據講，香港仔原本叫香港，自從明朝嘉靖年間（1522年至1567年），呢個細港灣就以轉運東莞運嚟嘅香木馳名，因為咁樣而得到呢個名。嗰陣時，東莞嘅香木首先經陸路運去尖沙咀（舊時叫香埗頭），然後用船仔載嚟香港仔，改用體積大啲嘅槽船運去廣州，再轉運去江蘇、浙江嗰帶。

香港開埠前後，英國商人同海軍多數喺港島南邊登陸，再請當地嘅蜑民（沿海港灣同內河船居居民）帶佢哋去港島北邊嘅中、上環嗰帶。據講，佢哋將香港村呢個名，當錯咗係成個島個名。所以香港嘅英文譯音 Hong Kong，係照蜑民所講嘅口音拼成嘅。