|
愛情
白雪公主，幾咁純潔無瑕。但係諗眞啲，白雪公主，識得嗰個係王子，灰姑娘識嗰個又係王子；有個有特殊嗜好，鍾意惜青蛙嘅女人惜咗隻青蛙一啖，隻青蛙變出嚟嘅又係王子！有冇人諗過根本個王子係同一個人呢？根本呢個王子都不知幾花心，周圍溝女，重無良到扮青蛙去溝添！
情竇未開
我第一次戀愛之前，我認爲自己就係楊過，而我同書裏面個楊過唯一唔同嘅地方，就係佢有隻大鵰。而我嗰陣，就鍾意撚呢個相思同畫眉多啲。同楊過一樣，我從來冇諗過要考第一。
我祇需要愛情，祇要搵到我嘅小龍女，我就可以拋棄學業，退隱山林，搬入新界住。但係我一定要住西班牙別墅，我唔住得邨屋，我怕蛇蟲鼠蟻。然後每個月至多出一次市區，不過我唔會逗留得耐，問亞媽攞完零用錢我就會入番入去。
冇錯，基本上，我由中一至中五都係喺呢種咁超然嘅思想下度過。嗰陣時學校最流行嘅辯論題目係：“中學生應否談戀愛？”我認爲，我哋應該辯論嘅係“中學生應否讀書？”
而喺我第一次戀愛之前，我嘅小龍女祇需要一個條件，就係靚，我知我咁樣諗好膚淺，但係嗰陣時我重細，唔知道原來身材都好重要㗎。
性
聖人話:“食色性也！”食同色，好唔同！一個人無論幾鍾意食，會唔會畀幾十文入戲院睇套《蒸氣騰騰小龍包》？一個人無論幾鍾意食，又會唔會爲咗望一嚿冇包住嘅牛肉望到畀車撞？
愛情
戀愛唔係PART-TIME，你唔可以話：“愛！做完咪走囉！”戀愛係一盤生意，你要二十四小時諗住佢。自己生意，冇所謂PART-TIME正職。人哋放假或者過年過節，你更加要開OT添。行花市啦行海邊啦睇戲食飯啦……
你有乜嘢競爭對手呢？我冇競爭對手！？你估你係專利巴士公司啊？港巴都執咗啦！有冇考慮結婚？噉就要向公眾交代，噉就即係上市啦！所以，“中學生應否談戀愛”唔係問題，問題係“人類應否有兩份全職工作？”
你再拍拖，需要知會你老闆：“老細，我出面搵咗份戀愛，我眞係好需要呢份戀愛，不過公司啲嘢我會照做，我兼顧到㗎。”然後你老闆會話：“噉你不如搵多份戀愛，咪直情唔使返呢份工囉！”
新鮮
依家啲人溝女，對條女最大嘅要求係乜啊？唔係靚，最緊要，係夠新鮮！
乜嘢叫做夠新鮮啊？就係話，溝咗一年嗰個，就唔夠溝咗半年嗰個咁正。因爲半年嗰個新相識，新鮮啲。同樣，溝咗半年嗰個，就唔夠三個月咁正。溝咗一個月就唔夠半個月嗰個咁正。溝咗一日就唔夠半日嗰個正，如此類推，終於……溝咗嗰件，就唔夠未溝嗰件咁正！
噉即係點呢？重溝唔溝好呢？一溝就唔正？！
女人偉大
黃：喺愛情之中，女人最偉大！
男人嘅犧牲，就爲咗追求美麗；而女人嘅犧牲，就祇係得到一個麻甩佬！而最偉大嘅係佢哋根本唔覺得係犧牲。
如果你話畀一個女人聽：“喂，你男朋友有口臭！”
張：車，人梗有局部缺點嘅！
黃：佢重有臭狐同香港腳喎！
張：噉佢咪好平均咯！
黃：佢啲鼻鼾聲唔使較咪啊！
張：我男朋友一定係夢見我，我開心。
黃：佢屙尿亂咁啡！
張：好壯啊！
黃：佢啡完唔洗手！
張：邊有男人洗手㗎！
黃：我有！
張：乸型！
黃：佢重講粗口啊！
張：但係佢心地好！
黃：佢喺電梯度食煙喎！
張：公眾場合都唔畀食咯，佢咪呢埋一邊食囉，你哋重想點啊！你係咪想逼死佢？！係咪想逼死佢？！嗚～～～
責任何在
如果你話我聽，因爲我唔靚仔，所以唔可以做戲，你唔應該話我聽！因爲唔關我事，我唔應該負呢個責任，你應該同我父母講，係佢哋搞成我噉嘅。如果你要罰，應該罰佢哋。以後，邊個丑樣，就罰佢爸爸媽媽唔准做戲！或者剩係做茄呢啡！
我唔係一個唔負責任嘅人，爲我爸爸媽媽嗰短短一剎嘅快感，我已經負責負咗廿幾年。你估做我好易做啊？
我細個讀書唔好，或者唔合格，我冇要父母負責。我自己簽晒啲成績表嘅。
每當我爸爸媽媽有爭執鬧交嘅時候，我有冇叫佢哋爲咗我嘅童年着想，忍下對方？冇！我叫佢哋出街鬧！
我大個咗，唔知應該信邊個宗教，唔知做人爲乜，唔知人生事業嘅方向都冇要求父母照顧我。
反而係我調番轉頭，提醒佢哋：你哋要搵錢啊，積穀防飢啊，唔係第日老來無依無靠啊！
……
乜嘢都係我！
男仔唔使靚仔
靚仔係唔係眞係咁重要啊？有啲人話男人唔使靚仔嘅，有才華咪得囉。
係，你有冇試過帶你嘅才華去落DISCO識女仔啊？人哋啲靚仔一行入去，唔使二十分鐘，就已經同啲女仔互相問問題：“你度定我度？”
我帶住我嘅才華入到去，幾艱難先搵到個女仔肯畀個機會我。唔係畀機會我交換問題，而係畀機會我天才表演。
唱歌跳舞做話劇講大話功夫表演，成套歡樂今宵一個人做一次……
演戲天份
我從小就知道，我係一個偉大嘅演員。
人哋細個成班細路群埋，鍾意玩扮結婚，扮爸爸媽媽。我細個，就鍾意扮姦夫淫婦。
但係唔知係咪我個樣比較老實，我係從來都冇機會扮姦夫。每次我都係扮淫婦……嘅老公。
雖然係噉，雖然，我亦都係成班人之中最細嗰個。但係我已經可以將一個妒忌嘅男人心態表現得淋漓盡至。
當然，我啲朋友個個都讚我，話我天生出嚟，就係戴綠帽嘅。
死亡
細個嗰陣，我係唔怕死嘅。
我覺得，係以前啲人先會死嘅。係歷史書裏面嘅人至會死。好多人唔明歷史有乜用，歷史咪話你聽邊啲人死咗囉。
我從來未睇過一本歷史書有提到黃子華呢個名，我點會死啊。最緊要係，就算死都唔係乜嘢一回事。
細個嗰陣隔籬陳師奶成日叫佢老公：“咁多人去死你重唔去死？”
然後去完番嚟，阿陳師奶又會話：“死番嚟喇？唔死多陣添？”
所以我一路都認爲，去死，即係去街，同埋一定唔會去好遠。因爲阿陳生每次都好快就返嚟嘅。
賭馬
喂，賭馬係需要付出好多㗎。
朝早要睇晨操夜晚要睇董驃，又要同朋友交換讀書報告。
你估我哋睇得書少？市面幾多馬經啊？
重唔係話你睇得多就得㗎喎！
香港啲馬經，一埸十隻馬，十隻馬都有人貼，你自己思想唔夠獨立，噉你就死梗喇：唔該，呢場每隻幫我落100文啊！希望中啦！
夏天嚟喇，唞暑啦，你估係畀啲馬休息咩？係畀我哋休息啊！
泳池
黃：去公眾泳池嗰啲唔係叫做游水，嗰啲叫做浸水。因爲喺公眾泳池游，祇可以用一種泳式，就係彈式，同一個位，彈下彈下。
張：如果係高手可以用自由式，但係要潛落水底嗰度用。
黃：點解香港啲泳池咁鬼逼嘅呢？
張：唔好問啊，趁人多你好快啲浸下。等陣所有人上晒水嗰陣，你就會發覺，個池啲水原來到膝頭哥㗎咋！你去浸腳指啦，下次。
黃：其實我哋香港人都習慣咗人多，去浸下水都好。但係可惜嘅係，呢啲水，唔係一般水，呢啲係暖水！你成日喺泳池度，你會發覺有啲人，全身唔喐，眼碌碌。
張：哦！你喺泳池屙尿，咁冇公德心！由細到大我老豆都教我㗎啦，急尿，去隔籬池吖嘛！
黃：所以我喺度，趁呢個機會，同你啲僆仔講啊！游游吓小童池就走過嚟大人池，擒喺個池邊，唔好話我聽係學游水啊！
張：特別係擒正喺噴水口嗰啲啊！想毀屍滅跡啊！
改名
改名，祇係啲父母將自己嘅主觀意願套喺啲仔女身上。所以大部份女仔唔係叫美乜就係麗乜。男仔唔係叫亞堅，就係亞強，一唔係就叫亞祥。噉我哋係咪好美麗，好堅好強好長呢？
黑白不明
我非常欣賞鄧小平嘅“黑貓白貓，捉到老鼠就是好貓。”我老友亞雄個老婆生仔，生咗個黑人出嚟，我都係噉對佢講：“黑仔，白仔，快高長大就係好仔！”
鬧人
以前我哋笑人，會話：“你有得發達？太陽由西邊出嚟啊！”依家我哋就會話：“你有得發達？建築面積等於實用面積啊！”
又或者話人醜，現在我哋都會技巧好多：“你唔醜，你點算醜啊，你係塊面唔多實用噉解嘛。你嘅鼻臺太大，啲眼耳口鼻咪唔見使囉。”
失戀
失戀係會令人成長嘅。我失戀之前，一向都覺得世界上所有問題都有答案。
點解我哋每日都要8點鐘起身返工啊？因爲夠鐘囉！
點解我哋有夠鐘呢樣嘢啊？因爲我哋唔用浮動上班時間囉。
點解呢個世界有戰爭？因爲我哋有武器囉。
噉點解我哋要有武器啊？因爲佢哋有武器囉。
一切都有答案，直到我失戀。
亞珍，點解你唔愛我？亞珍畀咗一個經典嘅答覆我，佢話：“愛情係冇點解㗎，係唔可以解釋㗎，唔好問啦。”（記緊呢句啦）
如果番學亞SIR問我嘢都可以噉答就好啦！“黃子華，物體燃燒點解需要氧氣啊？”
“亞SIR，係冇點解㗎，係唔可以解釋㗎，唔好問我啦！”
隆胸
葉子楣簡直爲演藝界創下新標準。
以後啲女仔想做明星，又唔使睇樣，又唔使睇演技，去磅啦！！！（加強語氣）得，入去磅一磅就得啦。“開嚟，六斤半，片酬係六千五文一日，小姐做唔做？”“開嚟，八斤有疤痕，八千減一千疤痕費，即係7千文一日。”
你話幾客觀呢！
放假
黃：一般人都會好珍惜每年一度嘅年假！
張：今年我要去夏威夷游吓水。
黃：如果你決定去夏威夷，你就要預咗付出沉重代價！前四後六！
張：我講緊係年假，唔係產假啊，子華！（眞係啊……）
黃：前四後六嘅意思係，喺你放假之前嗰四個禮拜，同你放假之後六個禮拜，都要做到仆街！（死未）因爲無論你放幾耐假，你嘅嘢始終係你做番。
張：係你嘅始終係你嘅！
黃：唔單止，放完假，唔係你嘅都會變成係你嘅！
金撈
點解要帶金撈？唔帶撈，有乜資格同人講，時間係寶貴？我嘅時間點値錢呀？（你話係唔係先）
嗱，支時針圍住行一個圈，12個鐘，十幾皮嘢，即係爲皮幾嘢一個鐘。你一個鐘値幾錢啊？
幾舊水？我點同你一齊食飯啊，大家時間觀念咁唔同！
唔單止噉，你帶撈，表示你個人有幽默感。勞力士，有邊個靠勞力搵食嘅人帶得起勞力士啊？越帶勞力士嘅人就越表示佢唔使用勞力！呢啲，就叫做幽默感啦。
女愛情觀
女仔對愛同鍾意有好大嘅分別，如果個女仔知道個男仔鍾意佢呢，佢都會同佢去吓街，睇吓戲，食吓飯，但想做進一步嘅嘢就唔得啦。
而女仔知道個男仔愛佢嘅時候係絕對可以付出更多。喺女仔心目中，鍾意等於“幫襯”。
但愛喺女仔心目中等於“收購”，收購包括“注資”，然後“合並”……（係呀，係呀！）
所以女仔要男仔將佢嘅愛注資落嚟，戶口注資落嚟，最重要嘅係錢注資落嚟。
然後去買Joyce啦，Panda啦，Gueeo啦，買到一身都係，等佢認爲可以鞏固佢自己嘅價値，但佢哋係絕對冇得到男方嘅同意㗎！
嗱！我而家同你哋講啊，你哋嘅黑箱作業，好容易破壞男方嘅經濟㗎！（你哋都好有共鳴啦）
男愛情觀
男仔對愛就好隨便，愛同鍾意都冇分別，祇要佢知道你鍾意佢，即刻可以帶你返屋企，或者去你屋企。
係唔係男仔心中冇愛呢？我覺得又唔係喎。係佢哋比其他人更清楚愛嘅定義。愛係乜呢？根據耶蘇嘅講法係：“愛係恆久忍耐又有恩賜，愛係不張狂，不大喚，不作害羞的事，忘記別人的錯。”
你話啦作爲小小男人嘅我哋又點可以隨隨便便同你講聲愛啊！
所以以後有人同你講愛，一就係佢講大話（加強語氣），二就係有個耶蘇喺你面前啊。
但耶穌主張愛人如己任，博愛㗎！
自重
當乜嘢人都唔搵我做嘢，我就知道，我係一個偉大嘅藝術家，在生嘅時候係唔會獲得應得嘅尊重。唔止噉，我重偉大過偉大嘅藝術家，因爲我知道，我死後都唔會受到尊重。
紅館
依家做歌星，好犀利，因爲有紅磡體育館。因爲呢樣嘢，做歌星，可以喺一晚，就賺晒你哋朝九晚五一世人都搵唔到嘅錢啦！
啲人話：“我眞係唔明張國榮點解要退休。”點解？佢一晚已經搵咗你一世搵嘅嘢，佢一晚已經做咗你一世人要做嘅嘢，重有乜嘢可以做啊？唔退休做乜？做五場，已經輪迴五次！做三十場，輪迴三十次，如來佛祖都話：使唔使？
啲人話，唔係嘅，佢唔捨得退休嘅！佢最後嗰場演唱會，佢自己都喊㗎。佢係喊，不過唔係爲自己喊，係爲咗你哋喊啊：“我就退休啦，我聽日就唔使DO啦，你哋聽日重要返九點，唔好遲到啊！！”
迷惘
喺公司，老闆會同我講：“你返嚟唔係瞓就係去廁所，你當呢度係屋企啊，呢度係公司啊。”
我返到屋企，亞媽又會話：“你重當呢度係你屋企咩，你返嚟唔係霸住個廁所就剩係識瞓！”
噉……噉我番屋企又唔瞓覺又唔去廁所，返公司又唔去廁所唔瞓，噉我呢啲嘢去邊度做啊？
不過後嚟我諗過自己又係過份啲嘅，於是我就痛改前非。以後返屋企我就剩係瞓覺，返公司就剩係去廁所。
老豆
我一向以爲老豆，係option嚟嘅，附加㗎咋。
冇錯，大部份人係有老豆嘅，就正等於大部份嘅車係有收音機一樣。但係嗰樣係option嚟咋嘛，唔係架架車都有。所以我細個嗰陣好憎啲僆仔成日喺我面前話：“我老豆點點點……”
我覺得嗰啲人好晒命，就好似你有部車，不停噉同人講：“我部車開蓬嘎，大包圍嘎！”你不如話：“你老豆開蓬嘎，用無鉛汽油㗎……”
十八歲
點解十八歲先至係合法年齡呢？因爲到咗十八歲，喺法律上我哋就要對自己負責任
多餘，唔通十八歲之前，我哋就唔使對自己負責咩？唔通十八歲之前，我就可以隨時撲出馬路：“我唔信啊，我17歲半咋，你敢撞死我？”
唔通十八歲之前，我喺油麻地踩完個紋身佬一腳，個紋身佬會話：“死僆仔，你未夠十八歲，我忍你！”
唉，十八歲嘅最大好處，就係你到咗一個合法嘅做愛年齡。我想請問，有邊個做愛係因爲合法先做㗎？我認爲大部份人做愛係爲咗快感同高潮。抑或你想話我聽，十八歲之前做愛係冇高潮嘅，十八歲之前做愛係白做嘅！噉樣十八歲就具有特別意義喇！
拜年
呢幾年，拜年嘅賀詞之中，最流行係邊句？祝你——不勞而獲。（唔係啩？）
恭喜人哋發財當然好，但係發財，都要有方法。有邊一個方法，好得過不勞而獲？（係咪）
不勞而獲嘅方法就係唔使方法，唔使方法就係最好嘅方法。我哋想發財，已經想到到咗一個禪嘅景界！
不勞而獲既然可以成爲新年賀詞，我期待喺未來幾年，我哋話人蛇鼠一窩，即係讚佢合群，話人非奸即盜，即係話佢勇敢！
嘩，眞羨慕你呢個家庭，眞係蛇鼠一窩非奸即盜。梗係，唔係我哋點會冚家富貴！
兒童教育
我一向都認爲，我哋成日呃啲細路仔，讕係nice噉對佢哋，講到呢個世界乜嘢都好好噉，噉係唔啱嘅。（何解？）
細個我同媽媽搭飛機，睇見廁所嘅水係藍色，我未見過，咪走去問媽媽嗰啲係乜？媽媽話：“係天空。”所以我就成爲世界上第一個食過天空嘅人。
細個啲大人成日講童話講白雪公主。（你都聽過啦）佢哋講嘅就係白雪公主又靚又好人，好値得去追求。
但係冇講到我哋唔係白馬王子！邊個人至係白馬王子啊？起碼有隻白馬啦。噉就即係馬主啦，你話係唔係啊？
講啲唔講啲好危險㗎。即係等如你同個細路仔講：“小明啊，飛出窗口好過癮嘅，成個香港望晒㗎，浮吓浮吓……”但係唔同佢講：“不過你落到地下個陣，會快過搭電梯好多！”
用家炒家
好多人結婚，最初就以爲自己係婚姻嘅用家。後來先發覺自己係感情嘅炒家，於是想離婚。但係離婚又要攪幾年，睇住周街都係新盤靚盤，自己個盤又放唔出，幾難受！
扒
如果你係一件豬扒，噉你基本上係唔使減肥咯～一件豬扒，減咗肥，就係一件瘦扒，一件瘦扒就係比豬扒更唔開胃嘅扒，係咪？你買叉都唔要嗰啲啦。
|
