，眼泪都标埋出嚟喎。 天仇：（攞嚟一块镜，对准僆A）嗱，你睇清楚，你认住个表情，记住个感觉佢。 洪爷：认住啊记住啊，听唔听到呀？喂，撇！ 天仇：喂，噉我嚟听晚出《雷雨》…… 洪爷：（摆手）《雷雨》唔使排喇，我哋出嚟行，应承得过你，一定到！嗱，听日请一百几十人落嚟，捧红个场佢！ 天仇：喂，噉系咯啰喎！ 洪爷：掂过碌蔗系喇！ （转身，对混混）喂！快啲吖。 （院子） （有一个阿婆打紧太极拳） 洪爷：快吖！ （一把将僆A推倒）喂！阿婆。你踩亲人喎。 阿婆：我冇踩到啊。 洪爷：你踩咗唔觉啫。（扐起僆A只脚）你睇佢脚，扁晒喎。 阿婆：系呀，满头大汗喎。 洪爷：啊，攞几嚿水嚟喇，我帮你挨义气送佢去医院嗱。 阿婆：（摸衣袋）我冇带钱架。 洪爷：你睇佢个样，就嚟死咁滞喎！ 阿婆：（攞出100文）我得返一百文咋…… 洪爷：啊！（一把抢咗去）攞嚟喇，100文！（拉起僆A）做嘢啦！ （呢件事畀天仇见晒） 天仇：（扮路过）咦？阿婆，你跌咗钱喎。 阿婆：（捡起钱）啊，好彩喎。哎，先生啊…… 天仇：啊，你听日得唔得闲啊？ 阿婆：做乜嘢呀？ 天仇：街坊剧场做《雷雨》喎！ 阿婆：《雷雨》？好啊！ （第二日冇人去睇《雷雨》，天仇好失落，目光停留喺一幅广告画上便，上便写住“屎，我系一督屎！”） （一个清纯学生妹飘然出现，最后奔入一家夜总会……） （夜总会内） 顾客：靓女，叫咩名呀？ 飘飘：叫飘飘啊，你呢？ 顾客：飘飘，真名嚟架？几有型喎。 飘飘：有名你就叫啦，问咁多嘢！ 顾客：系咪真系学生妹啫？ 飘飘：梗系学生妹啦！处女嚟添呀！正唔正呀？益咗你啦阿叔！哎，猜返发财拳喇。 顾客：唔识。 飘飘：财拳都唔识，你读过书未呀你？哎，Fanny，你嚟！哇——，你个肚腩咁大！因住呀棺材冚唔到盖呀。财拳呀！一定中！喂，出嚟玩，开心啲吖！你死老窦咩？开心开心啲！财拳 呀！一定中呀！三叉仔，二到宝呀，四！好，我饮。 妈咪：阿女，今物学生妹初恋之夜！我就唔该你收吓把口，似返个学生妹啦！你再系噉乜样畀人投诉，我真系保你唔住架吓。 飘飘：学乜鬼嘢生妹啫，搞埋晒噱头嘢。我做得返学生妹，唔使企喺度啦！ 妈咪：吖，你重喺度驳嘴？ 妓女A：妈咪吖，七号台嗰个客真系好鬼样衰，我顶佢唔蒲呀，我唔坐架吓！ 妈咪：你哋系咪一个二个喺度拣客坐呀？ 飘飘：妈咪。（对住妓女A）吖，你又系嘅，你有冇专业精神架？借视线吖嘛。 女A：乜鬼借视线呀？ 飘飘：个客丑样你咪唔好望佢全相啰。或者耳仔靓呢，净系望佢耳仔啰。个嘴猾突嘅，或者棚牙靓，你咪净系望佢棚牙啰。都话啲新人真系咩都唔识。（同妈咪点烟）等我搞掂佢。嚟喇，睇阿姐表演。 妈咪：醒定啲啊！ 飘飘：老世！ 八两金：（色迷迷噉笑，飘飘见到佢吓到自己目瞪口呆）你好靓女呀。 飘飘：点称呼呀老世？（飘转移视线睇个客快面） 八两金：我叫Pierre。系个法国名嚟架（飘睇个客嘅鼻，啲鼻毛叉晒出嚟），因为人哋话我似法国人，所以特登改个法国名。如果你觉得难叫呢，（飘看客只耳，居然有一只虫喺度躝吓躝吓）你可以叫我阿Pi，或者阿erre都得架。呵呵呵！ （飘飘揞住嘴走） 八两金：喂，做、做咩呀？ 妈咪：你个衰女平时也文也武，而家喫晒招啦。 飘飘：你唔怪得我呀妈咪，嗰件极品嚟架！你有冇见人个头有曱甴架？ 妈咪：噉有咩问题呀？你睇吓Lulu吖，同嗰只曱甴玩得几开心。 （个客将蟑螂摆喺Lulu手臂上） 飘飘：（摇摇头）噉我认命啰。 妈咪：噉得啰，你以后净系返嚟坐冷板凳啦，吽到生虫啦，吽到出菇仔啦，一个二个都系噉架！哎，Connie帮我同佢冚被呀。 Connie：你都唔系新嚟架啦，你知道对住啲客系要做戏家嘛。你哋啲问题呀就系啲戏屎呀。 飘飘：噉冇计架。 Connie：咦，我听讲有条友呀教人做戏唔使钱架，带你去瞄瞄呀？ 飘飘：教做戏？ （片场） 导演：全世界埋位！ （大家走入摄影棚，天仇都钻入去，畀副导一把拉住） 副导演：喂，又系你？ 天仇：早晨呀，Sunny哥。 副导演：霞姨！ 天仇：霞姨！我都揾紧佢啊。 副导演：喂，我冇畀通告你喎，你嚟做咩呀？ 天仇：噉嘅，上次你咪叫我返屋企谂吓点样死嘅？我都谂过，又畀我领悟到一啲新嘅启发啦。相信我而家嘅演出呢会更加令你哋满意嘅。 副导演：畀着我两年前呢，我一刀就插死你！ 天仇：拿刀嚟讲呢，又唔同枪喎，中刀呢通常会喺小厣位，（指住自己腋下，呈中刀状）呢度，个伤口会大啲呢，个面口会再擸啲，如果系畀自己朋友出卖嘅话呢，重会系（做惊讶状）估唔到……系你个仆街？（擘大口） 副导演：（踢天仇）我仆你个街！ 天仇：Sunny哥，我但求演出嘅啫，你畀多个机会我啦。 副导演：你钟意企喺度吖嘛？好，你企吖，我唔畀钱架！ 天仇：唔畀钱我都做啊，我要返盒饭盒得架喇。 副导演：饭盒唔使钱呀？走呀！ 武术指导：Sunny！ 副导演：点呀，武术指导？ 武术指导：你揾啲噉嘅假人嚟扮死尸唔掂喎！咁鬼丑样嘅！嗱嗱林搞掂佢啦，赶住啊！ 副导演：系，得，得，得，收到。（回头望天仇） （片场） （天仇躺喺地下。） 天仇：喂，多谢关照喎，SUNNY哥。 副导演：嗱，饭盒咋吓！ 天仇：冇问题呀，使唔使化化装先呀？ 副导演：而家化啦。（一坺泥抹喺天仇块面度）导演，OK嘞演员。演员OK嘞喎。 导演：Action! （杜娟儿率领一班人马打关斗上场。畀机关弹起落返地，继续撕杀，啲人倒晒地。忽然一只曱甴落喺佢靴面。） 杜娟儿：啊！曱甴呀，曱甴呀，曱甴。 导演：重唔去帮手！ （曱甴飞去天仇身上。一班人用折凳，锤仔起势扑天仇，天仇喐都唔喐。） 众人：死咗喇，娟姐，唔使惊。娟姐，你冇嘢吖嘛？…… 摄影：导演，Cut得未呀？ 导演：重未Cut嘅咩？Cut！ （天仇醒返） 杜娟儿：得嘞，得嘞，打只曱甴咋，使唔使噉呀？（手攞锤仔）快去睇吓佢有冇事。 天仇：哦，我冇事呀，娟姐，多谢关心。 杜娟儿：做咩你喐都唔喐嘅？ 天仇：哦，唔喐嚟讲呢，因为正话导演未嗌CUT。我都重系一个死尸，所有我系唔可以喐嘅。 杜娟儿：听唔听到呀？听唔听到呀？ 众人：听到。 杜娟儿：一日未嗌Cut一日都要演落去，呢啲就系我成日同你哋讲嘅（手指天仇）专业。你叫做咩名？ 天仇：我叫尹天仇。 杜娟儿：啊，仪姐，畀杯架啡佢。你阵间抄低人嘅电话。你，以后嚟开我工。 天仇：多谢娟姐关照！ 杜娟儿：（一面挥手一面同副导讲）：呢个shot OK未呀？ 副导演：OK，军火到。 杜娟儿：SUNNY啊。我唔该你呢， 副导演：系。 杜娟儿：临时演员都好重要架。好似上次嗰个神父，死极都死唔去嗰啲呢，就以后唔好揾嚟搞嘞。 副导演：明白，娟姐。 （天仇洗完面返嚟。） 天仇：娟姐呀，嗰个神父都系我嚟。 （娟姐愕然。） 天仇：上次其实呢就系噉…… （天仇一路讲一路走去娟姐嗰度，突然畀地毡绊倒，架啡撒咗娟姐周身都系。） 天仇：哎吖，好在，好在，我帮你抹啦，毛巾。 （转身攞毛巾，踩到凳打中娟姐。杜娟儿挞到轨道上便，前面一堆刀。） 一工作人员：娟姐！ 天仇：小心呀！ （天仇直起一脚，将杜娟儿踢出轨道。避过一劫。杜娟儿挞喺火药上，天仇挞喺另一边。） 天仇：娟姐，你冇嘢吖嘛？ 一工作人员：唔好“扌豆”呀！ （天仇唔小心揿中开关，火药开关。杜娟儿飞向天空。 众人仰望。） 天仇：哇！好靓呀！（后排重有人影相添） （众人走去救杜娟儿，天仇慌失失噉走出片场，时不时拧转头望后便有冇人追嚟。经过场务身边时谂起攞咗一盒饭盒。场务大哥一个人匿埋搣蕉皮。见到天仇，顺手将蕉皮抌咗出去，天仇一个唔好彩踩中蕉皮，挞喺地下，饭盒跌喺地。场务场务大叔走埋嚟将饭盒抌畀只狗食，谰得 戚敕噉样。） （街坊福利社） （Connie带住班女入嚟） Connie：喂，看更啊，呢度系咪有人教做戏架？ 天仇：我本身呢，从事艺术工作已经好多年架喇，无论系电影或者电视都有好丰富架演出经验，亦都曾经喺荔园剧场呢做过创作总监，噉导致到我呢系能歌善舞嘅。 Connie：噉系咪话即系你教呀？ 天仇：教又唔敢，不过呢度好多街坊呢都系戏剧发烧友，都好钟意嚟揾我研究吓噉。 Connie：我哋都系啲街坊介绍嚟架啫。 天仇：得架嘞，嗰便啦嗱。 飘飘：（打量天仇）你呀？ 天仇：啊？ 飘飘：你咪就喺嗰出乜鬼嘢戏话？啊，嗰出乜鬼嘢戏？哎，是但嗱，企喺后面踩蕉皮跌落地嗰条粉肠吖嘛。 天仇：咦，乜你有留意我架演出咩？ 飘飘：哈哈哈哈，你条粉肠，我心谂，边条粉肠踩完蕉皮重要跌落地下嘅？你唔好去死吖你！ 天仇：多谢！多谢！ 飘飘：你有冇咁笨实呀你？ 天仇：过奖嘞，过奖嘞。 飘飘：你条死茄哩啡吖真系……。 天仇：啊，其实我系一个演员嚟嘅。 （啲女大笑。） 天仇：嗰便啦。 Connie：茄哩啡呀？ （众人落座） 天仇：唔知有咩嘢可以帮到你哋呢？ Connie：坦白讲吖，我哋系做小姐架。 天仇：哦，呢个睇得出嘅。 Connie：我而家个场呢就搞紧个“学生妹初恋之夜”，呢班女啊，居然话连一啲初恋感觉都话做唔到喎。（同班女）你哋点揾食呀？ 天仇：初恋呢，我哋BB仔呢其实已经有架喇，即系，譬如我哋BB仔一见到个奶嘴呀噉都会啜埋去啦，噉都系一种爱嘅表现嚟架。 飘飘：你又啜乜春嘢奶嘴呀，你条死茄哩啡？ 天仇：其实我系一个演员嚟架。 Connie：系咯，你啜乜春奶嘴啫？ 天仇：哦，我谂住由浅入深噉样嚟到去解释吓啫。 Connie：得嘞，你具体啲讲得架嘞。 天仇：嗱，具体嚟讲呢，首先喺外形上要配合一个学生妹啦，而对白方面喺一啲重要嘅位。譬如我爱你呀，我恨你呀噉。如果能够加上少少嘅泪光呢，都会加强初恋嘅感染力架。即系好似噉。（开始酝酿眼泪）嗱，睇到 嘛？啲泪水呀（啲女望佢），啱啱好浪吓浪吓架咋。 飘飘：你有条春泪水浪吓浪吓咩？你条死茄哩啡。 天仇：嗱，嗱，嗱，嗱，其实我系一个演员嚟嘅。（天仇眼中真系有咗泪水）。 Connie：嘘！ 天仇：初学者如果要有泪水呢，可能需要一啲道具嘅辅助啦。噉而最简单嘅办法呢就系食Wasabi嘞。 飘飘：你又食乜春嘢Wasabi呀？（拧过去同Connie）喂，我哋系咪真系听呢条死茄哩啡点吓嘛？ 天仇：小姐，就算你一定要叫我做茄哩啡，都可唔可以冇加个“死”字喺头呢？ 飘飘：哈哈哈…… 天仇：其实你哋作为一个舞女嚟讲呢，如果能够多啲尊重别人，噉别人…… 飘飘：（陡然变脸）你叫边个舞女呀？ 天仇：对唔住。 小姐：算啦，我哋系吖嘛。 飘飘：我系唔钟意畀佢叫呀。（起身周围揾嘢） Connie：佢系噉架，唔使理佢架。冇事架，冇事架。（对飘飘）都话叫你唔好搞架咯。（对天仇）冇事架，冇事架！冇事架！冇事架！（对飘飘）哼，话极你真系噉架 。（对天仇）唔使惊架，冇事架，冇事架！唔使惊架，冇事架，冇事架！ 飘飘：舞女吖嗱！ （ 飘飘终于揾到一把就手嘅折凳，走向天仇，一嘢扑落去，天仇仆倒，飘飘扑多几嘢添） Connie：冇事架，冇事架，唔使惊，定啲嚟，定啲嚟，冇事，冇事！ （夜总会） Connie：嗨，我点知条友咁搞笑架啫？谂住唔使钱咪去睇吓啰。 飘飘：唔系你阻住我起脚呢，我唔一…… Connie：你把口真系衰架，叫你喺客面前唔好咁口臭啦。 龙少爷：出去！出去！ （间包房里便啲女畀赶走晒） 龙少爷：咁大个场，有冇搞错呀？ 妈咪：唔好意思呀。出去食自己喇。唔好意思。 龙少爷：重有冇呀？ 妈咪：有呀，好快，嚟紧，嚟紧。喂，Connie呀，过嚟啦。 Connie：咩事呀？Debra妈。 妈咪：龙少嚟咗，饮到醉晒，而家喺度玩失恋，要揾初恋情人呀。 Connie：呢度全场都系学生妹，啱晒feel啰。 妈咪：你睇吓，我成场啲女见晒咁滞啦，冇个啱feel，都黐线嘅。睇吓佢台面啦，啲银纸呀逐寸逐寸噉计嘅，喂，你入咗去未呀？ Connie：未呀。 妈咪：系喺度等阵啦，嗱嗱林捉多拃过嚟啦。 龙少爷：钱我大把，有本事就嚟攞啦。我要揾初恋呀，初恋呀！ （一条肥妹仔埋嚟） 飘飘：咦，你都嚟？ 肥妹仔：搏搏啦，有时啲有钱佬taste话唔埋架。 龙少爷：躝开啦。 （肥妹仔畀一拳打咗出嚟） 妈咪：嗱嗱林啦，嗱嗱林呀，醒目啦。龙少，靓女嚟喇，快啲同老世打招呼先啦。 众小姐：老世！ 龙少爷：（一下掀翻了桌子）仆街！ 妈咪：龙少，唔好咁兴啦。 龙少爷：行开啦。冇个睇得嘅！冚唪唥都唔系真心嘅，我要初恋呀，初恋呀…………冚唪唥都贪钱嘅！ （飘飘睇到地下啲Wasabi，即刻食咗，冇几耐就满面泪水。） 飘飘：我系真心架，我真系爱你架。 龙少爷：Mary，你要咩我都应承你，台面啲钱可以畀晒你，只要你唔好离开我啊，Mary。（讲完就趴低喺地下，醉咗） （飘飘将台面啲钱抛向天空，众小姐高呼！） （街坊福利社） （天仇趴喺台瞓觉，飘飘敲台面。天仇醒返企起身，眼眶黑黑地。） 天仇：做咩呀？ 飘飘：冇嘢吖嘛？咦，我又重手咗啲。喂，唔好意思啊。 天仇：琴日如果唔系有张台阻住我起唔到脚呢，我未必会打输架。 飘飘：我唔系谂住同你打交架，我真系谂住跟你学嘢喎。 天仇：哎，你扯吧啦。 （飘飘将一沓钱丢喺台面。天仇用乒乓波板冚住钱） 天仇：对于一啲有热诚嘅，志同道合好朋友呢，大家系可以研究吓嘅，你等等我啊。 （天仇收埋乒乓波板同钱，走入自己间屋仔数钱，数完钱即刻将钱收埋喺自己个饼干罐里便） （天仇见到窗外飘飘同班细路玩紧呼啦圈，个嘴咬住支烟仔） （天仇着咗套西装走出去） 飘飘：你使唔使化装化咁耐呀？你条………. 天仇：嗱嗱嗱，唔好呀嗱。 飘飘：呔——，贵嘢嚟架喎。 天仇：多谢，收得你钱，应该做足啲嘅。 小孩：乒乓波板呢？ 天仇：喺台底。呢度人多，嗰便啦好嘛？在下尹天仇，未请教？ 飘飘：柳飘飘呀！ 天仇：有咩需要研究吓嘅呢？ 飘飘：咪就系点样冧啲麻甩佬。 天仇：嗱，譬如所谓学生妹架初恋感觉呢，其实要由基本做起嘅。你而家可以当我系客，嚟到招呼我先。 飘飘：喂，老世！猜两板吖。 天仇：唔好老世喇，你而家嘅身份系学生妹，你可以叫“Good Morning, Sir”或者系“先生早晨”。 飘飘：先生早晨啰！ 天仇：试吓耷低个头，怕丑少少，等对方呢抬起你嘅头嘅时候，先至讲…… 飘飘：先生，早晨。 天仇：眼神死咕咕喇，再嚟。嗱，畀只闪烁啲嘅我。 飘飘：先生，早晨。 天仇：闪得滞喇，再嚟，定返啲吓。 飘飘（斗鸡眼）：先生，早晨。 天仇：嗱，死唔眼闭呢只喇，千祈唔好，吓死人架吓。再嚟，自然啲，柔和啲。 飘飘：先生，早晨。 （两人四目交投） 天仇：好！嗱，而家我哋讲讲形体动作方面呢，譬如拥抱啊噉。你用你嘅方法嚟到拥抱我吖。 （飘飘揼咗烟仔，抱住天仇） 天仇：做咩呀？ （飘飘双脚夹住天仇） 飘飘：做咩呀？ 天仇：唔使下下擘大个髀钳住人哋嘅。 飘飘：哦，唔好意思，职业病。 天仇：要改喇，其实作为一个学生妹呢，亦都唔需要话采取主动架，譬如好似做出一啲含羞答答嘅嘢嚟到令对方主动揽你嘅。 飘飘：你又含乜春嘢答答呀？ 天仇：即系譬如呢啲噉样啦。 飘飘：哦，鹌鹑噉样吓嘛？ 天仇：做啦。 （飘飘学天仇样） 天仇：系喇。对方见到你鹌鹑成噉样呢，自然忍唔住会揽住你。（讲完揽住飘飘）你而家先至将你嘅头依偎落对方嘅肩膀上便。 （飘飘眯埋眼） 天仇：做咩呀？ （飘飘又用大髀夹住天仇。） 飘飘：唔好意思，职业病嚟啫。 天仇：要改喇。表面工夫系噉上下嘅啫，如果再深入呢，要问返你初恋时候嘅心态嘞。 飘飘：我冇初恋架喎。 天仇：系人都有初恋架喎。 飘飘：都话冇咯。 天仇：噉都应该有啲好难忘嘅回忆。 飘飘：冇。 （飘飘陷入到回忆中，少女时嘅飘飘睇紧爱情小说，憧憬未来。一个靓仔喺离远揸住枝白玫瑰，对住飘飘微笑） 天仇：又或者听过啲好难忘架对白啦？ 飘飘：冇。 （回忆中） 靓仔：我希望永远同你喺埋一齐，应承我，畀我养你一世。 （回忆中，飘飘依偎喺靓仔怀抱入便） 天仇：噉都一定有啲好难忘嘅遭遇。 飘飘：冇。 （回忆：靓仔扇咗飘飘一巴） 飘飘（噙住泪水）：做舞女？你又话养我嘅？ 靓仔（一把揪住飘飘把头发）：你唔做舞女我边有钱呀？我冇钱点养你呀吓？ 天仇：噉喇，你而家试吓幻想我就系你嘅初恋男朋友。 （飘飘好火，狠狠扇咗天仇一巴，夺门而出。） 洪爷：阿仇，嗱，上次“雷雨”嗰坛嘢，因为我有大茶饭要搞，所以唔得闲嚟，真系唔好意思。反应热唔热烈呀？ 天仇：热烈。 洪爷：热烈咪得啰。嗱，下次一定到。哎，离远有啲细路拍啲咩唱歌啊嗰啲。嗱，你冇份架啦。嗱，我有紧要事要行开一阵。嗱，你帮我教条新僆去收陀地，帮我执一执佢咩造 手呀，语气呀。 天仇：语气呀？ 洪爷：系吖，嗰坛啦。嗱，你唔会托我手踭架？（摆手叫条僆过嚟） （一条新僆行咗出嚟，手揸甜筒。） 新僆：多多指教。就喺嗰度嘞。 天仇：嗱，作为一个黑社会嚟讲呢，首先系外形方面要有设计啦。嗱，你带住啲金链呀噉就啱架嘞。同埋个样呢尽量做到能够系凶神恶煞嘅。嗱，你试吓。 （新僆做凶嘅表情） 天仇：凶啲，畀啲火我。 （新僆扐出火机） 天仇：怒火。（新僆作怒火状，食咗一啖甜筒）揼咗甜筒佢。啊，几好嘞吓，对白方面你知架嘞吗？ 新僆：大概知道架嘞。 天仇：噉得嘞，我会一路喺呢便暗中提点你架。 新僆：嗯！ （天仇坐喺路边摊，条新僆走向拍MTV的导演。 导演：阿堂，呢便过啲系喇，开心啲，开心啲。 新僆：拍戏呀？ 导演：咩事呀？ 新僆：嗯，我唔记得咗。 （新僆望望天仇，天仇叉住条腰作出嗌交噉款） 新僆：你知啦，而家香港经济不景。 *导演：金融风暴吖嘛，一日都系嗰个咩索罗斯啰。 新僆：很多因素嘅。而家东南亚经济崩溃，印尼大贬值，新加坡大减薪，香港又负增长，啲大企业啊千疮百孔架嘞。 导演：睇嚟呢，重会引爆全新嘅一轮骨牌效应式嘅全球性经济大衰退添。 新僆：咦，你对经济几有见地噉喎。 导演：哎，我以前喺Hong Kong U读过经济嘅。 新僆：系？我今年毕业架。 导演：系？我96年毕业架喎。嗱，呢张我咭片。 新僆：师兄嚟架喎。你好，你好，你好。咦，点解你会拍卡拉OK嘅？ 导演：冇计啦。 （天仇见佢哋讲得咁投契，以为单嘢ok咗） 导演：你而家做紧咩？ 新僆：我而家冇嘢做啊，咪做住黑社会先啰。我见你哋拍戏咯，我嚟收陀地嘅。 导演：基哥，有人嚟收陀地喎。 基哥：边个收陀地？ （新僆睇见基哥成个人呆晒） 新僆：而家香港经济…… （基哥一脚踢埋嚟） 基哥：系唔系你呀？ （新僆回头望望天仇，天仇喺度同个胖仔玩，用手拍胖仔，新僆上前拍咗基哥一下，基哥手下谂住喐佢，畀基哥制止。） 基哥：喂！僆仔，你边饭架？ （新僆又望天仇，天仇喺度用树枝掂胖仔嘅啫啫，新僆照板煮碗） 基哥：我你都敢玩？ （基哥掴咗新僆一巴，新僆回头望望天仇，天仇用手弹胖仔嘅啫啫，新僆颤颤巍巍噉亦都弹咗基哥一下，基哥大怒。） 基哥：哎吔，扚起佢。死啊！死啊！仆街！仆街！仆街！仆街！（畀基哥打咗镬金嘅，新僆冲向天仇。）我只雀都够胆玩？你唔识我呀？ 天仇：唔好埋嚟，唔好埋嚟。 （新僆跑过嚟坐喺天仇隔篱） 天仇：唔好同我讲嘢，要扮单拖。要扮单拖，打电话吖笨，扮拖马啦。 新僆：我想返屋企啊。 天仇：一日未嗌cut都要演埋落去呀，要有专业精神呀。 新僆：我想返屋企呀！（呢个时候，基哥同班人开始收工） 天仇：佢哋走咯喎，喂，唔使惊嘞，佢哋走嘞，走嘞，走嘞。快啲拿返把刀冲返埋去攞返个尾彩先啦！ （新僆揸刀冲出去，见基哥未走，又返转头。） 天仇：做咩呀？ 新僆：嗰个坏人重未走呀。 天仇：要投入角色，你都系坏人，畀啲火我！ 新僆：我想食甜筒。 天仇：仆街吖（掴咗佢一巴），火啊！ （新僆好似癫咗噉喊住冲出去，去到基哥面前，又畀扇咗几巴） 基哥：早讲啦！ （新僆，举刀喺基哥面前喊。基哥好无奈，扐出廿文，塞入新僆个袋里便） 基哥：当我怕咗你呀。 （新僆重喺度喊，天仇埋嚟） 天仇：你点呀？做得好啊。 洪爷：哗，做咩搞坛噉嘢呀？ 天仇：全靠佢正话坚持住个演出，终于收到二十文。 洪爷：噉你重喊咩呀？喺天后庙面前噉都收到廿文陀地，都算系扬名立足嘅第一步。呢个look够晒喇，keep住呢个look佢！以后就用呢个look去收陀地。仇哥，你好嘢，掂过碌蔗。 天仇：唔好噉讲。 洪爷：呢廿文，庆功，食牛什。哈，哈，哈……，（对新僆）你笑乜嘢呀？keep住个look佢！听唔听到呀？（不停打新僆）唔好笑呀！喊啊！ 天仇（接住打落去）：唔好笑呀！喊啊！笑咩呀！ 僆A（接住打）：喊！喊呀！笑咩呀？ （片场） 天仇：嗰个大学生拿住两把菜刀，噉样，鬼杀咁嘈噉冲埋去，嘈到呢真系鬼杀咁嘈，佢完全将一个黑社会嘅神髓呢演绎到出嚟。全靠佢坚持住架演出，终于畀佢收到廿文陀地喎。 霞姨：你讲咩啫你？ 天仇：坚持呀，霞姨。其实我得架，你再帮吓我啦，我而家对揸刀有新嘅体验啊，拍刀剑片真系一流。 霞姨：你做咩啫你？你重嫌累我唔够大镬？重够胆返嚟同我讲啲噉嘅嘢？扯啦！ 副导演：喂。 霞姨：对唔住啊，Sunny哥，佢走架嘞。 副导演：喂，揾你呀，化装埋位喇。 天仇：哦，多谢！ 副导演：导演，个替身OK嘞。 导演：又话揾唔到？嘥晒啲时间！ 副导演：而家揾到嘞。你得架啦嘛？ 天仇：我得架嘞，能够做到阿娟姐嘅替身，我会全力以赴架嘞。 副导演：导演，OK嘞。 导演：点火。（道具喺天仇手臂上点火） 天仇：导演，阵间我除咗热之外可唔可以表演多一种孤独嘅冷啊？ 导演：你尽情做啦，总之你唔好拧过嚟畀我望到，明唔明白？ 天仇：明白。 导演：点火。嗱，hold住唔好冇喐呀吓。准备，喂，白鸽喺度做乜鬼嘢呀？ 摄影：导演我专登放喺度架，上一个shot打嗰阵有白鸽架。 导演：阵间拍嗰阵时，白鸽飞嚟飞去咪抢住啲火啰，扐走佢。 （白鸽畀扐走） 摄影：导演导演，有两只白鸽喺度个意境会高啲喎。 导演：有几高啊？ 摄影：几高好难讲嘅，因为高嘅定义呢就好抽象嘅，总言之系高啦。 导演：摆上去睇吓。个替身唔好拧过嚟啦。 副导演：你点睇呀，导演？ 导演：系高啲喎。嗱，我哋试吓白鸽头对住我，试吓个白鸽屎窟对住我，换一只吖。嗱，准备，啊，都系唔要白鸽，扐走佢。准备吓，咦，我把火机呢？火机呢？（副导演即刻同导演点烟，但系点极唔着，导演走向天仇）兄弟，借个火嚟 吖。 霞姨：啊，导演，呢度有。 导演：系咪真系有架？ 霞姨：有。 导演：着唔着得架？ （导演点着烟） 导演:嗱，快啲，快啲，准备啊。Ready，hold住唔好喐啊，roll机，Action！ （天仇终于抵受唔住热，挞喺地下，工作人员灭咗火） 导演：乜鬼嘢呀？ （工作人员用灭火器喷熄天仇身上嘅火） 副导演：你做咩呀你？你镬镬都系噉嘅！ 天仇：对唔住呀，Sunny哥，好热啊。 副导演：讲咗畀你听架啦，你话得家嘛！ 天仇：一系嚟多个啦好唔好呀？ 导演：你重嚟，换个醒啲架，点做嘢架Sunny？！ 副导演：啊，对唔住导演。啊，死开啦。嗱，我已经到尽架喇，你以后唔好再返嚟呀吓！ 天仇：我正话，你闻唔闻到有阵烧鸡翼味呀？我只手都叫做为艺术而牺牲架咯喎。 副导演：场务，畀盒燶啲嘅鸡饭佢。 场务：收到。 副导演（对霞姨讲）：你呀，以后唔好畀我再见到佢啊。唔系连你都冇得捞啊。 天仇：啊，霞姨呀！ 霞姨：你唔好再问我喇。Sunny哥！ 场务：哎，鸡翼饭咯！睇吓鸡翼吖还是你只手燶啲。喂，燶唔过喎，走啦。 天仇：阿Sunny哥话我有饭…… 场务：走啊！ 天仇：茄哩啡唔系人咩？ 场务：讲咩呀？大声啲。 天仇：茄哩啡唔系人呀？做乜系要针对我啫？ 场务：你想知点解吓哗？ 天仇：我想知点解呀！ 场务：因为你冇资格食呢盒饭！谰叻噉四围教人做戏，学人讲理论，教人扮黑社会，收陀地，简直系侮辱“演技”呢两个呀。 副导演：喂，嘈咩呀？开工啦。做嘢，做嘢。 场务：超，喺阿叔面前讲演技，超，（扐起饭盒掟天仇，天仇走开）火都嚟。 （海边） 洪爷：嗰两架雪糕车佢哋都敢收，嗰两架雪糕车我睇家嘛！即系当我洪爷冇料到啫！兄弟，擸架生，去喐佢！阿仇，跟埋我哋出去，体验吓我哋出嚟行点做嘢，顺便睇水。兄弟，撇！ 奶奶：洪仔，洪仔，你又去边度呀？ 洪爷：阿嫲，你出嚟做咩啫？啱啱肺痨好返，因住冻亲你啊！你食咗药未呀？ 奶奶：食咗喇，你又去打交啊？ 洪爷：唔系呀。 奶奶：唔好去啦。 洪爷：都话唔系咯。 奶奶：唔好去打交啦。 洪爷：唔系呀。 天仇：哎，阿嫲，佢唔系打交，佢嚟做话剧呀。哩，街坊剧场呢，我哋做《雷雨》呀。 奶奶：《雷雨》啊，好睇啊，李小龙白燕吴楚帆吖嘛。 天仇：反应好热烈呀，所以我哋而家加开一场，赶住去排戏咋嘛。 奶奶：哦，你要做戏呀？ 洪爷：系呀！ 奶奶：哗！真系！我孙仔会做戏呀！真系叻仔咯。阿嫲好开心呀！ （抱住洪爷锡咗一啖） 洪爷：啊！得嘞，得嘞，得嘞，走啊，返屋企啦。我一世英雄，畀佢搞到一面口水。 天仇：你阿嫲一个人养得你咁大，佢先系英雄，你唔系呀。你睇吓你阿嫲几开心！（奶奶一路走一路回头，重系笑住）。不如唔好再打交嘞，去排戏吖？ （街坊剧场，天仇同一干人排紧《精武门》） 洪爷：如果你打得赢我，我将“东亚病夫”四个字吞落肚，你系咪唔顺呀？ 天仇：“你系咪唔顺？”呢句嘢，可以噉样畀啲压力我，先至谷到我嗰个愤怒出嚟家嘛。 洪爷：唔使啦，都冇人睇。你霎时搞坛噉嘅“精武门”，叫我哋着啲噉嘅衫，你真系，畀足面你啦。你话系唔系喇？ 四眼僆：我净系想换个假发啫。 洪爷：走罢啦。 （呢个时候飘飘走入街坊剧场） 田鸡：哇！条女索喎，系咪你条女呀？ 洪爷：梗系啦，喂，醒神！ 天仇：哦好，嚟。 洪爷：嗱，如果你打得赢我，我就将“东亚病夫”四个字吞落肚。僆仔，系咪唔顺呀？ （众人扮激烈打斗） 天仇：咦喂，走位快啲得架。 （众人激烈搏杀，飘飘睇得好开心，起身走去舞台，畀激情演出紧嘅天仇打倒喺地下） （海边） 天仇：喺舞台上面我哋演出紧嘅时候呢系好投入架，你突然间冲上嚟会好危险架啰。 飘飘：我见你三条友打得咁过瘾，上嚟玩吓啫。 天仇：嗱，我选择“精武门”呢套戏呢，系因为商业上嘅原因架，因为有动作场面呢容易啲畀观众接受啦，同时亦都系有血有泪架…… 飘飘：我就有血有泪喇，我条尾龙唔知有冇挛到呀。我上次心情唔好冚咗你一巴，今次谂住同你晒个冧啫。 天仇：傻啦，其实你今晚咁捧场，我经已好感激架喇。多谢！ 飘飘：吓哗？ （天仇揽住飘飘） 天仇：多谢！多谢！多谢！你对我架鼓励呢，我会记住嘅。 *飘飘：你得架你。喂，你上次教我嗰招“鹌鹑”嗰个款呢，啲麻甩佬真系噉样托高我头，“先生，早晨！”哇！嗒晒糖呀！红呀我呢期。 天仇：系？ 飘飘：系，发围啊呢期。 天仇：恭喜你呀，你一定会成为一个好出色嘅舞女架。 飘飘：多谢，你都一定会成为一个好出色嘅死茄哩啡架。 天仇：多谢！ （两人凝望大海。） 飘飘：喂，睇吓前面几鬼黑，乜都睇唔到喎。 天仇：都唔系嘅，天光之后就会好靓嘞。 （两人对视片刻） 飘飘：噉我走嘞。哇！嗰三条友茂尼到晒顶咯喎。咦，乜你噉架？ 天仇：咩呀？ 飘飘：你嘴唇爆晒坼嘞！要唔要啲润唇膏呀？ 天仇：好。 （飘飘锡天仇） 飘飘：我得呢啲咋，好唔好啲呀？（坐喺天仇大髀上） 天仇：好啲。 飘飘：添啲哩。 天仇：啊，唔使嘞，唔该。 飘飘：唔使罢就！去死吖你，正人渣！ 天仇：做咩啫你？ 飘飘：我最憎人嘅嘴爆坼架嘞。 天仇：我嘴爆坼我都唔想架！ 飘飘：噉你做咩唔搽多啲润唇膏啫？ 天仇：噉搽咯。 飘飘：去死吖！唔想搽就唔好勉强。 天仇：其实我想搽架。 飘飘：嗱，我警告你啊，到我真系搽嗰时你唔好叽叽趌趌啊吓！ 天仇：我都话想搽咯。 （飘飘挨过嚟） 天仇：啊，咪住。 飘飘：啊，你个死铲你吓！ 天仇：可唔可以畀啲专业，搽匀称啲，唔好求祈揩两下算嘞。 飘飘：得喇。 （两人热吻，飘飘大髀又夹住天仇） （第二朝，地点：天仇屋仔。两个人瞓喺一张床上，飘飘趴系天仇身上。飘飘醒咗之后走出去，飘飘着住天仇嘅拖鞋，着咗件衬衫走出去，天仇即刻跟咗出去，着住飘飘嘅靴同衬衫，见到飘飘坐喺窗台上，吹海风。突然天仇好似醒 起啲嘢，返屋仔打电话） 天仇：喂，洪爷！ 洪爷：咩料？ 天仇：而家出便夜总会小姐呢过一晚夜大概收咩价钱？ 洪爷：质素普通嘅一千到千二度喇。 天仇：质素若然系好呢？ 洪爷：好成点先？ 天仇：我够胆讲系极品噉嘅质素。 洪爷：一百几呀万到一千几百万不等。 （天仇的电话掉喺地下。） 洪爷：喂！ （天仇即刻去攞饼干筒里面嗰一本简体字嘅《演员的自我修养》同埋一啲银纸，一块手表，同一个利市封。天仇将啲钱摆喺飘飘件衫上便，又将西装袋里便啲散银攞埋出嚟，又谂谂吓，将手表同利市封扐咗出嚟，呢个时候听到推门声，天仇即刻返番去床上诈瞓。飘飘入嚟，睇到钱同表，收埋，着好件衫，推门走出去） 飘飘：多谢晒喎老世。 （飘飘走出门回头望望，冇见天仇，而天仇匿埋望住飘飘走出街坊福利社。天仇追出去） 天仇：喂！ 飘飘：点呀？ 天仇：走喇？ 飘飘：系呀。 天仇：去边嗱？ 飘飘：返屋企啰。 天仇：跟住呢？ 飘飘：返工啰。 天仇：唔返得唔得呀？ 飘飘：唔返你养我呀？ （天仇笑咗吓，飘飘都笑咗吓，两人挥手告别，飘飘继续行。天仇追上嚟） 天仇：喂。 飘飘（叉住支烟背对天仇）：又点呀？ 天仇：我养你吖！ 飘飘：你养掂你自己先啦，傻仔！（飘飘只眼经已充满泪水。） （喺计程车上飘飘热泪盈眶，只手揸住天仇嗰本《演员的自我修养》）。 （片场） 天仇：无论你睇唔睇得起我都好，我都系一个演员。 场务：你同我讲嘢呀？ （天仇点头） 场务：又演咩呀？演你老母呀？ 天仇：上次你重差我三个饭盒，我想攞返。 场务：哈哈哈……，（场务把一把锯子扛在肩上）攞吖！攞吖！够姜就攞。 （天仇好平静噉攞起三个饭盒慢慢行出片场） 天仇（拧转头）：唔该晒。（继续行） （副导演同霞姨追嚟。） 霞姨：尹天仇。 副导演：企喺度。 （天仇起势走） 副导演：咪走呀你啊！ 天仇：喂，霞姨呀，呢啲饭盒系我架。 霞姨：是但啦，有人揾你呀。 副导演：行啦。 （天仇畀拉返片场，走入化装间） 副导演：入去里便吖，放低个饭盒。 （里间坐住娟姐同几个男人） 杜娟儿：闩门吖。 天仇：娟姐、导演。 杜娟儿：坐吖。嗱，有一段戏呢我想你帮我试一试，我哋系恋人，呢个呢，是我临死前同你嘅一段对白，你睇睇。 天仇：我系演……？ 杜娟儿：你做尹天仇，我做杜娟儿，得未？ 天仇：得。 杜娟儿：嗌Action啦！ 导演：Action！ （天仇将娟姐揽入怀中） 杜娟儿：天仇！ 天仇：娟儿！（天仇热泪盈眶） 杜娟儿：天仇……我…… 天仇：你唔会有事架，娟儿……（呢个时候鼻里已经流出鼻涕） 杜娟儿：我唔得架喇。 天仇：娟儿，我呢一世已经受咗太多挫折（鼻涕渐渐拉长），我已经好攰，如果连你都冇埋，我真系支持唔到落去。 杜娟儿：你……保重。 天仇就；娟儿……娟儿，你唔好死呀！娟儿，（鼻涕就嚟流到杜娟儿块面度）娟儿，你应吓我啦，娟儿，你应吓我啦，你擘大个口应吓我啦，娟儿。（鼻涕离杜娟儿只有一毫米）娟儿！ 杜娟儿（睁开眼，见到鼻涕离佢咁近，惊叫）：哇！ 导演：Cut。 娟姐，娟姐，抹返，抹干净先。 杜娟儿：唉，闪到！闪到！ 导演：有冇搞错呀？ 杜娟儿：哎，佢演得好投入吖。 导演：唔止投入啊，重好澎湃添呀！ 制片：喂，你出出去先。 杜娟儿：嗱，我同你哋讲，我就唔再等阿大哥啲期架嘞。 制片：大家可以将就吓架啫吓哗？ 杜娟儿：边个将就我呀？我受够嘞，我一定要用新人。 鬼佬：You rather use this guy than 大哥? Don't fucking,sorry,sorry. Don't bullshit me, OK? Cause I'm not bussiness like this, OK? 杜娟儿：Oh, don't you bullshit me. 我哋就系需要啲新面孔。 制片：新面孔大把啦，拍一部戏几贵你知架。你唔系求祈揾件噉嘅嘢畀我吓哗？ 杜娟儿：咩求祈揾件嘢？邵生，我真系留意咗佢好耐架，起真系好有Heart啊。 制片：Heart? 我哋而家系倾生意呀，唔系谈恋爱呀娟姐！ （一班投资人走出去） 鬼佬：Let me tell you something man. 制片：八婆！ 鬼佬：I'm not going to fucking work with these people and that bitch. I'm not gonna fucking work with this man. …… 制片人：阿尹生，唔该你入入嚟吖。 杜娟儿：我下一部戏想揾你做男住角，你点睇？ 天仇：好呀！ 杜娟儿：人物性格、背景关系、故事大纲、剧本重有原著小说你可以攞埋返屋企参考吓，我相信会对你有帮助，拍摄时间表同埋角色造型照全部喺晒度，我哋会尽快会揾人同你度身，有冇问题？ 天仇：每日肯定有饭盒食架吓嘛？ （众人哈哈大笑） （天仇开始同杜娟儿一齐出席各种场合，飘飘重喺夜总会陪啲客，高级舞会上杜娟儿为天仇执个领结，而飘飘畀龙少蹂躏紧，眼里充满泪水，突然间佢推开龙少。） 飘飘：妈咪啊，今晚我唔拎手袋嘞。 妈咪：做咩呀？又玩嘢？ 飘飘：唔系玩嘢。 妈咪：唔系玩嘢？你而家玩我呀！难得龙少爷咁冧你，多多钱都肯使，你阵间同我冲干净凉，琼干水呀，唔好喺度搞搞震啦！ 飘飘：我唔想再做呢啲嘢呀。 妈咪：唔想再做，你估你系小龙女呀？吓？不如唔好捞啦！ 飘飘：我钟意咗个人呀。 （高级舞会上） 天仇：我唔知应该点样多谢你畀呢个机会我？ 杜娟儿：你做好呢部戏啦。 天仇：我一定会将我全副精神同埋时间摆喺上面。 杜娟儿：希望你女朋友唔会介意你以后冇时间陪佢喎。 天仇：我冇女朋友架。 （夜总会） 妈咪：宁愿玩真爱，冇饭开呀？你傻架你！嗱，我唔理你咁多，总之就你今晚同我乖乖哋同我搞掂佢，其他嘢我慢慢先再同你计。靓女，快啲起身攞手袋啦。 飘飘：龙少呀，唔好意思啊，我突然间呢好唔舒服啊，我谂我今晚陪唔到你呀。 龙少爷：算啦，唔好吊高嚟卖喇，钱我大把，攞去吖嗱，得未呀？ 飘飘：我谂我真系好唔舒服，我真系唔得啊。 龙少爷：嗱，我唔想听到“唔得“嗰两个字，清楚未？再讲多次！ 飘飘：真系唔得。 （飘飘畀龙少打咗吓） （高级舞会） 天仇：你痛唔痛呀？ 杜娟儿：你话你跳舞好叻嘅？ 天仇：系呀，我跳舞好叻架。 杜娟儿：噉点解你会踩到我嘅？ 天仇：会唔会系你嘅步伐速咗少少呢？ 杜娟儿：噉样你就就我好唔好？ 天仇：好啊，我就就你啦。 （夜总会） 龙少爷：仆你个街吖，我上次十几两派晒畀你哋，而家畀晒钱，落晒订，你而家扮高斗呀？喺咁多人面前落我面？而家我畀多次机会你，喺咁多人面前讲多次，得唔得？ 飘飘：唔得。 （飘飘畀龙少爆打依然唔制，而此时天仇同杜娟儿跳紧舞。） 龙少：得唔得？ 飘飘：唔得。 妈咪：重唔快啲嗌人嚟？ （第二日朝早，天仇屋企门口） 天仇：早晨。 杜娟儿：早晨。 天仇：早晨。 杜娟儿：早晨。 飘飘正好赶来：咦，你咪系杜娟儿？ 杜娟儿：Hello。 飘飘：真系你呀？我系柳飘飘啊！喂，我系你fans嚟架，同我签个名吖！哗！你真人真系好靓！我好钟意睇你做戏架！ 天仇：喂。 飘飘：喂，娟姐啊，快点揾佢签名，唔系就走嘞佢。哗，你今物拍戏呀？拍酒楼呀？成个部长噉嘅，系咪啫？抑或去酒店做boy呀？ 天仇：你块面做咩呀？ 飘飘：哎，唔好搞啊。喂，娟姐呀，最近同边个拍拖啫？ 杜娟儿：你哋街坊嚟架？ 飘飘：你识得佢架！ 天仇：阿娟姐提携我，揾我做男主角啊。 飘飘：你唔好去死吖你！ 天仇：真架。 杜娟儿：阿仇呀，我哋唔好咁迟啰喎，邵生好唔钟意人迟到架。 飘飘：真架？ 天仇：系呀！ 飘飘：嗱，我都话你得架啦，记唔记得先？ （天仇咳） 飘飘：嗱，我话佢一定得架，我话佢得架，娟姐，唔信你问吓佢吖。 杜娟儿：阿仇啊，阿邵生阵间要飞美国，我哋快少少啦！我谂佢走之前都会想同你倾倾。 飘飘：喂，你记唔记得先？我系咪话过你一定掂先？喺沙滩嗰晚我有冇讲过呢句说话先？我喺沙滩嗰晚真系话佢一定掂架，娟姐…… 杜娟儿：个监制book咗个练靶场畀你，阵间呢要学开枪嘞，重要教你打关斗呀、跳弹床，啊，重有吊威吔架，你有着底裤架呵？ 天仇：啊？ 杜娟儿：吊威吔要着底裤架。 天仇：我有呀。 杜娟儿：OK. 杜娟儿：你朋友重有嘢揾你呀？ 飘飘：啊，冇，冇呀。啊，有啲嘢畀返你呀。（将《演员的自我修养》畀返天仇） 天仇：原来你攞咗呀。 飘飘：系呀，上次见到顺手攞嚟玩吓之嘛。 天仇：玩？好唔好玩呀？ 飘飘：唔好玩，所以畀返你啰。 天仇：你重有嘢揾我呀？ 飘飘：冇嘢，冇嘢，Bye Bye. 天仇：哦，Bye Bye。 （天仇上咗杜娟儿嘅车，慢慢驶去。） 飘飘：系噉先啦。 飘飘（大声嗌）：喂！你上次话养我系咪真架？ （车停低） 天仇：系呀。 飘飘：冇老点嘛？ 天仇：都话系咯，等紧你咋！（飘飘开心到跳起） 杜娟儿：不如你哋倾埋先啦，不过唔好咁迟喎。 天仇：知道。 （天仇走落车，走去同飘飘热情拥抱，杜娟儿一个人开车走开） （片场，化装间） 天仇：对唔住，我迟咗少少。 杜娟儿：唔紧要，过嚟吖，我介绍，呢个系Peter，我哋部戏嘅监制，同埋阿Johnny，我哋嘅策划。 Peter：尹生，早晨！ 天仇：早晨！ JOHNNY：早晨，请坐。 天仇：嗱，个角色呢我就分析过，其实系可以有三个层次、四个阶段同埋五种唔同嘅演绎方法架，噉我将佢写低咗，或者我哋大家可以研究吓。 Peter：Very good. 天仇：同埋呢，如果要令外国嘅观众都更加容易接受我呢个新人呢，我打算改一个英文名，就叫做，冧巴…… Peter: 冧巴？Number One? 天仇：就系Number One喇。 Johnny：好名呀，very good。 天仇：噉造型方面呢，我亦都…… 杜娟儿：阿仇呀，其实呢部戏本应系由大哥做架，噉因为佢嘅期有问题，我哋决定用新人，但系佢正话又打返电话畀我哋话个期又OK嘞，噉所以佢自己会做返男主角。 天仇：如果噉嘅情况呢，我可以做嗰个大反派吖，因为对于我嚟讲都系一个大挑战嚟。 杜娟儿：Sorry，大反派个角色我哋亦都有人选架嘞。 天仇：噉嘅情况呢，我要睇睇，我觉得里便呢…… Peter：啊，尹生呀。正如阿娟姐讲呢，我哋大家知道你系一个非常专业嘅演员，你放心，我哋一定会安排另外一个角色嚟畀你演出，唔该晒。 天仇：请问系咩角色呀？ （Peter同Johnny咬耳一阵） Peter ：你就做嗰个律师啦。嗱，噉你就要抽多啲时间熟读剧本、熟读对白，做多啲准备工夫嘞吓。 天仇：请问有几多句对白呀？ Peter（又同Johnny咬耳）：你系有三句对白嘅。 天仇：请问系边三句对白呀？ Peter：第一句系“吓？”。 天仇：吓？ Peter：第二句系“哦。”。 天仇：哦。 Peter：第三句系“你扯吧啦。”。 天仇：明白，噉我返去读熟佢。 Peter：啊，尹生啊。 天仇：啊？ Peter：你介唔介意畀返本剧本我哋呀？ （天仇将剧本伸向Peter。但系揸住唔放，Peter掹极唔甩。） 杜娟儿：阿仇，唔好噉啦。（天仇放开剧本，Peter倒喺沙发上边） 天仇：对唔住。 服装：啊！尹生啊，麻烦你除返套礼服落嚟啊，我哋有衫畀你换架。呢便啦，唔该。 杜娟儿：阿仇，Sorry。（天仇无言走出化装间） Peter：啊，娟姐啊，大哥个期呢…… 杜娟儿：你出返去先喇。 Peter：拍戏系噉架啦。 杜娟儿：出去呀！！！！ （片场，天仇正向外走，背景音乐响起，《屎我系一督屎》，个天开始落雨） （片场外，场务大叔担住伞，等紧天仇。） 场务：喂，僆仔，想唔想做场好戏呀？ 天仇：有冇对白架？ 场务：肯定超过三句。 天仇：咩角色呀？ 场务：正派角色。 天仇：即系咩戏啫？ 场务：咪问咁多，有冇兴趣呀？ 天仇：有呀。 场务：过嚟。 （天仇跟住场务走入一间屋仔） 警察：点呀？咩环境呀？ 场务：搞紧，搞紧。嗱，唔怕老实同你讲，我唔系你平日所见嗰个场务，我身份系香港警察，佢系我阿头。 警察：我哋刑事情报科：Criminal Intelligence Bureau。简称CIB。 场务：再简单啲讲，我系卧底。 天仇：你系卧底？ 场务：吹呀？我比嗰啲所谓演员更加专业、更加高尚、更有技巧，因为我每日嘅生活就系做紧戏，虽然我系冇剧本，但系我绝对唔会NG，事关我一NG可能会连命都冇，我先应该攞奥斯卡最佳男主角奖。 天仇：犀利！ 场务：今日本来我有一个好重要嘅行动要同我线人一齐去，但系佢突然间发羊吊，点样去？我想你代替佢，线人费八嚿水我哋会畀返你。 天仇：钱银都系其次啫，问题系演技有冇得发挥呢？ 场务：好有发挥。 （幻想中） 天仇：大佬，出便好多差人，你快走吖！ 黑社会大哥：好兄弟，呢度有我顶住，你走先啦。 （天仇向大哥开枪） 大哥：你出卖我？ 天仇：对唔住，我系卧底。 （回到现实） 天仇：点解要迫我杀人呢？ 场务：半个钟头之后我要去一个贼窦装个偷听器嚟到搜集佢哋犯罪证据，但系我每次去佢哋都会搜我身，所以我要你将呢个偷听器放喺盒茄蛋饭里便交嚟畀我，然之后你走。 天仇：噉我即系做…… 场务：送外卖。 天仇：噉完全冇…… 场务：好有发挥呢个角色，你好好哋把握。 天仇：人物性格、角色关系、时代背景呢？ 场务：人物性格、角色关系、时代背景基本上都喺晒呢只茶餐厅嘅餐牌度架啫，你尽快揣摩吓。但系实际上要视乎现场环境随机应变。 天仇：点解要揾我啊？ 场务：我哋需要一个专业嘅演员，我觉得你系，今次你就系男主角。 （排练） 场务：杂扒餐有咩呀？ 天仇：猪扒、牛扒、鸡翼、肠仔、蛋吖。 场务：午餐A呢？ 天仇：莴蛋免治牛肉饭、鸡蓉粟米汤、架啡或茶。 场务；B餐呢？ 天仇：时菜肉片饭、例汤、茶或架啡。 场务：改冻冷得嘛？ 天仇：加两文啦。 场务：乜嘢系全日供应架？ 天仇：鸡髀沙律、汉堡包吖。 场务：几钱呀？ 天仇（睇餐牌）：廿文。 场务：睇熟啲啦，大佬！ 天仇：鸡髀沙律、汉堡包…… 场务：什扒餐系咩呀？ ………… （喺贼窦外面） 场务：你而家已经系一个外卖仔，记住要投入角色，阵间我一入到个窦度，我即刻叫茄蛋饭，十分钟之后，你准时送入嚟。 场务：嚟架嘞喎。 天仇：正式架嘞？ 场务：正式架嘞。 天仇：唔排架嘞吓哗？ 场务：唔排架嘞。 天仇：哎，可唔可以嗌Action先嗱？ 场务：Action. 喂！喂！…… （场务上去敲门，有人开门，场务入去） 场务：哎，阿BEN。（有人开始搜身） BEN：阿毛。 场务：早几日又话call我过马交？ BEN：我有call你呀。 场务：几时有call我呀？ BEN：你冇开机咩？ 场务：我点会冇开机？廿四小时on call架。怪唔之你班马仔咁穷。喂！猴子偷桃呀？！ BEN：呢个衰仔成日抽水嘅。 场务：还返铺畀佢！ BEN：哎，阿柱，叫毛哥。 场务：阿毛得啦，柱哥。咦，又系皮褛呀？皮褛大会呀今日。同款喎。 （门外天仇还在练习） 天仇：我系外卖仔，我嚟送外卖嘅。茄蛋饭，廿五个半。 （贼窦） BEN：阿岐！ 阿岐：系！ BEN：佢呢件自然着旧架。你睇吓啲质感。冇返廿年，都着唔到噉嘅效果呀。你阿爷留畀你嘅？ 阿岐：新买架咋。 BEN：衰仔啊！ 场务：我都整返件先。 场务：叫嘢食先。（打电话叫外卖） BEN：喂，开饭喇。 阿岐：食饭啦， BEN：阿毛过嚟吖，一路食就一路倾。 场务：好啊，几好餸喎。 BEN：噉就叫好餸呀？跟住重有大茶饭呀。有单嘢呢就…… 场务：咪住，冇茄蛋呀？喂，我要食茄蛋喎，叫个茄蛋饭先。 BEN：唔使啦。 阿柱：茄蛋吓哗？咧。 场务：唔系啩？真系茄蛋？开口中喎。哎，炒蛋嚟呀？唔系呀，我要食荷包蛋嗰只啊，哎，都系叫个荷包蛋炒番茄。 BEN：荷包蛋！阿柱，即刻整荷包蛋。 场务：喂喂喂，哎呀，唔使咁麻烦啦，叫外卖好快嘅之嘛。喂，权发呀？…… （此时有人敲门） BEN：点解会咁快架？ 场务：系啰，我都未嗌。 送外买嘅：哗，咁耐至嚟开门，我赶住揾食家嘛大佬。 场务：叫咗嘢咩？ BEN：我叫嘅，叫咗个羊腩褒加餸呀。咁快嚟到嘅？炆得腍唔腍架？ 送外卖嘅：腍唔腍你问厨房啦，三十九个八呀。 场务：喂，等我畀。 BEN：唔使客气喇。 场务：得喇，等我嚟啦，我嚟冇乜所谓啦。 BEN：我请家嘛。 场务：冇乜所谓啦。 BEN：我嚟啦。 场务：唔好推，唔好。 送外卖嘅：不如我请啦！几呀岁人，嗰四呀文唔够，推嚟推去。不如碌卡吖，扑街！ 场务：讲咩呀，僆仔？。 送外卖嘅：嗱，唔好喐呀！一系就畀钱，一系就攞走，再唔系就我请啦…… （阿柱一枪打死了送外卖嘅） BEN：搞咩呀你呀？话咗几多次呀，行多步你都懒嘅，行埋啲兜住个头顶打落去就唔会溅到成墙血啦，讲极你都唔听嘅！专业啲好唔好呀？ （各人喺度抹血清理现场）宜家啲送外买嘅又系离谱啲嘅。 场务：不喽都系噉架喇。 BEN：好喇，食饭。 （有人敲门） BEN：边个呀？ 天仇：我系外卖仔呀，我嚟送外卖架。 BEN：出去睇睇，柱！ （阿柱将尸体收好） 天仇（行入间屋）：你哋好，我系外卖仔。 场务：得喇。 天仇：吓？茄蛋饭廿五个半，多谢。 BEN：你有嗌咩？ 场务：冇啊，我冇嗌呀，我都未嗌。 天仇（睇睇表）：重未嗌？ 场务：系咪送错地方呀？ 天仇（攞出一张纸条睇睇）：七号吖嘛？ 场务：七号？一号呀，你送去一号啦。 天仇：噉你重要唔要啫？ 场务：搞错呀，都唔系我嗌嘅点啊？ 天仇：茄蛋饭喎？ 场务（笑）：你做咩啫？傻咗咩？走啦。 BEN：横掂你想食茄蛋饭，喂，我要咗佢。 场务：唔好啦，人哋嗌家嘛。 BEN：我话我要先呀！过嚟吖！过嚟呀！ 场务：噉畀我哋先得唔得啊？ （天仇将茄蛋饭放低，无意中睇到梳化后面嘅死尸） 场务：吖，咁桥嘅，一号又系叫茄蛋饭。 BEN：茄蛋好咩？ 场务：清清地几好吖，番茄有益呀。 BEN：有咩益呀？ 场务：维他命C特别高架。 BEN：其他水果都有啫。 场务：其他水果边有佢咁高啫？ （天仇要向外走） BEN：喂唔收钱呀？ 天仇：多谢，廿五个半啦。 BEN：咁贵嘅？ 天仇：加底吖嘛。 BEN：噉唔加底呢？ 天仇：三呀六个八啦。 BEN：唔加底重贵过加底？ 天仇：哦，唔加底十二个二吖。 BEN：噉加底呢？ 天仇：三十六个八咯。 BEN：头先又话廿五个半？ 天仇：啊，系，廿五个半啦。 BEN：今朝早餐卖咩呀？ 天仇：咩话？ BEN：今朝早餐卖乜嘢？ 天仇：火腿蛋啰。 BEN：几钱呀？ 天仇：十二个二啰。 BEN：加底呢？ 天仇：二十五个半啰。 BEN：乜早餐都有加底嘅咩？ 天仇：噉你加两条肠都得嘅。 BEN：噉我加够三条肠要几多钱呀？ 天仇：唔好啦。 BEN：几多钱呀？ 天仇：我系送外卖架咋。 BEN：我问你几多钱呀！ 天仇：我唔知呀。 BEN：几多钱！ 天仇：我真系外卖仔嚟架！ BEN：你唔系外卖仔！ （场务冲咗上去） 场务：僆仔！小子，唔赖架嘅，你系唔系做外卖架？ 天仇：我新入行架！ 场务：新入行？ 天仇：我唔知送外卖都要答咁多问题家嘛！ 场务：重扮嘢！（一路讲一路搜天仇嘅身） 天仇：你做咩呀，吓？你系咪差人啊？ 场务：系啊，得唔得吖？ 天仇：我真系外卖仔嚟……（场务一拳打落天仇个肚） 场务：冇嘢喎，冇嘢喎，傻仔嚟啫喎。嗱，唔信搜吓啦，搜吓。僆仔，今日我放你走吓，以后醒定啲呀！喂…… （BEN打咗场务一枪） 场务：咩事？乜搞啲噉嘢呀？（一瘸一拐的走向沙发，坐低，对阿BEN讲）算点啊？（BEN攞出茄蛋饭里面嘅偷听器）咩嚟架？ BEN：想跣我！ （场务从饭盒中攞出枪，结果被人打多枪） （BEN枪口转向了天仇，天仇执起地上支枪，瞓喺地上，杀死晒三个贼，然后保持住一个动作唔变。） 天仇：对唔住，我系卧底。 场务（醒咗，叫天仇）：嘘，嘘，（天仇冇反应）Cut（天仇先听到，松咗啖气）。 天仇：点呀？点呀？ 场务：我冇事，未死得。 天仇：我意思系话我做成点呀。 场务：几好吖，第一次担正做男主角算系噉架喇，Good Take。 天仇：多谢！我帮你报警！ （此时一群警察冲咗入嚟。） （天仇家门口，飘飘喺度织冷衫，天仇返嚟喇。） |
| *copyright 初稿由凌凌漆先生提供，部分经本网修改 |