智服洪十八
陈梦吉献计
同方堂镜斗智
香港冠春园验尸
布置机关失败
饭台解释
阿欢出走
阿欢惹官司
探监
打官司前准备
官司第一堂
中途揾线索
打官司第二堂
结案判刑
尾声

画外音：满清末年，广东有桥王陈梦吉，职业状棍，专以窒人为乐，以整蛊人为荣。仇家多不胜数，呢一日，陈梦吉嘅仇家丐帮帮主洪十八，喺众丐怂恿之下决定揾陈梦吉计数，至于两人如何结怨，为乜结怨就实在无从稽考。

（丐帮帮主洪十八带众弟子，嚟揾陈梦吉，阿欢见状，飞奔返去话俾陈梦吉知）
洪十八：陈梦吉你个衰人我今日同你搏命。
阿欢：死喇！死喇！师父，死喇！！死喇！师父！师父呀！师父！
陈梦吉：欢！等你呀。（跳绳）
陈梦吉：熊人熊人，单双，熊人熊人，跌地。熊人熊人转个圈，熊人熊人get away
阿欢：师父呀，师父，
陈梦吉：欢！
阿欢：阿师父，丐帮洪十八嚟找你晦气呀！
陈梦吉：系？（对准阿欢的脑袋就是一脚）
阿欢：师父一定谂到桥嘞系咪呀？（阿欢倒在地上鼓掌，脸上带着兴奋的表情）
陈梦吉：冇桥冇桥，纯粹系见你样衰，试吓伸你一脚架啫。哎！咪俾我望到呀，唔系抵唔住颈又伸多嘢架嘞。
阿欢：啊！师父呢思维，果然天马行空仿如逆水行舟，师父即系师父，桥王即系桥王呀。
陈梦吉：咪桥王前桥王后起势咁嗌得咖！好大压力架，大佬！
阿欢：系嘅！系嘅！
（镜头转向陈梦吉家门外）
洪十八：陈梦吉，快啲躝出嚟！
帮众：躝出嚟！躝出嚟！
洪十八：陈梦吉同我躝出嚟！系咪知道你契爷我嚟睇你，唔敢出嚟呀？怕咗我阵乞随呀？再唔出嚟，我掘开你祖宗嘅山，掘埋啲骨磨粉喂鸡！
阿欢：师父。（将石头交畀陈梦吉）
（门内陈梦吉将一嚿石抛向门外，啱掟中洪十八只脚）
帮众一：大佬，嚿石春有字架！
洪十八：写乜春啊？
帮众一：揾人请敲门呀系！
洪十八：啊？同我玩斯文。
（洪十八与陈梦吉大战，最后洪十八同丐帮众弟子大败，重饮咗陈梦吉加咗泻药嘅尿，鬼死咁狼狈噉逃走。阴功咯。）
洪十八：陈梦吉你听住，我数三声你好举高双手投降。如果唔系我哋攻入嚟。
陈梦吉：咦，嚟真架佢哋。点睇呢，呢镬？
阿欢（透过门罅观察后门情况）：哗！哎呀，师父，佢哋喺后边玩火呀！
陈梦吉：唔奇吖，我哋啱啱至玩完嚟。
洪十八：一！
阿欢：死嘞！死嘞！
洪十八：二！二个半！三！
陈梦吉（挟持阿欢）：冇再迫我呀嗱！唔系我杀人质呀！
阿欢：救我！洪大哥！洪大哥！
洪十八：☆△◎※ ！☆
众丐：用啲屎泼佢！
阿欢：啊！——
洪十八：鬼吖！鬼吖！鬼吖！撞邪呀！撞邪呀！
（门内）
陈梦吉：玻璃门都未曾见过，井底之蛙！
阿欢：啊！师父上次原来游历德国买块噉乜嘢返嚟就系噉乜样用架。
洪十八：个个捻住晒个鼻？！大佬依家好臭呀？
（突然落雨）
洪十八（大笑）：陈梦吉，你估唔到呢，个天都帮我呀！落雨帮我洗身啦！啊哈哈——，大啲！
陈梦吉：洪兄！（洪十八四围揾陈梦吉）
陈梦吉：呢便呀，洪兄！唉！乞儿即系乞儿，有勇无谋不特止，三句唔埋就动刀枪。家吓请你饮尿经已算畀面架嘞。重嚟？兜口兜面架嘞。
（镜头转向野外众人大便的情节。。。。。。）
一丐：大佬！大佬！唔掂呀！我攋“钵钵焦”啊！
洪十八：我都急到攋呀！
一丐：帮帮我，唔好走呀！
（阿欢同陈梦吉喺草丛中蒲头）
阿欢：哗！班友仔饮咗我哋加咗泻药嘅尿，呢次重唔屙镬甘！
陈梦吉：嘘！（示意身后一人行动）
一人：好惨呀！好惨呀！（向上抛搽咗啲嘢嘅溪钱）
一丐：喂，大佬！怕唔怕邪呀？
洪十八：你用手指系用溪钱吖？
洪十八：你哋觉唔觉得喺肛门嘅深处，痕痒难当，好似俾针拮俾虫咬嘅感觉呀？
（众人点头）
洪十八：又俾陈梦吉算到！
（突然一张纸条飞过来，大家惊慌失措）
洪十八：唔使惊，冇屎架，有字啫！
帮众一：洪十八你条契弟，先前清洁肛门所用嘅溪纸全部搽满四川剧毒世家嘅“万毒蚁咬油”。痕起上嚟一系唔拗，一拗就拗到唔停得手，直至肛门爆裂，血流成河为止。
洪十八：点解你读信，个口唔喐，有声嘅？不过把声又唔系你？
（陈梦吉突然从后面出现）
陈梦吉：因为有我陈梦吉旁白，点呀？痕唔痕呀？哇哎！有蚊！咦，好痕！唔拗点得架！
阿欢：准备，一二三四！好痕吖！好痕呀！好痕吖！好痕呀！啦啦！啦啦啦！快啲搽啲“无赖膏”。嘿！“无赖膏”嚟喇。
（陈梦吉搽咗一浸）
陈梦吉：唔该！
洪十八：陈梦吉我认输嘞，（洪十八跪下）畀解药我哋啦！
陈梦吉：得！由于时间关系我已经嗌埋李公子嚟帮手做见证，嗌声我契哥先啦！
洪十八：契……契……
陈梦吉：李公子百忙中抽时间嚟帮手，真系唔话得呀！
李公子：鬼叫你有女咩！
陈梦吉：有冇你心先？
李公子：喂，快啲啰喂！
洪十八：斩对手都唔衰俾你睇！（洪十八举刀想斩自己手落嚟，陈梦吉抢过洪十八手中嘅刀）
陈梦吉：不愧为一条顶天立地嘅汉子，你嗌我契哥我唔睬你架嘞。欢！
阿欢：系！！由于时间关系，我哋已经准备咗啲解药，俾各位慢用架嘞。
洪十八：银两？
陈梦吉：呢一锭银你爱嚟塞入肛门，手指不能进入咯，咪拗唔到啰。（洪十八拿住银两）
陈梦吉：好！！佢谂都唔谂就啪入去，不愧为一条荡气回肠嘅汉子。抵惜！！！
陈梦吉：欢！
阿欢：系！哎！师父同你讲笑架啫，呢啲银两系畀你买二钱川贝，三钱伏地，四条夏枯草，四碗水煎埋一茶匙，然后润入肛门患处，自然药到病除，七日之后呢，包好，痕痒即消，重滋润肛门皮肤添！
陈梦吉：派银两！洪兄请起，我陈某敬重洪兄你系一个可歌可泣嘅汉子，冤家宜解不宜结，如今香港九龙新界，落入西人之手，所谓国难当头，你我好应该抛开私人恩怨，结为金兰兄弟，团结对外吖！而家我自认契弟，自怼一杯，嚟！
洪十八：你就想，我嬲你一世嘅，不过我都服你，契弟！走！
陈梦吉：欢！得饶人处且饶人，你学到冇？
阿欢：学到呀，师父！
李公子：哦，赢得咁漂亮重大讲风凉说话，我服得你好紧要。
陈梦吉：服就请跳舞呀！
李公子：喂！又我？
阿欢：嗨，唔使请呀？
李公子：嗨，噉就跳咯！喂，行咯！

陈梦吉献计

（李公子同其他两位公子夹份开嘅酒楼，冷冷清清，台面有四个人：陈梦吉，李公子，公子一（雷宇扬），公子二（张达明））
公子一：喂，桥王呀，唔好夹住，考吓你吖，黑猫系黑色，白猫系白色，噉熊猫系咩色呀？
陈梦吉：哇！估死人咩？
公子一：哈哈！嗱，好多人以为熊猫系红色架，其实熊猫系黑白色架。
陈梦吉：系喎！（非常惊讶之表情）
公子二：再考你，一点一划长，墙上甭支枪，阿木对阿木，阿公冇咗一忽肉。系个咩字？
陈梦吉：呜——，畀啖粥食好喎！
公子二：考起吖咧！个答案就系——中文字。好多人以为系英文字嚟咖。
李公子：啊！好嘢嚟喎。
李公子：难得咁高兴，桥王不如又整条好桥听吓咧。
陈梦吉：冇桥，冇桥，冇桥。靠把口揾饭食，真系有桥使坐喺度振咩？食嘢食嘢！
三人：你桥王嚟架，整条桥听吓啦。有嘅！有嘅！……
（有人托嚟一盘金摆喺陈梦吉面前）
陈梦吉：乜料？
公子二：人哋话陈梦吉算死草，现实势利，真系咁现实，唔见钱唔开口讲桥。
李公子：我哋三个有钱靓仔呀街知巷闻架啦。
陈梦吉：鬼死咁靓添啦！
李公子：咪啰！靓到鬼死噉样样开间酒楼，居然冇人帮衬喎。等阿陈兄你嚟度条好桥开吓客路咧。
陈梦吉：家吓大家把酒言欢，唔使真系度桥呀！
公子一：真系有性格，讲钱就伤感情。不过噉陈兄，我哋几兄弟同你冇乜感情好讲，都讲钱直接啲。
陈梦吉：啊！你都算挑通眼眉。就噉，换过晒啲女佢，请啲似返个人样嘅嚟至为之首要呀。
公子二：已经几匀架喇。
李公子：最索呢班架啦。有目共睹架！
公子一：阿桥王呀！你啲桥咁屎，你不如叫屎桥王吖。屎桥王！
陈梦吉：睇嚟几位有啲要求架！啊！噉呀！噉呀！噉呀！
（将公子二叫到身边，将佢一脚从三楼踢落去，围观嘅人拥入酒楼）
李公子：弊喇，啲生意真系好起嚟添。
公子二：喂，噉咪请多几个伙计返嚟招呼客人至得呀！
陈梦吉：好奇之心人皆有之，你哋三位一定要紧记架，每日三更准时轮住嚟跳楼仆街，吸引到班客人嘅注意力啰，财源自不然乒呤唪冷滚滚来吖。
李公子：但系大嗱嗱三楼跳落去好危噃！
陈梦吉：（一路落楼一路讲）揾食呀兄弟！七楼都焗住跳啦。
李公子：噉又系！噉又系！
陈梦吉：台面银两唔该送去我屋企。
李公子：好呀！
　

（饭桌上，几个人安静的围座是桌上。人物：陈梦吉，吕忍，阿仁，阿欢，水莲花，女客人）
陈梦吉：阿吕忍！
吕忍：点呀，老公？
陈梦吉：我明明供你到英国读法律，点解霎时间跑返番嚟呢？（表情严肃）
吕忍：畀个惊喜你噉啫！
陈梦吉：哇！好惊喜，食饭喇。
吕忍：话时话嘞，正话因乜事干你会俾啲水啡咗出间房嘅？我又见四周围都布置晒咁多机关，唔知你得唔得闲就呢件事干发表一下你嘅个人意见呢？
陈梦吉：得就好得闲！但系就——唔系咁方便讲！
阿欢：哎！师奶，你错怪咗师父嘞，查实师父呀看出徒儿有禽兽嘅欲念，所以布下了天罗地网，好使徒儿有机会呢一亲水姑娘嘅香泽，唔好误会师父呀。之不过师父，至于呢条猪脷，你又方唔方便解释一番呢？（扐出条猪脷）
陈梦吉：方便系方便，但系——唔系好得闲！
吕忍：噉咪好咯！就算你得闲讲，我哋都未必得闲听！
陈梦吉：（放低碗，深呼吸一啖）欢！条猪脷你舐过咧？
阿欢：有舐过！
陈梦吉：系喇，就系买嚟畀你舐架！
阿欢：（盯）师父！你当初同我讲话舐水姑娘条脷架噃？
陈梦吉：查实水姑娘条脷就我想舐，嗰条猪脷嗌嚟俾你舐，我跣你，标你松柴，过你一戙，点吖？（咬牙切齿）怕乜讲呀？怕乜讲呀？天口翳焗，生活又枯燥，搞少少把戏嚟调剂一下，噉得唔得？
吕忍：噉咪得啰！
陈梦吉：得咪就得啰！
（阿欢睥住陈梦吉）
陈梦吉：啋过你呀！睥到咁拫？（拍拍阿欢的肩膀）以我同你嘅交情，点都留返过你嘴嘅，嗱你问吓佢吖！（手指向水莲花）
水莲花：告辞嘞！陈梦吉，既然你有妇之夫嘞，你做咩重约我返嚟食饭吖？我会误会架，你有冇谂过我嘅感受呀？有才华唔系大晒架。（讲完走咗去，阿欢追出去）
阿欢：嗨！水姑娘！
女客人：Very simple! 佢就暗恋佢，佢就跣佢，佢又想嘴佢，你就嬲佢。
陈梦吉：（睥住女客）我想钟你添！
　

（水莲花冲出陈家，阿欢拎住灯笼追出去）
阿欢：小草！借借先。
阿欢：水姑娘……水姑娘，请停吓，水姑娘，请停吓，请停吓，水姑娘，路黑呀，我送你一程呀！
水莲花：唔使嘞，你借个灯笼畀我，我下次还返畀你。
阿欢：下次？噉我即系重有机会见到你啰？
水莲花：如果可以唔还就最好嘞，我得唔到佢个人，得唔到佢嘅心，得到个灯笼都叫做有返啲纪念啰！
阿欢：水姑娘呀，因乜解究你咁钟意我师父架呢？
水莲花：每个女人，都希望揾到一个叻过自己，能够保护到自己嘅男人。
阿欢：水姑娘，如果有个男人，叻你唔系好多，但系保护到你，唔知你又会唔会考虑噉呢？
水莲花：良禽择木而栖，如果我揾唔到好老公，宁愿自梳唔嫁。
阿欢：果然坚贞，绝非淫娃荡妇，好料！
水莲花：欢哥！男儿志在四方，儿女私情你都系暂时摆埋一边！你重咁年轻，好应该出去闯一闯！
阿欢（沉思，突然电闪雷鸣）：闯一闯？我去边处闯呀？奶奶！
（陈梦吉间房）
陈梦吉：系咪真系兴咖？
吕忍：系吖。
陈梦吉：系咪咖？
吕忍：睇吓。
陈梦吉：乜而家英国兴啲噉样喐架咩？
吕忍：点样喐呀？
陈梦吉：噉样喐啰。
吕忍：你有喐到咩？
陈梦吉：我有喐，呢个喐呀。
吕忍：Look!
陈梦吉：你家吓英语能够讲到柏柏声，真不枉我当年送你去英国攻书教学呀。
吕忍：你都不枉我千山万水带呢套礼物返嚟畀你啦，你睇你着起靓仔咁多。
陈梦吉：聋嘅都听得出你呢句说话系真心架噃。
吕忍：噉都俾你识穿添，你真系我肚里便一条虫。
陈梦吉：你噉样讲嘢重好浪漫添。（转身）哇哇哇，夜嘞，就寝咧。
（两人万分礼让）
陈梦吉：你先。
吕忍：哦，你先嗱，你先。
陈梦吉：唔好，唔好，你先，你先。
吕忍：哦，唔好唔好，唔好客气。
陈梦吉：唔系客气咧，我真系唔敢，我真系唔敢。
吕忍：唔好噉啦，当畀少少薄面我。
陈梦吉：唔系咧，我……我唯有恭敬不如从命。
（夜晚陈府门口，人物：吕忍，阿欢）
吕忍：唉，我谂我老公唔钟意我，我哋成咗亲七年，我又去埋英国一年，佢而家连讲嘢都唔望我。冇办法嘞，唯有连我都讲嘢唔望佢啦！
吕忍：喂，欢嗱！其实佢送我去英国读法律呢，我读咗第二样嘢。
阿欢：读咗咩呀？
吕忍：Fashion design.
阿欢：咩“嘥”话？
吕忍：针织咯！
阿欢：哎！真系天外有天，人外有人，个世界真系大变，针织都有得过去读架！
吕忍：所以你应该出去外便闯吓世界，见吓世面啰。
阿欢：系！师奶一言惊醒梦中人，男儿志在四方，虽然我远嘅地方唔去，近近地落个香港都要嘞。
（陈梦吉家大院，人物：陈梦吉，阿欢）
陈梦吉：喂？你落香港？
阿欢：系吖，师父！
陈梦吉：香港系殖民埞方唔系人住咖，系西人住咖。
阿欢：我理得佢呀，边个搞我，我打镬佢。
陈梦吉：哦！噉呀得。
阿欢：你唔好理我吖。
阿欢：我储喺你度嗰啲人工，你方便架话，唔知几时……
陈梦吉：讲咩呀？
阿欢：我储……
陈梦吉：之前嗰句？
阿欢：冇呀！
陈梦吉：叫我唔好理你？刮，very 刮! 你话咖！（手指向阿欢）
镜头转移：（夜晚饭桌前，人物：陈梦吉，阿欢，阿仁。吕忍）
阿欢：师父呀！鸡子，啱你架！（夹餸畀陈梦吉）
陈梦吉：添饭！
阿欢：我嚟我嚟！师父，饭。
陈梦吉：冇人知我减紧肥咩？（大家摇头）饭要一半啊！
阿仁：哦。
阿欢：等我嚟，等我嚟。
陈梦吉：衰仔，烂泥扶唔上壁！
阿欢：一半呀吓哗？（将饭倒喺台面，用手将饭分开两半）天一半，地一半，一半呀！食喇！
陈梦吉：喺我个场，你够胆噉样叫做系窜我噉话咯？
阿欢：又话唔理我？（用手厾陈梦吉个头）你输咗嘞，陈梦吉！
阿仁：家和万事兴呀，师父！
陈梦吉：收声！喺我个场几时轮到你讲嘢？
（陈梦吉手拿香，行到一盏灯前）
陈梦吉：我陈梦吉家吓向住灯火发誓，唔再理阿何欢，若然有反悔嘅，当受法律所制裁呀。
阿欢：你系唔理我啦嘛？
陈梦吉：哼！
阿欢：你系唔理我啦嘛？
陈梦吉：哼！
阿欢：自私精，冇血性，性无能！
（两人打起上嚟）
陈梦吉：仆街仔你，你仆街仔你！你仆街仔你！你仆街仔你！
阿欢：滚我啲钱。（一拳中落陈梦吉鼻梁，陈梦吉即场晕倒）
阿仁：出去避避先吖。
阿欢：避避？仁，保重呀！（走佬）
（陈梦吉梦中惊醒）
陈梦吉：我唔系性无能，我唔系性无能。我唔系吖——！
吕忍：老公，点呀你？发梦咋嘛。
陈梦吉：阿欢话我冷血兼自私，系咪真架？我好孤独，英文点讲？
吕忍：I love you!（好深情噉望住陈梦吉）
陈梦吉：（紧握拳头，表情痛苦）I love you!
吕忍：真嘅？
陈梦吉：I love you!I love you!!I love you!!!I love you!!!!I love you!!!!!
（阿欢叩响水姑娘间屋度门）
水姑娘：咁夜咩事呀？
阿欢：水姑娘，陈梦吉正乌龟王八蛋嗱，我同佢咁多年佢都噉对我呀，更何况对你？
水姑娘：冇其他事嘞呵？
阿欢：啊，水姑娘，水姑娘，查实你年纪都唔细架啦，呢处我有个玉佩畀你揸手。嗱嗱声入去执两件衫，拉我一齐落香港罢啦。你……唔呀？
水姑娘：香港路途遥远，你都系揾个玉佩傍吓身啊。万一遇到山贼，都有嘢畀人偷，唔会攞你命呀。时候唔早嘞，你上路啦。小心啲喇。（返入去）
　

（香港荷里活道某古玩店）
何春：少爷！（扐阿欢买咗嘅玉佩畀何中过目）
何中：个卖主而家喺边呀？
（香港会所）
（响起一声枪声，何春扒喺地度奄奄一息）
阿欢（揸住枪）：唔关我事呀，我唔识开枪架。
（何中匿喺暗角用枪杀死咗何春，阿欢俾人拉走）
阿欢：我冇杀人，我冇杀人，冤枉呀大老爷。（俾带去一个地方）西人？
西人：You murderer!
阿欢（问一手足）：阿叔呀，佢想闹我咩呀？
（阿欢受到各种刑罚嘅糟质）
阿欢：救命！你系咪同我玩杨乃武先呀？拆祠堂呀！
一手足：而家我哋告你谋杀，你可以自己揾律师帮你辩护。你有冇律师呀？
阿欢：有。陈梦吉。
（吕忍喺报纸度见到阿欢喺香港惹咗官非）
吕忍：Shit!
（某寺庙）
一僧：施主，你得未吖？
阿仁：揾到嘞，揾到嘞。揾到师父嘞。
吕忍：好！行！（带住一班徒儿去寺庙揾陈梦吉）
一僧：剃刀一落，寸草不生。冇得返转头架嘞施主。
一僧：唔好反悔
陈梦吉：嚟吖！
（原来系剃胳肋底嗰啲毛）
吕忍：唔好剃啦。
陈梦吉：胳肋底生虱，做少少手术都唔准？喂，畀条路行吓好。
一僧：施主，继唔继续剃呀？
陈梦吉：剃吖，唔该。
吕忍：阿欢喺香港惹咗官非吖。
陈梦吉：啊？咦？喂？
吕忍：噉你去唔去救佢啫？
陈梦吉：点救？
吕忍：你唔救佢会死架嘞。
陈梦吉：人生自古谁无死！
吕忍：噉叫得你桥王，
陈梦吉：冇桥，冇桥。佢而家喺香港犯事，用嘅系大不列颠法律，冇桥。
吕忍：喂，你送我去英国读法律，噉或者可能断估我可以帮到你少少呢我之前……
陈梦吉：讲话好拗底。
吕忍：喺你面前我叻咩啫
陈梦吉：噉睇嚟我要帮你嘞。
阿仁：师父！师父！
众人：师父！师父！（齐齐举手）    
（阿欢俾韫喺监狱）
狱监：放饭嘞。
阿欢：喺边度放饭，师兄？
（狱监派食物）
狱监：你新嚟呀？
阿欢：系吖，系吖。
（阿欢俾狱中鬼佬掐）
狱监：游戏时间。（阿欢俾鬼佬埋喺沙里便）
阿欢：你唔好虾我呀，我师父好叻架。
（香港李鸿章驻港办事处）
李鸿章：何欢一案，中英政府已经达成协议，以英式法庭审讯，速判速决，不设上诉。另外，特许争取到成状师代表被告辩护。
陈梦吉：呢层在下一早知嘞。
龙二哥：另外，李鸿章大人话，能够为何欢洗脱罪名嘅就系民族英雄。富贵荣华，指日可待。恭喜！
陈梦吉：哈哈哈——，万一场官司打输咗，唔使罚企吖哗？
龙二哥：噉即系有辱国体，轻则抄家，重则株连九族，冚家富贵。
陈梦吉：噉即系摆我上台啫。
龙二哥：噉你又唔使咁灰气，唔够凳坐啫。
　

（香港监狱，人物：陈梦吉。吕忍。阿欢。）
陈梦吉：点会噉架？（看着欢的头型）点会噉架？？你喺边度剪嘅啫？
阿欢：（表情哀伤）弥敦道九号！
陈梦吉：头嘅嘢你唔系见人哋剪你又发姣发趸走去剪架，要衬架！你睇吓你而家发型完全唔衬你个面型。个面型又唔衬个身型，个身型又撞返晒个发型，系撞到唪唪声呀欢哥！噉你而家究竟想点嘅啫你究竟？
阿欢：（哭泣着抱住陈梦吉的腿）师父！我知错嘞，你唔好再讲嘞，我剪咗呢个头发之后好后悔啊。
陈梦吉：坐返低先！坐返低先！讲返成件事，你由头到尾再讲多次。
阿欢：好！嗰日一个人行弥敦道，行到去九号，噉有个肥婆向我挥手，噉佢同我讲话，斗零剪个头啊，哥哥仔。噉我咪去剪咯。
陈梦吉：所以话好嘢冇平，平嘢冇好，你而家知错未吖？
吕忍：我哋争取时间讲返件案好唔好呀？
阿欢：噉案发当日呢，我如常返香港会所舞北狮啰，舞完北狮去到后台。突然间有人攞个米袋笠住我个头，拥我去后便，噉我咪挣扎咯，挣扎，挣扎，突然之间混乱之中，有人喺后便除咗我条裤咯。
陈梦吉：噉你有冇俾佢——？
阿欢：有啊！
陈梦吉：痛唔痛呀？
阿欢：唔痛。
陈梦吉：爽唔爽呀？
阿欢：唔爽，俾人除咗条裤睇到个箩柚，净系凉一凉噉啰！
陈梦吉：跟住点呢？
阿欢：跟住？跟住我嚟挣扎啰，我一除开个米袋，见到佢攞住支枪对住我啰。
（回忆案发当日经过……何春屈阿欢勾自己老婆，何春俾人喺暗角攞枪射死）
阿欢（反抗）：你想点呀？咸湿佬。你想点呀你？
何春：你勾我老婆，重恶人先告状。
冲入嚟嘅几个人：唔好杀我哋呀！唔好杀我哋呀！
阿欢：唔关我事啊，我唔识开枪架。
……
陈梦吉：噉得嘞，即系话有人匿埋喺暗角开枪打死何春，然之后嫁祸畀阿欢，但系关键系你有冇勾何春个老婆？
阿欢：师父！我连何春个老婆系点样我见都未见过，我点勾佢老婆呀？
吕忍：何春分明系乱噏啦，但系点解佢会俾人擸低呢？
陈梦吉：噉得嘞，关键就喺你个箩柚度。
（阿欢除裤）
陈梦吉：哎？呢个等边三角形系咩嚟？
吕忍：胎记嚟架！
陈梦吉：胎记？
吕忍：哗！阿欢你好热气！几多粒粒。
阿欢：少少噉喇，师母！
吕忍：跌嘢！啊？牌九嚟架！
陈梦吉：欢哥，噉即系算点呀？
阿欢：啊，呢啲叫通柜吖师父！喺度踎监呢新嚟嘅犯人要帮啲红毛鬼吖，印度鬼收埋啲娱乐赌具，跌一只就塞多只架。啊，劳烦师父你可唔可以帮我塞返入去噉呀？
陈梦吉：啊！横掂都系塞咯，我呢就带只鸡髀嚟过你，噉不如摆埋入去！（拿出鸡腿）你见肚饿嘅时候再攞出嚟食啦好吗？
阿欢：都好呀，师父。
陈梦吉：嚟！（将鸡髀啪入去）
阿欢：好，多谢师父！
陈梦吉：客咩气呀？以我同你噉样都重讲啲噉嘅嘢咩？唉！弊嘞，我啪埋去戒指入去里便添。欢哥，方唔方便囤返只戒指出嚟过我呀？呢只鸡髀嚟咋。戒指重喺里便，欢哥。
阿欢：唔系咩？哦！太多嘢嘞。师父呀，劳烦你自己抄一抄呀不如。
 

画外音：因为法庭嘅规例，虽然陈梦吉唔系自愿受洗。但系好欢迎佢信奉天主。（陈梦吉差啲俾浸死，好在龙二哥救佢）
龙二哥：放咗佢。
陈梦吉：哇！头先条女系噉意浸浸，乜啲仔要浸咁耐咖？咦，做乜打交呀？鼻血都流埋。
龙二哥：冇打佢啊。
神棍：唔关佢事，你睇吓。
（前面一排鬼妹，全部个身湿晒，好性感）
陈梦吉：超！鬼妹啫吓哗？我至憎添啊。（自己都流鼻血）
龙二哥（流鼻血）：都还可以喎。
（洪十八同众弟子入狱）
洪十八（教训红毛鬼一餐）：通你娘亲个柜喇。收返自己副牌九。重有啊，收埋我副麻将，麻将台凳全套。
红毛鬼：What?（俾爆打）
阿欢：多谢洪大哥。
洪十八：多咩谢呀？陈梦吉叫到，我实睇住你咖。大力啲耷佢。
　

（香港最高法院：人物：主控官，陈梦吉，吕忍，陪审团，法官……法庭爆棚）
手足：Court!
阿欢：我师父，巴闭。我师父，好犀利。
法官：请大候选陪审团出嚟遴选。张铁生先生，你系残废人士。本席豁免你做陪审员嘅义务。
张铁生：Objection.
法官：你又Obje乜嘢？
张铁生：歧视伤残人士系有违法律精神嘅行为，我张铁生虽然双目失明。但系一直以公正严明明辨是非嘅心处事。做陪审员系我嘅宏愿。如果你唔畀我做，我就投诉你。
法官：好呀。我畀你做。
张铁生：多谢。
（辩方陈梦吉同吕忍）
陈梦吉：又有陪审团，又有法官，九十几人，究竟边个话事架呢吓？
吕忍：系吖！
陈梦吉：你答咗我架嘞吓哗？
吕忍：好呀！
法官：主控官！
主控官：各位陪审员，喺未来呢几天里便，我将会喺你哋面前展露人性最丑恶嘅一面，呢一宗系一宗听后令人毛骨悚然，丧尽天良嘅蓄意谋杀案：被告何欢，同受害人何春嘅妻子颜如玉有染，佢唔单止淫人妻，重处心积虑想完全占有颜如玉，于是约何春出嚟将佢杀害。颜如玉至今下落不明，我哋系有理由相信，亦都同遭被告杀害嘅。我哋深信全能嘅上帝，因为佢系公义嘅，呢一度系法庭，系佢彰显公义同何春申冤嘅地方。
（好多口水喷落陈梦吉身上）
陈梦吉：高手嚟！
法官：辩方！
陈梦吉：法官大人，请准问陪审团几个问题。
法官：咩问题呀？
陈梦吉：相当重要嘅问题！
法官：你问呀！
陈梦吉：陪审团，若然有觉得被告靓仔嘅请举手！（全场冇动静，除咗阿欢自己举手）有觉得被告唔靓仔嘅请举手！（冇动静）有认为被告极度样衰到非常嘅请举手！（全场人全部举手）
陈梦吉：各位，被告样极衰，钱亦极冇，何其甩皮甩骨呢有目共睹嘅，试问有捻本事去勾引一个香港大富家族嘅总经理太太呀又？
主控官：反对！大人。
陈梦吉：大人，我只想证明控方指证被告嘅杀人动机，根本上就离晒大谱！
主控官：大人！辩方嘅比喻先至离晒大谱兼不切实际！
陈梦吉：实际啲吖嗱（手指向陪审团中一位丑样嘅老女人）嗰位姑娘，如果被告想沟你，你受唔受沟？
老女人：梗系唔受啦！（表情严肃）
陈梦吉：畀返一千几百过你吖，顶住半晚先都得啩？
老女人：有冇搞错呀？一千几百咁少呀想沟我，你个死铲！（非常生气，手指向阿欢）
阿欢：喂，大姑！你答问题就答问题啰，你做乜闹人死铲得架你？你而家咩状态呀？你个咩新丝萝卜皮呀？我话你知。你呀，我话你知吖，我何欢喂鱼都……
老女人：你系一个穷心未尽，色心又起嘅杀人犯嚟架。抵你坐监，坐到你死都抵吖。
（两人嗌交嗌到拫晒）
法官：静一静！！！！
陈梦吉：大人，杀人动机已经证明咗冇架嘞，再讲……
主控官：大人！被告靓唔靓仔样唔样衰根本同杀人系冇关系架，况且辩方喺度……
陈梦吉：咪住！
主控官：你咪住先嗱，况且被告……
陈梦吉：听埋我讲先喇，就算真系杀人嗱，都行远啲呀，有咩理由喺自己返工地方冧友呀？
主控官：噉你认为何春系点死咖？
陈梦吉：我点知呀？喂，大家谂谂呀，话唔定系何春垂涎被告嘅箩柚，因奸不遂反而自杀，顺便嫁祸。
法官：陈梦吉！呢度系大英帝国嘅法庭，唔系你哋啲中国地踎衙门，我都唔知你做紧乜？唔识法律，唔该你返去读多啲书，你唔为自己着想，都唔可以丢晒你哋啲中国同胞嘅架！
陈梦吉：疏利！疏利！
（返埋位细细声同吕忍讲）
陈梦吉：开口埋口大英帝国，条友唔记得咗香港借畀佢哋架啫，要还架，大佬！喺我哋个场噉嚟串我，仆佢个街！
吕忍：为咗阿欢一人少句喇！
陈梦吉：噉系吖嘛！疏利！疏利！
法官：传召证人！
证人一：当时我喺厨房洗紧米，听到枪声咪走咗入后栏睇吓。
主控官：你出去见到啲乜嘢？
证人一：见到死者何春佢中咗一枪，周身都系血，瞓咗喺地下，何欢佢重揾支枪指住佢，系噉样笑咗三声：哈哈哈！何春你今次重唔死？
主控官：跟住点呀？
证人一：跟住我好惊，嗌咗出嚟，然后何欢发咗癫噉样追杀我哋！
陈梦吉：反对！证人你讲紧咩呀？你喺差馆落嘅口供唔系噉架？
主控官：我就系想问，点解你要改口供？
法官：反对无效，证人回答问题。
证人一：因为我惊何欢报复，所以当初冇讲全部真相。
主控官：我冇嘢问，到你嘞。
陈梦吉：要求一号证物呈堂！（扐起一柄火枪）证人！呢支枪只能够打一发子弹，你话听到枪声过后，佢重点样追杀你呀？
证人一：佢唔系用枪追杀我。
陈梦吉：用咩呀？
证人一：圆月弯刀！
陈梦吉：（大跳）有冇呀？（呈上圆月弯刀）真系有？
证人二：何欢追杀我，佢用嘅系血滴子，佢一路系噉追我，我好惊好惊！佢一路系噉追我。
证人三：佢用支三节棍扑我个头，系噉扑呀扑，左又扑，右又扑……，系噉扑……
证人四：佢当时用一对鸳鸯柳月刀。
陈梦吉：呢啲所谓证物，我事前从未见过。
主控官：呢啲系新发现！
陈梦吉：杀一个人何须带齐十大武器呀？
主控官：噉更加证明，何欢早有预谋，连无辜嘅市民都想残害，揽住死一镬熟。
何欢：你个口水精咩都你讲晒，你冇好死啊！你生仔冇屎窟呀！
主控官：大人，我要求加控何欢恐吓司法人员，藐视法庭，蓄意伤害我身体同埋喺公众地方掟垃圾四项罪名。（俾只鞋掟中）陈梦吉！
陈梦吉：我冇掟到呀！唔系我掟咖。嗱，你冇乱嚟呀！
一观众：你掟咗我只鞋算点呀？快啲畀返只鞋我呀。
陈梦吉：顶住呀！顶住呀！
（吕忍掟返只鞋畀嗰个人）
（法庭休息）
　

（陈梦吉，阿仁同埋龙二哥夜晚去到案发现场揾线索）
陈梦吉：真系圆月弯刀。真系血滴子。啊！
龙二哥：有妖气！
（突然发现地下猫嘅排泄物）
陈梦吉：咩嚟架？
龙二哥：系猫嘅排泄物。
陈梦吉：（好诧异噉望住龙二哥食猫屎）你饿成噉样样？
龙二哥：可能系重要嘅线索。
陈梦吉：何以见得啊，龙二哥？
龙二哥：就凭我“龙二哥”三个字！
阿仁：呢度好多重要线索，系我踩入嚟架。（除咗只鞋畀龙二哥）
陈梦吉：嗰只鞋有冇呀？
阿仁：（脱下另一只鞋子）好多啊！
陈梦吉：畀埋阿龙二哥喇！线索好重要咖！叫声龙二哥添！
阿仁：龙二哥！
（龙二哥将耳仔贴喺地下）
龙二哥：嘘！听到脚步声，越嚟越远，越嚟越远！
（其实系陈梦吉同阿仁走嘅脚步声）
陈梦吉：夜嘞，龙二哥，收皮啦！
（陈梦吉、阿仁同龙二哥返到住处）
阿仁：又圆月弯刀，又血滴子，成件事一定早有预谋。
陈梦吉：今日嗰个主控官咁窜，系咩料嚟？
龙二哥：猛料！咁啱得咁巧系死者何春嘅老世叫何中。
陈梦吉：噉呢个何中有冇老世呀？
吕忍：有。咪就系佢老窦何西啰。
陈梦吉：何西？
吕忍：行政立法两局首席议员，生意遍布全东南亚，重有西环几条街都属于佢嘅何西。
陈梦吉：西？西？
阿仁：系西吖师父？
陈梦吉：一提起个西字，我就……
阿仁：好兴奋咧，师父？
陈梦吉：冇错。因为我醒起阿欢都有一个西——字嘅玉佩架。话唔定内里有文章添呀。（转身执起笔）呢单嘢分分钟同阿欢嘅孤儿身世有关。吕忍，何西为人如何？
吕忍：信奉天主，正直不阿。
陈梦吉：好，阿仁，速速将呢份嘢交畀何西，务必要佢嚟法庭见见阿欢为止。
阿仁：喂，师父，为乜你画啲咸湿公仔呀？
陈梦吉：兴奋冇？
（龙二哥等候紧差遣）
陈梦吉：龙二哥，呢镬我靠你嘞。
龙二哥：请讲。
陈梦吉：指证阿欢嗰班所谓证人一定系受到人收买同恐吓。家吓我以其人之道还治其人之身。拜托你出去刮返友仔用满清十大酷刑嚟迫佢哋讲出真相。
龙二哥：好桥！你点谂到架？
陈梦吉：系用我脑谂嘅。
龙二哥：放心！包喺我身上。
（龙二哥挞咗喺地下）
龙二哥：冇事！冇事！包喺我身上。放心！包喺我身上。（又跌一次）
吕忍：龙二哥认真唔掂。
　

（第二日，案件继续审理）
陈梦吉：大人，我想传召一位新证人。
主控官：咩证人咁巴闭呀？
陈梦吉：你老窦！
主控官：抗议！你敢用粗口闹我？
法官：你唔好剩系识反对，揾次听人讲得唔得呀？
陈梦吉：传召何西爵士。真系你老窦！
（何西出场）
何西：陈梦吉。
陈梦吉：辛苦晒你呀爵士，请！
陈梦吉：请跟我讲，我谨以挚诚宣誓。爵士，你认识被告何欢嘅咩？
何西：唔识，不过佢好——好似我妾侍阿如花。
陈梦吉：咩呀？你同你妾侍有骨肉架咩？
何西：我有个仔叫做阿念西，不过佢已经死咗嘞。
陈梦吉：点样死法？
何西：呢层唔知。
陈梦吉：点会唔知呢？
何西：噉我哋失散咗成廿年啦嘛。
陈梦吉：噉何故话佢死咗呀又？
何西：嗰日见到佢条尸体。
陈梦吉：冇见廿年，噉都认到系你嘅仔？
何西：我嚟见到条尸体嘅屁股呀。
陈梦吉：屁股？
何西：系吖。个屁股嘅右边有个等边三角形嘅胎记，噉条尸体咪系佢啰。
陈梦吉：爵士，所谓世事冇绝对，有阵讲你都唔信。欢，唔使我教嘞吓哗？重唔除裤？
阿欢：哦！
何西：噉之前嗰个呢？
陈梦吉：前嗰啲斋见屁股，样未见过。胎记嗰啲画上去未定嘅啫。
何西：画上去？噉佢咪系念西？
陈梦吉：今日你哋骨肉重逢，可喜可贺呀！
何西：念西！
陈梦吉：念西！念西！念西！（何西喷血）唔好咁激动！唔好咁激动！人嚟啦！照顾爵士啊！
陈梦吉：大家睇到吖嗱，何爵士亲口承认被告就系佢个仔。呢镬嘢噉样搞法呢，极有可能系一宗阴谋夺产伦理伦常油艇仔陷害大冤案嚟架。
主控官：但系正话证人所讲嘅说话冇响《圣经》面前宣誓，所以唔接纳成为呈堂证供嘅。
陈梦吉：宣誓咗喇。
主控官：佢只手掂住本《圣经》，但未读出誓词啊！
陈梦吉：得得得！再来！（可惜，爵士死咗嘞）大人，虽然发生咗件咁不幸嘅事，但系证人临死前所讲嘅嘢——
主控官：当冇听过。
陈梦吉：傻架你，明明讲咗点当冇听过呀？
法官：对唔住，法律就系法律，一个字都唔能够改动。陈梦吉，我帮唔到你。
陈梦吉：喂，大人，帮到架吓哗？
主控官：学嘢喇陈梦吉。
陈梦吉：老窦死咗你都冇乜反应，真系要跟你学吓嘢呀。
主控官：你重好讲？一日都系你呀！我老窦有心脏病架。如果唔系你揾佢做证人架，佢唔会死，杀人凶手！对唔住，我父亲啱啱过身，我控制唔到自己情绪。我唔得喇。
主控官：做咩呀？
陈梦吉：超！你诈喊？你死呀你？一滴眼泪都冇架。喂大家睇清楚啲呀嗱。干睁睁架。你重唔系有景轰吖嗱？断正畀我呀嗱。讲，做乜诈喊？
主控官：仆街啦你！
法官：控辩双方，请你哋尊重自己身份好唔好？
陈梦吉：咪住，大家听我讲古仔先。从前有个何西爵士，乃系香港名门望族，有一长子曰何中。爵士年纪老迈，长子承继家产乃系理所当然，点知，中途杀出一个油艇仔何欢。哼哼！有人担心家产地位不保，把心一横，派出其头马何春，将油艇仔嚟暗杀，唔知点解呀，暗杀失败，有人即刻将计就计，将何春杀死，再将罪名嫁祸落呢个可怜嘅油艇仔身上。哇！何止心狠手辣，无法无天之尤者也。（主控官一身冷汉）唔知大家对于我呢个假设点睇呢？
主控官：（大笑）哈哈哈！！！
陈梦吉：主控官，你笑咩呀？
主控官：我笑你编呢个古仔无知兼白痴呀！
陈梦吉：咁无知兼白痴嘅嘢你都听到标晒冷汉，都算奇特！
陈梦吉：（加重语气）主控官！！案发当晚你喺边？
主控官：喺屋企。
陈梦吉：喺屋企做咩呀？
主控官：睇书。
陈梦吉：睇咩书？
主控官：《玉蒲团》。
陈梦吉：睇到边度？
主控官：睇到潘金莲同阿……同阿……
陈梦吉：同阿唐三藏吓哗？
主控官：啊！同阿唐三藏……（突然醒起）唐三藏《西游记》嘅，你想跣我？
陈梦吉：咦，叻仔！噉同阿边个得架实在？
主控官：我做咩要答你问题呀？（情绪越嚟越激动）
陈梦吉：咪系？我都唔知你做咩要答我，攞架嚟丢。
主控官：陈梦吉你好咯。
陈梦吉：抹抹汉先吖。（攞出手巾）
陈梦吉：好深眼袋！呢排瞓得唔好定呢？何春晚晚都有嚟问候你咧？
主控官：大人！
陈梦吉：讲埋先啦，嗰晚你究竟喺屋企做咩啫？
主控官：（情绪失控）我咪讲咗畀你听啰！我喺屋企睇《玉蒲团》啊！
陈梦吉：唔系讲杀何春嗰晚嗱，系讲紧杀佢之前嗰晚嗱。
主控官：杀佢之前一晚我去咗……（讲漏嘴）
众人：噢！——
吕忍（兴奋）：Yeah!
阿欢：哼！死未？哈哈！
主控官：大人！我要求结案陈词。
陈梦吉：结你老美！讲埋你杀人之前嗰晚喺度搞咩先吖？
法管：庭警！！！！
（两法警行去主控官面前，谂住带佢走）
法官：唔系佢，系陈梦吉！
陈梦吉：啊！！咩料呀？（大跳一下，四个法警将陈梦吉捉住）
法官：辩方发表咗好多个人意见，都几精彩，不过唔依法律程序……
陈梦吉：喂，唔使跟到咁足吓哗？
法官：你噉即系再三藐视法庭。噉，我冇办法，我唯有依例判你监禁一天，即时执行。
陈梦吉：喂，讲笑咋啩大人？畀吓面好大人？唔系真架吓哗？
吕忍：老公！老公！
（法警将陈梦吉拉走）
陪审员张铁生：法官大人！刚才我哋听到嘅嘢系咪又可以当冇听过呢？
法官：由于刚才证供唔合法律程序，各位陪审员完全绝对要当未听过。陈梦吉由助手吕忍代表，明日结案陈词。
手足：Court!
 

（水莲花嚟监狱揾阿欢）
水莲花：欢哥！
阿欢：水姑娘，点解你会喺度嘅？
水莲花：我系嚟救你走架。
阿欢：好呀！好呀！噉我即刻攞嘢先嗱。
水姑娘：我试吓你人格架咋。我冇睇错，你果然系一个贪生怕死，胆小如鼠嘅懦夫。
阿欢：我系？
水姑娘：你噉样走咗去，成世孭住单官司喺身，瞓唔安，食唔落，唔见得光。永世做一只抬唔起头嘅乌龟。
阿欢：我决定要留低。
水姑娘：抵惜！
（原来系阿欢发梦，揽住另一个犯人）
犯人（一巴打落阿欢度）：贱格！
狱监：何欢，有人探你啊！
阿欢：水姑娘。
水姑娘：你喺边度剪咖？
阿欢：弥敦道九号。唔好讲嘞，我系唔会走架。我唔系一个贪生怕死，胆小如鼠嘅懦夫。噉样走咗去，孭住单官司，食唔安，瞓唔落，唔见得光。永世做一只抬唔起头嘅乌龟。我唔走！
水姑娘：我本身嚟系叫你撑落去，呢单官司系唔可以输架。要保住你师父陈梦吉嘅招牌。而家我先知，你先系真真正正，赤胆忠肝嘅真英雄。我相信你系清白架。我等你！
洪十八：好！讲得好啊！
阿欢：你等我？
（监禁室：吕忍、陈梦吉）
吕忍：你听日五点先放出嚟，噉你结案陈词点算嗱？
陈梦吉：吹我唔涨嘅，佢哋估唔到你都读过法律，听日就由你做结案陈词。
吕忍：老公呀……我……
陈梦吉：阿欢条命交喺你手架嘞。
吕忍：老公啊，你送我去英国读法律，系咪因为你对咗我七年对到闷嗱？
陈梦吉：当然唔系喇，个地球咁大，我能够让你出去见吓世面始终都系好事嚟咖，系唔系？
吕忍：老公！其实我喺英国冇读到法律呀，佢哋唔收我。
陈梦吉：（大惊）噉你喺英国成年做咩嚟？
吕忍：我读咗Fashion Design。
陈梦吉：咩呀？咩呀？咩“嘥”话？
（法警将吕忍赶走）
法警：够钟喇，阿哥。
吕忍：Fashion Design，时装设计吖！噉点算呀老公？
陈梦吉：Fashion Design?
（继续开庭）
手足：Court!
法官：控方，可以结案陈词！
主控官：法律不外乎人情，但系杀人一定要填命。大家试想一下，如果受害嘅系你哋亲人，你哋会点？而家所有法庭所承认嘅证据都显示何欢就系杀死何春嘅真正凶手，我要求各位陪审员判被告何欢罪名成立。
法官：辨方！
吕忍：（走下座位，行到去陪审团面前）我老公当年送我去英国读法律，但我好对佢唔住，我冇读到，读咗时装设计，小女子才疏学浅，所以有样嘢好唔明，究竟系法律程序紧要啲呀定系人命紧要啲呢？法官大人，如果你唔介意我讲出我嘅心声，我认为你其实读咗咁多法律，只不过系读屎片。我老公同我一样未读过法律，但系敢开天眼看凡尘，我以我老公为荣，我爱佢。各位陪审员，我相信你哋唔系傻架，你哋应该识得点样判决，若然你哋真系傻嘅，噉我讲乜嘢都冇用。Thank you very much.
（讲完返埋去座位，陈梦吉就坐喺隔篱）
吕忍：（大惊）你早放咗出嚟嘞？
陈梦吉：系吖！
吕忍：你咪听到晒？
陈梦吉：系吖！
吕忍：得唔得呀？
陈梦吉：全程刚柔并重，智勇双全（扼住吕忍只手）老公甘拜下风！
吕忍：嗯——，你氹我嘅——（撒娇）
陈梦吉：梗唔系喇，你睇（手指向陪审团中一个盲炳）盲嘅都俾你感动得要喊嘞。
陪审员一：大人！如果冇乜嘢，我要求休庭，因为我只眼旧患复发，流浓嘞。
（继续开庭）
法官：陪审团！你哋有结果未？
陪审员一：有结果。
法官：结果是否一致？
陪审员一：结果一致。
法官：陪审团一致裁定，被告何欢，谋杀罪名——成立！依例判处环首之刑。退庭！！
手足：Court!
（阿欢俾押往刑场）
阿欢：等等！（跳咗几下，一只鸡髀落咗喺地下，执起鸡髀畀印度庭警）多谢你照顾咗我咁耐呀，Vamdem。呢只鸡髀请你食呀。
（刑场，准备用刑，陈梦吉等人赶到）
刽子手：Sir!
（长官点头）
（阿仁唏嘘，陈梦吉度紧桥）
阿欢：你杀死我一个何欢，重有千千万万个何欢！
刽子手：Sir!
阿仁（阿仁走嚟胁持长官）：唔好逼我啊！捻死佢啊！
陈梦吉：咪住，大人，请问何欢判嘅系咩刑？
法官：依例判处环首之刑。
陈梦吉：噉得嘞，阿仁！放返佢落嚟！
（主控官扑埋嚟）
主控官：你又点呀？
陈梦吉：佢判嘅系环首“之”刑，并唔系环首“死”刑，家吓“首”已经环咗嘞，重唔放人等几时呀？
主控官：你捉字虱！
陈梦吉：大人！法律就系法律，一字一符号皆不能改动嘅，呢镬我都帮你唔到呀。
主控官：大人！
法官：哎！……
陈梦吉：嗱，你谂清楚至好讲呀！唔系丢晒你大英帝国嘅架不得止，我再告你谋杀咖。
法官：我谂都要开吓会先嗱！
陈梦吉：好！做嘢。
（主控官冲到刑场，紧急情况之下，一个印度人救咗阿欢）
主控官：一个二个黐线架。（阿欢俾吊起，阿仁越帮越忙。阿欢死得重快啲）
龙二哥：系时候我出手嘞。（龙二哥都唔好得去边，把刀插中阿欢手臂）
（法庭内）法官：法庭最后决议，刑罚已经执行，何欢可以重获自由。（一片欢呼）
阿欢：好啊！……（两法警走去主控官面前）法警：何中！而家要拘捕你，告你意图谋杀。
（阿欢走去水莲花面前）
水莲花：欢哥！
阿欢：莲妹！（唱歌）心肝宝贝，你突然再眼前，我急促气喘，动情为你…… 
 

（一年后）
摄影师：慢慢嚟啊喂，睇紧位。准备好嘞喂！得未呀？
吕忍：一世人影一次婚纱相，梗系要精雕细琢啲啦呵老公？陈梦吉：讲到精雕细琢你睇我就知嘞。
吕忍：系吖，系吖。
陈梦吉：再琢细啲添啦。
吕忍：好呀！好呀！
一女徒：师父！欢哥嚟咗喇。
阿欢：师父！师奶！
陈梦吉：欢哥！
阿欢：吉哥！
吕忍：阿水姑娘呢？
阿欢：我送咗佢去英国读书呀。
陈梦吉：读咩书呀？
阿欢：读嗰啲英国文学。
陈梦吉：哦！即系“莎士髀罅”嗰啲呀？
阿欢：啊！师父果然好嘢，髀罅你都识。
陈梦吉：髀罅啱佢读。
阿欢：好嘢！英国啲髀罅。
陈梦吉：髀罅你问我吖。
（影相）
陈梦吉：欢哥！
阿欢：师父！
陈梦吉：见你今日嘅发型能够衬返晒个面型。成个人鬼火咁靓噉样，我都觉得好安慰。
阿欢：嗨，师父，今日见你再成家立室，影个靓相，着得咁靓，我重安慰。
陈梦吉：咦，噉讲就你安慰啲。
阿欢：冇，你安慰啲。
陈梦吉：你安慰啲。
阿欢：哎！你安慰啲。
陈梦吉：畀吓面嗱。
阿欢：唔好同我争。唔好同我争。你安慰啲。
摄影师：嚟得喇！望住镜头。大家集中精神望住，嚟得。
阿欢：弥敦道九号？
陈梦吉：啊！衰仔原来咁靓仔。
阿欢：靓仔大晒咩？
摄影师：唔怕话你知，靓仔真系大晒嘅。吹咩？
（剧终）