粵口語中有講「賓周」，即係指男性陰莖，係一個隱語詞，我查證出口語講「賓周」，正寫應該係「豳脽」。祇係我個人意見，未必正確，不過以後嘅文章如果有提及呢個詞，我會將之寫成「豳脽」。

『豳：《唐韻》補巾切。《廣韻》府巾切。《集韻》《韻會》悲巾切。《正韻》卑民切。並音彬。《說文》周太王國。在右扶風美陽。本作邠，从邑，分聲，亦作豳。美陽亭即豳也。

脽：《唐韻》示住切。《集韻》《韻會》《正韻》視隹切。並音誰。《說文》凥也。《正韻》髖也。《正字通》尻骨也。《博雅》臀謂之脽。又《韻會》地名。又《集韻》川隹切。音推。又《五音集韻》職流切。音周。義並同。』

    以上內容全部出自《康熙字典》

    提起「豳脽」，就要另外一提個陰莖個「莖」字，香港方面要正音爲「衡」。植物莖部要讀爲「植物衡部」。大錯。
    先講一講男性性器官，又叫做「陰莖」、「陽具」，即我上文所講「豳脽」。相信冇人會將「陰莖」讀做「音衡」啩？
    爲何稱爲「陰莖」？因爲男性性器官長直，與植物莖部一貌似，所以稱之爲「陰莖」，可謂之十分生動。
    廣州曾有一任市長，名叫「李陽敬」，市民笑稱「賓周市长」。因爲「陽敬」，令聯想起「陰莖」，又稱「陽具」。足已證明廣州人將「莖」讀‘敬’。
    香港方面不知何故，關埋度門就搞正音，一啲都唔識放眼社會，放眼市民。一啲都唔識尊重市民意見。以佢自己嗰套先叫做正音，市民嗰套就叫俗音。怪唔得董建華特首話聽唔到市民嘅心聲啦。
    不過，話又講轉頭，香港傳媒影響非常大。廣州人應該相信自己語言係生動嘅，係啱嘅，唔應該照跟香港正音，香港正音唔理廣州人發音如何，一味話佢嗰啲先啱，又掛住「廣州話」招牌。從我角度講，從廣州人角度講，從廣東人角度講，叫「香港話」更加適合，「廣州話」？？？冇香港份，祇能叫「以廣州話爲基礎語言嘅香港話」。
    講到尾，香港話係有着自己一套所謂「正音」發展方向，同廣州話嘅距離越拉越遠。
    如果香港嘅正音運動再搞落去，最終會形成「英式英語、美式英語」如此般格局。