對於懶音呢個問題，我喺之前嘅一啲課堂(Lesson)入面都提及過。但我覺得對於呢類問題，其實好好有必要搬出嚟正式提一提。
    當代人(尤其係年輕一代)講話嘅時候懶音特別重，香港地區尤爲嚴重。
    相信好多人都未注意到懶音嘅現象。首先講講懶音係乜。懶音主要分爲三種情況：第一，將gw聲母嘅字講成g聲母。例如「廣gwong2」就講成「講gong2」；「國gwok8」講成「各gok8」等。第二，將ng聲母嘅字講成零聲即。例如「牛ngau4」就講成「au4」；「偶ngau5」就講成「au5」等。第三，l、n聲母不分。例如「呢ni1度」就講成「哩li1度」；「過gwo3年nin4」就講成「個go1連lin4」。除咗主要嘅三種懶音現象之外，重有其它次要嘅懶音現象，例如「永恆hang4」講成「永痕han4」。都唔知係咪佢個身成日都痕癢，所以叫「永痕」；「佢keoy5哋」又講成「heoy5哋」等。(更詳細介紹請睇「好嘢嚟贈慶01」)
    我身爲一個粵語研究者聽到呢類懶音當然係覺得好難頂，話佢哋，佢哋會講「聽得明咪算囉！」眞係被佢哋吹脹。通常聽到呢類回答嘅時候，我都有一種「打佢一鑊」嘅衝動。
    總之，對於懶音現象我哋必須要重視，尤其係香港傳媒方面(包括歌星影星)，因爲香港對廣東省嘅影響力可以講係最大，內地廣東人多數鍾意睇香港電視節目而唔睇本地節目，原因好簡單——香港節目較爲精彩。但係而家好多明星都成日懶音脫口而出，唔好話我唱衰邊個歌手，大家可以聽聽蕭正楠、MP4、郭富城、余文樂、Twins等專訪對白，幾乎每句都有懶音存在。而年輕人又得唔到長輩嘅指導，面對偶像有樣學樣。事問我哋如果唔正視懶音問題，我哋嘅語言會唔會被年輕人嘅呢一代糟蹋？

特別推介相關文章「當今粵語懶音現象大觀」

以上內容純屬作者個人觀點，與本網立場無關